MERKA — Jair Jurrjens tabata tin un ‘showcase’ pa algun ofisial di e ekipo di Kansas City Royals ayera, esaki segun fuentenan di Liga Grandi.
E ‘showcase’ aki a tuma luga na e kompleho di Spring Training di Kansas City Royals na Surprise, Arizona. E kompleho di Royals no ta muchu leu for di e kompleho di San Frnacisco Giants na Scottsdale, Arizona kaminda e selekshon Hulandes di beisbol tin nan kampamentu di entrenamentu.
WILLEMSTAD — Resientemente District Administrator di Curaçao Little League, señor Urny Florán, a firma un akuerdo ku Fundashon Pa Nan, presidí pa señor Dennis Dambruck. E akuerdo ta enserá ku Fundashon Pa Nan ta ser enkargá ku organisashon di kampionato di Baseball pa hóbennan di 4 te ku 8 aña di edat, bou di reglanan di organisashon di Little League Internashonal, e asina yama divishon di Tee Ball i Pre- Infantil.
Den pasado organisashon di Curaçao Little League no tabatin un kampionato pa hóbennan di e edat aki. Ekiponan tabata hunga diferente torneo organisá dor di tersera kaminda nan ta hunga un kantidat mínimo di wega i ku reglanan diferente. Un otro punto di konsiderashon ta ku pa motibu ku no tin kampeonato ofisial di Little League hopi organisashon afiliá na Little League no tin interes di tin team den e divishon nan aki i ta opta pa kuminsá forma hóbennan na un edat mas grandi. Tambe District Administrator a konsiderá e echo ku organisashon mundial di Little League situá na Williamsport a tuma e desishon resientemente pa paisnan dediká mas atenshon na hóbennan na un edat mas yòn.
Ku firmamentu di e akuerdo aki Curaçao Little League ta dal e promé stap den formashon di hóbennan for di edat di 4 aña. Di e forma aki por siña e hóbennan na un edat mas yòn balornan di rèspèt, kurashi, karakter, lealtat i deportivismo i asina nan por ta mas mihó prepará den e divishonnan mas haltu pa hunga riba nivel nashonal i internashonal.
Curaçao Little League a skohe pa Fundashon Pa Nan, dor ku e fundashon tin komo meta edukashon di hóben na promé lugá. Fundashon Pa Nan tin eksperensia den organisashon di torneo di baseball. Último dos aña e fundashon a organisá kampionato pa e hóbennan di e edat aki. Den pasado Fundashon Pa Nan tabata enkargá ku un par di torneo pa hóbennan di 13 te ku 18 aña. Mester bisa ku tur e torneonan aki tabatin hopi éksito.
No tin niun duda ku e akuerdo aki lo benefisiá nos hóbennan i ku nos lo bai haña un kampionato na nivel pa nos futuro peloteronan. Inisio di e kampionato lo ta den kabamentu di mart próksimo.
MERKA — Djabierne tras di lomba tur tres pelotero di Korsou ku tabata elegibel pa arbitrahe salarial a yega na un akuerdo ku nan respektivo ekipon nan. Ku esaki tantu Didi Gregorius, Jurickson Profar i Jonathan Schoop ta evita e proseso di arbitrahe yegando na un akuerdo di un aña ku nan ekipo.
Didi Gregorius tabata e prome ku for di den trempan di djabierne a yega na un akuerdo di $5,1 mion ku e ekipo di New York Yankees. Jonathan Schoop a sigi ku akuerdo di $3,475 mion ku Baltimore Orioles. Por ultimo tabata Jurickson Profar ku tambe a logra evita arbitrahe yegando na un akuerdo di $1,005 mion ku Texas Rangers.
WILLEMSTAD — District Administrator di Curaçao Little League señor Urny Florán i FEBEKO, representá dor di su presidente señor Armin Konket, a firma akuerdo di koperashon pa kampeonato hubenil di aña 2017. Ta trata di un akuerdo di beisbòl pa hóbennan di 17 te ku 19 aña di edat. District Administrator i Presidente di FEBEKO a instalá un komishon pa organisá e kampeonato aki.
E kampeonato lo wòrdu hunga bou di kombinashon di reglanan di FEBEKO i di Little League. E kampeonato ta plania pa kuminsá den luna di mart 2017 i ta terminá fin di mei 2017. Dos selekshon di Liga Hubenil, bou di responsabilidat di District Administrator di Curaçao Little League, lo partisipá na e torneo Latinoamerikano Hubenil ku ta tuma lugá na Kòrsou di 21 pa 30 di yüli 2017.
