TOKIO – Banda di ta e rei di honron na Hapon, awor Wladimir ‘Coco’ Balentien ta e kara di e di serbes Kirin na Hapon. Kirin ta e serbes di mas bieu na Hapon i tambe e kompania ku ta produsí e dos serbes nan mas popular na Hapon.
Ku su 60 honron nan konektá e temporada aki Balentien a pone un rèkert nobo pa honron nan konektá den un temporada den beisbòl Hapones. Banda di esaki, Balentien a bati pa un promedio di .330 ku 131 kareda empuha.
Wladimir ‘Coco’ Balentien den propaganda di serbes Kirin
WILLEMSTAD – Konseho di Minister a risibí un delegashon formá pa diferente di nos pelotero nan profeshonal di Kòrsou i di Hulanda, kompañá pa un delegashon di e organisashon ‘Curaçao Baseball Week’ relashoná ku e siman di Beisbòl ku a keda organisá na Kòrsou di 18 – 25 di novèmber 2013 na Blue Bay Curacao Golf & Beach Resort.
Algun di nos beisbolista nan lokal ku ta na Kòrsou aktualmente i ku a forma parti di e delegashon aki ku Gabinete Asjes a risibí, ta entre otro: Wladimir “Coco” Balentien, Hensley Meulens, Andrelton Simmons, Didi Gregorius, Jurickson Profar, Shairon Martis, Roderick Bernadina i Jonathan Schoop.
Meta di ‘Curaçao Baseball Week’ ta pa trese nos strea nan di Beisbòl mas serka di nos mucha nan lokal, entre kual un gran kantidat ku ta hunga beisbòl i praktiká otro deporte nan. E hóben nan aki lo haña e oportunidat pa konosé, interkambiá, risibí firma, wak wega nan di sòftbòl, disfrutá di un ‘home run derby’, forma parti di klínika nan i saka potrèt ku nos héroe nan di beisbòl internashonal.
Lo bai tin tambe oportunidat pa nos coach nan lokal por bishitá diferente seminario spesial di beisbòl. Ademas a organisá un sena pa haña e fondo nan nesesario ku lo sirbi pa e desaroyo nan ku mester tuma lugá na e parke di beisbòl na Jandoret.
Na nòmber di Gobièrnu di Kòrsou, Promé Minister Sr. Ivar Asjes a gradisí Blue Bay Curacao Golf & Beach Resort, ku a tuma e inisiativa pa organisá e siman aki di beisbòl. Na mes momento tambe nos Promé Minister a yama un danki spesial na nos beisbòlista nan pa nan disposishon i aporte, ku ta na benefisio di nos hóben nan deportista, ku lo haña e estímulo nesesario pa sigui paso di nan ídolo nan.
Gobièrnu a hasi un apelashon na organisashon di ‘Curaçao Baseball Week’ en kuestion pa den futuro serkano huntu bai organisá mas di e tipo di aktividat nan aki ku inklushon di nos talento nan internashonal. E proposishon ta pa hasi esaki por lo ménos un bia pa aña risibiendo nos strea nan na Plasa Brion, kaminda Pueblo tambe por partisipá.
Hensley Meulens, Wladimir “Coco” Balentien i tambe e organisashon di ‘Curaçao Baseball Week’ a aploudí e intenshon i plan nan di Gobièrnu, ku lo yuda pa nos por tin mas di e strea nan di beisbòl aki un par di aña. Tambe Coco Balentien a ekspresá ku pa por logra esaki, en bes di pone fiesta i músika, ta mas importante pa por tin material i mas fasilidat pa hasi deporte. Komo tal e pelotero nan aki ta aploudí ku Gobièrnu di Kòrsou a reservá 14 mion florin èkstra pa fasilidat nan deportivo pa e tres aña nan benidero.
BALTIMORE, MD – E ekipo di Baltimore Orioles a anunsiá ku nan a firma dos hungadó ku un kontrakt di Liga Menor. Un di e hungadó nan aki ta Sharlon Schoop. Sharlon di 26 aña di edat ta ruman grandi di Jonathan Schoop ku tambe ta forma parti di e organisashon di Baltimore Orioles.
Pa motibu di leshon Sharlon a hunga ultimo biaha den e temporada 2012 ku e afiliashon den dòbel A di Kansas City Royals. Den e 50 wega nan ku Schoop a hunga den 2012 ku Arkansas Naturals, e la bati pa un promedio di .267 ku un porsentahe di yega base di .341. Defensiva mente Sharlon a hunga tur posishon di kuadro ku e ekipo di Arkansas i tambe e la hunga den outfield.
ARLIGNTON, TX – Jurickson Profar a sera e temporada 2013 ku hopi interogatorio. E hóben pelotero yu di Kòrsou a hunga sinku diferente posishon pa Texas Rangers den 2013. E no tabata tin e mínimo idea kiko Texas su intenshon nan pa ku su posishon defensivo tabata. Pa kaba di korona e obra Texas a ekstendé kontrakt di tantu su segunda base komo su shortstop. Esaki a laga Profar i siguidó nan di beisbòl pensando si den 2014 e por yama Texas Rangers su kas of si e lo ta ku un otro ekipo.
