Category: Beisbòl

TOKIO, Hapon – E rèkert di mas honron konektá den un temporada di beisbòl profeshonal Hapones tabata establesé ya pa 49 aña na 55 honron, establesé pa e Hapones Sadaharu Oh. Na 2001 Tuffy Rhodes i despues na 2002 Alex Cabrera a logra igualá e rèkert aki na 55 honron. E aña aki Wladimir Balentien ta logra surpasá 55 honron i skirbi historia den beisbòl Hapones.

Balentien di 29 aña di edat a kibra e rèkert den promé ining konektando un honron di 2 kareda kontra picher di Hanshin Tigers, Daiki Enokida. Den di tres ining un biaha mas kontra di Enokida, Balentien a konektá un honron solitario pa su di 57 honron di temporada.

“Mi no por a kere kiko tabata pasando. Tabata tin un sensashon dushi. Mi ta kere ku mi no por sinti esei nunka mas den mi bida,” Balentien a bisa despues di e partido. Tambe Balentien a mustra hopi rèspèt pa Sadaharu Oh, bisando: “mi tin hopi rèspèt p’e.” “Pa por empatá su rèkert i despues surpas’e ta algu hopi spesial pa mi.”

Balentien i su ekipo Tokyo Yakult Swallows ta liber mañan. Despues di esei a keda e ekipo 18 partido mas e temporada aki.

TOKIO, Hapon – Wladimir Balentien faltando un honron pa kibra e rèkert Hapones di mas honron den un temporada. Den e partido di ayera Wladimir no a logra esaki, konektando un hit den tres turno na bate ku un base por bola. Balentien lo drumi por lo mínimo un anochi mas promé ku e skirbi historia.

E ekipo di Balentien ku ta Tokyo Yakult Swallows tin 21 partido mas di hunga e temporada aki. Esaki ta hasi e chèns hopi grandi ku e yu di Kòrsou ta pone un rèkert nobo den beisbòl Hapones. E temporada aki Wladimir ta konektando honron na mas of ménos un honron pa kada nuebe turno na bate.

E echo ku Balentien a bai tres i un den e partido di ayera a pone ku su promedio a baha na .339. Esaki ta 10 punto tras di e lider di promedio kual ta Yuya Hasegawa ku a subi su promedio na .349. Den e kategoria di honron ta lógiko ku Wladimir ta kabesa e tabla ku 55 honron, siguí pa Tony Blanco ku tin 37 honron.  Tony Blanco ta kabesa e tabla di kareda empuha ku 124, siguí pa Balentien ku 117.

TOKIO, Hapon – Wladimir Balentien a bira e di kuater hungadó den beisbòl profeshonal Hapones ku ta logra yega e sifra mágiko di 55 honron den un temporada. Sadaharu Oh ta e promé ku a logra esaki na aña 1964 i Alex Cabrera tabata e ultimo ku a logr’e 11 aña pasa na aña 2002.

E ekipo di Balentien kual ta Tokyo Yakult Swallows a sobra 21 partido mas den e temporada aki. Esaki ta hasi e chèns hopi grandi ku Wladimir por bira e promé hungadó den beisbòl Hapones ku ta konektá 56 of mas honron.

E yu di Kòrsou ta den posishon di por gana e tripel korona den beisbòl Hapones tambe. E temporada aki Balentien tin un promedio aktual di .340 ku ta pone na di dos lugá den e kategoria di promedio tras di Yuya Hasegawa ku tin un promedio aktual di .346. Pa loke ta trata honron, Balentien ta lider den e kategoria aki ku 55 honron. Den e kategoria di kareda empuha, Wladimir ta na di dos lugá ku 117 kareda empuha tras di Tony Blanco ku 123 kareda empuha.

