Beisbòl Archives | Page 65 of 107

February 26, 2014

Andruw Jones pelotero estranhero mihó paga na Hapon

HAPON – Segun e revista di beisbòl Hapones, Shukan, Andruw Jones ta e pelotero estranhero mihó paga den beisbòl profeshonal Hapones. Andruw Jones na inisio di e aña aki a yega na un akuerdo di un aña ku e ekipo di Rakuten Golden Eagles pa $3.8 mion.

E revista ta menshoná ku 91 pelotero di beisbòl profeshonal Hapones ta gana $1 mion of mas. Di e 91 pelotero nan aki 65 ta Hapones i 26 ta estranhero. E pelotero mihó paga den beisbòl Hapones ta e catcher di Yomiuri Giants, Shinnosuke Abe. E pelotero aki tin un salario di $6 mion e temporada aki.

February 26, 2014

BEISBOL: Breve Deporte Awe #11

Resultado nan di Spring Training ayera:

Detroit Tigers a gana 12-0 kontra di Florida Southern College.

New York Yankees a gana 8-3 kontra di Florida State University.

Partido nan di Spring Training pa awe:

Miami Marlins kontra University of Miami Hurricanes

Toronto Blue Jays kontra Philadelphia Phillies

New York Yankees kontra Pittsburgh Pirates

Detroit Tigers kontra Atlanta Braves

Oakland Athletics kontra San Francisco Giants

Cincinnati Reds kontra Cleveland Indians

Los Angeles Dodgers kontra Arizona Diamondbacks

Pitcher habridó di Los Angeles Angels of Anaheim, C.J. Wilson mester a bandoná entrenamentu despues di a risibí un liña for di bate di Yorvit Torrealba den kabes. Mes ora despues di esaki Wilson a lanta para i bisa ku e tabata bon. Pero e pelotero tabata sangra un tiki i a wòrdu hiba hospital pa un chekeo médiko.

Outfielder di Los Angeles Angels of Anaheim, Josh Hamilton a leshona su batata di pia na momentu ku e tabata kore base. Pa e motibu aki e hungadó lo no por praktiká beisbòl den e próksimo dia nan. Segun Hamilton, den kuater pa sinku dia e lo por bisa kuantu tempu di rekuperashon e mester.

E dos biaha ganadó di premio Cy Young, Johan Santana a tene un oudishon dilanti shete ekipo ku e speransa di regresá bek den Liga Grandi. Temporada pasa e pitcher a opera su skouder i no a picha durante e temporada. Segun informashon nan, Minnesota Twins i New York Yankees ta den e ekipo nan ku ta interesá den e pitcher. Na 2012, Santana a gana 6 partido, pèrdè 9 ku un efektividat di 4.85 den 21 salida.

E outfielder di Los Angeles Dodgers, Matt Kemp lo hasi un MRI na su ènkel djabièrnè próksimo pa purba determiná ki dia e por kuminsá kore atrobe. Den kaso ku dòkter duna lus bèrdè, Kemp lo añadí entrenamentu nan di kore den su programa. Segun informashon nan, no tin un manera pa bisa ku eksaktitut ku e ènkel di Kemp a kura kompletamente. Esaki ta pone ku si e pelotero kuminsá rehabilitation muchu tempran e ènkel por sufri leshonnan permanente.

E ekipo di San Diego Padres a anunsiá ku e tersera base Chase Headly lo no partisipá na Spring Training e próksimo simannan. Esaki despues ku e pelotero a leshoná su batata di pia. Segun e ekipo e hungadó lo ta for di akshon pa sigur dos pa tres siman.

Segun e shortstop di salon di fama, Ozzie Smith, gobièrnu di Merka mester hasi e dia di apertura di temporada di beisbòl profeshonal un dia di fiesta nashonal. E pelotero ta hibando un kampaña den kua e ta buskando 100.000 firma den e próksimo 30 dianan.

