Beisbòl Archives | Page 71 of 107

December 9, 2013

Pelotero Shakir Albert ta firma ku Los Angeles Dodgers

WILLEMSTAD – E organisashon di beisbòl di Liga Grandi Los Angeles Dodgers tabata tin e fin di siman tras di lomba sr. Bob Ingle ku ta direktor di “scouting” Internashonal i tambe sr. Camilo Pascual, “scout” spesial dje organisashon na Kòrsou.

Durante nan estadia, huntu ku sr. Rolando ‘Lando’ Chirino nan a tira un bista riba algun prospekto lokal durante di un try-out ku tabatin relashoná ku e torneo di beisbòl “Torneo Coach Reggie”.

Serka e representashon di Dodgers a resaltá e prospekto Shakir Albert. Un hóben di 16 aña di edat ku a lanta den e organisashon di baseball di Sta. Rosa. Shakir Albert ta hunga den outfield i ta midi 6 pia.

Despues di reuní ku mayor nan di e pelotero, e desishon a kai ku Dodgers ta firma Shakir Albert. Shakir Albert den luna di yanüari lo bai Repúblika Dominikana kaminda e lo dal su promé paso nan den baseball profeshonal.

Dodgers despues di basta aña ta bolbe firma un pelotero Kurasoleño. E último ku Dodgers a firma tabata Kenley Jansen ku aktualmente ta “closer” di e tim den Liga Grandi. E representante nan di Dodgers a regresá nan pais hopi kontentu pa loke nan a mira i eksperensiá na Kòrsou.

December 9, 2013

Jonathan Schoop preferiblemente den Tripel A na komienso di temporada

LAKE BUENA VISTA, FL – E siman aki na Orlando, Florida ta tuma lugá e evento anual konosí komo Baseball Winter Meetings. E evento aki ta keda asistí pa tur 30 ekipo di Liga Grandi tambe ekipo nan di Liga Menor.

Aki nan Dan Duquette, Vise Presidente di Baltimore Orioles a papia riba e opshon nan ku e ekipo tin pa segunda base. Segun e Vise Presidente e ekipo tin diferente opshon den e organisashon mes pa hunga segunda base.

Pa loke ta trata e hóben Kurasoleño, Jonathan Schoop e ekipo ta preferá e kuminsá e temporada den Triple A Norfolk. “E por probechá di un tiki mas eksperensia promé ku e wòrdu yama komo hungadó di tur dia den Liga Grandi,” Duquette a bisa. “Apesar di esaki kapas di hasi e trabou.”

December 9, 2013

Hensley Meulens coach di aña

ROTTERDAM – Hensley Meulens a keda nombra komo coach di beisbòl di aña 2013 pa e Union di Beisbòl di Reino Hulandes mihó konosí pa “KNBSB”. Na komienso di e aña aki Meulens a logra hiba e selekshon di Reino na semifinal di World Baseball Classic.

E yu di Kòrsou a haña su premio wikènt tras di lomba durante si e STARS Awards, ku ta keda otorgá anualmente deportista nan di beisbòl i sòftbòl. Meulens tabata na Hulanda kaminda e la hiba palabra na e di 27 edishon di European Coach Clinic.

“Nan a soprendemi ku e premio di coach di aña,” Meulens a bisa. “Esaki tabata e chèri riba e bolo despues ku nos tabata tin un tremendo aña den beisbòl.”

December 6, 2013December 6, 2013

AKTUALISASHON: Yurendell de Caster ta reforsá Industriales de Coatzacoalcos

* Yurendell de Caster a konektá honron di dos kareda den su promé turno na bate pa Industriales de Coatzacoalcos *

VERACRUZ, MEXICO – E ekipo di Industriales de Coatzacoalcos a anunsiá ku nan a añadí e yu di Kòrsou Yurendell de Caster komo refuerso na nan roster. Industriales de Coatzacoalcos ta forma parti di e Liga di Beisbòl Invernal di Veracruz, Mexico.

Industriales de Coatzacoalcos ta bira e di tres ekipo ku de Caster ta forma parti di dje durante di e temporada di beisbòl invernal aktual. Yurendell a kuminsá e temporada na Nicaragua ku e ekipo di Tigres de Chinandega den e Liga di Beisbòl Profeshonal Nicaraguense. Aki nan de Caster a hunga 12 partido ku Tigres i a logra un promedio di .234 ku 2 kareda empuha.

Resientemente Yurendell a keda laga den libertat pa e ekipo di Mayos de Navojoa. Segun e ekipo e prestashon di de Caster durante e temporada aki no tabata loke nan a spera. Den 12 partido ku e ekipo de Caster a logra un promedio di .140.