LOS ANGELES — E ekipo di Los Angeles Dodgers a anunsia ofisialmente ayera ku nan a yega na un akuerdo ku e picher yu di Korsou, Kenley Jansen. Ta trata di un akuerdo di 5 aña pa $80 mion.
Jansen di 29 aña a keda honra temporada pasa ku e premio di Trevor Hoffman Relevista di Aña pa Liga Nashonal. Tambe Kenley a keda selekta pa su prome All-Star Game di su karera. Den 2016 Kenley tabata tin un rekert di 3-2 ku un efektividat di 1.83 i 47 partido salba den 53 oportunidat.
Segun informashonnan, Jansen lo risibi un bono di $4 mion i e sobra sen lo wordu paga di e sigiuente forma:
2017: $10 mion
2018: $10 mion
2019: $18 mion
2020: $18 mion
2021: $20 mion
Adishonalmente, Kenley por kibra e kontrakt despues di temporada 2019 i bira agente liber. E pelotero no tin un klousula kontra kambio den su kontrakt, pero lo risibi $1 mion kada biaha e keda kambia.
WILLEMSTAD — Torneo 100 aña MCB a drenta den simannan kulminante ku playoffnan final pa asina determiná kua ta e ekiponan ku lo batayá den final pa e título kampion di e torneo aki. Manera ya ta konosí, Torneo 100 aña MCB a ranka sali dia 24 di sèptèmber den kategoria Junior (13-15 aña) i Senior (16-18 aña). E torneo aki a ser hunga aña pasa bou di e nòmber RBI Curaçao i e aña aki a djòin e selebrashon di e spònser prinsipal MCB i a yama esaki Torneo 100 aña MCB.
Ekiponan di Junior league a hunga no mas ku 16 wega pa yega na e posishonnan final kaminda ta determiná ken lo hunga kontra ken den e playoff dal saka. Djadumingu último e playoff aki a kuminsá den divishon Junior i meskos ku aña pasa e ekipo ku a kaba na promé lugá den e buèlta regular a sa di gana su partido i pasa pa final. E aña aki esaki ta e ekipo di St. Maria ku awor ta sinta warda ken nan lo bai topa den final.
E kampion di aña pasa, Sta. Rosa, no a logra sobrebibí e promé wega di eliminatorio i a haña un pasashi pa bai kas despues di un derota kontra e ekipo di Brievengat ku ta esun ku lo bai purba di sali for di abou i bin gana e título. E sub kampionnan di aña pasa, Van Engelen, tambe mester a baha kabes pa e ekipo di Marchena ku aña pasa tambe a hunga un bon rònt eliminatorio i logra keda den e delaster tres nan. Montaña Abou tambe a sa di gana nan partido kontra St. Michiel ku tabata e debutantenan den e torneo di e aña aki.
E partidonan di Junior lo kontinuá djadumingu awor pero promé ku esaki lo bai haña djasabra e rònt eliminatorio di Senior. E partidonan programá ta:
8:30 Montaña Ariba vs. St. Michiel
10:45 Sta. Rosa vs. Brievengat
13:00 Van Engelen vs. Marchena
15:15 Ganadó 1 vs. Ganadó 2
E ganadó di e partido di 1or ta pasa mesora pa e gran final miéntras ku e pèrdèdó ta haña un chèns pa hunga bini bek.
Tantu e final di Junior komo di Senior lo ta un Best of three i tur dos ta kuminsá Djabièrnè 16 di desèmber i kaba djasabra dia 17.
Curaçao Baseball Week
E aña aki atrobe a forma All Star Game for di e ekiponan partisipante den Torneo 100 aña MCB i esakinan a midi forsa ku otro den e Curacao Baseball Week hungando Junior (djaweps) i Senior (djabièrnè). Tabata dos tremendo partido di nivel ku públiko por a disfrutá.
Durante di e partidonan aki tambe a hasi entrega di premio na e kampion pitcher i kampion bate di e respektivo divishonnan. Den Junior e kampion bate a resultá Nazir Rog di e ekipo di Sta. Maria i e kampion picher Cliyano Nahr di e ekipo di Montaña Abou. E premionan a ser entrega dor di Sr. Gino Valeriaan di MCB.
Den Senior e kampion bate a resultá Alex Henrietta di Van Engelen i e kampion picher Siamani Boekhoudt di Sta. Rosa. E premionan a ser entrega pa Dr. Jacobus di Fundashon Pa Nan.