Manager di Baltimore Orioles, Buck Showalter a pone prospekto di e ekipo skirbi un informe riba èks-pelotero Frank Robinson. Esaki despues ku Frank Robinson a presentá na e kampamentu di entrenamentu di Baltimore Orioles i e pelotero di 19 aña, Josh Hart no tabata sa ken ta Frank Robinson. Frank Robinson tabata nobato di aña 1956 ku Cincinnati Reds tambe e la sali dos biaha e hungadó mas balioso di temporada. Na aña 1966 Robinson a gana e premio di Tripel Korona. Robinson tabata un All-Star na 14 okashon, ku 586 honron konektá den su karera. Tambe Robinson a bira e promé manager di kolo den historia di Liga Grandi.

February 25, 2014February 25, 2014

BEISBOL: Breve Deporte Awe #10

Weganan di Spring Training ta kuminsá awe ku dos partido. Riba e dia di awe e ekipo New York Yankees ta hunga kontra Florida State University. Den e di dos partido e ekipo di Detroit Tigers ta hunga kontra Florida Southern College.

Despues di un temporada 2013 ku no a bai muchu bon, Roger Bernadina ta kla pa sigui pa dilanti i lubidá e aña tras di lomba. Den un deklarashon Roger a bisa ku, “aña pasa no a bai manera e tabata ke. Pero e tin ku pone atenshon riba loke e tin ku hasi pa duna un bon prestashon e aña aki. Ana pasa ta tras di lomba. E atenshon ta riba e temporada nobo.” Na luna di yanüari ultimo e ekipo di Cincinnati Reds a anunsiá ku nan a yega na un akuerdo ku Roger Bernadina pa un kontrato di liga menor ku invitashon na Spring Training. Ku un bon prestashon den Spring Training e pelotero tin e posibilidat di keda ku e ekipo di Cincinnati Reds den Liga Grandi.

E ekipo di Texas Rangers a anunsiá ku nan a ekstendé e kontrato di manager Ron Washington ku un aña mas. Washington su kontrakt mester a terminá na final di e temporada 2014. Ku e ekstenshon Washington su trabou ta sigurá te final di e temporada 2015. Ron Washington ta manager di Texas Rangers for di aña 2007 i tin un rèkert di 611 partido gana i 524 partido pèrdí.

New York Yankees no ta interesá mas den shortstop Kubano, Aledmys Diaz. Segun informashon nan e ekipo di Yankees tabata interesá den e hungadó aki, pero ya no ta interesá mas. Ainda Atlanta Braves, San Francisco Giants, St. Louis Cardinals i Philadelphia Phillies tin interes den e shortstop di 23 aña. Diaz tabata tin un promedio di .315 ku 12 honron i 11 base roba den su ultimo temporada di beisbòl na Cuba.

MLB a anunsiá ku nan a yega na un akuerdo pa di forma eksperimental implementá e regla nobo ku ta designa pa eliminá mayoria choke grave na plato. Básikamente, e reglamentu aki ta bisa, ku un koredó ku ta riba kaminda pa plato no tin mag di kambia su ruta direkto pa plato, pa asina okashoná un choke na plato. Den kaso ku e umpire haña ku e pelotero a viola e regla aki, e pelotero ta out. Di otro banda e regla ta bisa ku, miéntras ku un catcher no ta den poseshon di e bala e no por blòkia e ruta di e koredó pa plato. Den kaso ku e umpire haña ku e catcher a viola e regla aki, e koredó ta keda deklará safe. MLB lo evaluá e regla aki miéntras ku e temporada 2014 ta progresá. E plan ta pa implementa e regla aki den su totalidat den e temporada di 2015.

Organisadónan di e seri di apertura di Beisbòl Liga Grandi na Oustralia ta rabia ku pitcher di Los Angeles Dodgers, Zack Greinke. Esaki despues ku e pitcher a bisa ku e no ta emoshoná pa hunga e partido nan di apertura na Oustralia. Segun e pitcher e no ta mira niun motibu pa ta emoshoná. Los Angeles Dodgers i Arizona Diamondbacks ta habri e temporada regular di beisbòl Liga Grandi dia 22 i 23 di mart na Oustralia.

