Den preparashon pa su regreso despues di a pèrdè temporada 2014 pa motibu di un suspenshon, Alex Rodriguez ta entrenando huntu ku èks-pelotero Barry Bonds. Segun informashonnan, Alex a keda mira huntu Bonds entrenando na un fasilidat di beisbòl yama Future Prospects. A-Rod, ku lo kumpli 40 aña na yüli próksimo, a bisa siman pasa ku e ta antisipá ku e lo gana e trabou na tersera base e temporada benidero.
Kedando ku New York Yankees, e pelotero Kubano di 19 aña Yoan Moncada tabata tin un seshon di entrenamentu priva pa e ekipo di Yankees. Scoutnan ta kompará Moncada ku otro peloteronan Kubano manera Jorge Soler i Yasiel Puig. Mas aleu nan ta bisa ku ofensivamente e pelotero ta hopi bon i nan ta kere ku e lo ta un futuro segunda of tersera base. San Francisco Giants i Boston Red Sox ta dos otro ekipo ku tambe ta den kontienda pa e pelotero aki.
Tin informashonnan ku e ekipo di Atlanta Braves ta buskando outfielder, agente liber Jonny Gomes. Pa temporada 2015 e ekipo ta proyektá un outfield ku Zoilo Almonte den left field, B.J. Upton den center field i Nick Markakis den right. Jonny Gomes lo kompartí tempu ku Almonte den left. Gomes a pasa temporada pasa ku Boston Red Sox i Oakland Athletics logrando un promedio kombiná di .234.
Robinson Cano a hunga su ultimo partido ayera ku Estrellas Orientales den e Liga di Beisbòl Invernal Dominikano. E pelotero a risibí permit di Seattle Mariners pa hunga un kantidat limitá di partido. Pa ta mas eksakto e ekipo di Seattle a duna e pelotero permit pa hunga den sinku partido. Den e partido di ayera Cano a bai di 3-1 i finalisando ku un promedio di .500.
E ekipo di San Francisco Giants a anunsiá ku nan a yega na un akuerdo ku e outfielder agente liber, Nori Aoki. Segun informashonnan ta trata di un kontrakt di un aña garantisá pa 4 mion dòler ku opshon pa temporada 2016 na un balor di 5,5 mion dòler. Aoki temporada pasa ku e ekipo di Kansas City Royals tabata tin un promedio di .285 ku 63 kareda anotá i 17 base roba.
E ekipo di Milwaukee Brewers i Texas Rangers a yega na un akuerdo pa manda picher Yovani Gallardo Texas. Den e kambio Texas a manda infielder, Luis Sardinas i pichernan Corey Knebel i Marcos Diplan. Segun fuentenan, den e negosiashonnan e nòmber di Jurickson Profar a subi mesa, pero nada no a bin for di esaki. Mas aleu, e pelotero Luis Sardinas ku a keda manda Milwaukee tambe ta un shortstop i a keda firma pa Texas Rangers mesun dia ku Jurickson Profar, esta 2 di yüli 2009. E uniko diferensia tabata ku Jurickson a keda konsiderá komo un mihó prospekto durante di e tempunan ku nan tabata den Liga Menor.
Segun informashonnan no konfirmá pa e ekipo di Washington Nationals e akuerdo ku nan a yega ku picher Max Scherzer ta pa shete aña na un balor di 210 mion dòler. Lo ke ta pekuliar di e kontrakt aki ta ku maske e pelotero lo bira agente liber aki shete aña, e ekipo di Nationals lo page un montante di 15 mion anual pa e próksimo 14 añanan. Banda di esaki e pelotero a risibí un bono pa firma di 50 mion dòler ku lo keda paga durante di un término no definí.
Segun informashonnan, durante 10 i 11 di mart próksimo lo tin dos wega di fogeo Na Hapon entre un selekshon di beisbòl oropeo i e selekshon nashonal Hapones. E selekshon oropeo ta bai tin prinsipalmente peloteronan di Hulanda i Italia pero tambe peloteronan di Alemania, Spaña i Repúblika Cheko. Probablemente dependiendo di su rekuperashon, Wladimir Balentien lo por ta un di e peloteronan ku lo keda yama pa representá e selekshon oropeo.
TEXAS – E ekipo di Texas Rangers a anunsiá ku Jurickson Profar ta di skedjel pa kuminsá tira bala awe. Jurickson a pèrdè kompletu e temporada 2014 pa motibu di un múskulo ku a sker den du skouder drechi.
E plan ta pa Jurickson kuminsá tira suave for di un distansia di 45 pia awe. Gradualmente e lo sigui avansá, kreando asina aki forsa bek den e skouder. Texas Rangers ta spera ku Jurickson lo progresá sufisiente di moda ku e por hunga den spring training.
Gerente general di e ekipo, Jon Daniels a duna di konosé ku probablemente Jurickson lo kuminsá e temporada ku e ekipo di Round Rock den Tripel A. Esaki ta pa e pelotero por haña tempu di wega i kompensá pa e temporada ku e la pèrdè.
