Category: Beisbòl

Posted on

Jair Jurrjens, Shairon Martis i Roger Bernadina ketu bai agente liber

WILLEMSTAD – E tres pelotero nan yu di Kòrsou, Jair Jurrjens, Shairon Martis i Roger Bernadina ainda no tin un ekipo pa hunga ku ne den temporada 2014. Tur e tres hungadó nan aki a figura den Liga Grandi temporada pasa. Pa e picher, Jurrjens esaki no ta algu nobo. Aña pasa Jair a yega na un akuerdo ku e ekipo di Baltimore Orioles riba 15 di febrüari 2013.

E fecha pa picher, kècher i hungadó nan leshoná reportá na Spring Training di Liga Grandi ta kuminsá 13 di febrüari próksimo. E fecha boluntario pa otro hungadó nan ta 18 di febrüari. Tur hungadó mester tei pa dia 25 di febrüari. E fecha nan aki ta varia un tiki pa e ekipo nan di Los Angeles Dodgers i Arizona Diamondbacks. E dos ekipo nan aki lo biaha 16 di mart pa Oustralia, kaminda nan lo habri e temporada di Liga Grandi di 22 di mart i 23 di mart, pues nan hungadó nan mester tei un tiki mas tempran den febrüari.

Jair Jurrjens

Jair Jurrjens a habri temporada 2013 den Tripel A ku ekipo di Norfolk Tides. Ku Tides, Jurrjens tabata tin 16 salida for di kua e la logra un rèkert di 6 wega gana i 6 wega pèrdí ku un efektividat di 4.18.

Den luna di mei, Baltimore a subi Jurrjens pa Liga Grandi. Aki nan Jair no a logra desishon den e dos wega nan ku e la figura den dje i tabata tin un efektividat di 4.91. Un luna despues, na yüli, Orioles a laga Jair den libertat i e ta firma un siman despues ku Detroit Tigers. Aki nan e pelotero a keda asigná na e ekipo di Tripel A Toledo Mud Hens kaminda e tabata tin 7 salida. Den e 7 salida nan aki Jurrjens a logra un rèkert di 1 wega gana i 4 wega pèrdí ku un efektividat di 5.49. Na novèmber 2013 Jair a  opta pa bira agente liber.

Shairon Martis

Shairon Martis a habri temporada 2013 ku ekipo di Rochester Red Wings den Tripel A. Aki nan Martis a mira akshon den 42 partido, kaminda e la parti tempu entre relevista i habridó. Shairon tabata tin un rèkert di 2 wega gana i 4 pèrdí den Tripel A, ku un efektividat di 4.26. Den sèptèmber a pelotero a keda yama pa subi Liga Grandi ku Minnesota Twins.

Ku Twins, Shairon a figura den 6 partido komo relevista i tabata tin un rèkert di 0 wega gana i 1 wega pèrdí ku un efektividat di 5.59. Na òktober 2013 e petishon di Martis pa bira agente liber a keda aprobá.

Roger Bernadina

Roger Bernadina a habri temporada 2013 ku Washington Nationals den Liga Grandi. Den 85 partido ku Nationals, Roger a logra un promedio di .178, ku 2 honron i 6 kareda empuha. Na ougùstùs, Bernadina a keda laga den libertat pa Nationals i algu dia despues e la firmá ku Philadelphia Phillies. Ku Phillies den 27 partido, Roger a bati pa un promedio di .187 ku 2 honron i 5 kareda empuha. Na òktober 2013, Roger a opta pa bira agente liber.

Posted on

Randall Simon ta titulá kampion ku Gigantes de Rivas

MANAGUA, NICARAGUA – E ekipo di Randall Simon, Gigantes de Rivas a titulá kampion den e Liga di Beisbòl Profeshonal na Nicaragua. Esaki despues ku Gigantes a gana di Indios del Bóer ku skor di 15 pa 9.

Gigantes ku tabata e ekipo bishitante a habri kabes di nuebe ining perdiendo ku skor di 9 pa 8. Pero a batido designa di Gigantes, Randall Simon a habri e ining ku un base por bola. Esaki tabata e komienso di un ‘rally’ di shete kareda pa Gigantes.