December 6, 2013December 6, 2013

Curt Smith kontratá pa Venados de Mazatlan

MAZATLAN, MEXICO – E ekipo di Venados de Mazatlan a anunsiá ku nan a kontratá e primera base yu di Kòrsou, Curt Smith. Venados de Mazatlan ta forma parti di e Liga di Beisbòl Mehikano di Pasifiko.

Anteriormente Curt tabata forma parti di e ekipo di Tigres de Chinandega na Nicaragua. Algu mas ku un siman pasa Smith a keda laga den libertat pa e ekipo di Tigres de Chinandega pa motibu di leshon, segun e ekipo.

Huntu ku Chinandega Smith a hunga 12 partido for di kua e tabata tin un promedio di .393.

December 5, 2013December 6, 2013

Yurendell de Caster ta reforsá Industriales de Coatzacoalcos

December 4, 2013December 4, 2013

Cuba bek den Seri di Karibe

WASHINGTON, DC – Cuba a risibí aprobashon di Departamento di Estado di Merka pa regresá den e Seri di Karibe di beisbòl. Cuba tabata pa 53 aña ousente na e kampionato aki. Esaki debí na e embargo ekonómiko pone pa gobièrnu norte amerikano kaminda ekipo nan Kubano ta partisipá huntu ku ekipo nan Amerikano.

E siguiente edishon di e kampionato Karibeño lo ta di 1 pa 7 di febrüari di otro aña na Margarita, Venezuela.

Banda di e ekipo kampion di Cuba, Los Naranjas de Villa Clara tambe lo partisipá e kampion nan di Mexico, Repúblika Dominikana, Puerto Rico i Venezuela. Tin posibilidat pa añadí un di seis ekipo ku lo bin di sea Colombia, Nicaragua of Panama. E ultimo aki lo ta un desishon di e Konfederashon di Karibe.

Cuba a gana e Seri di Karibe na shete di su 12 okashon nan ku e la partisipá.

December 4, 2013

Yurendell de Caster laga den libertat

NAVOJOA, México – E ekipo di beisbòl invernal na Mexico, Mayos de Navojoa a duna di konosé ku nan a laga Yurendell de Caster den libertat. Segun e ekipo e prestashon di de Caster durante e temporada aki no tabata loke nan a spera.

Yurendell a kuminsá bon ku Mayos de Navojoa, konektando un hit den tres turno na bate i empuha un kareda den su promé partido. Pero despues di esaki e kos nan no a sigui muchu bon. Den 12 partido ku e ekipo de Caster a logra un promedio di .140.

November 26, 2013

Kaya nobo dediká na e baluarte deportivo sr. Franklin I. ”Frank” Curiel

WILLEMSTAD – Gobièrnu di Kòrsou ta informá ku dia 30 di òktober 2013, e desishon a keda tumá pa kambia nòmber di algun kaya di Kòrsou. E desishon a keda tumá pa duna mas rekonosementu i apresio na nos baluarte nan i atleta nan ku ta presta. Nan prestashon ta di gran balor pa nos komo Pueblo i komo País.

Riba 25 di novèmber 2013 ultimo a desvelá e nòmber di kaya nobo dediká na e Baluarte Deportivo sr. Franklin I. ”Frank” Curiel komo apresio pa su trabou nan balioso di hopi aña komo entrenadó i lider di hubentut. E kaya Juan Hatoweg a bira awor Kaya Frank Curiel.

E desvelo a tuma lugá na Kaya Frank Curiel enfrente di Frank Curiel Ballpark pa 5’or di atardi den presensia di Minister di Enseñansa, Siensia, Kultura & Deporte a.i. sr. Ivar Asjes i Minister di Tráfiko, Transporte & Planifikashon Urbano sr. Earl Balborda.

November 26, 2013November 26, 2013

Wladimir ‘Coco’ Balentien hungadó mas balioso den Liga Sentral di Beisbòl Profeshonal Nippon

TOKIO, Hapon – Wladimir ‘Coco’ Balentien a keda nombra komo e hungadó mas balioso di e temporada 2013 den Liga Sentral di Beisbòl Profeshonal Hapones. Esaki despues ku Balentien tabata tin un temporada históriko. Wladimir a haña 200 voto pa promé lugá, 38 pa di dos i 21 voto pa di tres lugá.

Ku su 60 honron nan konektá e temporada aki Wladimir a pone un rèkert nobo pa honron nan konektá den un temporada den beisbòl Hapones. Kibrando asina aki e rèkert di Sadaharu Oh ku na aña 1964 a konektá 55 honron.

Banda di esaki, Balentien a bati pa un promedio di .330 ku 131 kareda empuha. Si no tabata pa Tony Blanco den Liga Sentral ku a bati un promedio di .333 ku 136 kareda empuha, Balentien lo a bai kas ku e premio di Tripel Korona tambe.