Segun informashonnan, e ekipo di Washington Nationals a yega na un akuerdo ku picher agente liber Max Scherzer. Ta trata di un akuerdo di shete aña pa un kantidat di riba 180 mion dòler. Scherzer i su agente Scott Boras tabata en búskeda di un kontrakt pa 200 mion dòler. Max Sherzer temporada pasa tabata ku e ekipo di Detroit Tigers kaminda e la logra un rèkert di 18-5 ku un efektividat di 3.15.
E ekipo di Texas Rangers ta den kòmbersashon ku Milwaukee Brewers riba un kambio pa e picher Yovani Gallardo. Sin embargo, te ku awe mainta e pelotero no a keda informá di un kambio ni tampoko Texas Rangers no a anunsiá ningun kambio. Tabata tin momentunan ku nòmber di Jurickson Profar a bin dilanti den e posibel peloteronan ku lo pasa pa Milwaukee. Sin embargo, tin fuentenan ta bisa ku Jurickson Profar no ta forma parti di e pakete di pelotero ku ta rumbo pa Milwaukee. Den transkurso di dia mas informashon tokante e kambio aki lo bin dilanti.
E ekipo di San Francisco Giants a anunsiá ku nan a yega na un akuerdo ku outfielder Gregor Blanco. E akuerdo di dos aña pa 7,5 mion dòler ta evitá e proseso di arbitrahe salarial. Blanco temporada pasa ku e ekipo tabata tin un promedio di .260 ku 18 doblete, 6 tripel i 5 honron.
LOS ANGELES — Kenley Jansen riba djabièrnè ultimo a yega na un akuerdo ku e ekipo di Los Angeles Dodgers i asina evitá e proseso di arbitrahe salarial. Kenley i ekipo di Dodgers a yega na un akuerdo di un aña pa 7,425 mion dòler. Ku e salario aki Kenley ta bira e ‘closer’ di shete mihó paga den Liga Grandi. Ainda e pelotero yu di Kòrsou tin dos temporada mas ku e ta bou di kontrol di Los Angeles Dodgers promé ku e bira agente liber na final di e temporada 2016.
Ainda no ta konosí si e ekipo di Dodgers ta bai ekstendé e kontrakt di Kenley. Sin embargo tin spekulashonnan ta sirkulá ku e dos partidonan ta sinta na mesa ta kòmbersá. Kenley mes no kier a konfirmá ni desmentí e informashon aki i a bisa ku e no ta preokupá ku esaki i ta laga esakinan den man di su agente. Kenley temporada pasa salba 44 partido den 49 oportunidat ku un efektividat di 2.76.
Kenley Jansen, no ta konfirmá ni desmentí ku e ta sinta na mesa ku e ekipo di Los Angeles Dodgers negosiando un kontrakt di mas ku un aña. E pelotero ku tabata hasiendo ehersisio na stadion di Dodgers a bisa ku e no ta preokupá ku asuntunan di kontrato i ta laga tur esakinan den man di su agente. Manera ta konosí, Kenley a opta pa kuminsá e proseso di arbitrahe salarial ayera.
Mariekson ‘Didi’ Gregorius a hasi su promé bishitá komo miembro di New York Yankees ayera na Yankee Stadium. E pelotero a keda introdusí i di forma ofisial a bisti e kamiseta ku number 18 riba lomba. Aña pasa tabata picher Hiroki Kuroda ku a karga e number aki. Na aña 2011 Andruw Jones tambe a karga number 18 den Yankees.
New York Yankees a anunsiá ku nan e yaga na un dil ku picher Ivan Nova i asina aki evitá e proseso di arbitrahe salarial. E dos partidonan a yega na un dil di 3,3 mion dòler ku ta e mesun montante ku Nova a gana temporada pasa. E picher a pèrdè gran parti di e temporada 2014 pa motibu di operashon Tommy John.
Segun informashonnan, e ekipo di New York Yankees un biaha mas tin bista riba picher veterano Johan Santana. E ekipo di Yankees a bai tira un bista riba e picher, den su salida mas resien den beisbòl invernal na Venezuela. Temporada pasa e pelotero di 35 aña e purba di hasi un comeback den Liga Grandi ku Baltimore Orioles pero no a logra esaki despues di a leshoná i mester a pèrdè e restu di e temporada.
Despues di a kambia Jason Heyward i Justin Upton e ekipo di Atlanta Braves ta siguí kambia hungadó. E biaha aki ta e kècher Evan Gattis e ekipo a kambia. Den e kambio Atlanta Braves a risibí pichernan Michael Foltynewicz i Andrew Thurman i tambe e ekipo a risibí e tersera base Rio Ruiz. Michael Foltynewicz ta wòrdu konsiderá pa Baseball America komo e di tres mihó pelotero den e organisashon di Houston Astros. Mientras ku Rio Ruiz ta wòrdu konsiderá e di ocho mihó pelotero den Liga Menor di Astros.