Simon den e partido no e konektá ningun hit den dos turno ofisial na bate pero a logra tres base por bola for di kua un intenshonal.

Posted on

Jonathan Schoop den mihó prospekto nan pa aña 2014

NEW YORK – E paginá di internet MLB.com a anunsiá e 10 mihó prospekto nan na segunda base pa tene kuenta ku ne den 2014. Den e top 10 nan, posishoná na number seis ta aparesé e prospekto Kurasoleño, Jonathan Schoop.

Segun e ‘scouting report’ ta bisa, “Schoop ta otro talentoso hungadó di kuadro for di Kòrsou, similar na Andrelton Simmons i Jurickson Profar. Den sèptèmber ultimo e la subi den Liga Grandi, konektando honron den su debut.

Riba e bateo di Schoop e reporte ta bisa ku, “Schoop ta un batido agresivo i su swing duru ta produsí un kontakto fuerte. E tin un poder riba promedio, pero mester mehorá su rekonosementu di picheo pa demostrá e poder aki kompletamente.”

“E pelotero Kurasoleño a hunga mayoria posishon den kuadro, pero a keda usa mas tantu na segunda base pa e organisashon di Orioles. Miéntras ku Schoop su fleksibilidat ta hasie un kandidato pa un hungadó di utilidat, su abilidat ku e tin ta hasie un hungadó di tur dia kaminda Orioles disidí na pone hunga defensiva mente,” e ‘scouting report’ a terminá bisando.

Te ainda tur kos ta mustra ku Schoop lo kuminsá e temporada 2014 den Tripel A ku e ekipo di Norfolk Tides. Segun e Vise Presidente di Baltimore Orioles, Dan Duquette, “Schoop por probechá di un tiki mas eksperensia promé ku e wòrdu yama komo hungadó di tur dia den Liga Grandi.”

Posted on

Randall Simon grandi den viktoria di Gigantes de Rivas

MANAGUA, NICARAGUA – Randall Simon i e ekipo di Gigantes de Rivas ta pone nan mes na un viktoria di korona nan mes kampion den e Liga di Beisbòl Profeshonal di Nicaragua. E ekipo di Gigantes a gana e di kuater partido den e seri kontra Indios del Boer ku skor di 16 pa 7.

Den e partido aki Simon a sirbi komo batido designa i tabata e kuarto bate pa e ekipo di Gigantes. Randall a konektá 2 hit den 3 turno na bate, anotá 3 kareda i empuha 3. E siguiente partido den e seri final ta djamars 21 di yanüari próksimo.

Posted on

Kenley Jansen a pidi $5.05 mion den arbitrahe

LOS ANGELES, CALIFORNIA – E pelotero Kenley Jansen ku a drenta e proseso di arbitrahe salarial den siman tras di lomba a pidi un salario di $5.05 mion for di Los Angeles Dodgers. E ekipo na su turno a ofresé Jansen un salario di $3.5 mion.

Kenley lo sinta na mesa huntu ku Dodgers pa wak si nan por yega na un akuerdo. Den kaso ku Jansen i Dodgers no yega na un akuerdo, e kaso lo keda skucha pa e ‘panel’ di árbitro. Na su turno e panel di árbitro ta disidí e ora ei si e hungadó of e ekipo ta haña loke e la pidi, despues ku kada un defendé nan propuesta. E ultimo aki lo tuma lugá entre 1-21 di febrüari próksimo, si yega asina leu.

Posted on

Curt Smith ta regresá organisashon di St. Louis Cardinals

LINCOLN, NEBRASKA – E ekipo di Lincoln Saltdogs a anunsiá ku nan a bende e kontrakt di Curt Smith ku e organisashon di St. Louis Cardinals. Smith di 27 aña ta regresá e organisashon ku a draft e na aña 2008 for di Universidad di Maine. Curt a keda tres aña ku e organisashon di Cardinals kaminda e la logra gana e premio di hungadó di aña den ‘Appalachian League’.

Den 2013 Curt a habri e temporada den dòbel A ku e ekipo di New Britain Rockcats. E hóben yu di Kòrsou a keda ku Rockcats te na yüli 2013, batiendo pa un promedio di .231, ku 4 honron i 19 kareda empuha den 45 partido.