February 24, 2014

Kevin Moesquit laga den libertat pa Sioux City Explorers

DURHAM, NORTH CAROLINA – E Asosiashon Amerikano di Beisbòl Profeshonal Independiente a anunsiá ku e ekipo di Sioux City Explorers a laga e pelotero Kevin Moesquit den libertat.

Kevin a habri temporada 2013 den klase A di Liga Menor ku e ekipo di Burlington Bees. Aki nan e pelotero a hunga 49 partido for di kua e la logra un promedio di .235 ku 13 kareda empuha. Na yüli di 2013 e ekipo di Burlington Bees a laga Moesquit den libertat.

Mesora e pelotero a keda kontratá pa Winnipeg Goldeyes den e Liga di Beisbòl Profeshonal Independiente Amerikano. Aki nan, Kevin a hunga 44 wega ku e ekipo i tabata tin un promedio di .245 ku 2 honron i 18 kareda empuha den 139 turno na bate.

Na final di e temporada e pelotero a formá parti di un kambio kaminda e la bin resultá den e ekipo di Sioux City Explorers ku awor a laga e pelotero den libertat.

February 24, 2014

BEISBOL: Breve Deporte Awe

Segun e manager di New York Yankees, Joe Girardi, Derek Jeter lo hunga su promé partido di Spring Training riba djaweps próksimo. Riba e dia aki e ekipo di New York Yankees lo hunga kontra e ekipo di Pittsburgh Pirates. Jeter a kore base durante entrenamentu den wikènt tras di lomba i a bisa ku tur kos bon. Segun e manager, Joe Giraradi e ke pa Jeter kore base un par di biaha mas promé ku e hink’e den wega.

Tur kos ta mustra ku New York Yankees a yega na un akuerdo di ekstenshon di kontrakt ku outfielder, Brett Gardner. E akuerdo ta pa kuater aña na un montante di $52 mion i e ekipo di Yankees tin posibilidat di keda ku e pelotero un di sinku aña pa $12.5 mion adishonal. Temporada pasa Gardner a bati pa un promedio di .273, ku 33 doblete, 10 tripel i 8 honron.

Segun informashon nan, e outfielder di Los Angeles Angels of Anaheim, Mike Trout ta sinta na mesa di negosiashon ku e ekipo pa un posibel ekstenshon di kontrakt. Ni e ekipo di Anaheim, ni Mike Trout no kier a komentá riba esaki, pero informashon nan ta bisa ku Anaheim a ofresé e pelotero $140 mion pa seis aña.

E ekipo di Baltimore Orioles a yega na un akuerdo ku outfielder, Nelson Cruz. Cruz a bai di akuerdo ku un kontrakt di un aña pa $8 mion. Na novèmber di aña pasa Cruz a nenga un dil di un aña pa $14.1 mion ku Texas Rangers. Ayera e hungadó tabata na kampamentu di Baltimore pa hasi su eksámen físiko i ku tur probabilidat awe Baltimore lo anunsiá ofisialmente e dil ku e pelotero. Den e temporada tras di lomba Cruz a bati pa un promedio di .266 ku 27 honron i 76 kareda empuha den 109 partido huntu ku Texas Rangers.

E ekipo di Los Angeles Dodgers a anunsiá ku nan a firma e shortstop Kubano, Erisbel Arruebarrena na un kontrakt di sinku aña pa $25 mion. E pelotero di 23 aña a desertá Cuba aña pasa i a establesé su mes na Haiti. Aktualmente e ta entrenando na Repúblika Dominikana i mester haña un visa di trabou pa e por bin Merka.

