Beisbòl Archives | Page 66 of 107

February 18, 2014

Jurickson Profar a haña lus bèrdè pa tira bala

SURPRISE, ARIZONA – E segunda base di Texas Rangers, Jurickson Profar a haña lus bèrdè pa por tira bala. Siman pasa e ekipo di Texas Rangers a anunsiá ku Jurickson tabata sufriendo di tendinitis ku ta un inflamashon na e tendon di Jurickson su skouder drechi. Pa e motibu aki mes ora Texas a prohibí Jurickson di tira bala.

Apesar di e echo ku Profar a haña lus bèrdè pa tira tog Texas Rangers ta sigui ku nan plan di no laga e pelotero tira por lo pronto. For di siman pasa e ekipo a bisa ku Profar por hasi tur otro aktividat ku eksepshon di tira bala.

Segun manager di e ekipo, Ron Washington, awor aki e prioridat ta pa traha riba Jurickson su koordinashon di pia na segunda base i e no mester tira pa hasi esei.

Den e promé siman nan di spring training, Profar lo kuminsá komo batido designa i despues di algun siman e pelotero lo hasi e transishon pa segunda base. Esaki lo no tin impakto riba Jurickson su abilidat pa ta kla pa komienso di temporada, e general manager di Texas Ranger, Jon Daniels a bisa.

February 18, 2014

BEISBOL: Breve Deporte Awe

Segun informashon nan e ekipo di Baltimore Orioles a firma pitcher Ubaldo Jimenez. Ta trata aki di un kontrakt di kuater aña pa $50 mion. Sin embargo e akuerdo ta pendiente d un eksámen médiko. Temporada pasa Ubaldo Jimenez a picha ku e ekipo di Cleveland Indians kaminda e la gana 13 partido i pèrdè 9 ku un efektividat di 3.30 den 32 salida.

E ekipo di Baltimore Orioles a anunsiá awe tambe ku nan a yega na un akuerdo ku pitcher Koreano, Suk-min Yoon. For di siman pasa e dos partido nan a yega na un akuerdo pero esaki tabata pendiente un eksámen médiko. E kontrakt ku Yoon ta di tres aña pa $5.75 mion. Temporada pasa e pitcher a sirbi komo relevista pa e ekipo di Kia Tigers na Korea. Aki nan e pitcher a gana 3 partido, pèrdè 6, salba 7 i tabata tin un efektividat di 4.00.

Segun e pitcher di Cincinnati Reds, Homer Bailey, e ta serka di yega na un akuerdo di término largu ku e ekipo di Cincinnati i asina evitá un kaso di arbitrahe salarial. Temporada pasa Bailey a gana 11 partido, pèrdè 12, ku un efektividat di 3.49 den 32 salida.

E pitcher Kubano, Jose Contreras di 42 aña a bisa ku e no tin pensa di retirá por lo pronto. E pitcher ku a gana Seri Mundial na 2005 ku Chicago White Sox a bisa ku si e hunga shete aña mas porta e por gana dos of tres seri mundial mas. Texas Rangers a firma Contreras na un kontrakt di Liga Menor.

Coach di bateo di New York Yankees, Kevin Long ketu bai ta molestiá ku Robinson Cano no tabata kore duru pa primera base na momentu ku e bati un bala rutinario den infield. E komentario aki a bin apesar ku e hungadó ya no ta ku New York Yankees mas. Segun Long, semper Cano tabata tin un otro èksküs. Tin biaha e ta bisa ku su pia nan no ta sinti bon of e ta bisa ku e ta hunga tur dia i mester spar su energia. Long a sigui bisa ku, e no ta e úniko hende di e ekipo ku a papia ku Cano riba e problema aki.

Segun manager di New York Yankees, Joe Girardi, Brian Roberts lo ta e segunda base di tur dia pa e ekipo. E manager a bisa ku e sa ku Roberts no a hunga un temporada kompletu den e ultimo aña nan i ku tambe Roberts tin su edat pero su plan ta pa e hungadó ta riba tereno tur dia. Temporada pasa, Roberts di 36 aña a hunga den 77 wega, ku un promedio di .249, ku 8 honron i 39 kareda empuha.

