Beisbòl Archives | Page 73 of 107

November 8, 2013

Parada pa Wladimir Balentien

WILLEMSTAD – E rei di honron den beisbòl profeshonal Hapones, Wladimir Balentien ta yega Kòrsou dia 17 di novèmber próksimo. En konekshon ku esaki ta bai tin un parada pa homenagiá Wladimir.

Si tur kos kana segun plan, Balentien ta yega Kòrsou djadumingu 17 di novèmber pa 4’or di atardi. Na aeropuerto Hato ta bai tin un seremonia kòrtiku i 5’or di atardi e parada lo sali for di aeropuerto i pasa den kaya nan di Kòrsou.

E parada ta plania pa terminá 8’or di anochi ku yegada di Wladimir na Cirilo Chirino Ballpark. Aki nan lo bai tin entretenimentu musikal i show di vürwèrk. E programa kompletu ta terminá 12’or di anochi.

Siguentemente e ruta kompletu den kua e parada lo pasa:

1. Curacao Airport Hato

2. F.D. Rooseveltweg (7.1 km)

3. Plaza Hariri Palu Blanku

4. Schottegatweg West (drenta Marchena)

5. Weg Naar Welgelegen (JPF (8.7 km))

6. Rodeweg (9.3 km)

7. Bredestraat Otrabanda (10.3 km)

8. Pater Eeuwensweg (11 km)

9. Retonde Lucia da Costa Gomez (11.2 km)

10. Retonde Ergilio Hato(11.6 km)

11. Skarloweg direkshon Palaza Mundu Merced (14.5 km)

12. Abraham Mendez Chumaseiro boulevard (16.0 km)

13. Parke Cirogalopi / Theaterstraat (16.3 km)

14. Kaya Wilson ‘papa’ Godett (16.3 km)

15. Penstraat (16.5 km)

16. Dr. Martin Luther King (18.1 km)

17. Kaya Koraal Specht (19.4 km)

18. Amandelwegweg (20.6 km)

19. Anasaweg (21.5 km)

20. Caracasbaaiweg (22.3 km)

21. Kaminda Duvert “Boy” Nicolina (23.3 km)

22. Kaminda Jose C. Anthonia (24.9 km)

23. Kaminda Willems J. Gratz (Shon We Cratz (26.3 km))

24. Kaminda Venacio F. Isenia (Nacho Polis (26.7 km))

25. Kaminda Hose P. Liberia (Papa Liberia (27.9 km))

26. Santa Rosa weg (31.5 km)

27. SBN Doormanweg (33.9 km)

28. Snipweg (34.5 km)

29. Corrie weg (36.1 km)

30. Plenchi Trafiko GAS “Sam Bunting” Hamson (Baluarte di sòftbol (36.4 km))

31. Kaminda Brievengat (36.5 km)

32. Plaza Mordy Maduro (37.4 km)

33. Bonam weg (37.4)

34. Gosieweg (38.4 km)

35. Schottegatweg Noord (40.8 km)

36. Azteken weg (41.6 km)

37. Arowaken weg (42.1 km)

38. Comanche Straat (43.1 km)

39. Kaya Salish (43.2 km)

40. Cirilo Chirino Ballpark (43.5 km)

November 6, 2013

Jair Jurrjens ta bira agente liber

TOLEDO, Ohio – E picher yu di Kòrsou Jair Jurrjens a opta pa bira agente liber. Jurrjens ku ta kliente di Scott Boras a opta pa bira agente liber despues di e temporada tras di lomba.

Jair a kuminsá temporada 2013 ku Norfolk Tides ku ta e afiliashon di Baltimore Orioles den tripel A. Tides a laga Jurrjens den libertat riba 18 di yüli ultimo i e picher a firma ku Detroit Tigers seis dia despues. Huntu ku Tigers, Jurrjens a keda asigná na e ekipo di Toledo Mud Hens den tripel A.

Jair tabata tin un bon promé mitar di temporada ku Norfolk Tides. Aki nan Jurrjens tabata tin un rèkert di seis wega gana i seis wega pèrdí, ku un efektividat di 4.18.

