Category: Beisbòl

HAPON — Despues di a kibra invikto di e tim di Israel, e Tim di Reino Hulandes ta den ful preparashon pa topa e siguiente kontrinkante. Djamars 14 di mart 2017, pa 11’or di anochi ora di Kòrsou, e Tim di Reino ta enfrentá e Cubanonan pa determiná si ta pasa pa semifinal.

Diegomar Markwell lo ta riba montikulo pa habri e partido di awe kontra Cuba.

E speransa di yega semifinal a keda bibu durante di e partido kontra di Israel paso e Tim di Reino a presta di forma impreshonante. E hungadónan guiá pa Hensley Meulens a hinka total 12 kareda i e kontrinkante a anotá solamente 2 kareda. Ku un bon bataso di Yurendell de Caster tantu Didi Gregorius komo Jonathan Schoop a anotá e promé dos karedanan. Didi Gregorius i e debutante Shawn Zarraga a bati doblete pa hinka tres di e kuater karedanan.

Den di kuater inning e skor a yega 10 pa 0 na man di bateo di Wladimir Balentien i un bataso kuadrangular di Didi Gregorius ku a sòru pa tres kareda. Al final, e Tim Oraño a logra 15 hit ku e protagonistanan Wladimir Balentien (4-3), Yurendell de Caster (5-3), Andrelton Simmons (5-3) i Didi Gregorius (3-2). Debí na e bateo fantástiko, e picher habridó Jair Jurrjens a haña tur trankilidat pa bira e promé picher ku a sera kuater inning pa e tim aki.

Awor tur konsentrashon ta riba preparashon pa e partido kontra di Cuba. Den e edishon anterior di World Baseball Classic (WBC), Tim di Reino a sa di gana Cuba i pone ku nan no a pasa pa semifinal. Den e promé buèlta di WBC e aña aki Cuba a forma parti di Grupo B den kual nan a pèrdè e promé partido kontra Hapon pero a gana di China i Oustralia. Despues e Cubanonan a pèrdè kontra Israel i tin un partido mas pendiente kontra Hapon promé ku topa Tim di Reino.

Miéntras tantu mènedjer Hensley Meulens ta duna e Tim di Reino un deskanso bon meresí. Meulens a duna di konosé ku: “Nos tabata asina kontentu ku e viktoria di e di dos partido kontra di Taiwan, esun ku nos a pasa pa e di dos buèlta kun’é. Por sierto e partido a kaba hopi lat i nos a disidí pa no hasi e seshon di batting practice e dia siguiente promé ku e partido kontra Israel. Siman pasá e hungadónan tabata kansá i ala bes emoshonal pa e partido kontra Israel.”

Meulens a sigui bisa ku: “Nos ta bai hasi kosnan diferente e biaha aki. E hungadónan ta haña un dia liber. Nos tin sigur dos siman ta traha duru sin dia liber. Deskanso ta mes un importante ku traha duru. E tim tin mester di deskansá i despues di tur e esfuersonan, nan tin derechi riba esaki pero nos no ta bai rilèks paso nos mester ta fuerte pa e partido kontra Cuba.”

Tambe Meulens a reflehá riba e kambionan di hungadó: “Mester tene kuenta ku situashon di kada hungadó i tin ora bo tin partidonan ‘do-or-die’ den kual bo mester usa bo intuishon. Den hasi esaki ta bini kambio den e aliniashon pa duna sierto hungadó mas espasio pa sinti konfortabel ku e line up. Tambe pa e otro hungadónan por haña un chèns. E kambio aki a resultá nos bon den e partido mas resien.”

HAPON — Selekshon di Reino ta keda na bida den e Klásiko Mundial di Beisbòl derotando Israel ku skor di 12-2. E ekipo di Reino a drenta e partido di awe básikamente ku lomba kantu di muraya.

Diferente na e otro partidonan, awe si e picheo di Reino a mustra su kara. Tabata Jair Jurrjens ku a habri riba montikulo pa e selekshon di Reino i tabata sublime. Jurrjens a picha seis entrada sólido, permitiendo solamente un kareda riba sinku hit miéntras ku e la poncha sinku.

Resúmen di e partido, kortesia di MLB.com

Banda di picheo e ofensiva di e selekshon di Reino tambe a klik awe. Manager, Hensley Meulens a hasi algun kambio den aliniashon i esaki a duna fruta. E selekshon di Reino a anotá dos kareda den di dos entrada riba hit empuhador di Yurendell de Caster(5-3).

Den di tres entrada e selekshon di Reino a añadí kuater kareda mas. Akinan tabata Wladimir Balentien(4-3), Didi Gregorius(3-2) i Shawn Zarraga(5-2) ku a empuha e kareda.

Selekshon di Reino ta ripití den di kuater entrada ku kuater kareda mas. Un biaha mas tabata Wladimir Balentien i Didi Gregorius ku a empuha e karedanan pa hasi e partido 10-0.