TOKIO, Hapon – Wladimir Balentien a konektá su di 54 honron di temporada pa e ekipo di Tokyo Yakult Swallows. Ku esaki Balentien ta falta un honron pa empatá e rèkert di honron konektá den un temporada. Konektando e di 55 honron Wladimir lo djòin, Sadaharu Oh, Tuffy Rhodes i Alex Cabrera komo e úniko hungadó nan ku ta konektá 55 honron den un temporada den beisbòl profeshonal Hapones.

Balentien i su ekipo tin 22 partido mas pa hunga e temporada aki, esaki ta pone e hungadó yu di Kòrsou den un posishon faborabel pa kibra e rèkert di 55 i skirbi historia den beisbòl Hapones.

Banda ku Wladimir por kibra e rèkert di honron Hapones tambe Balentien ta den posishon di por gana e tripel korona den beisbòl Hapones. E temporada aki Balentien tin un promedio aktual di .340 ku ta pone na di dos lugá den e kategoria di promedio tras di Yuya Hasegawa ku tin un promedio aktual di .346. Pa loke ta trata honron, Balentien ta lider den e kategoria aki ku 54 honron. Den e kategoria di kareda empuha, Wladimir ta na di dos lugá ku 116 kareda empuha tras di Tony Blanco ku 123 kareda empuha.

TOKIO, Hapon – Faltando 24 partido e temporada aki Wladimir Balentien ta pone su mes den posishon faborabel pa kibra e rèkert di honron den beisbòl Hapones. Den wikènt tras di lomba, Balentien a konektá su di 53 honron di e temporada aktual.

Na aña 1964 e konosidó hungadó Hapones Sadaharu Oh a pone e rèkert di honron konektá den un temporada na 55. Esaki ta nifiká ku Wladimir falta dos honron pa empatá e rèkert i tres pa kibre.

Ku 24 partido faltando Balentien ta pone su mes den posishon faborabel pa kibra e rèkert. Sin embargo, Hapones nan a ekspresá den pasado ku nan no ke pa un hungadó estranhero kibra e rèkert di Oh. Na tres okashon den pasado hungadó nan ekstranhero a purba na kibra e rèkert di 55 honron di Oh. Pero den na ultimo partido nan, e hungadó nan aki a hunga kontra ekipo manehá pa Oh i e picher na e momentu ei a nengá di tira strike.

Te ainda Balentien ta mirando strike, teniendo na kuenta ku den e ultimo partido Balentien a konektá tres hit den sinku turno i no a haña ningun base por bola.

Banda ku Wladimir por kibra e rèkert di honron Hapones tambe Balentien ta den posishon di por gana e tripel korona den beisbòl Hapones. E temporada Balentien tin un promedio aktual di .341 ku ta pone na di dos lugá den e kategoria di promedio tras di Yuya Hasegawa ku tin un promedio aktual di .345. Pa loke ta trata honron, Balentien ta lider den e kategoria aki ku 53 honron. Den e kategoria di kareda empuha, Wladimir ta na di dos lugá ku 114 kareda empuha tras di Tony Blanco ku 122 kareda empuha.

 

TOKIO, Hapon – Wladimir Balentien ta pone su mes den posishon faborabel pa kibra e rèkert di honron den beisbòl Hapones. Balentien ta mirando e bala hopi bon na e momentu nan aki i a konektá tres honron mas den ultimo dos dia nan. Asina aki Balentien ta pone su kantidat di honron pa e temporada aki na 51.

Na aña 1964 e konosido hungadó Hapones Sadaharu Oh a pone e rèkert di honron konektá den un temporada na 55. Esaki ta nifiká ku Wladimir falta kuater honron pa empatá e rèkert i sinku pa kibre. Ta di nota ku e ekipo di Wladimir kual ta Tokyo Yakult Swallows ainda tin 32 wega pa hunga e temporada aki. Esaki ta pone ku Balentien ta den un posishon favorabel pa kibra e rèkert aki.

Balentien a yega e di 51 honron, konektando te ainda 17 honron den luna ougùstùs. Ku esaki Balentien ta bai den buki komo e promé hungadó di beisbòl profeshonal Hapones ku ta konektá 17 honron den un luna.