February 17, 2014February 17, 2014

BEISBOL: Breve Deporte Awe

Atlanta Braves ta yega na un akuerdo di kuater aña ku pitcher (closer) Craig Kimbrel. E akuerdo ta pa un montante di $42 mion den kuater aña. Na final di kuater aña e ekipo di Atlanta tin e opshon di keda ku e hungadó pa un aña mas na un balor di $13 mion.

Despues ku Atlanta Braves a yega na akuerdo ku Craig Kimbrel un biaha mas informashon nan a kuminsá sirkulá riba un posibel kontrakt entre Atlanta Braves i Andrelton Simmons. Den un entrevista e presidente di Atlana Braves, John Schuerholz a bisa, refiriendo na un posibel kontrakt: “Andrelton ta interesá. Nos di Braves ta interesá, pero tin biaha akuerdo nan ta tuma lugá i tin biaha no.” Segun informashon nan, Atlanta tin un tiki duda ainda den Simmons su abilidat nan ofensivo. Pero hopi ta kere ku si e dos partido nan no yega na un akuerdo e aña aki, otro aña nan lo yega na un akuerdo.

Wladimir ‘Coco’ Balentien ta sigui ku su preparashon nan pa e temporada di beisbòl profeshonal Hapones. Den entrenamentu di bateo den wikènt tras di lomba, Balentien a mira 23 picheo for di kua 8 e la saka for di stadion. Segun informashon nan, Wladimir ta bezig ta swing na 85 pa 90 porshento di su forsa. E velosidat di su bate wòrdu midi na 151 kilometer pa ora.

Jonathan Schoop tambe ta den preparashon pa temporada regular. Schoop ku ya ta na kampamentu di Baltimore Orioles a yega muchu mas grandi ku temporada pasa. Segun e pelotero e la añadí entre 8 pa 10 liber di múskulo. Den off-season, Jonathan a hisa hopi peso huntu ku entre otro Jurickson Profar. Segun Schoop a bisa, “mi mester bira mas fuerte si mi ke hunga e temporada kompletu i hisamentu di peso ta parti di e wega.” Mesora Schoop a demostrá su poder ora ku den entrenamentu di bateo e la konektá un honron ku a bai kai den e lugá di stashoná outo di e kompleho i ‘deuk’ un outo ku tabata para ei nan.

Shairon Martis ku aktualmente ta agente liber ta bek ku e agensia di beisbòl, Metis Sports Management. Mesora e kompania aki a kuminsá traha i segun informashon nan tin interes pa e pitcher yu di Kòrsou su servisio nan i pronto e lo por yega na un akuerdo di Liga Menor.

February 14, 2014

BEISBÒL: Breve Deporte Awe

Tur kos ta mustra ku Wladimir ‘Coco’ Balentien ta bai hasi e konvershon di outfield pa primera base. Balentien a presentá ku dos wante di primera base na kampamentu di entrenamentu di Tokyo Yakult Swallows i ya ta entrenando na primera base. Segun informashon nan, Wladimir lo habri na primera den e partido di ekshibishon kontra Andruw Jones i Rakuten Golden Eagles dia 22 di febrüari próksimo.

E shortstop Kubano, Aledmys Diaz huntu ku e pitcher Kubano Odrisamer Despaigne a tene un ‘showcase’ na e kompleho di Spring Training di San Diego Padres. Mas ku 20 ekipo di Liga Grandi a manda nan skout nan pa bin wak e Kubano nan. Tabata tin entre otro skout nan di Yankees, Cardinals, Blue Jays, Mariners, Padres i Giants. E dos hungadó nan tin pensa di tene sigur kuater ‘showcase’ mas. Esaki nan lo keda tene den estado di Florida.

E ekipo di Los Angeles Dodgers ta sigui agresivo den nan búskeda di hungadó nan internashonal. E ekipo a firma e outfielder Panameño di 18 aña, Carlos Mosquera.

Manera ta konosí, Cuba a manda nan promé ekipo den mas ku 50 aña Serie del Caribe. Esaki tabata motibu ku skout nan di Liga Grandi a bai den gran kantidat Venezuela pa wak e Kubano nan. Segun informashon nan tin kuater Kubano ku a resaltá: e outfielder, Alfredo Despaigne, e segunda base Jose Fernandez, tersera base Yulieski Gourriel i pitcher Norge Ruiz.

