Beisbòl Archives | Page 87 of 107

April 6, 2013

Jair Jurrjens ekselente den debut pa Norfolk Tides

NORFOLK, Virginia – Jair Jurrjens a hasi su debut den e ekipo di Tripel A, Norfolk Tides. Jurrjens tabata tin un bon prestashon den e partido pero mester a konformá su mes ku un salida sin desishon. Jurrjens a picha 6 ining kompletu i tabata tin 95 lansamentu den e partido aki di kua 56 tabata strike. Banda di esaki Jair a poncha 7 i pèrmití solamente un hit i 2 base por bola.

Den e mesun partido aki Jonathan Schoop a hunga segunda base pa e ekipo di Norfolk Tides. Schoop tabata number seis den e aliniashon i a konektá un hit den kuater turno. Tambe e la risibí un base por bola i a poncha dos biaha. Schoop su averahe aktual ta di .143.

April 6, 2013

Andrelton Simmons for di aliniashon di Braves

ATLANTA, Georgia – Andrelton Simmons no tabata den e aliniashon di Atlanta Braves den e partido kontra Chigaco Cubs di awe djasabra. Simmons a leshoná su dùim robes den e partido anterior na momentu ku e la roba segunda base i mester slide ku kabes promé.

Segun Simmons ku a hunga henter e partido di ayera, e dùim a hincha despues di e partido bai kue mainta. E ta spera di ta bek den aliniashon djadumingu, añadiendo ku e ta sinti bon.

Aña pasa Simmons a pèrdè 56 partido na momentu ku e la kibra su pink drechi. Aki nan tambe Simmons a slide ku kabes promé den segunda base den un partido kontra Philadelphia Phillies.

April 6, 2013

Shairon Martis ku promé wega pèrdí di temporada

ROCHESTER, New York – Shairon Martis tabata tin su promé salida di temporada awe pa e ekipo di tripel A, Rochester Red Wings. Martis a bai e promé dos ining nan sin pèrmití kareda, pero den di tres ining e ta pèrmití un honron di dos kareda. Shairon ta siguí picha e di tres ining i sera e ining permitiendo solamente dos kareda.

Promé ku kabes di kuater ining e mènedjer di Red Wings ta hasi e kambio i saka Martis for di wega. Na tur Martis a picha 69 lansamentu di kua solamente 29 tabata strike. Den e tres ining nan ku Martis a picha e la pèrmití kuater hit, kuater base por bola, dos kareda limpi i un ponche.

April 5, 2013April 5, 2013

Andruw Jones ku su promé honron

SENDAI, Hapon – Andruw Jones a konektá su promé honron den beisbòl profeshonal Hapones. Den e partido aki e ekipo di Jones, Rakuten Golden Eagles a gana di Chiba Lotte Marines ku skor di 17-5. Andruw a konektá dos hit den kuater turno i empuhá tres kareda den e partido. Esaki tabata Jones su di sinku partido den beisbòl profeshonal Hapones. Aktualmente e tin un averahe di .357 i un porsentahe di yega base di .591

Ku e honron aki Andruw lo doná 50.000 yen, mas òf ménos $530 na un bon kousá. Jones a anunsiá ku kada honron ku e konektá den e kampionato di beisbòl profeshonal na Hapon e lo doná e montante menshoná na mucha nan ku a pèrdè nan mayor nan den e temblor i tsunami den 2011 na Hapon.

April 4, 2013

Dashenko Ricardo riba roster di Dòbel A

CHATTANOOGA, Tennessee – E ekipo di Chattanooga Lookouts a anunsiá nan roster pa e temporada di 2013. Chattanooga tin tres kècher riba nan roster di kua Dashenko Ricardo ta un di nan. Ricardo a wòrdu firma algun siman pasa miéntras ku e tabata partisipando den Klásiko Mundial di Beisbòl.

Ricardo a hunga kuater temporada pa e organisashon di Baltimore Orioles i e último dos temporada nan pa e organisashon di San Francisco Giants. Na final di temporada pasa Ricardo a wòrdu laga den libertat pa San Francisco.

April 3, 2013

Mariekson ‘Didi’ Gregorius lo reportá na Tripel A

PHOENIX, Arizona – Mariekson ‘Didi’ Gregorius ku aktualmente ta riba lista di hungadó leshoná pa 15 dia lo reportá pronto na e afiliashon di Arizona Diamondbacks den Tripel A. Ayera Gregorius a bati 15 bala den un wega di simulashon kontra picher di liga menor. Gregorius lo ta pronto ku e ekipo di Tripel A Reno kaminda lo e kuminsá komo pinch hitter i despues trahando su kaminda pa ta den tereno bek 15 di aprel.

