Beisbòl Archives | Page 67 of 107

February 7, 2014

Atlanta Braves pensando riba un akuerdo di ekstenshon pa Andrelton Simmons

ATLANTA – Segun informashon nan, e ekipo di Atlanta Braves ke purba na yega na un akuerdo di ekstenshon ku Andrelton Simmons. Esaki despues ku e ekipo a sigurá Freddie Freeman pa ocho ana i Jason Heyward pa dos ana.

E kolumnista di New York Post, Joel Sherman a duna di konosé ku awor ku Freeman a keda firma pa término largu, Braves ke purba yega na un akuerdo ku Andrelton Simmons i picher Julio Teheran.

Simmons a kobra un salario di kasi mei mion dollar temporada pasa i ainda tin un aña mas promé ku e ta elegibel pa arbitrahe salarial. Saliendo for di e punto di bista di Atlanta Braves, ta mas ku lógiko ku nan ke purba ekstendé e kontrakt di Simmons mas pronto ku ta posibel. Mientras mas e ekipo warda, mas chèns tin ku e shortstop Kurasoleño su balor ta sigui subi.

Den e temporada tras di lomba Simmons a batí pa un promedio di .248 ku 17 honron i 59 kareda empuha. Defensiva mente Simmons tabata aun mas mihó kometiendo solamente 14 eror den 753 oportunidat. Esaki tabata motibu ku Andrelton a gana su promé wante di oro den su promé temporada kompletu den Liga Grandi.

January 31, 2014

Gigantes de Rivas eliminá for di Seri Latinoamerikano

MONTERIA, COLOMBIA – E ekipo di Randall Simon, Gigantes de Rivas a keda eliminá for di e Seri Latinoamerikano na Monteria, Colombia. Gigantes de Rivas a hunga kontra Indios de Urracá Panama pa asina kibra e tripel empate ku tabata tin den e seri. Un biaha mas Rivas a sa di bai ariba den trempan di e partido pero nan no por a mantené e bentaha aki. Finalmente, e ekipo di Gigantes de Rivas a pèrdè ku skor di 10 pa 5 kontra Indios de Urracá.

Den e partido Randall Simon a konektá un hit den tres turno na bate, ku un base por bola.

January 31, 2014

Roger Bernadina ku akuerdo di Liga Menor ku Cincinnati Reds

CINCINNATI – E ekipo di Cincinnati Reds a anunsiá ku nan a yega na un akuerdo ku Roger Bernadina pa un kontrakt di liga menor ku invitashon na Spring Training. Si na final di Spring Training, Roger logra keda ku e ekipo di Liga Grandi di Cincinatti Reds e lo gana $1 mion den temporada 2014. Bernadina tin e posibilidat di sali for di e kontrakt riba 18 di mart, 28 di mart i 1 di yüli den kaso ku e no keda añadí na e roster di 25 hungadó di Reds.

Bernadina a habri temporada 2013 ku Washington Nationals den Liga Grandi. Den 85 partido ku Nationals, Roger a logra un promedio di .178, ku 2 honron i 6 kareda empuha. Na ougùstùs, Bernadina a keda laga den libertat pa Nationals i algu dia despues e la firmá ku Philadelphia Phillies. Ku Phillies den 27 partido, Roger a bati pa un promedio di .187 ku 2 honron i 5 kareda empuha. Na òktober 2013, Roger a opta pa bira agente liber.

January 31, 2014

Randall Simon i Gigantes de Rivas ta keda na bida den e Seri Latinoamerikano

MONTERIA, COLOMBIA – E ekipo di Randall Simon, Gigantes de Rivas ta keda na biba i ala bes kompliká kos den e den Seri Latinoamerikano na Monteria, Colombia. Gigantes de Rivas a logra nan promé viktoria den e seri ganando di Tigres de Cartagena ku skor di 8 pa 4.

Ku e viktoria di Gigantes de Rivas riba Tigres de Cartagena i e derota di Brujos de los Tuxtlas riba Indios de Urracá awor tin un tripel empate den e seri. Brujos de los Tuxtlas Mexico ku ta invikto den e seri ta e úniko ekipo ku outomátikamente a pasa pa e final djasabra promé di febrüari.

Pa kibra e empate, e ekipo di Gigantes de Rivas i Randall Simon ta hunga awe kontra Indios de Urracá Panama. E ganadó di e partido aki ta hunga mas lat kontra Tigres de Cartagena Colombia. E ganado di e ultimo partido aki ta pasa pa final pa hunga kontra Brujos de los Tuxtlas Mexico, djasabra.

Den e partido di ayera Randall Simon a konektá un hit den kuater turno na bate, ku un base por bola i un kareda anotá.

January 30, 2014

Gigantes de Rivas i Randall Simon ta pèrdè nan di dos wega

MONTERIA, COLOMBIA – E ekipo di Gigantes de Rivas i Randall Simon ta pèrdè nan di dos partido den Seri Latinoamerikano na Monteria, Colombia. Kontrali na e promé partido ku e ekipo di Rivas a kai atras for di den prinsipio di e wega, den e partido aki e ekipo Nicaraguense a bai ariba ku 6 kareda den promé ining.

Apesar di kai atras for di trempan den e partido e ekipo di Los Brujos de los Tuxtlas Mexico no a entrega. Den di seis entrada nan ta empatá e partido na 7 kareda i den di ocho entrada Los Brujos de los Tuxtlas ta anotá e kareda di viktoria pa gana di Rivas ku skor di 8-7.

