Beisbòl Archives | Page 79 of 107

May 29, 2013

Jair Jurrjens ku su di 4 salida sin desishon

NORFOLK, Virginia – Despues di a pèrdè su ultimo salida, Jair Jurrjens a subi montikulo en búskeda di su di 5 viktoria di temporada. Tur kos tabata mustra den e direkshon ei tambe na momentu ku Jurrjens a bandoná e partido den di 6 ining lagando Norfolk Tides ariba kontra di Scranton/Wilkes-Barre RailRiders ku skor di 6-4.

Apesar ku Tides a gana e partido 10-8, e bullpen no por a wanta e bentaha ku Jurrjens a laga i ta laga RailRiders bai ariba 7-6 den kabes di 8 ining. Den bòm di 8 ining Tides ta bin bek ku 4 kareda pero na e momentu ei ya Jurrjens no tabata e picher di rèkert mas. Jair a picha 6 ining kompletu den e partido aki permitiendo 8 hit for di kua 4 doblete. Jurrjens a regalá solamente un base por bola i a poncha 3. Den su 6 ining nan di trabou e la permití 4 kareda limpi. Ku esaki Jurrjens ta mantené su rèkert na 4-2 den 10 salida, ku un promedio di kareda permití di 3.41.

May 28, 2013

Didi Gregorius ta konektá su di 4 honron di temporada

PHOENIX, Arizona – Mariekson ‘Didi’ Gregorius tabata den un slump despues di a konektá solamente 3 hit den su ultimo 19 turno nan na bate den su ultimo 5 partido nan. Esaki a kambia den e partido di Arizona Diamondbacks kontra Texas Rangers kaminda Didi a konektá 2 hit den 4 turno nan bate pa yuda Diamondbacks gana di Rangers ku skor di 5-4.

Den bòm di promé ining Gregorius a konektá un tripel ku a empuhe 1 kareda. Mas lat den a partido, pa mas eksakto den bòm di 8 ining Gregorius a konektá su di 2 hit di e partido. Ku un koredó na base Didi a konektá un bataso largu pa right field pa su di 4 honron di temporada.

Aktualmente Gregorius tin un promedio di .324 for di kua 8 doblete, 2 tripel, 4 honron I 11 kareda empuha. Te ainda Didi tin e promedio i porsentahe di yega base mas haltu di rookie nan den Liga Grandi. Pa loke ta trata slugging Gregorius ta na di dos lugá.

May 28, 2013

Dashenko Ricardo ta pasa pa Ogden Raptors

GREAT LAKES, Michigan – E ekipo di Great Lake Loons a anunsiá ku nan a aktivá kècher Eric Smith for di lista di hungadó leshoná. Esaki ta trese ku ne ku mester a manda Dashenko Ricardo pa un otro afiliashon di Los Angeles Dodgers pa asina traha lugá pa Eric Smith. Ricardo a keda manda pa e ekipo di Ogden Raptors, ku ta e afiliashon di Dodgers den Rookie League. Ku e ekipo di Loons, Ricardo tabata tin un promedio di .202 for di kua 4 doblete i 7 kareda empuha.

May 26, 2013

Yurendell de Caster ku di tres honron di temporada

MEXICO CITY, Mexico – Yurendell de Caster ta siguí “red hot” pa e ekipo di Acereros del Norte. Den e partido di Acereros del Norte kontra Diablos Rojos del Mexico, de Caster a sòru pa e úniko kareda di e ekipo di Acereros del Norte. E kareda aki a bini riba un honron solitario den promé ining di Yurendell.

Lastimá mente e ekipo di de Caster no por a wanta e bentaha di 1-0 i a pèrdè ku skor di 4-1. Un biaha mas Yurendell at konektá dos hit den un partido, hasiendo asina aki su di shete wega den kua e ta konektá mas ku un hit den su ultimo dies wega nan. Aktualmente de Caster tin un promedio di .407 for di kua 6 doblete, 3 honron i 10 kareda empuha den 59 turno na bate.

May 26, 2013

Jurickson Profar ku promé honron di temporada pa Texas Rangers

SEATTLE, Washington – Jurickson Profar a konektá su promé honron di e temporada aki pa su ekipo di Texas Rangers. Den e partido Profar tabata e primer bate pa e ekipo di Rangers i no a dura muchu ku e ta buta Texas riba e markadó. E di seis picheo di e picher di Seattle Mariners, Profar a konektá pa right field pa su promé bataso largu. Ku e honron aki Profar ta ekstendé su racha di hit konektá na kuater partido. Aktualmente Profar tin un promedio di .308 den kuater partido ku e ekipo di Texas Rangers.