Tur kos a bòltu na momentu ku Jurrjens a kambia di ekipo. Ku Toledo Mud Hens e picher di Kòrsou a logra gana solamente un wega i a pèrdè kuater wega ku un efektividat di 5.49 den shete salida.

October 29, 2013

Andrelton Simmons ta gana su promé Wante di Oro

ATLANTA, Georgia – Pa mas ku 50 aña kaba e kompania di wante Rawlings ta otorgá e wante di oro na e mihó hungadó defensivo. Siman pasa a keda anunsiá ku e hóben yu di Kòrsou Andrelton Simmons tabata un di e finalista nan. Simmons a kompetí kontra Troy Tulowitzki di Colorado Rockies i Ian Desmond di Washington Nationals pa e premio di wante di oro na shortstop.

Apesar ku Tulowitzki a gana e premio na 2010 i 2011 i a lidera Liga Nashonal e temporada aki den porsentahe di fildeo, coach nan di Liga Grandi huntu ku analista nan di estadistika a disidí na otorgá e premio na Andrelton Simmons.

Simmons tabata tin un tremendo temporada defensivo kometiendo solamente 14 eror den 753 oportunidat. Ku esaki Simmons ta bira e promé hungadó di kuadro di Atlanta Braves ku ta gana e premio di wante di oro despues di Terry Pendelton na aña 1992.

Andruw Jones ta e úniko otro yu di Kòrsou ku a gana wante di oro. E la hasi esaki pa dies aña konsekutivo ganando e premio den outfield pa Atlanta Braves entre 1998 pa 2007.

Segun Andrelton e mihó hungadó ku e la hasi e temporada aki tabata kontra Washington Nationals kaminda e la kompletá un dòbel play sin asistensia den di 14 ining.

October 25, 2013

Andrelton Simmons komo finalista pa Gold Glove

ST. LOUIS, Missouri – E shortstop yu di Kòrsou di Atlanta Braves, Andrelton Simmons a keda nominá komo un di e finalista nan pa e premio di wante di oro. Esaki a keda anunsiá awe pa e kompania di wante Rawlings ku ya pa mas 50 aña ta otorgá e wante di oro na e mihó hungadó defensivo.

Troy Tulowitzki di Colorado Rockies i Ian Desmond di Washington Nationals tambe a keda nominá i lo bataya kontra Simmons pa e premio. Tulowitzki a gana e premio na 2010 i 2011 i a lidera Liga Nashonal e temporada aki den porsentahe di fildeo.

E diferente manager i coach nan den Liga Grandi asistí pa analista nan di estadistika lo vota pa determiná e diferente ganadó nan. E ganadó nan di e wante di oro lo keda anunsiá djamars awor pa 8’or di anochi.

E lista kompletu di finalista nan:

Liga Amerikano

Picher
Mark Buehrle, Blue Jays
R.A. Dickey, Blue Jays
Doug Fister, Tigers

Kècher
Joe Mauer, Twins
Salvador Perez, Royals
Matt Wieters, Orioles

Primera base
Chris Davis, Orioles
Eric Hosmer, Royals
James Loney, Rays

Segunda base
Robinson Cano, Yankees
Dustin Pedroia, Red Sox
Ben Zobrist, Rays

Tersera base
Adrian Beltre, Rangers
Evan Longoria, Rays
Manny Machado, Orioles

Shortstop
Alcides Escobar, Royals
Yunel Escobar, Rays
J.J. Hardy, Orioles

Left field
Yoenis Cespedes, A’s
Andy Dirks, Tigers
Alex Gordon, Royals

Center field
Lorenzo Cain, Royals
Jacoby Ellsbury, Red Sox
Adam Jones, Orioles

Right field
Nick Markakis, Orioles
Shane Victorino, Red Sox
Josh Reddick, A’s

Liga Nashonal

Picher
Patrick Corbin, D-backs
Zack Greinke, Dodgers
Adam Wainwright, Cardinals

Kècher
A.J. Ellis, Dodgers
Russell Martin, Pirates
Yadier Molina, Cardinals

Primera base
Paul Goldschmidt, D-backs
Adrian Gonzalez, Dodgers
Anthony Rizzo, Cubs

