Category: Beisbòl

Posted on

Diegomar Markwell i Shairon Martis ku salida sin desishon

VENEZUELA – Djabièrnè tras di lomba Diegomar Markwell a hasi su  promé salida e temporada aki den Beisbòl Profeshonal Venezolano. Markwell a habri  e promé ining permitiendo 5 hit for di kua un honron di 3 kareda. Esaki tabata motibu sufisiente pa e manager di Leones del Caracas saka Markwell for di wega pichando solamente un tèrsio di e partido. E ekipo di Caracas a logra bin bek apesar di esaki i gana ku skor di 8-6 den 10 ining for di Tigres de Aragua.

Shairon Martis tambe a hasi su promé salida di temporada riba e dia aki. Martis tampoko no a logra un desishon den e partido di Tiburones de La Guaira kontra Caribes de Anzoategui. Martis a picha kuater ining kompletu lagando Tiburones ariba ku skor di 5-3. Komo e wega no tabata ofisial ainda na momentu ku Martis a bandoná e partido e mester a konformá su mes ku un salida sin desishon. Shairon a permití 6 hit i 3 kareda, miéntras ku e la poncha dos batido. E ekipo di Tiburones a logra gana e partido ku skor di 8-3.

Posted on

Andruw Jones a mustra deseo di regresá Hapon bek

WILLEMSTAD – Despues di a duna di konosé ku tempu lo determiná si e ta keda Hapon of regresá bek Liga Grandi, Andruw Jones a bisa ku e ta interesá na regresá Hapon bek si e haña e oportunidat.

Algu mas ku un aña pasa Jones a firma un kontrakt di un aña ku e ekipo di Tohoku Rakuten Golden Eagles. Andruw a bati pa un promedio di .243 ku 26 honron i 94 kareda empuha. Tambe e la bira kampion di beisbòl profeshonal hapones ku Golden Eagles, ganando di Yomiuri Giants den e Seri di Hapon.

Posted on

Kaya nobo dediká na Hensley Meulens

WILLEMSTAD – E promé pelotero yu’i Kòrsou den Liga Grandi, Hensley Meulens a keda presentá ku un kaya na su nòmber. E kaya dilanti Tio Daou Ballpark antes Weg naar Sta. Catharina awor yama Kaya Hensley F.A. ‘Bam Bam’ Meulens. Banda di ta promé Kurasoleño den Liga Grandi, Meulens a logra di ta dos bes ganadó di Seri Mundial komo coach.

Posted on

Kaya nobo dediká na Andruw Jones

WILLEMSTAD – Gobièrnu di Kòrsou a desvelá e nòmber di kaya nobo dediká na un di nos beisbolista nan profeshonal Andruw Jones komo apresio pa su logro nan nashonal i internashonal. E kaya Bonamweg a bira awor Kaya Andruw Jones. Entre di su tantísimo logro nan di gran magnitut, ta figura entre otro:

  • 10 wante di oro;
  • Lider di honron den Liga Grandi;
  • Lider Liga Nashonal den Kareda empuha;
  • Premio Silver Slugger;
  • Hank Aaron Award;
  • Babe Ruth Homerun Award;
  • Kampion Beisbòl Profeshonal Nippon (Hapon)
  • Ela kibra rèkert di Mickey Mantle birando e rookie mas hóben ku a konektá homerun den un wega di World Series.

Pa loke ta trata kibramentu di e rèkert di Mickey Mantle aki, mester bisa lo siguiente: Nos no mester lubidá ku siendo un rookie ku 19 aña, 6 luna i 28 dia, ya kaba Andruw a kibra rèkert di e gran Mickey Mantle, leyenda di Liga Grandi, ora ku Andruw a bira e pelotero rookie mas hóben di historia ku a konektá homerun den un wega di World Series. Mickey Mantle a realisá e hazaña aki tempu e tabatin 20 aña, 11 luna i 16 dia, un rèkert ku ela keda kuné te dia Andruw a kibré, dunando Atlanta e viktoria den e promé wega ei di World Series 1996.

E desvelo di kaya a tuma lugá na Plasa Mordi Maduro pa 5 or di atardi den presensia di Promé Minister di Kòrsou, sr. Ivar Asjes i Minister di Desaroyo Ekonómiko sr. Stanley Palm.

Ku esaki Gobièrnu ta duna balor i rekonosementu na nos hóben nan ku ta destaká riba tereno internashonal ku nan logro nan i ku un i mas biaha ta pone nòmber di País Kòrsou riba mapa mundial.

Posted on

Diegomar Markwell i Shairon Martis riba montikulo awe

VENEZUELA – Tantu Diegomar Markwell komo Shairon Martis lo habri nan promé wega den Liga di Beisbol Invernal Venezolano awe. Ambos a mira akshon kaba pa nan respektivo ekipo nan pero na tur e okashon nan aki nan a drenta di relevo.

Diegomar Markwell lo habri e partido pa Leones del Caracas kontra Tigres de Aragua. Markwell a mira akshon komo relevista na 18 okashon e temporada aki. E no a perde niun wega ainda i a gana 13 i tin un efektividat di 2.84.