Segun Gregorius tur kos ta bayendo segun plan. “Mi ta mehorando tur dia un tiki mas,” Gregorius a bisa. “Mi tin ku siguí dilanti i spera ku mi no tin niun retraso den mi rekuperashon. Mi ta loko pa hunga defensa, pero mi sa ku mi no por hansha. Una bes mi por hasi esei, mi ta kere ku lo mi por ta mi mes bek.”

April 3, 2013April 2, 2013

Roderick Bernadina ta habri temporada ku Delmarva Shorebirds

SALISBURY, Maryland – Awe e temporada di beisbòl Klase A ta kuminsá pa Delmarva Shorebirds. En konekshon ku esaki e ekipo a publiká nan roster pa e temporada 2013. Ku esaki e ekipo a anunsiá ku Roderick Bernadina lo ta bek ku nan. Roderick ta hunga outfield pa Shorebirds i ta ruman di Roger Bernadina di Washington Nationals. Roderick ta e prospekto number 31 den e organisashon di Baltimore Orioles. Temporada pasa Bernadina a hunga 31 partido ku Shorebirds i tabata tin un averahe di .298.

April 2, 2013

Mariekson ‘Didi’ Gregorius loko pa hunga den tereno

PHOENIX, Arizona – Mariekson ‘Didi’ Gregorius a wòrdu pone riba lista di hungadó leshoná pa 15 dia kuminsando 30 di mart. Esaki ta nifiká ku dia 15 di aprel Gregorius por ta bek riba roster di Liga Grandi. Awe Gregorius ta kuminsá práktika bek i a wòrdu pèrmití pa bati den un partido di simulashon.

Gregorius ta spera ku ya pa otro siman e por ta riba tereno den un partido di Liga Menor. Segun Gregorius tur kos ta bayendo segun plan. “Mi ta mehorando tur dia un tiki mas,” Gregorius a bisa. “Mi tin ku siguí dilanti i spera ku mi no tin niun retraso den mi rekuperashon. Mi ta loko pa hunga defensa, pero mi sa ku mi no por hansha. Una bes mi por hasi esei, mi ta kere ku lo mi por ta mi mes bek.”

April 2, 2013

Shairon Martis ta habri temporada den tripel A Rochester

ROCHESTER, New York – E ekipo di tripel A, Rochester Red Wings a anunsiá nan hungadó nan ku lo habri temporada 2013 riba nan roster. Di e 25 hungadó nan riba nan roster 17 tin eksperiensha di Liga Grandi i un di nan ta Shairon Martis.

Martis a kuminsá ku e ekipo di Rochester ana pasa yüni ora ku e tabata forma parti di un kambio entre Pittsburgh i Minnesota. Den e periodo aki Martis a picha den 10 partido i a gana kuater i pèrdè tres ku un efektividat di 5.22. Banda di esaki Martis tin un total di 59 wega gana den Liga Menor ku kuater diferente ekipo. Den Liga Grandi Martis a habri 19 partido ku un rèkert di 6-6 i un efektividat di 5.33.

April 1, 2013

Kòrsou ku tres hungadó riba roster di Beisbòl Liga Grandi

NEW YORK, New York – E liga di beisbòl profeshonal di Estádos Unídos konosí pa MLB a anunsiá awe ku tin 241 hungadó riba roster pa e promé wega di temporada ku no a nase na Estádos Unídos. Di e 241 hungadó nan aki e mayoria ta bin di Repúblika Dominikana, ku tin 89 hungadó den liga grandi.

Venezuela ta siguí Repúblika Dominikana ku 63 hungadó. Na di tres lugá ta Canada ku 17 hungadó den liga grandi. Kòrsou ta na di dies lugá despues di Colombia i Panamá ku ámbos tin kuater hungadó den liga grandi. E tres hungadó nan di Kòrsou ta: Andrelton Simmons, Kenley Jansen i Roger Bernadina.

Kòrsou por tabata empatá ku Colombia i Panamá si MLB lo a konsiderá Mariekson ‘Didi’ Gregorius komo Kurasoleño. Gregorius a nase na Hulanda i MLB ta konsider’é un Hulandes di Hulanda. Apesar di esaki, Gregorius ta bira e di tres hungadó di Hulanda for di 1995 ku ta habri temporada riba roster di liga grandi. E otro dos nan tabata Robert Eenhoorn i Rick van den Hurk.