Segunda base
Darwin Barney, Cubs
Brandon Phillips, Reds
Mark Ellis, Dodgers

Tersera base
Nolan Arenado, Rockies
Juan Uribe, Dodgers
David Wright, Mets

Shortstop
Ian Desmond, Nationals
Andrelton Simmons, Braves
Troy Tulowitzki, Rockies

Left field
Carlos Gonzalez, Rockies
Starling Marte, Pirates
Eric Young Jr., Mets

Center field
Carlos Gomez, Brewers
Andrew McCutchen, Pirates
Denard Span, Nationals

Right field
Jay Bruce, Reds
Jason Heyward, Braves
Gerardo Parra, D-backs

October 18, 2013

Hainley Statia ta ekstendé kontrakt ku Milwaukee Brewers

NASHVILLE, Tennessee – Milwaukee Brewers a anunsiá awe ku nan a ekstendé kontrato di Hainley Statia. Den 2013 Statia a forma parti di e afiliashon di Milwaukee Brewers den Tripel A kual ta Nashville Sounds. Aki nan Hainley tabata tin e ròl di ‘utility-player’ hungando na segunda base, tersera base i shortstop tambe left field i right field i por ultimo komo batido designa. Esaki a pone ku Hainley tabata un di shete hungadó nan ku a pasa kompletu e temporada 2013 ku Nashville Sounds.

Hainley a hunga 113 partido ku Nashville for di kua e la logra un promedio di .241 ku sinku honron. E sinku honron nan aki ta e mas tantu ku Statia a yega di bati den su karera profeshonal. Kuater di e sinku honron nan ku Hainly a konektá a bin den luna di yüli ultimo.

October 17, 2013

Roger Bernadina for di roster di 40 hungadó di Philadelphia Phillies

PHILADELPHIA, Pennsylvania – Philadelphia Phillies a kita kuater hungadó for di nan roster di 40 hungando awe. Entre e hungadó nan aki tin Roger Bernadina. Bernadina a keda atkeri pa Phillies na momentu ku e la keda laga den libertat pa Washington Nationals den ougùstùs ultimo. Den 27 wega ku Philadelphia, Bernadina a bati pa un promedio di .187. Tur e kuater hungadó nan aki nan kontrakt a pasa pa e afiliashon di Tripel A di Philadelphia Phillies ku ta Lehigh Valley IronPigs.

October 8, 2013

Wladimir Balentien ta terminá temporada históriko

TOKIO, Hapon – E ultimo wega nan di temporada regular di beisbòl profeshonal Hapones a tuma lugá awe. E ekipo di Tokyo Yakult Swallows a terminá e temporada ku un derota despues di a kai vensí di Yomiuri Giants ku skor di 4-3. Den e partido aki Wladimir Balentien no a konektá hit den su úniko turno na bate pero a logra un base por bola i un kareda empuha.

Wladimir por mira atras riba un temporada históriko. Ku su 60 honron nan konektá e temporada aki Balentien a pone un rèkert nobo pa honron nan konektá den un temporada den beisbòl Hapones. Banda di esaki, Balentien a bati pa un promedio di .330 ku 131 kareda empuha. Ku e promedio aki Balentien ta keda na di dos lugá den Liga Sentral, tras di Tony Blanco ku tabata tin un promedio di .333. Tony Blanco ta kita e puesto di promé lugá den kareda empuhe tambe for di Balentien ku 136 kareda empuha. Ku esaki Wladimir ta keda net un tiki kòrtiku di gana e premio di tripel korona.