February 21, 2014

BEISBOL: Breve Deporte Awe

E outfielder di Milwaukee Brewers, Ryan Braun a yega spring training. E hungado mas balioso di temporada 2011 a keda suspendé aña pasa pa 65 wega pa uso di dopaje. Un biaha mas Braun a pidi su diskulpa pa loke a pasa i ta kla pa sigui pa dilanti. Braun temporada pasa a hunga den solamente 61 partido i tabata tin un promedio di .298 ku 9 honron i 38 kareda empuha. E temporada aki Braun lo move for di left field i lo bai hunga right field.

E ekipo di Texas Rangers a para tur aktividat relashoná ku beisbòl di e pitcher Matt Harrison. Esaki despues ku e pitcher a sinti molester na su lomba. Segun e gerente general di Texas Rangers, Jon Daniels, djaluna e pitcher ta regresá Dallas, Texas. Aki nan un spesialista di lomba lo eksaminá e pitcher su lomba . Aña pasa e pitcher a wòrdu opera pa un leshon na su lomba.

Texas Rangers ketu bai ta den kòmbersashon ku outfielder, Nelson Cruz. E ekipo a bisa ku tin posibilidat ku nan por firma e hungadó di nobo pero solamente si su preis bira rasonabel. Na novèmber ultimo, Cruz a nengá un dil di un aña pa $14.1 mion ku Texas Rangers. Temporada pasa ku Texas, Crux a bati pa un promedio di .266 ku 27 honron i 76 kareda empuha den 109 partido. Na ougùstùs di aña pasa e hungadó e keda suspendé pa kompra di dopaje. Seattle Mariners, New York Mets i Baltimore Orioles a mustra interes den e hungadó.

Pitcher di Liga Menor di Boston Red Sox, Francisco Tena a keda suspendé pa un periodo di 50 wega sin pago despues ku e la test positivo pa supstansiánan prohibí. Tena aktualmente ta den e Liga di Verano na Repúblika Dominikana.

Boston Red Sox ta yega na un akuerdo di un aña ku pitcher, Chris Capuano. E akuerdo ta pa un montante di $2.25 mion. Temporada pasa Capuano a picha ku Los Angeles Dodgers i tabata tin un rèkert di 4 gana i 7 pèrdí ku un efektividat di 4.26 den 24 aparishon.

February 21, 2014

Andrelton Simmons ku akuerdo di shete aña ku Atlanta Braves

LAKE BUENA VISTA, FLORIDA – E ekipo di Atlanta Braves a anunsiá ku nan a yega na un akuerdo pa ekstenshon di kontrakt ku shortstop, Andrelton Simmons. E ekipo di Atlanta Braves a mara Andrelton pa e próksimo shete añanan na un balor di $58 mion.

Den un deklarashon Frank Wren, gerente general di e ekipo a bisa ku, “e ekipo ta kere ku Andrelton ta un di e top shortstopnan den e wega i nan ta kontentu di a firm’e, evitando asina e añanan di arbitrahe salarial i e promé dos añanan di agente liber. Ku esaki e ekipo ta keda riba e ruta di mantené e núkleo di hungadónan huntu i e ekipo ta pensa ku Simmons ta parti integral di esaki.”

E montante di $58 mion ku Simmons ta bai gana den e próksimo shete añanan ta repartí den $1 mion komo bonus pa firma, $1 mion pa e temporada 2014, $3 mion pa e temporada 2015, $6 mion pa e temporada 2016, $8 mion pa e temporada 2017, $11 mion pa e temporada 2018, $13 mion pa e temporada 2019 i $15 mion pa e temporada 2020.

“Mi ta hopi emoshoná, mi ta hopi kontentu di por a firma ku un ekipo ku mi a lanta ta wak,” Simmons a bisa. “Mi no ta bai kambia mi manera di hunga, mi ta bai sigui traha duru i mi ta kontentu ku nan tin e konfiansa pa invertí den mi,” Simmons a terminá bisando.

Den e temporada tras di lomba Simmons a batí pa un promedio di .248 ku 17 honron i 59 kareda empuha. Defensiva mente Simmons tabata aun mas mihó kometiendo solamente 14 eror den 753 oportunidat. Esaki tabata motibu ku Andrelton a gana su promé wante di oro i tambe e ‘platinum glove’ den su promé temporada kompletu den Liga Grandi.