Den e partido aki Randall Simon a konektá un hit den 5 turno na bate i anotá un kareda.

Awe Gigantes de Rivas ta hunga kontra e ekipo di Tigres de Cartagena.

January 29, 2014January 31, 2014

Randall Simon i Gigantes de Rivas ta pèrdè nan promé partido

MONTERIA, COLOMBIA – E ekipo di Gigantes de Rivas ku ta representá Nicaragua den Seri Latinoamerikano na Monteria, Colombia a pèrdè nan promé partido den e seri. E ekipo di Randall Simon a kai atras kontra e ekipo di Indios de Urracá di Panama for di den inisio di e partido i nunka no por a bin bek. E partido a finalisá ku skor di 15-13 pa e ekipo di Indios de Urracá di Panama.

Den e partido Randall a konektá un doblete den kuater turno na bate i a risibí dos base por bola. Randall i Gigantes de Rivas ta bek riba tereno awe ora nan hunga kontra Los Brujos de los Tuxtlas di Mexico.

January 29, 2014

Andruw Jones bek na Hapon

HAPON – E pelotero yu di Kòrsou, Andruw Jones ta bek na Hapon pa su di dos temporada ku e ekipo di Rakuten Golden Eagles. E ekipo di Golden Eagles ta kuminsá nan kampamentu di entrenamentu promé di febrüari próksimo. E kampamentu aki lo dura te dia 13 di febrüari i e partido nan di pre-temporada ta kuminsá dia 16 di febrüari te ku 23 di mart. Dia 28 di mart e temporada regular di beisbòl profeshonal Hapones ta kuminsá.

Andruw ta optimista ku e ekipo di Golden Eagles tin un bon chèns pa ripití komo kampion e temporada aki. Esaki apesar ku e ekipo a pèrdè na picher estelar kual ta Masahiro Tanaka. Tanaka ku tabata tin un rèkert di 24 gana i 0 pèrdí a firma un kontrakt di $155 mion ku New York Yankees.

Andruw a bati pa un promedio di .243 ku 26 honron i 94 kareda empuha temporada pasa i a firma un kontrakt di $3.8 mion pa un temporada ku Golden Eagles.

January 28, 2014

Wladimir ‘Coco’ Balentien ta bek na Hapon

HAPON – Wladimir ‘Coco’ Balentien ta bek na Hapon, esaki a keda anunsiá pa e pelotero awe. Wladimir a pone un mensahe riba su paginá di Twitter bisando, “Nice to be back in Japan.”

Siman pasa den korte e abogado nan di Balentien a pidi pa e pelotero haña su pasport bek i permit pa biaha. Esaki a keda aprobá pa e hues apesar ku e fiskal den e kaso no tabata di akuerdo.

Wladimir ku ta keda sospecha di violensia doméstiko kontra su kasa Karla Balentien tabata tin un temporada históriko den 2013 kaminda e la konektá 60 honron den e temporada di beisbòl profeshonal Hapones. Kibrando asina aki e rèkert di Sadaharu Oh ku na aña 1964 a konektá 55 honron. Tambe ‘Coco’ a keda nombra komo e hungadó mas balioso di e temporada 2013 den Liga Sentral di Beisbòl Profeshonal Hapones.

January 24, 2014

Wladimir Balentien a deklará su mes no kulpabel den kaso di violensia doméstiko

MIAMI, FLORIDA – E pelotero yu di Kòrsou, Wladimir Balentien a deklará su mes no kulpabel den kaso di violensia doméstiko kontra su kasa Karla Balentien. E abogado nan di Balentien a trese e deklarashon aki di forma eskrito pa e hues den e kaso, Dennis Murphy.

Tambe e abogado nan di Balentien a pidi pa e pelotero haña su pasport bek i permit pa biaha. Esaki a keda aprobá pa e hues apesar ku e fiskal den e kaso no tabata di akuerdo. Segun e fiskal, Balentien no ta siudadano Amerikano i e tin miedu ku si e bai Hapon e lo no regresá pa su siguiente fecha den korte.

Wladimir tabata tin un temporada históriko den 2013 kaminda e la konektá 60 honron den e temporada di beisbòl profeshonal Hapones. Kibrando asina aki e rèkert di Sadaharu Oh ku na aña 1964 a konektá 55 honron. Tambe ‘Coco’ a keda nombra komo e hungadó mas balioso di e temporada 2013 den Liga Sentral di Beisbòl Profeshonal Hapones.

January 24, 2014

Otrabanda ku su propio ekipo di Little League

WILLEMSTAD – Riba dia 10 di October 2013, Otrabanda Jewels Little League baseball team a mira lus di dia i for di e fecha aki tur siman religiosamente, djamars, djaweps i djasabra, tereno di beisbòl pega ku SVB ta esenario pa e mucha nan di Otrabanda desplegá nan talento i abilidat nan deportivo.

Ku esaki awor Otrabanda tambe tin su tim di little league baseball, ku ta bai representá nos Otrabandista nan den kampionato di liga Pabou 2014. Den un enkuentro ayera, e ekipo di Otrabanda Jewels a hasi boutismo di nan uniform i tambe presentashon ofisial di e ekipo.