Shairon Martis lo habri e partido pa Tiburones de La Guaira kontra Caribes de Anzoátegui. Martis a sali komo relevista na sinku okashon e temporada aki. Den e kuater ining i dos tèrsio ku Martis a picha e la logra un efektividat di 3.86.

Posted on

Randall Simon ku honron pa Gigantes de Rivas

MANAGUA, Nicaragua – E pelotero yu di Kòrsou Randall Simon a konektá su di 4 honron den e Liga di Beisbòl Profeshonal di Nicaragua. Simon a manda e ekipo di Gigantes de Rivas ariba den promé ining ku honron di dos kareda kontra Tigres de Chinandega. Apesar di esaki Gigantes de Rivas a pèrdè e partido ku skor di 10-7. Randall a konektá un honron, un single i empuha dos kareda den kuater turno na bate den e partido aki. Ku esaki Randall ta pone su promedio na .301, ku 4 honron, 2 doblete i 27 kareda empuha.

Posted on

Promé minister Ivar Asjes ku apresio pa hóben nan di little, minor i senior league di liga Pariba

WILLEMSTAD – Promé Minister di Kòrsou, Sr. Ivar Asjes, den un evento simpel i bunita organisá pa Fundashon Kompleho Deportivo Kasa Grandi (KODEKAG) a mustra su apresio i elogio na nos hóben nan di Banda Riba ku ta praktiká deporte di beisbòl den e liga nan di Pariba.

Den un mensahe na esnan presente, Promé Minister Ivar Asjes a indiká ku e meta di Gabinete Asjes ta pa duna mas atenshon i engrandesé deporte na Kòrsou, duna mas atenshon na nos deportista nan ku ta sobresalí, pone e fondo nan disponibel i kontrolá esaki nan tambe i drecha i mantené nos fasilidat nan deportivo p’asina nos hende nan por hasi mas moveshon i deporte pa e kurpa i mente nan keda respektivamente sano, saludabel, positivo, kreativo i proaktivo.

“Ki dushi ta pa nos rekonosé i duna honor na nos hóben nan pa nan talento, seriedat, dedikashon i determinashon ku ta hasi nan logra nan hasaña nan grandi na nivel lokal i internashonal, manera entre otro Shakir Albert di Senior League ku a resultá Kampion Bate Latino Amerikano na St. Maarten, Faysel Gregorio di Miner League ku a sali Kampion pitcher den e torneo na Panamá i Jaeir Janzen di Little League ku a resultá Kampion Bate di e torneo na Boneiru i asina nos por sigui”, Promé Minister Asjes a a bisa.

Ivar Asjes a gradisí lider nan di deporte, coach nan, manager i direktiva di tur e tim nan di Pariba, Fundashon Kompleho Deportivo Kasa Grandi (KODEKAG), ku impekabelmente a organisá e enkuentro aki, mayor nan i tambe e hóben nan mes ku ta trese tur e logro nan aki pa Kòrsou.

Posted on

Curt Smith ku bon siman pa Venados de Mazatlan

MAZATLAN, MEXICO – E pelotero yu di Kòrsou Curt Smith tabata tin un bon siman pa e ekipo di Venados de Mazatlan. Smith ku tin algu mas ku un siman ku e ekipo aki a logra konektá su promé dos honron nan di temporada den e siman ku a pasa.

Tur dos honron ku Curt a konektá den siman tras di lomba tabata den di shete ining. E promé tabata un honron solitario kontra Aguilas de Mexicali. Aki nan e Kurasoleño a manda su ekipo ariba ku skor di 4-3. Lastimá mente ku nan no por a mantené e bentaha i a pèrdè ku un skor di 5-4.

E di dos honron di Smith tabata un honron di dos kareda. Aki nan un biaha mas Curt ta duna su ekipo e bentaha, kibrando un empate di 0 kareda. E biaha aki si e ekipo di Venados ta logra mantené e bentaha permitiendo solamente un hit den e partido.

 

Smith tin un promedio aktual di .261 den 23 turno na bate ku 2 honron i 4 kareda empuha

Posted on

New York Yankees interesá den Mariekson ‘Didi’ Gregorius

LAKE BUENA VISTA, FL – Segun informashon nan e ekipo di New York Yankees ta interesá den servisio nan di e pelotero yu di Kòrsou Mariekson ‘Didi’ Gregorius. Yankees tabata interesá tambe den Brandon Phillips pero a bin realisá ku un kambio pa e hungadó aki no ta na nan benefisio.

Ku Derek Jeter hungando shortstop i mirando ku e ekipo a kaba di perde nan segunda base ta di suponé ku Yankees lo ta interesá pa Gregorius kubri segunda base. E pelotero di Kòrsou ya tin un historial ku e ekipo di New York Yankees. E promé honron di su karera den Liga Grandi e la konektá kontra di e ekipo aki.

Den e temporada tras di lomba Gregorius a hunga ku e ekipo di Arizona Diamonbacks. Den 103 partido, Mariekson a bati pa un promedio di .252 for di kua 16 doblete, 3 tripel i 7 honron.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media