Tambe Simmons a bira e di tres persona den e ultimo 30 añanan ku ta gana e premio di Solo Briante otorgá pa Radio Hoyer. E premio aki, ta keda otorgá na persona nan ku a sobresali na un forma hopi spesial i eksepshonal. E otro ganadónan di e premio aki tabata Churandy Martina na 2008 i Rignald Recordino na 2011.

February 20, 2014

BEISBOL: Breve Deporte Awe

Manager di Texas Rangers, Ron Washington a anunsiá awe su aliniashon ku e tin den mente pa temporada regular 2014.

LF Shin-Soo Choo
SS Elvis Andrus
1B Prince Fielder
3B Adrian Beltre
RF Alex Rios
DH Mitch Moreland
C Geovany Soto
2B Jurickson Profar
CF Leonys Martin

Tur aña Baseball America ta saka nan lista di e 100 mihó prospekto nan pa e temporada. Riba e lista di e aña aki, Xander Bogaerts di Boston Red Sox a keda di rank komo e di dos mihó prospekto pa e temporada 2014. Na puesto number unu tin e outfielder di Minnesota Twins, Byron Buxton.

David ‘Big Papi’ Ortiz ta pidiendo e ekipo di Boston Red Sox un ekstenshon di kontrakt di un aña. Esaki ta loke David Ortiz a bisa durante di un konferensia di prensa na e kampamentu di entrenamentu di Boston Red Sox. Segun Ortiz a bisa: “mi no ta buskando un ekstenshon di dos aña, solamente un aña. Mi ke ta kla riba esaki.” Ortiz lo gana $15 mion e aña aki i segun informashon nan e ta buskando un ekstenshon na e mesun balor aki.

E pitcher di Cincinnati Reds, Homer Bailey e yega na un akuerdo ku e ekipo pa un ekstenshon di 6 aña pa un montante di $105 mion. Ainda e hungadó no a firma e kontrakt pero segun e general manager di Reds, si tur kos ta bon, e pitcher ta firmá awe mainta. Temporada pasa Bailey a gana 11 partido, pèrdè 12, ku un efektividat di 3.49 den 32 salida.

E ekipo di Chicago Cubs a anunsiá, ku na final di e temporada 2014 nan lo kuminsá ku renovashon di nan stadion. Wrigley Field ta kumpli 100 aña e temporada aki i den offseason tabata tin par di trabou di mantenshon i reparashon ku a tuma lugá pero nada grandi manera e renovashon di $500 mion ku lo tuma lugá na final di temporada 2014.

Segun informashon nan, tantu e ekipo di Miami Marlins i Washington Nationals ta usando ‘drone’ na spring training pa filma nan entrenamentu nan. E ekipo di Washington Nationals a bisa ku e filmashon nan ku keda hasi pa e drone ta simplemente pa propaganda. Di otro banda Marlins a bisa ku nan ta usa nan filmashon nan pa analisá e moveshon di nan hungadó nan riba tereno.

February 19, 2014

BEISBOL: Breve Deporte Awe

Segun informashon nan, Shairon Martis tin dos oferta di dos ekipo di Liga Menor. Tambe e pitcher ta den kòmbersashon ku diferente ekipo pafó di Merka. Un desishon final lo bin ku tur probabilidat den fin di siman. Temporada pasa den Liga Grandi ku Minnesota Twins, Shairon tabata tin un rèkert di 0-1 den 6 aparishon komo relevista i un efektividat di 5.59. Den Tripel A ku Rochester Red Wings, Martis tabata tin 42 aparishon for di kua 3 salida i un rèkert di 2 gana, 4 pèrdí ku un efektividat di 4.26.

