Category: Beisbòl

TOKIO, Hapon – Wladimir Balentien poko poko pero sigur ta yegando e rèkert di honron den beisbòl Hapones. Na aña 1964 e konosido hungadó hapones Sadaharu Oh a pone e rèkert di honron konektá den un temporada na 55. Ku e dos honron nan di Balentien den wikènt ku a pasa aki, Balentien tin 48 honron poniendo su mas na ocho honron for di un rèkert nobo.

Manera Balentien ta bayendo e ta riba kaminda pa empatá e rèkert di Oh den mas of ménos 16 wega i e lo por kibra e rèkert den mas of ménos 18 wega. E ritmo ku Balentien ta aden awor aki ta pone den un posishon sumamente favorable mirando ku su ekipo di Tokyo Yakult Swallows tin 34 wega mas programa. Esaki ta pone ku siguiendo e ritmo aki Balentien lo por pone un rèkert nobo di 62 honron den beisbòl hapones.

TOKIO, Hapon – Wladimir Balentien a konektá 4 honron den su ultimo dos partido nan, poniendo asina su kantidat di honron pa e temporada 2013 na 46 honron. Ku esaki Balentien ta pone su mes na 9 honron pa empatá e rèkert di 55 honron pone pa Sadaharu Oh na aña 1964 i 10 honron pa skirbi historia.

Balentien i su ekipo Tokyo Yakult Swallows tin 37 partido mas programa e temporada aki. Den e kaso ku Balentien keda saludabel e sobra di temporada aki, ku tur probabilidat Balentien lo por empatá i kibra e rèkert di 55 honron pa mas of ménos 15 di sèptèmber. Deporte Awe ta kalkulá ku lo tuma Balentien mas of ménos 64 turno na bate pa empatá e rèkert  i 71 turno pa kibra e rèkert. Esaki ta mas of ménos i un total di 21 i 24 partido pa empatá i kibra.

Hapones nan a ekspresá den pasado ku nan no ke pa un hungadó estranhero kibra e rèkert di Oh. Na tres okashon den pasado hungadó nan ekstranhero a purba na kibra e rèkert di 55 honron di Oh. Pero den na ultimo partido nan, e hungadó nan aki a hunga kontra ekipo manehá pa Oh i e picher na e momentu ei a nengá di tira strike. Oh a retirá komo manager na 2008.

Balentien ta batiendo e temporada aki pa un promedio di .337 ku 46 honron i 99 kareda empuha.