Category: Beisbòl

Posted on

Jair Jurrjens ta logra di tres viktoria di temporada

NORFOLK, Virginia – Jair Jurrjens tabata un biaha mas fuerte pa e ekipo di Norfolk Tides den su di seis salida di temporada. Despues ku na prinsipio di temporada Jurrjens no tabata risibí hopi ofensivo di su ekipo, e la haña sinku kareda den promé ining pa traha ku ne. Esaki tabata sufisiente pa Jurrjens ku a picha 8 ining kompletu for di kua e la permití 7 hit, 2 kareda, 2 base por bola i 7 ponche. Jair tabata hopi efektivo den e partido pichando 92 bala for di kua 68 tabata strike. Ku esaki Jurrjens ta logra su di tres viktoria di temporada, miéntras e tin solamente un derota.

Jonathan Schoop tambe tabata tin un bon partido, konektando 3 hit den 4 turno. Tur tres hit di Schoop tabata single. Schoop ta subi su promedio na .250 ku e prestashon aki. Den ultimo dies partido nan Schoop a konektá hit den tur partido ku eksepshon di un.

Posted on

Curt Smith ku su di dos honron di temporada

PORTLAND, Oregon – Curt Smith a konektá su di dos honron di temporada, apesar di esaki e ekipo di New Britian Rock Cats ta kai chikí kontra Portland Sea Dogs. Xander Bogaerts a manda e ekipo di Sea Dogs ariba den promé ining ku un honron solitario. Den di kuater ining ku e ekipo di Rock Cats perdiendo 1-0, Smith a konektá un honron di dos kareda pa manda Rock Cats ariba 2-1. Rock Cats no por a mantené e bentaha aki i a pèrdè ku skor di 5-4. Curt Smith e temporada aki tin un promedio di .278. Den 54 turno na bate Smith tin 15 hit for di kua 3 doblete, 2 honron i 7 kareda empuha.

Posted on

Dashenko Ricardo ku tres hit pa Great Lakes Loons

GREAT LAKES, Michigan – Dashenko Ricardo a konektá tres hit pa su ekipo Great Lakes Loons pero esaki tabata den kousa pèrdí. Great Lakes Loons a pèrdè ku skor di 4-0 kontra Beloit Snappers. E ekipo di Ricardo a konektá 5 hit for di kua 3 tabata di Ricardo. Den e partido Dashenko a konektá dos single i un doblete.

“Awe nochi, mi tabata purba na konsentrá riba yama un bon partido tras di plato,” Ricardo a bisa. “Pero ma ripara ku nan tabata purba di bin aden ku e fastball. Pues den mi di dos turno nan bate, ma pone atenshon riba esei i trata na hasi kontakto ku e bala.”

Dashenko ta subi su promedio na .286 ku 12 hit den 42 turno na bate. Di e 12 hit nan aki Ricardo tin 3 doblete, 1 honron i 10 kareda empuha.

Posted on

Playoff Little League ta ranka sali wikènt aki

WILLEMSTAD – E playoff nan di Little League ta kuminsá wikènt aki. Djabièrnè anochi tin e promé partido nan di divishon Minor i Little. Den divishon Minor, 5’or lo hunga e selekshon di Willemstad kontra Pabou. Despues 7’or di anochi tin divishon Little ora ku e selekshon di Willemstad topa ku Pabou. Tur e dos partido nan aki ta na Frank Curiel Ballpark.

E playoff di Minor i Little ta siguí djasabra ora ku 4’or di atardi e selekshon di Minor League Pabou enfrentá esun di Pariba na Frank Curiel Ballpark. Despues 6’or Little League Pabou ta enfrentá Little League Pariba tambe na Frank Curiel Ballpark.

Djasabra tin partido nan di Junior i Senior League tambe, e partido nan aki lo tuma lugá nan Tio Daou Ballpark. Kuminsando 10’or di mainta tin e promé partido. Entre e Junior League Willemstad ku Junior League Pabou. E di dos partido ta di divishon Senior i lo tuma luga 2’or entre Liga Willemstad i Liga Pabou.

Djadumingu tambe tin dos partido, kuminsando un biaha mas 10’or di mainta. Den e partido aki Junior League Pabou ta topa ku Junior League Pariba. E di dos partido ta 2’or di atardi ora ku Senior League Pabou hunga kontra Senior League Pariba.

