WILLEMSTAD – RBI ta bek! Despues di un ousensia di dos aña i despues di finalisá tur e trámitenan ofisial ku Major League Baseball (MLB) por bisa ku e hóbennan ku ta práktika baseball di 13 pa 18 aña lo ta e gran ganadornan. Tur esaki no tabata posibel sin e konfiansa di e spònsernan. Maduro & Curiel’s Bank un biaha mas ta pone su sosten tras di RBI komo e spònser prinsipal. Refineria Isla tambe a demonstrá un biaha mas di ta sigui kere den nos hubentut, deporte i baseball en partikular. Tantu MCB komo Refineria Isla tabata instrumental pa pone RBI 2015 bek riba pia.
MLB
E proseso pa lanta RBI bek a inisiá komo seis luna pasa na momentu ku MLB a manda un delegashon Kòrsou pa sondia e posibilidat pa bolbe aktivá e liga aki. MLB tabata asina serio den nan intenshonnan ku asta a bin ku e representante di RBI Venezuela pa wak si por laga Kòrsou bai kai bou di nos pais bisiña. Sin duda esaki a demonstrá e balor ku MLB tin den Kòrsou pero tambe ku e promé dos temporadanan di RBI na 2011 i 2012 tabata eksitoso bou di e grupo di Chairon Isenia pero lamentablemente no a kontinuá na 2013 i 2014.
CBDF
Hustamente e fundashon nobo, Curaçao Baseball Development Foundation (CBDF) tabata den e proseso pa keda funda, Hensley Meulens i Ben Thijssen komo konsehero a usa nan kontaktonan di MLB pa evitá ku RBI ta bai kai den man di un grupo ekstranhero. Esei a resultá eksitoso na momentu ku MLB a otorgá CBDF e derechi pa organisá RBI.
Union ta hasi forsa
Na momentunan ei a bin realisá ku tabatin tres grupo interesá pa organisá un torneo di baseball pa e hóbennan di e grupo di edat aki. Enbes di a bai bringa otro, a uni forsa. CBDF a aserka Fundashon pa Nan ku e petishon pa organisá RBI 2015 ya ku e grupo aki konsistiendo di Dennis Dambruck, Ardnel Barbolina i Elger Jacobus tabatin amplio eksperensia organisando kampionatonan di Liga Pariba den pasado. Na 2013 tabata Coach Reggie ku a bin ku e idea pa organisá un torneo kòrtiku pa yena e bashí ku RBI a laga e aña ei. Pa tal motibu durante kampionato di MCB RBI 2015 lo bai organisá un Wega di Tur Strea ku lo karga e nòmber di Coach Reggie All Star Game. Durante e kampionato di RBI, MLB lo tene su showcase anual ku lo ta na enkargo di Dutch Caribbean Baseball Academy ku ya tin dos aña ku tarea aki. E showcase aki lo tuma lugá djaweps 26 di novèmber i Coach Reggie All Star Game (Junior League) lo tuma lugá djabièrnè 27 di novèmber próksimo.
Komishon di 6
A instalá un komishon di seis persona pa hasi tur e preparashonnan pa MCB-RBI 2015. E komishon ta konsistí di e tres personanan ya menshoná di Fundashon pa Nan huntu ku tres miembro di CBDF, Ben Thijssen, Andy Nicolaas i Romulo Irausquin ku a kaba di forma e grupo. Ku e plan den man a aserka na promé lugá MCB i e gerente, Sr. Michael de Sola mesora a duna sosten na e proyekto aki i asina a bira e spònser prinsipal di MCB-RBI 2015. Meskos tabata e kaso na momentu ku e Komishon a aserka Sr. Kenneth Gijsbertha di Refineria Isla ku a bai diakuerdo pa forma parti di RBI komo spònser tambe.
Sosten di organisashonnan
No tin duda tambe ku e aktornan prinsipal den henter e aspekto aki di RBI ta e organisashonnan, dirigentenan, kuerpo tékniko i e propio hungadónan. Sin nan no tin kampionato. Pa tal motibu luna pasa e Komishon di RBI a sinta huntu ku e diferente organisashonnan i a risibí sosten di nan pa por hunga RBI 2015. Un total di 11 organisashon di Little League/Hubenil lo partisipá na e kampionato di MCB-RBI 2015. Kada organisashon lo risibí nan unifòrm nobo ku nòmber di e ekipo di Liga Grandi ku nan a skohe pa hunga kuné.
Dos divishon i afiliashon di MLB
Lo bai tin dos divishon konsistiendo di ocho ekipo kada unu. Den divishon Junior (13 pa 15 aña) lo partisipá Brievengat (Orioles), Jandoret (Braves), Marchena (Reds), Montaña Abou (Rangers), Sta. Maria (Pirates), Sta. Rosa (Indians), Trai Seru (Dodgers) i Van Engelen (Giants). Den Senior e ekiponan partisipante lo ta Brievengat (Orioles), Kwartier (Athletics), Marchena (Reds), Buenavista (Nationals), Montaña Ariba (Yankees), Sta. Maria (Pirates), Sta. Rosa (Indians), Trai Seru (Dodgers). E divishon di Senior ta pendiente terminashon di temporada Hubenil (Febeko) pa por kuminsá hunga RBI.
Donashon
E organisashonnan partisipante na MCB RBI 2015 a risibí un kaha ku 10 dozein di ‘practice ball’ kortesia di Curacao Baseball Week. E balanan aki ta adekuá pa train kuné riba e superfisie riba kua mayoria organisashon ta train tur dia. E organisashon di Curacao Baseball Week tambe a brinda e oportunidat pa RBI lusi den e siman ei. Riba e anochi final, djabièrnè 4 di òktober 2015 komo antesala na e homerun derby i e wega di softball di e profeshonalnan, lo tin e Wega di Tur strea di RBI Senior League.
Otro donashon ta esun via di Fundashon pa Nan, ku ta organisá un kurso di kapasitashon di tur coach i ademas a opsekiá tur organisashon material di baseball tambe.
Inovashon
MCB RBI 2015 ta trese un inovashon tambe den mundu di baseball aki na Kòrsou. Pa promé biaha tur wega di un torneo ofisial lo keda di skor via e sistema digital di Gamechanger. Esaki lo sosodé riba un Ipad i despues di a sigui kurso di esaki por bisa ku scorernan ta hopi entusiasmá ku e inovashon aki. Ku e sistema aki un i tur por sigui RBI Curacao i nan ekipo faborito for di unda ku nan ta. Un mayor ku mester traha i no por yega vèlt por sigui e wega via su telefon.
Ademas di e inovashon aki tambe RBI Curacao tin su propio website, www.rbicuracao.com i tambe ta riba Facebook. Ei por haña skema di wega i otro informashonnan relevante.
Den e fin di siman tras di lomba a tuma lugá dos wega i tabata un bon oportunidat pa hasi uso di e métodonan nobo i esaki a traha masha bon mes. Pa loke ta e weganan mes, den e promé wega Van Engelen Giants a gana di Brievengat Orioles ku skor di 7-1 i den e di dos wega Van Engelen Giants a gana ku e mesun skor di Jandoret Braves.