Den otro kambio nan, e ekipo di Washington Nationals a manda picher Tyler Clippard pa Oakland Athletics a kambio di Yunel Escobar. Yunel Escobar, no mas ku siman pasa e keda kambia di Tampa Bay Rays pa Oakland Athletics i ya e siman aki e pelotero ta ku un ekipo nobo atrobe.
MERKA — Kenley Jansen pa di dos aña konsekutivo ta opta pa drenta e proseso di arbitrahe salarial. Ana pasa tambe Kenley a drenta e proseso aki pero a logra di yega na un akuerdo ku e ekipo di Los Angeles Dodgers promé ku tratamentu di e kaso. Na e okashon ey Kenley a bai di akuerdo ku un salario di 4,3 mion dòler. Ta estima ku e temporada aki Kenley lo por risibí kasi dòbel su salario aktual. Tin spekulashonnan ku e pelotero lo risibí alrededor di 8 pa 8,2 mion dòler.
Djabièrnè próksimo e pelotero lo sinta na mesa ku e ekipo di Los Angeles Dodgers. Akinan ambos banda lo interkambiá nan proposishonnan salarial. E kasonan di arbitrahe salarial den kaso ku e dos partidonan no yega na un akuerdo lo tuma lugá entre 1 pa 20 di febrüari próksimo na Phoenix, Arizona.
ATLANTA — Andrelton Simmons ta gana otro premio pa su prestashon defensivo durante di e temporada 2014. E biaha aki Andrelton a gana e premio GIBBY ku ta para pa; ‘Greatness in Baseball Yearly Awards’. Pa Andrelton esaki ta e di kuater premio ku e pelotero ta keda honra kuné pa su defensa den e temporada 2014. Anteriormente Andrelton a keda otorgá e premionan di; Wante di Oro, ‘Fielding Bible Award’ i ‘Wilson Defensive Player of The Year Award’.
NEW YORK – E ekipo di Arizona Diamondbacks a kambia Mariekson ‘Didi’ Gregorius. Den e kambio aki e pelotero a bai finalisá den e ekipo di New York Yankees. Ta trata aki di un kambio ku a involukrá tres ekipo. New York Yankees a manda picher Shane Green pa Detroit Tigers, miéntras ku Arizona Diamondbacks a risibí picher Robbie Ray mas un pelotero di Liga Menor.
Didi di 24 aña di edat, a logra un promedio di .226 ku 35 kareda anotá, nuebe doblete, sinku tripel, seis honron, 27 kareda empuhe durante 80 partido temporada pasa ku Arizona Diamondbacks. E pelotero a yega Liga Grandi na 2012 ku Cincinnati Reds. Na final di 2012 Cincinnati a manda Didi Arizona Diamondbacks den un kambio. Ku Diamondbacks e pelotero a pasa dos temporada.
Den oranan di ayera tardi e gerente general di New York Yankees, Brian Cashman a papia riba e atkishon di e pelotero yu di Kòrsou. Segun Cashman, ‘Didi ta un pelotero hóben, atlétiko i defensivamente hopi bon. E tin un tiki problema kontra pichernan slengu pero ta bati pichernan derecho. Mas aleu e gerente general a bisa ku Didi lo kuminsá temporada kompartiendo e trabou di short ku Brendan Ryan. Didi no ta kompletamente desaroyá ainda segun Cashman, pero e ta kere ku Didi tin e kapasidat pa sigui progresá. E ekipo ta konsiente ku Didi su parti fuerte ta su defensa pero nan tin e konfiansa ku Didi por adelantá ofensivamente tambe.’
Parti di e konferensia via telefòn ku gerente general Brian Cashman (diskulpa pa e kalidat ku no ta masha bon):
For di marduga DeporteAwe.com tabata informa di e kambio di Didi Gregorius.
Risibiendo info ku posisblemente un pelotero Kurasoleño den Liga Grandi a keda kambia den ora di anochi, no tin konfirmashon ainda. #Korsou
E pelotero en kuestion na multiple okashon tabata riba trading block. Aktualmente e ta na Korsou den Curacao Baseball Week. #Beisbol — Edson Evertsz (@EdsonEvertsz) December 5, 2014
MERKA — Mariekson ‘Didi’ Gregorius por ta rumbo pa un otro ekipo. Informashonnan ku DeporteAwe.com a risibí di fuente nan ta bisa, ku e ekipo di Arizona Diamondbacks a kambia Didi den un kambio di tres ekipo. Den e kambio aki Didi Gregorius lo mester resultá den e ekipo di New York Yankees. (Mas detaye ta sigui despues)
For di den ora di marduga DeporteAwe.com tabata sigui e informashon aki i nos a publika lo siguiente riba Twitter:
Risibiendo info ku posisblemente un pelotero Kurasoleño den Liga Grandi a keda kambia den ora di anochi, no tin konfirmashon ainda. #Korsou
