Beisbòl Archives | Page 84 of 107

April 22, 2013April 21, 2013

Jair Jurrjens ku ayudo di Jonathan Schoop ta gana su promé partido

DURHAM, North Carolina – Un biaha mas Jair Jurrjens a subi riba montikulo pa su ekipo di Norfolk Tides. Esaki tabata Jurrjens su di kuater salida pa e ekipo, kaminda e la bai buska su promé viktoria. Jurrjens a sali dominá e partido kaminda e la picha tres ining kompleto sin permití kareda. Ku esaki e ekipo di Norfolk Tides a haña chèns di kue e bentaha di tres pa nada.

Den di kuater ining despues di permití tres single, un base por bola i un eror e ekipo di Durham Bulls ta empatá e partido na tres kareda. Jurrjens ta logra mantené e skor na tres pa e próksimo entrada nan. Den kabes di seis ining Jonathan Schoop ta manda su ekipo ariba ku un single empuhador di un kareda. Despues di seis entrada i dos tèrsio Jurrjens ta bandoná e partido lagando Norfolk Tides ariba ku skor di sinku pa tres. Jurrjens den su trabou a permití shete hit, tres kareda, kuater base por bola i dos ponche tur esaki pichando 100 bala di kua 64 tabata strike.

Jonathan Schoop a konektá tres hit den kuater turno den e partido, for di kua un doblete, dos kareda empuha i un base por bola. Ku e prestashon aki Schoop ta subi su promedio na .210.

April 21, 2013

Andruw Jones ku di kuater honron di beisbòl Hapones

CHIBA CITY, Hapon – Andruw Jones aparentemente a haña su swing di honron. Despues di a konektá solamente un honron den su promé dos i mei siman nan den beisbòl Hapones, Jones a konektá tres honron den ultimo sinku dia nan. Andruw su honron tabata un honron solitario i tabata su úniko hit den kuater turno ku e la haña den e partidó pa Tohoku Rakuten Golden Eagles. Jones a subi su promedio ku 41 punto den e ultimo siman. Aktualmente Andruw tin un promedio di .250 i un porsentahe di yega base di .395.

April 20, 2013

Yurendell de Caster laga den libertat

WINNIPEG, Canada – Yurendell de Caster a keda laga den libertat pa e ekipo di Winnipeg Goldeyes. Winnipeg Goldeyes ta un ekipo di beisbòl profeshonal situá na Winnipeg, Canada i ku ta forma parti di e Asosiashon Amerikano di Beisbòl Profeshonal Independiente. Segun e ekipo nan a laga de Caster den libertat riba petishon di e hungadó mes. Yurendell ke bai buska oportunidat den e liga di beisbòl Mehikano. Ainda no ta konosí si de Caster a haña un ekipo.

April 19, 2013

Roderick Bernadina bek ku Delmarva Shorebirds

SALISBURY, Maryland – Despues ku siman pasa e ekipo di Delmarva Shorebirds a asigná Roderick Bernadina pa e ekipo di Aberdeen IronBirds, e siman aki Bernadina ta bek ku Shorebirds. Bernadina su ultimo partido ku Delmarva tabata djaweps 11 di aprel kaminda e la haña solamente un turno nan bate promé ku saka for di e partido. Roderick a bin ta hasi un bon trabou pa e ekipo di Delmarva Shorebirds. Den ocho partido ku Bernadina a hunga aden e tabata tin un promedio di .364 for di kua un tripel, un honron i kuater kareda empuha.

April 19, 2013

Curt Smith ku promé honron di temporada

PORTLAND, Maine – Curt Smith a konekta hit den tur shete partido ku e la hunga e temporada aki pa e ekipo di New Britan Rock Cats. Awor tambe e tin su promé honron di temporada. Smith su honron a bin den di nuebe ining ku un koredó na base i un out. Den e mes un partido aki Smith a konektá un total di tres hit den sinku turno na bate. Su dos otro hit nan tabata un doblete i un single. Aktualmente Curt ta batiendo pa un promedio di .387, ku tres doblete, un honron i sinku kareda empuha.