Den di ocho Didi Gregorius ta empuha su di sinku kareda di partido, konektando un fly di sakrifisio pa empuha Jurickson Profar(3-1). Shawn Zarraga tambe ta empuha un otro kareda, konektando un single pa empuha Wladimir Balentien.

Ku 10 kareda diferensia e partido ta terminá pa motibu di regla di miserikordia.

Sigiuentemente, e selekshon di Reino ta enfrentá Cuba. Ku un viktoria e selekshon ta garantisá su pase pa e semifinal di e Klasiko Mundial na Los Angeles. E partido kontra Cuba lo ta djamars, 11’or ora lokal di Kòrsou.

HAPON — Selekshon di Reino ta pèrdè su promé partido di e di dos buèlta di e Klasiko Mundial di Beisbòl. E selekshon di Reino a kai ku un skor di 8-6 for di e selekshon di Hapon despues di a bataya 11 entrada.

Despues di a kai atras 1-0 den kabes di dos entrada e selekshon di Reino ta empatá e partido na unu. Tabata Jonathan Schoop(5-3) ku den bòm di e entrada a konektá un honron solitario pa empatá e partido.

Hapon ta bini bek di kabes di tres pa anotá kuater kareda i hasi e partido 5-1. No a dura masha ku den bòm di entrada Andrelton Simmons(6-2) ta konektá un single pa empuha Randolph Oduber(5-1). Xander Bogaerts(4-0) ta konektá un flai di sakrifisio pa empuha Simmons. Ku dos out den e entrada, Wladimir Balentien(5-2) ta konektá un honron di dos kareda empuhando Jurickson Profar(5-2) i igualando e partido na sinku.

Faltando un out den e partido, Jonathan Schoop ta konektá un single pa empatá e partido na seis den bòm di nuebe ining.

Hapon ta anotá dos kareda den kabes di 11 pa hasi e partido 8-6. Despues di a bin bek for di diferente défisit den e partido den di 11 si e Selekshon di Reino no a logra esaki i kai vensí kontra Hapon.

Mañan selekshon di Reino ta enfrentá Israel 6’or ora lokal di Kòrsou den un partido ku nan mester gana. Riba montikulo pa selekshon di Reino lo ta Jair Jurrjens.

KOREA — Selekshon di Reino ta pèrdè nan último partido den e promé buèlta di e Klásiko Mundial di Beisbòl. E selekshon di Reino a enfrentá Israel den su último partido i a kai vensí ku skor di 4-2. Apesar di e derota ámbos ekipo ta pasa pa e siguiente buèlta na Tokyo, Hapon.

Israel a bai ariba for di den promé entrada ku skor di 3-0. Pa selekshon di Reino e veterano Rob Cordemans a habri e partido.

Den di tres entrada Randolph Oduber(3-0) ta anotá e promé kareda di e partido pa Reino despues di un roletaso pa tersera di Xander Bogaerts(2-0).

Resúmen di e partido, kortesia di MLB.com

E selekshon di Reino ta añadí otro kareda mas den kabes di ocho ora ku Sharlon Schoop(1-0) ta anotá riba un eror di e segunda base di Israel.

Jurickson Profar a bai di 3-3 ku dos doblete den e partido.

SUR KOREA — Rick Van den Hurk a keda nombra komo a habridó pa e prome partido di e selekshon di Reino den e Klásiko Mundial di Beisbol. Mañan mainta 5’or i mei ora lokal di Kòrsou e selekshon di reino lo tin nan promé partido kontra di e selekshon Koreano den Gocheok Sky Dome.

Segun e manager di e selekshon, Hensley Meulens e la skohe Rick Van den Hurk pa habri mañan paso e ta e mihó picher ku e selekshon tin aktualmente.

Van den Hurk a keda firma na 2002 pa e ekipo di Florida Marlins aktualmente Miami Marlins. Na 2007 e picher drechi a hasi su debut den Liga Grandi. Banda di Marlins e picher di 31 aña a picha tambe pa Baltimore Orioles i Pittsburgh Pirates den Liga Grandi. Último añanan Van den Hurk tabata na Hapon ku e ekipo di Softbank Hawks.

Apesar di a derota e Koreanonan den e Klásiko di Beisbòl na 2013, “nos tin ku trese nos miho wega,” Meulens a deklara.

“Si nos no picha bon, nos no kore base, nos no batí oportuno, nos no fango e bala, nos lo no gana nan,” Meulens a añadí.

Woo Kyu-min ta e picher anunsiá pa ta riba montikulo kontra e selekshon di Reino. Kyu-min ta un picher drechi di 32 aña ku ta picha den e Liga di Beisbòl Profeshonal di Korea ku e ekipo di Samsung Lions.

E selekshon Koreano a pèrdè nan promé partido di e Klásiko ayera kontra Israel ku skor di 2-1.