SYRACUSE, New York – Jonathan Schoop a konektá tres hit den sinku turno na bate den partido kaminda Norfolk Tides a gana ku skor di 14-1 di e ekipo di Syracuse Chiefs. Schoop su di tres honron tabata unu solitario den di sinku ining. Banda di e kareda empuha aki, Schoop a empuha dos kareda mas den e partido pa un total di tres kareda empuha. Schoop tin un promedio aktual di .254 for di kua 6 doblete, 3 honron i 15 kareda empuha.
TOKIO, Hapon – Wladimir Balentien ta konektá tres hit den kuater turno na bate pa Tokyo Yakult Swallows pero esaki tabata den kousa pèrdí. Tokyo Yakult Swallows a pèrdè ku skor di 11-7 di Hanshin Tigers. Balentien a konektá su di 11 honron den di 8 ining ku niun out i niun koredó na base. Ku esaki Balentien ta keda empatá na di dos lugá riba e lista di hungadó nan ku mas honron den beisbòl profeshonal Hapones. Na promé lugá tin Tony Blanco ku un total di 18 honron e temporada aki. Pa e temporada 2013, Balentien tin un promedio di .309 ku 29 kareda empuha.
BUFFALO, New York – Jonathan Schoop a konektá su di dos honron di temporada pa asina yuda e ekipo di Norfolk Tides gana di Buffalo Bisons ku skor di 7-3. Den di tres ining ku 2 out i niun hende nan base Schoop a konektá su di dos honron di temporada. Norfolk Tides a hinka kuater kareda den e entrada ei ku tabata sufisiente pa nan gana e partido apesar di e kareda nan di siguransa ku nan a añadí. Jonathan ton un promedio di .293 den su ultimo 10 partido. Ku esaki e la pone su promedio pa e temporada na .252 for di kua e tin 6 doblete, 2 honron i 15 kareda empuha.
BUFFALO, New York – Jair Jurrjens ta logra su di 4 viktoria konsekutivo pa Norfolk Tides den un partido ku Tides ta gana ku skor di 8-4 di Buffalo Bisons. Jurrjens no a kuminsá e partidó muchu bon, na momentu ku den bòm di promé ining Bisons ta anotá 3 kareda pa kue bentaha di 3-2 riba Tides. Despues di esaki Jurrjens a tuma kontrol di e partido, permitiendo niun kareda mas den 6 ining kompletu di picheo. Den kabes di 5 ining e ekipo di Tides ta bai ariba 6-3 hasiendo asina aki Jurrjens e picher di rèkert pa e viktoria. Jurrjens tin 4 viktoria i un derota den 7 salida e temporada aki, ku un promedio di kareda limpi permití di 2.62.
MONCLOVA, México – E ekipo di Acereros del Norte a anunsiá ku nan a atkerí e servisio nan di Yurdenell de Caster. Segun e ekipo, “de Caster ku tabata un agente liber a wòrdu buska pa asina yuda reforsá e ofensiva di e ekipo di Acereros.” Den pasado ya Yurendell a yega di hunga den e liga di beisbòl Mehikano. E tin un eksperensiá di 198 partido kaminda e la hunga ku Broncos de Reynosa i Olemcas de Tabasco.
Mas of ménos tres siman pasa Yurendell de Caster a keda laga den libertat pa e ekipo di Winnipeg Goldeyes, esaki riba petishon di e propio hungadó. Na e momentu ei de Caster a duna di konosé ku e ta interesá na bai buska oportunidat den e liga di beisbòl Mehikano.
TOKIO, Hapon – Wladimir Balentien ta konektá su di 10 honron di temporada pa e ekipo di Tokyo Yakult Swallows. Balentien ta hasi esaki den apénas 23 partido ku ta nifiká ku praktiká mente kada dos partido e ta konektá un honron. E honron di Balentien a bin den di tres ining ku dos koredó na base i manda e ekipo di Tokyo Yakult Swallows ariba kontra Chunichi Dragons. Apesar di esaki Swallows no por a wanta e bentaha i kai vensí ku skor di 6-5. Pa e temporada aki Balentien tin un promedio di .313 ku 5 doblete i 28 kareda empuha.
CINCINNATI, Ohio – Andrelton Simmons ta konektá dos honron den partido pa yuda e ekipo di Atlanta Braves derota Cincinnati Reds ku skor di 7-4. Simmons a habri e di dos ining ku un honron solitario pa left field. Esaki tabata su promé di tres hit total durante di e partido. Den kabes di kuater ining Simmons a konektá un single, empuhando Dan Uggla pa su di dos kareda empuhe di e partido. Simmons a hasi historia na momentu ku den di ocho ining e la bolbe konektá un honron pa left field, e biaha aki ku un koredó na base. Esaki tabata promé biaha den su karera den liga grandi ku e ta konektá dos honron i empuha kuater kareda den un partido.
“Mi a sinti bon na plato,” Simmons a bisa despues di e partido. “Ma haña par di bal riba plato. Danki na kolega nan di ekipo. Nan a duna mi un bon scouting report. Esei a hasi’e mas fásil.”
Banda di un bon prestashon na bate, Simmons ta perfekto defensiva mente. Simmons tin un porsentahe di fildeo di 1.000, e no a kometé ningun eror den 126 oportunidat. Esaki ta empate na promé lugá entre shortstop nan den liga grandi. Elvis Andrus di Texas Rangers tambe tin un porsentahe di 1.000 den 116 oportunidat.
SENDAI, Hapon – Andruw Jones a bai dos siman sin konektá e bala largu, pero esaki a kambia na momentu ku Jones a konektá su di 5 honron di temporada. Jones su honron a bin den promé ining na momentu ku tabata un koredó na base. Ku esaki Tohoku Rakuten Golden Eagles a kue bentaha for di promé ining riba ORIX Buffaloes. Golden Eagles a añadí ocho kareda mas den e partido pa asina gana ku skor di 10-3 di Buffaloes. E honron tabata Jones su úniko hit den 2 turno ofisial na bate. Andruw a haña 2 base por bola den e partido aki i a logra subi su promedio na .233.
NISHINOMIYA, Hapon – Wladimir Balentien a konektá tres hit den sinku turno na bate pa Tokyo Yakult Swallows. Apesar di esaki e ekipo di Swallows a kai vensí kontra Hanshin Tigers ku skor di 7-6. Balentien a konektá su honron den di seis ining, tabata un honron solitario. Ku esaki Balentien ta pone su promedio na .319, ku 24 kareda empuha.
SAN DIEGO, California – E ekipo di Arizona Diamondbacks a anunsiá ku nan a aktivá Mariekson ‘Didi’ Gregorius bek for di lista di hungadó leshoná. Gregorius a wòrdu manda riba lista di hungadó leshoná paso riba 27 di aprel Gregorius a risibí un lansamentu di 93 mia pa ora den su kasko.
Den e enkuentro di Arizona Diamondback kontra San Diego Padres, Gregorius a konektá 2 hit den tres turno na bate. Gregorius su honron a bin den di tres entrada i tabata un honron solitario. Esaki tabata e úniko kareda ku e ekipo di Arizona Diamondbacks a anotá.
Gregorius a bati hit den 8 wega konsekutivo e temporada aki batiendo 13 hit den 30 turno pa un promedio di .433 ku 4 doblete i 3 honron i 3 kareda empuha.