April 19, 2013April 19, 2013

Andruw Jones su di tres honron den beisbòl Hapones

HAPON – Dos dia despues ku Andruw Jones a konektá su di dos honron di temporada den beisbòl profeshonal Hapones, e la konektá su di tres. Jones a konektá un honron di tres kareda den di dos ining pa e ekipo di Tohoku Rakuten Golden Eagles. Aktualmente Jones a figura den 17 partido i tin un promedio di .232.

April 19, 2013

Otro salida sin desishon pa Jair Jurrjens

GWINNETT, Georgia – E promé entrada di e partido tabata desisivo pa Jair Jurrjens. Despues di a saka e promé out, Jurrjens a permití dos single, un flai di sakrifisio ku e empuha un kareda i un honron di dos kareda. Total Jurrjens a permití tres kareda den e promé entrada i den e partido. Jurrjens a picha seis ining kompleto, permitiendo ocho hit, tres kareda, un base por bola i dos ponche. Di un total di 91 bala picha Jurrjens a picha 61 pa strike.

E ekipo di Jurrjens, Norfolk Tides a anotá un kareda den di dos ining ku yudansa di Jonathan Schoop ku a konektá un doblete empuhador. Norfolk Tides no a anotá nada mas te ku di nuebe ining. Den kabes di nuebe ining Norfolk Tides ta añadí tres kareda pa asina kue bentaha di 4-3 riba e ekipo di Gwinnett Braves. Ku e regreso aki di e ekipo Jurrjens a wòrdu kita komo e picher di desishon. Den tres salida e temporada aki Jurrjens tin dos salida sin desishon i un wega pèrdí.

April 19, 2013

Mariekson ‘Didi’ Gregorius ku promé honron den Liga Grandi

NEW YORK, New York – Despues di a pasa 15 dia riba lista di hungadó leshoná, djamars ultimo Arizona Diamondbacks a aktivá Mariekson ‘Didi’ Gregorius riba nan roster di liga grandi. Gregorius a yega e ekipo grandi di Arizona ku un bate kayente. Den su estadia den tripel A promé ku e la wòrdu aktivá riba e roster di liga grandi, Gregorius a bati pa un promedio di .387, for di kua dos doblete, dos honron i dos kareda empuha.

Gregorius tabata number ocho den e aliniashon di Arizona Diamondbacks i haña su promé turno na bate komo un Diamondback den di tres entrada. Didi no a pèrdè tempu i e promé bala ku e la mira di picher Phil Hughes e la konektá di honron. Gregorius a bisa, “ma ripara ku e ta kuminsá tur hende ku fastball, kièr men mi a pensa di kon no swing riba dje?” Den Gregorius su siguiente turno den di sinku ining e la konektá su promé doblete di temporada. Gregorius a konektá dos hit den sinku turno ayera, ku un kareda empuha i dos ponche.

April 17, 2013

Jurickson Profar ku promé honron i tripel di temporada

OKLAHOMA CITY, Oklahoma – Despues di tres dia for di aliniashon di Round Rock Express, Jurickson Profar ta bek den aliniashon. Den di tres ining Profar ta yuda e ekipo di Round Rock Express bini bek for di un défisit di kuater kareda ku un honron di tres kareda. Profar den di sinku ining ta añadí na su bon prestashon i konektá su promé tripel di temporada.

Esaki no tabata tur kos pa Profar, den di shete ining Jurickson ta añadí un single tambe. Den di nuebe ining Profar a bati pa e siklo pero no a logra e doblete na momento ku e la dal un roletaso pa e picher. Ku e aktuashon aki Profar ta subi su promedio na .281. Profar a drenta den e partido aki ku un promedio di .222.

April 16, 2013April 16, 2013

Mariekson ‘Didi’ Gregorius bek riba roster di Arizona

PHOENIX, Arizona – E ekipo di Arizona Diamondback a anunsiá ku nan a añadí Mariekson ‘Didi’ Gregorius bek riba nan roster di Liga Grandi. Gregorius a hunga su promé wega den vèlt ayera pa e ekipo di Reno den tripel A . Den su estadia den tripel A, Gregorius a bati pa un promedio di .387, for di kua dos doblete, dos honron i dos kareda empuha.