ROUND ROCK, Texas – Jurickson Profar tabata for di e aliniashon di e ekipo di Round Rock Express ayera i awe un biaha mas e ta for di aliniashon. Segun informashon nan Profar ta sintiendo un dòlò na parti robes di su kurpa. Mañan e staf médiko di ekipo lo evaluá Profar un biaha mas pa por determiná kiko ta e paso nan ku lo sigui. Profar tin un averahe di .250 den 24 turno na bate e temporada aki.
SAN DIEGO, California – Kenley Jansen tin su promé wega salba di temporada 2013. Esaki ta e promé wega salba pa Jansen for di 18 di ougùstùs 2012 kontra Atlanta Braves. Jansen a drenta den bòm di nuebe ining i tabata tin mester solamente 13 bala pa kompletá e trabou. E temporada aki Jansen a picha kuater ining i dos tèrsio. Den esaki Jansen a permití solamente dos hit, dos base por bola, poncha seis i no a permití kareda. E temporada aki Jansen a limitá su oponente nan na un averahe di .133.
DURHAM, North Carolina – Den Jair Jurrjens su debut pa e ekipo di Norfolk Tides e mester a konformá su mes ku un salida sin desishon apesar di un ekselente trabou riba montikulo. Un biaha mas e ofensiva di Norfolk Tides no ta presentá na wega i e biaha aki Jurrjens mester a konformá su mes ku e derota. Jurrjens un biaha mas tabata hopi bon riba montikulo permitiendo dos kareda limpi den 5 1/3 ining.
Den di dos ining Jurrjens ta permití un base por bale ku despues ta pasa pa anotá e promé kareda di wega. Despues di e base por bola Jurrjens a permití un doblete kaminda e koredó na primera a avansá bai tersera ku un out. E di dos out ta bin via di un roletaso pa segunda base kaminda e segunda base ta saka e out na primera i e koredó na tersera ta anotá e promé kareda.
E partido ta keda 1-0 te den bòm di seis ining kaminda despues di saka promé out Jurrjens ta permití un single i un doblete pa pone koredó na primera i tersera. Aki nan e mènedjer di e ekipo ta saka Jurrjens for di e partido. E picher nobo ku a drenta e partido ta permití un single i asina empuha e di dos kareda di e partido.
Den e sinku ining i un tèrsio ku Jurrjens a picha e la permití kuater hit for di kua tres tabata doblete. Tambe Jurrjens a permití kuater base por bola i dos ponche. Jair a picha un total di 93 bala di kua 54 tabata strike.
Jonathan Schoop no a hunga den e partido di ayera kaminda Norfolk Tides a konektá solamente dos hit i no a anotá ningun kareda. Schoop tin solamente kuater hit den su ultimo 23 turno nan na bate i solamente tres base por bola. Pa e temporada 2013 Schoop tin un averahe di .174.
ATLANTA, Georgia – Andrelton Simmons a pèrdè dos wega for di aliniashon di Braves despues di a sufri un leshon nan su dùim drechi. Ku e regreso Simmons ta sali for di e racha sin hit ku e tabata aden. Simmons no a konektá hit for di 4 di aprel den e partido kontra Philadelphia. Den e ultimo dos wega nan Simmons a konektá kuater hit den ocho turno na bate. Tambe Simmons a logra empatá su rèkert personal di tres hit den un wega, algu ku e la hasi na tres otro okashon den pasado. Aktualmente Simmons 29 turno na bate for di kua e la konektá 7 hit ku ta bon pa un averahe di .241.
CHATTANOOGA, Tennessee – Dashenko Ricardo a yuda hiba e ekipo di Chattanooga Lookouts na un viktoria kontra Tennessee Smokies. E ekipo di Chattanooga tin tres kècher riba nan roster entre nan Dashenko Ricardo. Ricardo a wòrdu firma algun siman pasa miéntras ku e tabata partisipando den Klásiko Mundial di Beisbòl.
Dashenko a hunga den dos otro partido e temporada aki i no a logra konektá hit. Esaki a kambia den e ultimo partido na momento ku Ricardo a konektá dos hit den kuater turno na bate. Un di e hit nan aki tabata un honron di dos kareda den di seis ining. Ku esaki Ricardo ta subi su averahe pa e temporada na .250.
SALT LAKE CITY, Utah – Mariekson ‘Didi’ Gregorius ku aktualmente ta riba lista di hungadó leshoná pa 15 dia lo kuminsá asignashon di reabilitashon den tripel A. Gregorius a reportá na e afiliashon di Arizona Diamondbacks den tripel A i tabata batido designa. Didi tabata na kabes di e aliniashon i a bai di 5-1 ku un base por bola.