Tur esaki a kambia na momentu ku a bira konosí ku Texas Rangers a kambia su segunda base Ian Kinsler pa e primera base di Detriot Tigers, Prince Fielder. Di un manera indirekto ya kaba Texas a bisa ku si Jurickson keda e lo hunga segunda base. Den 72 wega ku e hóben a hunga ku Texas, algu mas ku mitar di su wega nan e la hunga na segunda base. E sobra di wega nan a keda dividí den kuater otro posishon.
Pero ainda tur kos no ta kla pa Profar i e mester kompetí pa e posishon di segunda base, segun e gerente general di Texas Rangers Jon Daniels.
“E ta un hóben ku nos gusta. Nos gusta su potensial i loke e ta trese na mesa. E ta e persona ku nos ke mira konkista e trabou, pero e tin ku hasi esei,” Daniels a bisa.
“Nos por trese un tiki kompetensia pa e, ya asina e hungadó nan aki ta push’e pa dilanti.”
“Pero e no ta haña e título ainda,” Daniels a terminá bisando. “E tin ku bin i gana e trabou.”
CARACAS – Tiburones de la Guaira a anunsiá ku Shairon Martis lo añadí su mes komo refuerso na e ekipo. Martis no ta un deskonosí den beisbòl invernal Venezolano. Esaki lo bira su di kuater temporada na Venezuela i e lo mester yega den e próksimo dia nan.
Den e temporada 2012 – 2013 e Kurasoleño tabata tin un rèkert di un gana i un pèrdí ku un efektividat di 7.50 den sinku wega ku e ekipo di Tiburones. Martis lo kuminsá e temporada den e Liga Paralela ku ta un liga di desaroyo pa e ekipo nan di beisbòl invernal na Venezuela. Una bes gerensia i kuerpo tékniko duna e lus bèrdè Shairon lo uni ku e ekipo prinsipal.
Huntu ku Minnesota Twins den 2013, Martis tabata tin un rèkert di 0-1, ku un efektividat di 5.59 den seis partido.
NAVOJOA, México – Algun dia despues ku Yurendell de Caster a keda laga den libertat pa e ekipo di Tigres de Chinandega na Nicaragua e pelotero a haña otro ekipo pa forma parti di dje.
E ekipo di beisbòl Mehikano, Mayos de Navojoa a duna di konosé ku nan a atkerí servisio di de Caster. Esaki pa motibu di un buraku ofensivo ku ta eksistí den e ekipo aktualmente.
De Caster ya e yega di hunga beisbòl na México. Den e temporada tras di lomba Yurendell a hunga ku e ekipo di Acereros de Monclova. Aki nan e la logra un promedio di .342 ku 18 doblete, 10 honron i 52 kareda empuha den 71 wega.
Den su promé wega ku Mayos, Yurendell a konektá un hit den tres turno na bate i empuha un kareda.
SANTO DOMINGO – Jurickson Profar a terminá su estadia ku e ekipo di Tigres del Licey. Esaki tabata e palabrashon for di un prinsipio. Profar a bisa ku e lo e hunga un luna ku Tigres del Licey i esei a sosodé tambe.
Den e un luna ku Jurickson a keda ku Licey e la logra un promedio di .284 ku 23 base por bola i 10 ponche. Den su ultimo partido Profar a konektá un hit den tres turno na bate ku un base por bola.
MANAGUA, Nicaragua – E Liga di Beisbòl Profeshonal Nicaraguense a duna di konosé ku e ekipo di Tigres de Chinandega ta laga Yurendell de Caster den libertat. Segun e Liga di Beisbòl Nicaraguense, de Caster su partisipashon den e Liga a terminá i e lo bolbe su pais natal. Yurendell a hunga 12 partido ku Tigres i a logra un promedio di .234 ku 2 kareda empuha.
Na lugá di de Caster e ekipo di Tigres ta aktivá e Kurasoleño Curt Smith. Smith a keda kita for di roster algun dia pasa. Esaki despues ku e la a sufri un leshon na e parti robes di su múskulo di barika. Smith a hunga seis partido ku Tigres de Chinandega den e Liga di Beisbòl Profeshonal Nicaraguense. Den e seis partido nan aki Curt tabata tin un promedio di .333.
MANAGUA, Nicaragua – Curt Smith ta keda kita for di riba roster di e ekipo di Tigres de Chinandega. Esaki despues ku Smith a sufri un leshon na e parti robes di su múskulo di barika. Smith a hunga seis partido ku Tigres de Chinandega den e Liga di Beisbòl Profeshonal Nicaraguense. Den e seis partido nan aki Curt tabata tin un promedio di .333.
CARACAS – Despues di algun dia riba lista di hungadó leshoná Diegomar Markwell ta bek ku e ekipo di Leones del Caracas. Esaki a keda konfirmá pa e Liga di Beisbòl Profeshonal Venezolano.
Mes ora Markwell a mira akshon, pichando pa Leones del Caracas den e partido kontra Cardenales de Lara. Markwell a picha e di nuebe ining den e partido aki, sakando tur tres batido enfrentá out.
Diegomar ta un piesa klave pa e ekipo di Leones del Caracas ku a pèrdè seis wega konsekutivo inkluyendo e partido kontra Cardenales. E picher Kurasoleño a mira akshon den kuater partido, pichando un totalidat di 6.2 ining sin permití kareda.