Posted on

Andrelton Simmons ku di dos honron di temporada

ATLANTA, Georgia – Andrelton Simmons a kuminsá e temporada un tiki friu pero ta hañando su swing poko poko den ultimo wega. Simmons a konektá 11 hit den ultimo 33 turno nan na bate ku ta bon pa un promedio di .333. Den e 11 hit nan aki tin Simmons su di dos honron di temporada. Andrelton a konekta e honron aki den e promé ining di e partido di Washington Nationals kontra Atlanta Braves kontra picher Gio Gonzalez.

Simmons a konektá dos hit mas den e partido aki, pa asina igualá pa di sinku biaha su rèkert di tres hit den un partido. Andrelton a subi su promedio pa e temporada na .241. Banda di ku Simmons a kuminsá haña su swing, Simmons ta hasiendo un bin trabou defensivo for di prinsipio di temporada. Andrelton no a kometé ningun eror di 92 chèns na shortstop, loke ta dune un porsentahe di fildeo di 1.000. Ku esaki Simmons ta keda empatá na promé lugá den Liga Grandi entre shortstop nan.

Posted on

Wladimir Balentien ku tres honron den partido

YOKOHAMA, Hapon – Wladimir Balentien ta sigui swing un bate kayente. Den e partido di Tokyo Yakult Swallows kontra DeNA Baystars, Balentien a konekta 3 honron i empuha 5 kareda pa asina Swallows gana ku skor di 12-3.

Balentien a konekta honron den tres partido konsekutivo. Den e partido aki e la konekta honron den prome i di dos ining i despues un biaha mas den di ocho ining. Ku esaki Balentien a subi su total di honron pa temporada na 8. Balentien tin un promedio aktual di .333 ku 22 kareda empuha den 15 partido.

Posted on

Mariekson ‘Didi’ Gregorius ta bai bek riba lista di hungado leshona

PHOENIX, Arizona – Apenas dos siman ku Mariekson ‘Didi’ Gregorius tabata tin riba roster di Arizona Diamonbacks e la bolbe wordu pone riba lista di hungado leshona. Gregorius a kuminsa e temporada 2013 riba lista di hungadao leshona ku un leshon na su brasa.

E biaha aki Didi a wordu manda riba lista di hungado lesahona paso riba 27 di aprel Gregorius a risibi un lansamentu di 93 mia pa ora den su kasko. E dia sigiuente Gregorius a bisa, ku su kabes a hincha un tiki i e tabata tin un tiki dolo di kabes pero otro di esei e tabata sinti bon. Apesar di esaki e staf tekniko i mediko di Arizona a disidi di manda Gregorius riba lista di hunga do leshona.

Gregorius a wordu pone riba lista di hungado leshona pa shete dia retro aktivo na 27 di april. Ku esaki Gregorius te elegibel pa regresa bek riba roster di Arizona riba 4 di mei. Didi a konekta 11 den 27 turno pa un promedio di .407 for di kua 4 doblete, 2 honron i 2 kareda empuha.

Posted on

Wladimir Balentien ku honron di viktoria pa Swallows

TOKIO, Hapon – Un dia despues ku Wladimir Balentien a konektá su di kuater honron di temporada e ta bolbe konektá un mas pa su di sinku.  Balentien pa di dos dia konsekutivo ta yuda e ekipo di Tokyo Yakult Swallows superá un défisit i gana di Yomiuri Giants. Swallows tabata pèrdí un pa nada te den di ocho ining. Aki nan Balentien a konektá un honron di dos kareda ku a manda Swallows ariba 2-1. Ku esaki Swallows ta gana tres wega konsekutivo for di e lider nan di Liga Sentral, Yomiuri Giants.

Posted on

Jair Jurrjens un biaha mas ekselente pa Norfolk Tides

NORFOLK, Virginia – Despues di tres salida for di kua dos salida sin desishon i un wega pèrdí, Jair Jurrjens ta gana su di dos wega konsekutivo. Jurrjens huntu ku tres relevista ta kombiná pa hiba Norfolk Tides na un viktoria di 2-1 riba Toledo Mud Hens. Den kabes di sinku ining Jurrjens ta permití e úniko kareda di e partido despues di permití un doblete i un single empuhador.

Ku un total di 101 picheo for di 64 tabata strike, Jurrjens a picha seis ining i dos tèrsio. Jurrjens a poncha shete, permitiendo solamente dos base por bola i seis hit. Pe temporada Jair tin un rèkert di dos wega gana i un pèrdí ku un promedio di kareda permití di 2.64.

Jonathan Schoop a konektá un hit den tres turno den e partido aki. E hit aki tabata un doblete den di kuater ining, ku ta ekstendé Schoop su racha di hit konsekutivo na 10 partido. Den e ultimo dies partido nan Schoop ta batiendo pa un promedio di .343 ku sinku doblete i ocho kareda empuha.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media