Category: Beisbòl

Posted on

Jair Jurrjens ta pèrdè su promé wega den Toledo Mud Hens

TOLEDO, Ohio – Jair Jurrjens a subi riba montikulo pa di dos biaha komo miembro di e ekipo di tripel Toledo Mud Hens. Den su promé salida Jurrjens a logra bai ku un salida sin desishon pero ayera esaki no tabata e kaso. E ekipo di Columbus Clippers a sali anotá 4 kareda den promé ining kontra Jurrjens. Despues den di tres ining Clippers a añadí 2 kareda mas pa asina kore ku Jurrjens for di e partido.

Den e partido aki Jair a picha tres ining kompletu, permitiendo 9 hit i 6 kareda. Banda di esaki Jurrjens a permití 2 base por bola i a poncha 3. Esaki ta pone Jurrjens su rèkert den liga menor e temporada aki na 6 wega gana i 7 wega pèrdí ku un promedio di kareda permití di 4.65.

Posted on

Curt Smith ta konektá su di kuater honron di temporada

ALTOONA, Pennsylvania – Despues di mas ku un luna sin konektá honron, Curt Smith ta konektá su di kuater honron di temporada. Ku esaki Smith ta yuda su ekipo di New Britain Rock Cats pasa riba Altoona Curve ku skor di 9-2. Smith tabata tin un bon dia nan plato konektando tres hit den kuater turno na bate i empuhando kuater kareda. E di kuater honron di Curt a keda konektá den di dos ining ku dos koredó na base i dos out. Ku esaki Curt ta pone su promedio aktual na .241 for di kua 8 doblete, 4 honron i 18 kareda empuha.

Posted on

Wladimir Balentien ku dos honron pa Yakult Swallows i elegí pa All Star Game

TOKIO, Hapon – Wladimir Balentien tabata tin un bon dia na plato den e partido entre Yokohama DeNA Baystars i Tokyo Yakult Swallows. Apesar di e echo ku Swallows a pèrdè ku skor di 7-6, Balentien a empuha kuater di e seis kareda nan di Swallows. E promé tres kareda nan ku Balentien a empuha a bin den promé ining ora ku e la konektá su di 24 honron di temporada.

Promé ku e partido finalisá den bòm di nuebe ining, Wladimir a bolbe konektá e bala largu pa su di 25 honron di temporada. Esaki tabata un honron solitario ku a hasi e partido un tiki mas pèrtá pero no tabata sufisiente pa Swallows gana e partido. Ku e di 25 honron di temporada di Balentien e ta empatá na promé lugá ku Tony Blanco pa hungadó nan ku mas honron den e temporada aktual. Wladimir a sali e kampeon di honron tantu na aña 2011 i 2012.

Tambe a keda anunsiá ku Wladimir ta e hunga ku a haña mas voto entre outfielder nan den liga sentral di beisbòl hapones pa e All Star Game. Ku un kantidat di 328.032, Balentien ta keda skohe pa su di tres All Star Game na Hapon. E promé partido di e All Star Game lo tuma lugá riba 19 di yüli na Sapporo Dome, sigui pa e di dos partido 20 di yüli na Jingu Stadium i finalisando dia 22 di yüli ku e di tres partido na Iwaki Green Stadium.

Posted on

Christopher Garia ku dos honron den partido

SPOKANE, Washington – Christopher Garia a konektá su promé dos honron nan di temporada pa e ekipo di Spokane Indians. Den partido kontra Boise Hawks Garia a konektá dos honron i ambos tabata honron nan solitario pa right field. Ku esaki Garia ta yuda Spokane Indians gana nan di tres partido konsekutivo, vensiendo Boise Hawks ku skor di 8-6. Spokane Indians ta e afiliashon di Texas Rangers den klase A temporada kòrtiku. Na 2010 Jurickson Profar tambe a forma parti di e ekipo aki.

Posted on

Wladimir Balentien ku dos honron den wikènt tras di lomba

HIROSHIMA, Hapon – Wladimir Balentien a konektá su di 22 i di 23 honron di temporada den wikènt ku ta tras di lomba. E di 22 honron di Balentien a bin den e partido entre Tokyo Yakult Swallows i Hiroshima Toyo Carp. Den e partido aki Balentien a konektá su honron den di 4 ining ku dos koredó na base. E tres kareda nan aki empuha pa Wladimir tabata sufisiente pa Tokyo Yakult Swallows gana di Hiroshima Toyo Carp ku skor di 3-0.

Su siguiente dia un biaha mas kontra Hiroshima Toyo Carp, Balentien a bolbe konektá un honron di tres kareda. E biaha aki den di 3 ining pero esaki no tabata sufisiente pa Tokyo Yakult Swallows sali viktorioso. Ku e honron Swallows a bai ariba 4-0 den di 3 ining pero nan no por a wanta e bentaha aki i a kai vensí ku skor di 5-4.

Aktualmente Balentien tin un promedio di .309 for di kua 7 doblete, 23 honron i 52 kareda empuha. Tambe Balentien ta hungadó ku mas voto aktualmente den Liga Sentral di beisbòl Hapones pa e wega di tur strea. Balentien tin un total aktual di 328.032 voto. E resultado final lo keda anunsiá djaweps awor i e eskoho di e manager nan lo keda anunsiá riba promé di yüli.

E promé partido di e wega di tur strea lo tuma lugá riba 19 di yüli na Sapporo Dome, sigui pa e di dos partido 20 di yüli na Jingu Stadium i finalisando dia 22 di yüli ku e di tres partido na Iwaki Green Stadium.