E di dos mitar di temporada Curt tabata ku e ekipo di Lincoln Saltdogs den Liga Profeshonal di Beisbòl Independiente. Ku Saltdogs, Smith a bati pa un promedio di .316, ku 5 honron i 27 kareda empuha den 49 partido.

Posted on

Wladimir ‘Coco’ Balentien ta pidi despensa pa loke a pasa

MIAMI, FLORIDA – Wladimir ‘Coco’ Balentien huntu ku su abogado nan a tene un konferensia di prensa ayera na Miami. Wladimir a lesa loke e kier a deklará i no a bisa nada mas durante e konferensia di prensa.

Segun e abogado di e pelotero, David Rothman, “nos a instruí Wladimir pa no kontesta pregunta i e motibu ta simpel, tin un kaso penal pendiente i nos no ke hinka nada den e kaso ku no mester tei, inkluyendo kontesta riba pregunta.”

Den mes un rosea e otro abogado di ‘Coco’, Omar Malone a bisa, “mi tin sigur ku boso ta komprendé ku nos no por bai den detaye di e kaso, pero ta nesesario pa menshona ku ‘Coco’ no a kibra ku lei, pero miéntras tantu e kaso ta pendiente nos no por drenta den detaye i echo nan di e kaso.

Na su turno Wladimir a deklará por parti e siguiente: “Mi tin bèrgwensa di ta aki nan awe, pero ta mi mes falta. Mi ta pidi despensa na mi famia, mi ekipo i na e hende nan di Hapon. Dios a bendishona mi ku un bunita yu muhé. Mi stima mi famia, mi tin un dushi trabou i e oportunidat pa biba i traha na un di e pais nan mas importante na mundu. Nunka lo mi no tume leve, ku mi por hunga beisbòl na Hapon i gana mi pan di kada dia. Mi ta hopi gradisí pa e bendishon nan ei. Pero mi a kometé un fayo i awor mi ta aki nan. Mi ke gradisí mi famia pa nan apoyo i nan amor, mi ekipo pa para mi tras i e hues i fiskal pa trata mi di manera hustu. Mi diskulpa, mi ta spera ku e hende nan di Hapon por duna mi un otro oportunidat. Ora tur e bèrdat bin dilanti, mi sa ku tur kos lo ta bon,” Balentien a terminá bisando.

Wladimir ta liber riba fiansa pendiente pa su siguiente aparishon den korte dia 24 di yanüari próksimo.

Posted on

Fiskal ta kanselá tres di e kuater kargo nan kontra Andruw Jones

GWINNETT, GEORGIA – Tres di e kuater kargo nan ku a keda presentá kontra Andruw Jones den kaso di violensia doméstiko a keda anulá pa e fiskal den e kaso. Esaki despues ku Andruw a deklará su mes kulpabel di kondukta for di òrdu.

E tres otro kargo nan ku a keda kanselá den e kaso, ta e kargo nan di agreshon doméstiko kontra Andruw su èks kasa Nicole Jones. Pa e kargo di kondukta for di òrdu, Andruw a keda sentensiá na un multa di $1305 i un periodo di 11 luna i 29 dia di libertat kondishonal.

Posted on

Wladimir ‘Coco’ Balentien ta sali liber awe riba fiansa

MIAMI, FLORIDA – E abogado di divorsio Evan Marks a konfirmá ku Wladimir tabata sera te ku awe. Algun ratu pasa tabata tin e ‘bond hearing’ segun Marks, i hues a laga Balentien liber riba fiansa.

Marks ta abogado di Wladimir den e kaso di divorsio ku su kasa Karla Balentien. Marks no ta e abogado den e kaso di violensia doméstiko pero ta bisa ku e ta na altura ku Wladimir tabata sera te ku awe i ku e lo keda laga den libertat awe.

Segun e abogado no ta strañ’e ku Wladimir a keda sera algun dia ya komo e insidente a tuma lugá den wikènt, pues ta dura algun dia promé ku un hues por tende e kaso. Mas aya e abogado a bisa ku, “Wladimir ta un hende hopi dushi, e tin hopi rèspèt pa Balentien i e ta un bon hende. E no ta un persona asina, e mester ta riba tereno di beisbòl konektando honron.”

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media