May 25, 2013

Andruw Jones ku honron ta hiba Eagles na viktoria

HIROSHIMA, Hapon – Andruw Jones a konektá su di 8 honron di temporada pa asina Tohoku Rakuten Golden Eagles gana di Hiroshima Carp ku skor di 2-1. Den kabes di 9 ining ku e skor empatá na unu ainda, Jones a konektá un honron pa left field i hiba e ekipo di Eagles ariba ku skor di 2-1. Aktualmente Jones tin un promedio di .243 for di kua 5 doblete, 8 honron i 23 kareda empuha.

May 25, 2013

Yurendell de Caster ku dos honron den ultimo dos dia nan

MONCLOVA, México – Yurendell de Caster ta “red hot” den su ultimo dies partido nan ku su ekipo nobo di Acereros del Norte. Den su ultimo dies partido nan de Caster a konektá hit den tur partido ku eksepshon di un partido. Bayendo mas leu den únikamente kuater di e dies partido nan aki de Caster a konektá un hit of ménos den tur otro partido e tabata tin mas ku un hit. Ku esaki Yurendell a añadí su promé dos honron nan di temporada tambe. Aktualmente de Caster tin un promedio di .385 for di kua 4 doblete, 2 honron i 9 kareda empuha den 52 turno na bate.

May 25, 2013

Jair Jurrjens ta pèrdè su di dos wega di temporada

ALLENTOWN, Pennsylvania – Jair Jurrjens ta sufri su di dos derota di temporada despues ku e ekipo di Norfolk Tides a pèrdè di Lehigh Valley Ironpigs. Jurrjens a permití un kareda den di dos i di tres ining ku a pone ku e ekipo di Ironpigs a bai ariba 2-0 riba Norfolk Tides. Den kabes di seis ining Norfolk Tides ta empatá e partido na 2.

E empate no ta dura muchu largu ya ku den bòm di seis ining Ironpigs ta bai ariba bek. Jurrjens ta saka dos out den e ining aki despues di a permití un doblete i un base por bola i tur kos tabata mustra ku e lo a sali for di e ining. Riba loke mester tabata e di tres out di e ining e segunda base di Tides ta kometé un eror i un kareda ta anotá. Despues Jurrjens ta permití un single ku ta empuha un kareda i hasi e skor 4-2. Jair a haña un oportunidat mas pa sali for di e ining pero no ta logra esaki i ta permití un base por bola. Na e momentu ey e menedjer di Norfolk Tides ta disidí di saga Jurrjens for di e partido.

Jurrjens a picha sinku ining i dos tèrsio den a partido aki permitiendo 8 hit, 3 base por bola i 5 ponche. Di e 4 kareda nan ku e la permití 2 kareda tabata limpi. Ku e salida aki Jurrjens ta pone su rèkert na 4 wega gana i 2 pèrdí den 9 salida ku un promedio di kareda permití di 3.14.

May 22, 2013

Jonathan Schoop posiblemente for di aliniashon entre 6 pa 8 siman

BALTIMORE, Maryland – For di 12 di mei Jonathan Schoop no a mira akshon mas pa e ekipo di Norfolk Tides. Siman pasa e ekipo a anunsiá ku nan ta pone Schoop riba lista di hungadó leshoná. Schoop a wòrdu pone riba e lista di hungadó leshoná pa shete dia ku dòlò den su parti abou di lomba.

Awor kos ta mustra di ta un tiki mas serio, aparente mente Schoop a keda diagnostiká ku fraktura den su lomba. Esaki ta nifiká ku e pelotero lo tin mester di entre 6 pa 8 siman di sosiegu pa rekuperá. Tur kos ta mustra ku Schoop lo bai tuma un di dos opinion e siman aki pero ta parse ku e diagnosis inisial lo no kambia.

E temporada aki Jonathan tin un promedio di .268 for di kua 6 doblete, 3 honron i 18 kareda empuha den 127 turno na bate ku e ekipo di tripel A Norfolk Tides.

May 21, 2013

Andruw Jones ta yuda Rakuten Golden Eagles pasa riba Tokyo Yakult Swallows

TOKIO, Hapon – Aktualmente den beisbòl profeshonal hapones ta tumando lugá e wega nan di inter liga. Esaki a trese ku ne ku e ekipo di Andruw Jones, Rakuten Golden Eagles a topa ku e ekipo di Wladimir Balentien kual ta Tokyo Yakult Swallows. Ku yudansa di Andruw Jones Golden Eagles a logra sali viktorioso riba Swallows ku skor di 3-1. Den di 5 entrada, Jones a konektá su di 7 honron di temporada pa asina kibra e empate i manda Golden Eagles ariba ku skor di 2-1. Jones a empuha 2 di e tres kareda nan anotá pa Golden Eagles den e partido aki. Banda di esaki Wladimir Balentien ta esun ku a empuha e úniko kareda pa e ekipo di Swallows.