Posted on

Jair Jurrjens ta logra su di sinku viktoria

SCRANTON, Pennsylvania – Jair Jurrjens a permití 2 kareda den promé ining i 2 mas den di dos ining, apesar di esaki e ta logra su di sinku viktoria. Jurrjens a drenta di kuater ining ku su ekipo di Norfolk Tides perdiendo ku un skor di 4-0 di Scranton Wilkes-Barre RailRiders.

Den e promé tres ining nan di e partido Jurrjens a permití 7 hit pero a logra kontrolá su mes despues. Esaki a pone ku Jurrjens a permití solamente 5 hit den su siguiente sinku ining nan ku a permitie keda den e partido i asina figura komo e picher di rèkert ora ku Norfolk Tides a bai ariba den di nuebe ining. Den di nuebe ining e ekipo di Norfolk Tides a anotá 2 kareda pa asina bini bek for di un skor di 4-0 i gana e partido ku skor di 5-4.

Aktualmente Jurrjens tin un rèkert di 5 partido gana i 4 pèrdí ku un promedio di kareda permití di 3.89 den 13 salida.

Posted on

Dashenko Ricardo bek pa Klase A

ALBUQUERQUE, New Mexico – E ekipo di Albuquerque Isotopes a anunsiá ku nan a manda kècher Dashenko Ricardo pa e ekipo di Rancho Cucamonga Quakes den klase A. Esaki ta debí ku kècher Jonh Baker a keda claim riba waivers pa e ekipo Albuquerque Isotopes i mester a hasi lugá pa e atkishon aki. Ricardo a hunga dos partido pa Albuquerque pa un promedio di .000 den 7 turno na bate, ku 1 base por bola.

Promé ku Ricardo a forma parti di Albuquerque Isotopes e la forma parti di e ekipo di dòbel A Chattanooga i despues tambe ku e ekipo di klase A Great Lakes. Den 29 partido ku e dos ekipo nan aki Dashenko tabata tin un promedio di .207 for di 1 honron i 10 kareda empuha, tambe e la mata 8 di 31 koredó ku a purba roba base.

Posted on

Wladimir Balentien ta konektá su di 21 honron di temporada

OSAKA, Hapon – Wladimir Balentien ta konektá su di 21 honron di temporada den beisbòl hapones. Apesar di esaki e ekipo di Tokyo Yakult Swallows ta kai vensí kontra ORIX Buffaloes. Balentien su honron a bin den di dos ining i tabata un honron solitario. Banda di esaki Balentien a haña 3 base por bola den un total di sinku turno na bate. Ku esaki Balentien ta pone su promedio na .311 for di kua 7 doblete, 21 honron i 46 kareda empuha.

Posted on

Jair Jurrjens ta pèrdè su di 4 partido permitiendo solamente 1 hit

NORFOLK, Virginia – Jair Jurrjens a subi bek riba montikulo pa e ekipo di Norfolk Tides pa su di 12 salida. Jurrjens a pèrdè su ultimo salida pa motibu di un leshon na su dùim. Den e partido di Norfolk Tides kontra di Louisville Bats tur kos a mustra ku e dùim di Jurrjens a rekuperá kompletamente. Jair a permití solamente un hit den e partido aki. Apesar di esaki Jurrjens mester a konformá su mes ku e derota.

Jurrjens a habri kabes di 6 ining permitiendo un doblete for di e bate di Jason Donald. Esaki tabata e promé i ultimo hit ku Jurrjens a permití den e partido. Despues di e hit aki a siguí dos sakrifisio. E promé un toke di sakrifisio ku a move Donald pa tersera base i despues un fly di sakrifisio ku a empuha Donald. E kareda aki a manda Louisville Bats ariba 1-0 i tabata sufisiente pa nan bai ku e viktoria.

Jurrjens a bai e ruta kompletu pichando shete ining kompletu permitiendo 1 hit, 1 kareda, 3 ponche i niun base por bola. Jair tin un rèkert di 4 wega gana i 4 wega pèrdí den 12 salida ku un promedio di kareda permití di 3.82.

Posted on

Selekshon Hulandes pa World Port Tournament

UTRECHT, Hulanda – Steve Janssen, manager di e ekipo Hulandes ku lo partisipá na World Port Tournament a anunsiá e hungadó nan ku lo ta riba roster.

E selekshon Hulandes ta kuminsá e torneo di 30 di yüni ku e siguiente roster:

Pitcher nan:  Rob Cordemans, Kevin Heijstek (tur dos di L&D Amsterdam), Diegomar Markwell, Berry van Driel, Orlando Yntema (nan tur di DOOR Neptunus), Arshwin Asjes, David Bergman, Leon Boyd (nan tur di Corendon Kinheim), Bayron Cornelisse (Vaessen Pioniers) i Chris Mowday (RCH-Pinguins)

Kècher nan: Bas Nooij (L&D Amsterdam) i Rudy van Heydoorn (DOOR Neptunus)

Infielder nan: Jeffrey Arends (Corendon Kinheim), Jesse Aussems, Michael Duursma (tur dos di L&D Amsterdam), Dwayne Kemp (DOOR Neptunus), Vince Rooi (Vaessen Pioniers) i Stijn van der Meer (UVV)

Outfielder nan: Gianison Boekhoudt i Shaldimar Daantji (tur dos di DOOR Neptunus), Quintin de Cuba i Bryan Engelhardt (tur dos di Corendon Kinheim), Roeland Henrique (L&D Amsterdam) i Danny Rombley (Vaessen Pioniers).

Den e torneo ku ta tuma lugá entre 30 di yüni pa 7 di yüli Hulanda lo enfrentá Cuba, Kòrsou i Taiwan den Neptunus Familiestadion na Rotterdam.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media