WILLEMSTAD — E aña aki meskos ku a e kaso den añanan anterior, e torneo di Creme de la Creme ta keda dedika na un personahe grandi den mundu di baseball. Randall ‘Chulo’ Simon un persona ku un karakter tremendo ku ta stima hóbennan i semper a sa di yuda hóbennan tantu na Kòrsou komo den eksterior. Organisadonan di Creme de la Creme ta apresiá masha tantu ku Chulo a aseptá e proposishon pa dediká e torneo na su nòmber i ku Chulo apesar di tur su kompromisonan a traha tempu pa ta presente durante di e torneo.
E torneo e aña aki lo tuma lugá di di 3 di sèptèmber pa 2 di òktober na Post 6 i Sabana Ballpark.
Nòmber: Randall Carlito Simon, mihó konosí komo Chulo Simon.
Nasé: 26 mei 1975 na Kòrsou den e bario di Kura Piedra pero ku su 2 aña nan a muda pa Seru Fortuna
Ruman: Nan ta 11 ruman di kua e ta mas chikí
Estado Sivil: Kasa ku señora Violetta Anguiano
Yu: un yu hòmber Randall Simon Jr. i un yu muhé Sophia Lucia Simon
Adrès aktual: E ta biba pa basta aña kaba na Mexico.
Kon Randal a kuminsá hunga beisbòl?
For di trempan Randall tabata hunga beisbòl ku su rumannan ku tabata mas grandi kuné i e mester a hunga bon pa por a haña un chèns den e tim. Ora ku nan tabata lag’e afó, e tabata rabia bai kas i bisa su mama i e mama tabata bai buska e otro rumannan i wega no por a kontinuá. Pues asina nan tabata hink’e den tim pa e mama no bin para kos. Ku su 11 aña e mama a regal’é su promé wante di beisbòl i a kuminsá hunga bou di maneho di Djo Pieters den ekipo di Isla. Despues Djo tabata sufri di kebrante di salú i no por a kontinuá. Randall na e momentu ei a pasa pa hunga bala serka Frank Curiel huntu ku su amigu Kònònò van het Kruis. Randall te ku dia di awe ta gradisí e hendenan ku tabata un guia pe. E ta kòrda kon Frank tabata bin busk’e pa hunga bala òf e mes tabata sali kore na pia bai trein i despues kore na pia bai kas bèk. Aparte di beisbòl, Randall tabata hunga futbòl tambe i e ta kòrda klaramente kon e tabata kore bai vèlt di Frank Curiel, hunga beisbòl, sali kore bai vèlt di Vesta pa hunga futbòl, kaba kore bin bèk serka Frank pa hunga beisbòl, kual tabata algu sigur sumamente impreshonante. Randall ta kòrda e momentunan aki komo un parti sumamente importante di su bida ku ta reflehá e trabou duru, amor, entusiasmo i optimismo pa hasi deporte. Pa Randall ta danki na e lucha aki i ku yudansa di esnan rònt di dje, ku awe e ta loke ku e ta.
Ken a skout Randall ?
Randall a mira akshon den little league, Junior league i tambe hubenil i Dòbel A ku e organisashon di Sta Maria, pa despues ku su 16 aña firma ku e organisashon di Atlanta. Randall e tabata studia na e skol tékniko Juan Pablo Duarte den Buenavista i ta splika ku ta tur e skoutnan ku tabata na Kòrsou, esta di Yankees, Baltimore, Atlanta i Cleveland a mustra interes den dje.
Randall ta splika ku tabata e organisashon di Yankees di New York a aserk’é promé (Bayendo su kas un dia for 6’or di mainta). Tabata e mama ku a lant’e bise ku tin algun hende ta puntra pe pafó pero ku nan ta papia un manera straño (nan tabata papia ingles). Pero al final Randall a tuma e desishon pa dia 24 di yuli 1992, firma ku e ekipo di Atlanta mirando ku tabata e ekipo faborito di su mama i aki Giovanni Viceisza i Bill Clark a firma Randall Simon i Andruw Jones.