Seattle Mariners a anunsiá nan presensia na Repúblika Dominikana ku apertura di nan Akademia di Beisbòl na Boca Chica. Anteriormente e ekipo tabata kompartí un kompleho ku Los Angeles Dodgers. E kompleho ku ta bibienda pa 80 hóben, a kosta $7 mion i tin tres vèlt di beisbòl, ‘batting cage’ bou di dak, sala di peso, sala pa duna les i kamber pa drumi. Banda di duna e prospekto pelotero nan edukashon den beisbòl tambe nan lo haña les di ingles i kòmpiuter.

E ekipo di Seattle Mariners a anunsiá ku ofisialmente nan a firma pitcher Fernando Rodney. E akuerdo ta un akuerdo di dos aña pa $14 mion. Temporada pasa e ‘closer’ Dominikano a salba 37 wega ku un efektividat di 3.38 pa Tampa Bay Rays.

E negosiashon nan entre outfielder Nelson Cruz i Seattle Mariners a pega. Aparentemente tin un desakuerdo riba e salario di Cruz. E ekipo di Mariners no ke paga loke Nelson Cruz ta pidiendo. Tur kos ta mustra ku Seattle a kuminsá pone atenshon na otro prioridat nan.

Derek Jeter ku a anunsiá e siman aki su retiro for di beisbòl Liga Grandi na final di temporada, lo papia ku prensa otro siman. Jeter ya ta na Spring Training pero a bisa ku e ta warda te ora henter e ekipo ta huntu otro siman pa papia riba su retiro for di beisbòl.

Leshon na skouder, tin outfielder di Los Angeles Dodgers, Yasiel Puig riba un programa di entrenamentu adaptá. Segun e manager di e ekipo, Don Mattingly, no ta nada serio pero komo prekoushon nos no ta lag’e tira te ora nos sa ta kiko ta pasando ku su skouder.

February 13, 2014

BEISBOL: Breve Deporte Awe

E pelotero Kurasoleño, Jonathan Schoop ya ta na kampamentu di entrenamentu di Baltimore Orioles. E ekipo di Baltimore Orioles ta kuminsá nan promé entrenamentu ku ekipo kompletu di 19 di febrüari próksimo. Segun informashon nan, Schoop tabata tin ku regla algun kos di su visa algun siman atras, pero tur kos ta resolve i e hungadó a yega Spring Training trempan.

E kapitan di New York Yankees, Derek Jeter a anunsiá ku e temporada di 2014 lo ta su ultimo. Jeter, ku na yüni próksimo ta kumpli 40 aña di edat, ta bai drenta su di 20 temporada den Liga Grandi. E ‘rookie of the year’ di aña 1996 a forma parti di All-Star Game na 13 okashon, tambe e la gana wante di oro na 5 okashon i a gana Seri Mundial na 5 okashon ku New York Yankees.

Segun Miguel Cabrera di Detriot Tigers e ta sinti’e mas fuerte despues di operashon ku e tabata tin na final di temporada ultimo. E hungadó mas balioso di ultimo dos temporada nan a bisa, “mi ta sinti mi liber, ta manera mi por hasi tur kos awor. Mi ta sinti liber, kla pa kuminsá Spring Training.”

Segun informashon nan, e ekipo di Philadelphia Phillies a yega na un akuerdo ku pitcher A.J. Burnett. E ekipo mes no a konfirmá esaki, pero fuente nan ta bisa ku Burnett a bai di akuerdo ku un kontrakt di un aña pa $16 mion.

Pitcher di Philadelphia Phillies, Cole Hamels a anunsiá ku e lo kuminsá temporada 2014 riba lista di hungadó leshoná. Segun Hamels e no ta sinti ku su brasa robes ta 100 porshento.

Pitcher di Seattle Mariners, Hisashi Iwakuma probablemente lo no habri temporada ku e ekipo. Esaki despues ku e habridó a leshoná un dede na su man di picha. E no ta nada serio e general manager di e ekipo a bisa pero Iwakuma tin ku keda kuater pa seis siman sin picha.

Segun fuente nan, Los Angeles Dodgers a yega na un akuerdo tentativo ku shortstop Kubano, Erisbel Arruebarruena. E ekipo mes no a konfirmá esaki ainda. Ainda falta un eksámen físiko di e hungadó i tambe resolve algun problema legal i tambe di imigrashon.