WOODBRIDGE, Virginia – Randolph Oduber ku ta konosí pa hopi komo e orguyo di Paradera, Aruba ta siguí ku un bate kayente. Oduber ta forma parti di e afiliashon di Washington Nationals den klase A kua ta Potomac Nationals. Apesar di ta hiba un bate kayente, ayera Oduber tabata tin un hit so pero e hit aki tabata grandi.
Den di shete ining Potomac Nationals a manda 11 batido na plato i a anotá shete kareda. Kuater di e shete kareda nan aki a keda empuha pa Oduber ku a konektá un grand slam den e entrada aki. Oduber a konektá un liña pa left field ku a sali kompletamente for di stadion den par di sekònde. Esaki tabata e promé honron di temporada pa Oduber ku tin un averahe di .500.
Texas Rangers a anunsiá e siman tras di lomba aki ku nan a yega nan un akuerdo ku shortstop Elvis Andrus pa un ekstenshon di kontrato. Aktualmente Andrus su kontrato ku Rangers ta kore te ku aña 2014. Esaki lo keda ekstendé te na aña 2022 den e akuerdo ku entre Andrus i Texas Rangers. Kiko esaki ta nifiká pa Jurickson Profar?
Profar ta wòrdu konsiderá pa entre otro MLB.com komo e prospekto number un den beisbòl Liga Grandi aktualmente. Aunke Jurickson ta hunga segunda base e ta preferá shortstop i ta e posishon ku e tin mas eksperensha hungando.
Ku e ekstenshon di kontrakt di Andrus, Texas Rangers ta demonstrá ku Andrus ta parti di nan plan i ku nan ke Andrus pa sigur e próksimo ocho aña nan. Si esaki no tabata e kaso Texas Rangers lo no a ekstendé Andrus su kontrakt i na 2014 nan lo a laga Profar tuma over.
Ku shortstop okupá pa e próksimo aña nan, tin un posibilidat ku Profar por bai segunda base. Na segunda base Texas Rangers tin Ian Kinsler ku tambe ta parti di nan plan di plaso largu. Aña pasa Texas Rangers a ekstendé e kontrakt di Kinsler te ku 2017, ku opshon di e ekipo pa tene te 2018.
Ku esaki lo bira difísil pa Profar haña un chèns den Texas Rangers manera kos nan ta aktual. Un posibilidat ku Profar por haña un chèns ta ku si Kinsler hunga sea outfield òf primera base. E agente di Kinsler a ninga rotundamente di laga Kinsler hunga primera base pues probablemente esaki lo no ta un opshon. Ainda no tin aklarashon si Kinsler ta dispuesto na hunga outfield, pero si esaki mester sosodé lo ta na final di e temporada aki.
Te ainda Texas Rangers no tin plan pa Jurickson Profar hunga segunda base tampoko, te ainda Profar a hunga tur su partido nan den tripel A e temporada aki na shortstop. For di 2010, Profar a hunga 277 wega na shortstop, solamente 25 na segunda base i un wega nan tersera.
Esaki ta nifiká ku chèns ta grandi ku Jurickson Profar lo wòrdu kambia pa e ekipo di Texas Rangers. E echo ku Profar ta e prospekto number un den Liga Grandi, Texas lo por usa esaki pa un kambio pa otro hungadó di renombre. Den kaso ku Texas no kambia Profar, su chèns pa ta un hungadó regular lo ta na 2014. E último aki dependiendo si Ian Kinsler ta dispuesto na kambia posishon na benefisio di e ekipo.
PHOENIX, Arizona – Mariekson ‘Didi’ Gregorius ku aktualmente ta riba lista di hungadó leshoná pa 15 dia lo kuminsá asignashon di rehabilitashon den tripel A awe nochi. Gregorius lo reportá na e afiliashon di Arizona Diamondbacks den tripel A. Gregorius lo kuminsá komo pinch hitter i despues traha su kaminda pa ta den tereno bek 15 di aprel.
Par di dia pasa Gregorius a bisa, “mi ta mehorando tur dia un tiki mas. Mi tin ku siguí dilanti i spera ku mi no tin niun retraso den mi rekuperashon. Mi ta loko pa hunga defensa, pero mi sa ku mi no por hansha. Una bes mi por hasi esei, mi ta kere ku lo mi por ta mi mes bek.”
SALISBURY, Maryland – Roderick Bernadina a konektá su promé honron di temporada pa e ekipo di Delmarva Shorebirds. Delmarva Shorebirds ta e afiliashon den klase A di e ekipo di Baltimore Orioles. Den e partido aki Bernadina a hunga right field i tabata number shete den e aliniashon. Bernadina a bai perfekto na bate, konektando dos hit den dos turno na bate i opteniendo un base por bola den su di tres turno. E honron di Bernadina a bin den di seis ining ku dos out i un koredó na base. Aktualmente Roderick tin un averahe di .600 den e temporada 2013.