Unda Randall a hunga den liga Menor i ki dia e la debutá den liga grandi
Randall a ser firmá na aña 1992 i a biaha pa Repúblika Dominikana, unda e la integrá su mes na e kompleho di Atlanta Braves na San Pedro de Macoris ku tabata ser dirigí pa Pedro Gonzales. Komo ku ya temporada tabata finalisando Randall a haña e oportunidat pa hunga algun wega ku e organisashon di Braves den liga menor na Santo Domingo. E temporada siguiente Randall ta biaha pa Merka i ta djòin e ekipo di Danville Braves den e liga di nobato Appalachian. Randall di 93 pa 97 a militá den tur e divishonnan di liga menor i a gana e MVP di e liganan di klase A (’95), AA (’96) i AAA (‘97). Na aña ‘97 Randall ta konektá no ménos ku 45 doblete i ta empuhá 102 kareda ku un promedio di bateo di 308 punto ku e ekipo di Richmond Braves e tempu ei ku awor a bira Gwinnett Braves. Esaki a pone ku dia 01 di sèptèmber di aña 1997, Randall a hasi su debut den liga grandi ku e ekipo di Braves.
Karera komo hungadó di liga grandi
Randall Simon ta un batido lenks di hopi forsa i tabata konektá e bala bon, pero tabata un realidat tambe ku den e ekipo di Atlanta tabatin un pelotero di nòmber Fred Mc Griff ku tambe tabata lenks i tabata konekta e bala super bon. Esaki sigur tabata un opstákulo den kaminda di Randall pa logra hunga tur dia i na 2001 Randall ta pasa pa e organisashon di Detroit kaminda e ta gana e premio di Tiger of the Year komo e mihó hungadó di e organisashon di Detroit Tigers i a logra e título di tripel korona ku Detroit. Pues Randall a hunga ku Detroit na (2001–2002), Pittsburgh Pirates (2003), Chicago Cubs (2003), Pittsburgh Pirates (2004), Tampa Bay Devil Rays (2004), Orix Buffaloes (2005) i ta finalisá ku Philadelphia Phillies (2006). Ku Chicago Cubs tambe Randall a logra yega te den ‘postemporada’ ora ku e ekipo ta logra e título di divishon sentral di liga nashonal.
Paisnan ku Randall a hunga beisbòl
Segun Randall, no tin niun lugá riba e mundu aki ku ta práktika beisbòl, ku e no a partisipá na esaki. Randall despues di a stòp komo hungadó di liga grandi dia a hunga na Kòrsou, Repúblika Dominikano, Merka, Canada, Venezuela, Colombia, Nicaragua, Panama, Méhiko, Hapon i Hulanda. Randall ta splika ku su amor pa e deporte di beisbol ta inmenso i ta hunga esaki unda ku nan brind’e e oportunidat.
Randall su pensamentu pa loke ta Creme de la Creme
Randall na promé lugá, na nòmber di su famia ta gradisí Lando Chirino di a skohe su persona pa dediká e di 15 edishon di torneo Creme de la Creme na dje. Esaki ta promé bia ku Randall ta risibí un homenahe asin’aki na Kòrsou i ta sintié sumamente honrá ku e la ser konsiderá pa haña e honor aki i di kurason ta gradisí e komishon organisadó. Randall ta kere ku e muchanan mester haña e oportunidat di práktika deporte i Creme de la Creme sigur ta un torneo ku ta brinda e hóbennan e oportunidat di hasi esaki i interkambiá ku otro hóbennan di otro pais. Randall ta spera ku e torneo por keda pa hopi aña mas dunando e oportunidat na hobennan di Kòrsou praktika e dushi deporte di beisbol.
Mensahe di Randall na tur e hóbennan di Kòrsou
Randall semper a kere den e ponensia ku trabou duru ta paga i e entusiasmo di hasi loke bo gusta ta pone ku bo ta mehora kada dia mas. Ora ku e wak atras riba su infansia i e mira kon e la lucha pa logra i ku awe e ta loke ku e ta, esaki ta yen’e di orguyo i satisfakshon. No tabata nada fásil, pero ku dedikashon, amor, union i entusiasmo, bo ta logra sigur. Randall ta kere firmemente den e union, mas uni nos ta, mas kos nos por logra huntu i sigur na kada un hóben ku ta praktiká deporte, e ke rekomendá nan pa hasi nan máksimo esfuerso na skol i den nan deporte, semper ku rèspèt pa bo mayornan. Ku bo hasi e kosnan básiko bon, mañan bo tambe por ta manera un Hensley Meulens un Andruw Jones, un Randall Simon òf asta mihó ku nan. Nos tin hopi hóben ku talento i ta sigur ku nos por ta un di e paisnan mas fuerte den beisbòl pa loke ta nos area. Nos mester apoyá otro i uni mas pa nos por logra di ta e mihónan. Maske ku e ta biba leu, semper Randall su kurason ta ku nos hóbennan di Kòrsou.