General manager di Texas Rangers, Jon Daniels a bisa ku e no ta kere ku Nelson Cruz lo firma ku Texas. “Periódikamente mi ta den kontakto ku e agente di e hungadó, pero nada no a kambia,” Daniels a bisa. “Mi ta kere ku e ta firmá ku un otro ekipo.”

February 13, 2014

Jurickson Profar ku leshon menor na skouder

ARLINGTON, TEXAS – E ekipo di Texas Rangers a informá ku e segunda base, Jurickson Profar lo no ta den kondishon óptimo pa kuminsá Spring Training. E hóben Kurasoleño ta sufriendo di tendinitis na su skouder drechi.

Segun e General Manager di Texas Rangers, Jon Daniels, Jurickson por hasi tur kos ku eksepshon di tira. Ku tur probabilidat Profar mester, por lo ménos un siman promé ku e por kuminsá tira.

“E por partisipá den tur kos ku e mester pa e por ta kla pa komienso di temporada. Ta solamente e tiramentu,” Daniels a bisa, “e hungadó lo ta mas of ménos un siman atras den preparashon.”

Temporada pasa Jurickson a kuminsá e temporada ku e ekipo di Round Rock Express den tripel A promé ku e la keda promové pa Liga Grandi den mei. Ku e ekipo di Texas Rangers, Jurickson a bati pa un promedio di .234, ku 11 doblete, 6 honron i 26 kareda empuha.

Despues ku temporada di Liga Grandi a terminá, Jurickson a hunga durante un luna ku e ekipo di Tigres del Licey na Repúblika Dominikana. Aki nan Jurickson a bati pa un promedio di .284 den 25 wega.

February 12, 2014February 12, 2014

BEISBOL: Breve Deporte Awe

Justin Verlander ta kere ku e lo ta kla pa kuminsá temporada di beisbòl. E pitcher di Detroit Tigers mester a keda opera despues di un leshon den desèmber ultimo. “Miéntras tantu ku mi no bolbe leshoná den Spring Training lo mi ta kla,” Verlander a bisa. E pitcher ta pensa ku sinku salida den Spring Training ta sufisiente pa pone den kondishon óptimo pa e temporada 2014.

New York Yankees ofisialmente a introdusí pitcher Masahiro Tanaka den un konferensia di prensa ku a konta ku mas of ménos 200 periodista. Tanaka a yega New York ayera mainta despues ku e la charter un Boeing 787 serka Japan Airlines pa $195.000. E avion ku tin alrededor di 200 asiento a yega New York ku solamente Tanaka, su kasa, nan kachó i tres otro invitado.

Èks pitcher di Liga Grandi i Salon di Fama, Nolan Ryan a keda kontratá pa Houston Astros komo konsehero. Ryan lo ta konsehero pa e doño di e ekipo, Jim Crane, e general manager Jeff Luhnow i Reid Ryan.

Pitcher, Roy Oswalt a anunsiá su retiro for di beisbòl profeshonal. Segun e pitcher, “aña pasa no tabata un di mi mihó aña nan, mi a leshoná i mi no por a hasi tur lokual ku mi tabata ke. Ma pensa ku ta tempu pa kuminsá ku algu otro. Mi yu nan ta birando grandi i mi ke ta mas na kas.”

Cody Ross, outfielder di Arizona Diamondbacks a haña lus bèrdè pa partisipá na Spring Training. Esaki despues ku e hungadó a leshoná na ougùstùs di aña pasa i mester a opera.

Miami Marlins ta ofisialisá akuerdo ku pitcher Carlos Marmol. E ekipo i Marmol a yega na un akuerdo inisial for di siman pasa djaweps, pero esaki tabata pendiente eksámen físiko. Marmol a yega na un akuerdo di un aña ku Marlins pa un montante di $1,25 mion.

February 12, 2014

Kenley Jansen ta yega na akuerdo ku Los Angeles Dodgers

LOS ANGELES – E ekipo di Los Angeles Dodgers a yega na un akuerdo ku pitcher, Kenley Jansen. E akuerdo ta un akuerdo di un aña pa un montante di $4.3 mion.

Den un deklarashon Jansen a bisa, “bo ta mira bek, un catcher, luchando ku bateo, nan ta pone bu riba montikulo i nuebe luna despues bo ta den Liga Grandi. Ta inkreibel kon kos ta bai, asina lihé. Sin bo sa, bo ta firmando un kontrakt mionario. Hopi impreshonante. Mi tin ku keda humilde. Mi no sa kiko pa bisa. Mi tin ku mehorá mi mes kada aña.”