For di aki e komishon organisadó kier a yama tur ekipo ku a partisipá danki pa nan partisipashon i deportivismo durante di e temporada 2016 den e Torneo 100 aña MCB. Tambe un danki na Sr. Hensley Meulens ku atrobe a koperá en grande ku bala pa e torneo por a drai. Naturalmente no por laga nos spònser prinsipal, Maduro & Curiel’s Bank afó i no tin nada mas ku apresio i elogio pa nan kontribushon. For di e promé dia MCB tabata para kla pa yuda i no a duda niun momentu pa yuda e komishon organisadó realisá e torneo ku ta drentando su parti final.
Un invitashon ta bai na pueblo di Kòrsou pa bin presensia nos futuro streanan den akshon e dos wikènt benidero aki. Pa informashon aktual por siguí nos tambe riba nos pagina di Facebook: rbicuracao i e weganan riba Gamechanger.
WILLEMSTAD — Blue Bay Curacao Baseball Week 2016 ta organisá klínika i seminario gratis pa tur mucha i entrenador di beisbòl. E seminarionan lo tuma lugá riba djasabra 26 i djadumingu 27 di novèmber na Renaissance Resort & Casino i na Tio Daou Ball Park. Riba djaluna 28, djamars 29 djarason 30 di novèmber i djaweps 1 di desèmber e muchanan lo ta den akshon durante e klínikanan na Tio Daou.
Oradonan internashonal
E seminarionan ta posibel ku kolaboráshon di KNBSB i University of Wisconsin – Whitewater. Ademas di diferente charlanan, e entrenadornan lo subi vèlt tambe pa partisipá na e seshonan di práktika. Oradonan internashonal lo bini Kòrsou pa kompartí nan konosementu i eksperiensia i pa asina engrandesé e konosementu di e entradornan lokal. John Vodenlich i Jerry Weinstein (University of Wisconsin – Whitewater)lo bini for di Merka pa trata e temanan: ‘preparashon prome ku wega’, ‘outfield’ i kon pa coach e basenan. Sidney de Jong na nomber di KNBSB lo papia riba ‘catching’ i ‘hitting’ i Steve Janssen i Eugene Kingsale lo sostenénan. Inskripshon pa e seminarionan ta posibel ahinda via e wèpsait: http://www.curacaobaseballweek.com/coach-seminars. Partisipashon ta gratis I pa tur dos dia lùnch i bebida ta inkluí.
Viahe pa un wega di MLB
Vincent Zrour, organisadó di e CBW: “Un evento espektakular lo kuminsá otro siman i pa medio di e evento aki e soño di hopi mucha lo bira realidat. Nos tin asina tantu talento riba nos isla i nan ta keda demonstrá ku nan por yega den e tòp di mundu. Esaki ta é oportunidát pa e muchanan i tur e fanátikonan di beisòl di Kòrsou por bin wak nan heroenan den akshon I siña for di nan. Tribi di soña! Tur e muchanan ku ta hunga beisòl na Kòrsou por inskribí gratis via nan entrenador pa e klínikanan” i via nos wèpsait: http://www.curacaobaseballweek.com/kids-clinics. Partisipashon ta gratis.
Hensley Meulens: “Nos ta bai eskohe for di kada klinika dos mucha a base di nan esfuerzo, nan gana di siña i talento. E muchanan aki, huntu ku ùn di nan mayornan lo biaha pa un wega di MLB na Miami den 2017. Esaki kiermen12 mucha in total. Naturalmente esaki ta un eksperensia tremendo”. Meulens ta ùn di e entrenadornan ku lo eskohe e muchanan.
E kategoria di Pre Infantil (14:30 – 16:00) i Minor League (17:30 – 18:30) ta tuma lugá riba djaluna 28 di novèmber na Tio Daou. E mesun muchanan di Minor League por partisipá djamars 29 di novèmber na un klinika extra. Esaki ta wordu organisá pa MLB i lo trata e “Pitch, Hit & Run program” entre 14:30 te ku 17:00. E Junior (14:30 -16:00) i Little League (17:00 – 18:30) lo ta na turno riba djarason 30 di novèmber. Riba djaweps 1 di desèmber MLB atrobe ta organisa e Pitch, Hit & Run Program. Esaki si ta pa e kategoria Little League. Despues di esaki, 18:00 ‘or e Junior League All Star Game na Tio Daou Ball Park ta kuminsa, entrada gratis!