Andrelton Simmons a yega kampamentu di entrenamentu di Atlanta Braves na Lake Buena Vista, Florida. Segun e pelotero su atenshon ta riba beisbòl i no ta prekupa ku e asuntu di ekstenshon di kontrakt. Den un deklarashon Simmons a bisa, “mi ta komprendé henter e kos. Pero ami tin ku hasi mi trabou. Mi atenshon ta riba hunga beisbòl. Mi gusta Atlanta, lo mi ta kontentu si e ekstenshon tuma lugá.”

Derek Jeter lo tin un konferensia di prensa awe pa papia riba su desishon pa retirá na final di e temporada 2014. Manera ta konosí siman pasa e kapitan di New York Yankees a anunsiá ku e temporada di 2014 lo ta su ultimo, pero lo warda te ora e ekipo kompletu ta na Spring Training pa papia riba esaki. Jeter, ku na yüni próksimo ta kumpli 40 aña di edat, ta bai drenta su di 20 temporada den Liga Grandi. E ‘rookie of the year’ di aña 1996 a forma parti di All-Star Game na 13 okashon, tambe e la gana wante di oro na 5 okashon i a gana Seri Mundial na 5 okashon ku New York Yankees.

E manager di Toronto Blue Jays, John Gibbons a anunsiá ku pitcher R.A. Dickey lo habri e promé wega di temporada pa e ekipo. Esaki lo ta di dos temporada siguí ku e pitcher ta habri e promé wega di temporada. E promé wega di temporada pa Toronto Blue Jays ta dia 31 di mart na momentu ku nan topa ku Tampa Bay Rays na Tampa. Temporada pasa Dickey tabata tin 34 salida for di kua e la gana 14 wega, pèrdí 13 ku un efektividat di 4.21.

Cleveland Indians ta yega na un akuerdo di un aña ku pitcher Justin Masterson. Ku esaki e ekipo ta evitá un kaso di arbitrahe salarial. Masterson a bai di akuerdo ku un montante di $9.7625 mion pa un aña. Temporada pasa e pitcher a gana 14 partido, pèrdè 10 den 29 salida ku un efektividat di 3.45.

Segun informashon nan, e tienda ku ta bende souvenir na e kas di Spring Training di New York Yankees na Tampa, no ta bendiendo jersey di Alex Rodriguez. Manera ta konosí Rodriguez a keda suspendé pa henter e temporada 2014. Segun New York Yankees, ta e gerente di e tienda ta disidí kua jersey nan ta bende, e no ta un desishon ku e ekipo ta tuma.

February 19, 2014

Jurickson Profar su leshon na skouder ta sigui molestiá e pelotero

SURPRISE, ARIZONA – Un dia despues ku Jurickson Profar a haña lus bèrdè pa kuminsá tira bala, Texas Rangers a kambia nan desishon i para esaki di nobo. E motibu di esaki ta ku te ainda Jurickson tin molester na su skouder drechi. Huntu ku e echo ku Profar no por tira bala pa e próksimo siman, Texas a prohibí e pelotero di bate tambe awor.

Profar a keda diagnostiká siman pasa ku inflamashon na su skouder drechi pa e staf médiko di Texas Rangers. Segun Profar, e la leshoná su skouder un luna pasa hisando peso.

General manager di Texas Rangers, Jon Daniels a bisa ku e ekipo ta bai trata e leshon aki ku a bin ta afektá Profar den e ultimo luna, di un manera hopi kouteloso. Pa e motibu aki e desishon a keda tuma pa no laga Profar tira, ni bati den e próksimo siman.

Daniels a sigui bisa, ku e ekipo no ta dje prekupa ei a largo plaso ku e leshon, pero ku e tipo di leshon nan aki no tin chèns pa kometé deskuido. Un deskuido por nigikia ku e pelotero lo no ta kla pa komienso di temporada.

Te ainda Texas no e modifiká nan plan nan i lo tin Jurickson komo batido designa den e promé partido nan di Spring Training. Den di dos of di tres siman di mart e ekipo tin pensa di laga Profar hunga den tereno.