Kenley su kaso dilanti e panel di arbitrahe tabata di skedjel pa febrüari 18 na Tampa, Florida. Jansen tabata pidi $5.05 mion i Dodgers a ofresé $3.5 mion. Finalmente, e dos partido nan a topa na mitar kaminda.

Jansen temporada pasa tabata tin un rèkert di 4-3, ku un efektividat di 1.88 i 28 wega salba.

February 12, 2014February 12, 2014

Kargo mas grave kontra Wladimir ‘Coco’ Balentien ta keda kanselá

MIAMI, FLORIDA – E kargo kontra Wladimir Balentien di minamentu di libertat di su kasa of na ingles, ‘false imprisonment’ a keda kanselá. Esaki ta loke dokumento nan di korte ta mustra despues di kontinuashon di e kaso di violensia doméstiko kontra di Wladimir Balentien. E kargo di minamentu di libertat tabata e kargo mas grave ku tabata tin den e kaso di Wladimir.

Pa motibu ku e kargo di minamentu di libertat a keda kanselá, mes ora hues a manda e kaso pa ‘county court’. ‘County court’ ta responsabel pa atendé ku delito nan ménos grave. Ainda e kargo di agreshon kontra Karla Balentien ta keda. Banda di esaki fiskal a presentá un kargo nobo. E kargo nobo ku a keda presentá ta e kargo di entrada sin permit of na ingles ‘trespass’.

Hues Spencer Multack lo husga e kaso awor. Te ainda no tin un fecha stipulá pa kontinuashon di e kaso.

Wladimir mes no tabata na e kontinuashon di e kaso. E pelotero a haña permit pa biaha i ya ta na Hapon preparando pa e temporada di beisbòl profeshonal Hapones.

February 11, 2014

Breve Deporte Awe

Notisia di deporte den un forma breve.

Cleveland Indians ta anunsiá ku nan a yega na un akuerdo di kuater aña ku outfielder Michael Brantley. E akuerdo ta pa $25 mion ku opshon pa un aña adishonal pa $11 mion. Temporada pasa Brantley tabata tin un promedio di .284 ku 10 honron, 26 doblete, 3 tripel i 73 kareda empuha.

Despues ku Philadelphia Phillies a anunsiá ku nan no ta interesá na firma niun hende promé ku Spring Training, ta parse awor ku tog nan tin interes pa firma algun hungadó. Segun informashon nan Philadelphia aktivá mente ta buskando servisio di pitcher A.J. Burnett.

General Manager di Minnesota Twins, Terry Ryan a keda diagnostiká ku kanser, esaki Ryan mes a konfirmá. Pa motibu di tratamentu nan médiko ku lo tin ku tuma lugá e general manager lo no ta ku e ekipo di Minnesota Twins na Spring Training.

Pelotero Albert Pujols di Anaheim Angels ta laga kaso di difamashon kontra èks pelotero Jack Clark kai. Pujols a file un kaso di difamashon kontra Clark despues ku Clark a bisa ku Pujols tabata usa droga pa mehorá su prestashon. Den un deklarashon, Jack Clark a bisa ku e ta distansia su mes di e deklarashon nan ku e la hasi i ta pidi diskulpa na Albert Pujols.

Pitcher di New York Yankees, Masahiro Tanaka resientemente a risibí su visa i lo yega Merka awe. Promé ku e biaha pa Spring Training na Florida lo tin un konferensia di prensa na New York. Tanaka a firma un kontrakt di shete aña pa $155 mion ku Yankees.

Segun e kapitan di New York Yankees, Derek Jeter, e ekipo ta kla pa sigui sin Alex Rodriguez. Esaki despues ku djabièrnè ultimo Alex Rodriguez a aseptá su suspenshon pa e temporada di beisbòl 2014.

Texas Rangers a yega na un akuerdo di liga menor ku invitashon na Spring Training ku pitcher Tommy Hanson. Hanson tabata tin un rèkert di 4 gana i 3 pèrdí ku un efektividat di 5.42 ku Anaheim Angels temporada pasa.

E ekipo di Washington Nationals a yega na un akuerdo di un aña ku e relevista Tyler Clippard.