WILLEMSTAD — E ekipo di beisbòl di Brigham Young University, BYU Cougars, prosedente di Utah, Estádos Unídos lo ta di bishita na Kòrsou di 23 pa 27 di novèmber próksimo. E ekipo aki lo midi forsa ku e selekshon di Kòrsou durante un serie di tres enkuentro. E partidonan entre BYU Cougars i selekshon di Kòrsou lo tuma lugá riba:
E partido di djaweps i esun di djabièrnè lo tin un límite di tempu di 3 ora. Pa loke ta e partido di djasabra ta asina ku e límite di tempu lo ta di 2 ora i mei. Den kaso di empate na e momentu di e límite di tempu, lo apliká e asina yamá ‘tie break rule’.
Entrada general lo ta 5 florin. Mucha bou di 15 aña i personanan ariba di 60 aña ta paga 2 florin.
E selekshon di FEBEKO lo ta bou di enkargo di Mompie van Gurp i Johnny Balentina.
WILLEMSTAD — Softball a jega den su fase final, weekend tras di lomba tabatin e ultimo weganan di temporada regular. E kampionato a kana hopi bon, tur kos a kana zeta i te na e delaster weekend tabatin weganan ku a disidi klasifikashon i tambe posishon riba e tabla di posishon. Den femenina AA, Pichingolo Nissan i Starosa angels Vanddis a kava ku mesun rekort di 10 gana i 2 perdi, pero pa miho saldo di kareda Pichingolo Nissan ta Sali na prome luga i asina ta klasifika direkt pa gran final di AA. Eagles Softex a klasifika komo equipo number 3 i mester enfrenta St. Rosa Angels Vanddis den semifinal.
Den maskulino e equipo di Suffisant Eagles i tambe Dream team tambe a kaba ku e mesun rekort di 6 gana i 2 perdi, pero Suffisant Eagles ta kaba na prome luga pa miho saldo di kareda. E dos otro ekiponan ku a klasifika ta Haarlem Power ku a klasifika na di 3 i Klasse Aparte ku a klasifika di 4.
Den femenina Klasse A E equipo di Soto CMTC a kaba invikto na prome luga ku 10 wega gana i 0 perdi. Demolation Cartel NV a klasifika na di dos luga, sigi pa Nos Tei Office Supply di tres i Starosa Angles Vanddis na di 4 luga. Playoffnan mes lo start djawebs awor, djawebs lo tin wega na Frank Curiel Bp i djabierne i tur sobra dianan di playoff lo ta na Stadion di Post 6.
WILLEMSTAD — Weekend tabata karga un biaha mas ku softball fastpich Liga CSB/MCB. Djabierne tabatin un tremendo partido dilanti un bon publikona Buenavista ballpark ku a bai entre Dreamteam i Haarlem Power. Den e partido aki Dreamteam ta bin di atrás después k unan tabata perdi 3 pa 0 pa bin gana equipo di Haarlem Power ku skor di 5 pa 4. Wendley Serberie a gana i na bate Wihnmar Ricardo di 2-1. Giomar Isenia ku homerune pa Dreamteam. Picher perdedo tabata Raychel Sambo i na bate pa Haarlem Power tabata Rutviensey Windster di 2-1.
Djasabra Haarlem Power a bolbe topa un wesu duru den fastpich maskulino ora nan mester a enfrenta e equipo di Suffisant Eagles. Den e wega aki Haarlem Power a bin fuerte pa gana 8 pa 5 di Suffisant Eagles. Pa Haarlem Power 8 kareda, 9 hit i 1 eror. Picher ganador tabata Raychel Sambo i na bate pa Haarlem Power Norvanie Aniceta di 2-2 ku 1 homerun. Pa Suffisant Eagles 5 kareda, 9 hit i 2 eror. Picher perdedo Shahairy Ustacia i na bate pa Suffisant Eagles tabata Sevard Seferina di 3-3.
Den e otro resultadonan den Maskulino, Klase Aparte ta pasa fasil riba Demolation ku skor di 17 pa7. Dreamteam ta gana di Demolation ku skor di 10 pa 3. Den femenina klasse A, Pichingolo Nissan ta gana di Youngstars 16 pa 14, Demolation Cartel N.V. ta gana di Nos Tei Office Supply 12 pa 7, StaRosa ta gana di Youngstars 11 pa 1 i finalmente nos ta kaba e hornada di klasse A ku Soto CMTC ta gana di Pichongolo Nissan ku skor di 10 pa 3. Despues di e weganan di e weekend aki nos tin e siguiente standing ku den femenino AA Pichingolo Nissan na prome luga, den klasse A femenino Soto CMTC ketu bai invikto i den maskulino Dreamteam ku tambe ta na prome luga invikto.