October 8, 2013

Kenley Jansen ta sera porta pa Atlanta Braves

LOS ANGELES, California – Atlanta Braves ku lomba kontra di muraya mester a gana e di kuater partido den e Seri di Divishon den Liga Nashonal pa asina forsa un di sinku partido na Atlanta. E ekipo di Dodgers a sa di bai ariba for di trempan den e partido. Dos honron solitario di Carl Crawford, tantu den e promé ining komo den e di tres ining a manda Dodgers ariba 2-0. Apesar di esaki Atlanta ta logra empatá e partido den di kuater ining i bai ariba ku skor di 3-2 den di shete ining. E bentaha aki no a dura masha despues ku den di ocho ining, Yasiel Puig ta konektá un doblete i Juan Uribe un honron pa manda Dodgers ariba 4-3. Kenley Jansen a drenta den di nuebe ining pa sera e wega. Hasiendo loke e la hasi henter temporada Jansen a poncha tur tres batido enfrentá i asina sigurá e viktoria blou.

Andrelton Simmons a konektá un hit den kuater turno den e partido aki i a terminá ku un promedio di .250 ku dos kareda empuha den post temporada. Simmons por mira atras riba un bon temporada. Su 17 honron nan konta e temporada aki ta e mas tantu konektá pa un shortstop di Atlanta despues di Jeff Blauser ku na 1997 tambe a konektá 17 honron. Loke mas a resaltá pa Simmons e temporada aki tabata su defensa. E la lidera tur shortstop den Liga Grandi ku 499 asistensia. Tambe Simmons a wòrdu nombra komo e hungadó defensivo di luna pa ESPN pa tantu e luna di mei komo esun di yüni.

September 30, 2013

Diegomar Markwell konfirmá ku Leones del Caracas

CARACAS, Venezuela – E ekipo di beisbòl Venezolano Leones del Caracas a anunsiá ku nan a haña konfirmashon di Diegomar Markwell pa e temporada 2013-2014 di Beisbòl Profeshonal Venezolano. Markwell ku no ta un deskonosí den beisbòl profeshonal Venezolano ta bini for di un temporada kaminda e tabata tin un efektividat di 1.19 den beisbòl Hulandes. E ekipo ya a kuminsá ku su treinen nan di pre-temporada i ta spera ku dia promé di òktober Diegomar lo hasi presensia.

Banda di esaki Leones del Caracas a haña outorisashon di Beisbòl Liga Grandi pa negosha ku algun hungadó. Entre e hungadó nan aki Leones del Caracas ta papiando ku Jair Jurrjens.

September 27, 2013

VIDEO: Jurickson Profar ta tene Texas Rangers su kabes riba awa

ARLINGTON, Texas – Texas Rangers ta luchando den Liga Amerikano pa kue e ultimo lugá den post temporada. Faltando tres wega mas e ekipo di Rangers ta un wega tras di Cleveland Indians, poniendo asina ei e number mágiko di e ekipo na tres. Ku e ekipo di Indians viktorioso ayera nochi ku nan di shete viktoria sigui, Texas tabata obligá na gana.

Texas a sali bai ariba den bòm di promé ining anotando tres kareda kontra di Los Angeles Angels pa hasi e partido 3-1. E bentaha aki no a dura masha na momentu ku Texas ta kometé tres eror den e di dos ining permitiendo Los Angeles tuma e bentaha di 4-3.

Den di seis ining Texas ta bini bek i ta anotá dos kareda pa bòltu e skor na 5-4. Un biaha mas e bentaha aki no ta dura. Mesora den kabes di shete ining Los Angeles ta anotá un kareda pa asina empatá e partido na sinku.

E partido ta keda empatá na sinku kareda te den bòm di nuebe ining. Aki nan menedjer Ron Washington ta pone su konfiansa den Jurickson Profar i mand’e habri e ining komo batido emergente.

Jurickson a konektá solamente 39 hit den su ultimo 184 turno na bate nan loke tabata bon pa un promedio di .212. E ultimo aki mesora a pasa pa olvido na momentu ku riba un konteo di 1-1, Profar ta swing riba un fastball i konektá esaki den tribuna di right field pa su di seis honron di temporada.