Beisbòl Archives | Page 88 of 107

April 1, 2013

Roger Bernadina riba lista di mionario

WASHINGTON, DC – Roger Bernadina ta kuminsá temporada 2013 ku un oumento salarial di mas di 100 porshento. Den temporada 2012 Bernadina a gana $493.500 ku e oumento Bernadina lo gana $1.212.500 den 2013. Ku e salario aki Bernadina ta bira un di e 463 mionario nan riba roster pa e promé wega di temporada di beisbòl liga grandi.

Bernadina ta na puesto 432 riba e lista. Aña pasa Andruw Jones i Jair Jurrjens tambe a forma parti di e lista aki. Andrelton Simmons i Kenley Jansen tambe ta forma parti di e roster pa promé wega di temporada pero no tin un salario mionario ainda.

March 31, 2013

Mariekson ‘Didi’ Gregorius riba lista di hungadó leshoná

PHOENIX, Arizona – Arizona Diamondbacks a anunsiá nan roster di 25 hungadó pa komienso di temporada 2013. Diamondbacks lo habri temporada mañan anochi kontra St. Louis Cardinals. Ku esaki Diamondbacks a anunsiá ku nan ta manda Mariekson ‘Didi’ Gregorius riba lista di hungadó leshoná en konekshon ku un leshon na su kokoti drechi. Si tur kos bai segun plan, Gregorius lo por ta riba tereno atrobe 15 aprel próksimo.

March 31, 2013

Andruw Jones ku obrá karikativo na Hapon

SENDAI, Hapon – Andruw Jones a anunsiá ku kada honron ku e konektá den e kampionato di beisbòl profeshonal na Hapon e lo doná 50.000 yen, mas òf ménos $530 na un bon kousá. Jones a disidí ku huntu ku Casey McGehee nan lo doná e montante menshoná na mucha nan ku a pèrdè nan mayor nan den e temblor i tsunami den 2011 na Hapon.

Te ainda Jones no a konektá ningun honron den e temporada di beisbòl Hapones. Den su último partido Jones a bai di 3-1 ku dos base por bola, un doblete i un kareda empuhá. E ekipo di Jones, Rakuten Golden Eagles ta liber mañan i nan lo reanudá e temporada dia 2 di aprel kontra Orix Buffaloes.

March 30, 2013

Jair Jurrjens asigná pa liga menor

BALTIMORE, Maryland – Den un komunikado e ekipo di Baltimore Orioles a konfirmá ku nan a asigná Jair Jurrjens pa kampamentu di liga menor. Jurrjens ta rekuperando di un leshon ku e la sufri den su ultimo wega ora ku un liña for di e bate di Thomas Neal a dal e den su kashi repchi. Ku tur probabilidat Jurrjens lo reportá na e ekipo di Tripel A Norfolk huntu ku Jonathan Schoop.

March 29, 2013

Andruw Jones a debutá den beisbòl Hapones

SENDAI, Hapon – E temporada di beisbòl profeshonal Hapones a kuminsá awe i konsekuentemente ta e komienso di temporada pa Andruw Jones i Wladimir Balentien. Jones su ekipo di Tohoku Rakuten Golden Eagles a hunga kontra Fukuoka Softbank Hawks dilanti mas ku 38.000 fanátiko. Den e partido aki e ekipo di Golden Eagles a kai vensí ku skor di 7-1.

Jones tabata number kuater den e aliniashon komo batido designa pa e ekipo di Eagles. E la bai di 3-1 i su promé turno ofisial den beisbòl profeshonal Hapones tabata un base por bola. Miéntras ku su promé hit tabata un doblete.

Wladimir Balentien su ekipo tambe a hunga awe pero Balentien no a mira akshon. Balentien ta rekuperando di e leshon ku e la sufri den e Klásiko Mundial di Beisbòl. E siman ku a pasa aki Balentien tabata ku e afiliashon di su ekipo den Liga Menor Hapones, kaminda e ta poniendo su mes den kondishon pa regresá ku su ekipo.

March 28, 2013March 28, 2013

FEBEKO ku aplikashon pa selular

WILLEMSTAD – Federashon di Beisbòl di Kòrsou (FEBEKO) a anunsiá ku nan ta trahando riba un aplikashon òf mihó konosí komo “App” pa telefon nan selular ku tin e posibilidat pa instalá app. Segun FEBEKO e aplikashon ku ta den produkshon por wòrdu usa riba selular ku tin e sistema Android, iOS of Blackberry OS. E aplikashon aki ta permití e usuario sigui tur wega di beisbòl lokal for di little league te na e nivel máksimo di beisbòl Dòbel A.

March 28, 2013

Jair Jurrjens leshoná den partidó kontra New York Yankees

SARASOTA, Florida – Jair Jurrjens ketu bai ta trahando pa gana un posishon den e rotashon di Baltimore Orioles pero mester a bandoná e partido di ayera despues di enfrentá shete batido. Den di dos ining Jurrjens a risibí un liña for di e bate di Thomas Neal na su kashi repchi drechi.

Den promé ining dos batido a yega base kontra Jurrjens, e promé riba un single i e otro riba un base por bola. Jurrjens a eliminá tur tres siguiente batido pa medio di pòp flai. Den di dos ining Jurrjens a bandoná e partido lagando dos koredó na base, e promé a en base riba un eror i e otro riba e liña ku a dal Jurrjens.

Jurrjens a permití dos kareda den e partido aki di kua un tabata un kareda limpi. Banda di esaki Jurrjens a permití dos hit, un base por bola i sero ponche.

Despues di e partido Jurrjens a bai saka potrèt X-ray i nan a sali negativo pero ainda e ta hopi steif i e leshon ta hasié un tiki inkómodo den su rutina nan diario. Riba e posibilidat di hasi un bon impreshon Jurrjens a bisa: “Mi no por bisa masha riba esaki. E ta loke e ta anto mi ta dil ku n’e. Mi ta purba na mantené positivo i dil ku n’e.”

March 28, 2013

Ademar Rifaela ta firma ku Baltimore Orioles

WILLEMSTAD – Ademar Rifaela a firma kontrakt profeshonal ku e ekipo di Baltimore Orioles. Rifaela a hunga temporada ku a pasa pa e ekipo di Marchena Braves i a hunga den tantu Klase A i Hubenil. Durante di e temporada aki Rifaela a hunga tantu den outfield komo picha.

Den Hubenil, Rifaela a hunga 19 partido for di kua e la konektá 21 hit pa un averahe di .382. Banda di esaki Rifaela a habri un partido riba montikulo na kuater okashon. Den e 37 2/3 ining ku Rifaela a picha e tabata tin un efektividat di 2.63 ku 27 ponche i 14 base por bola. Rifaela a hunga 10 partido den Klase A ku un averahe di .200.

Rifaela lo muda pa Republika Dominikana kaminda lo e kuminsá su karera profeshonal ku afiliashon di Orioles aya nan.

March 26, 2013

Roger Bernadina ku honron kontra Miami Marlins

JUPITER, Florida – Den e partido kontra Miami Marlins, Roger Bernadina a bai di 2-2 inkluyendo un honron. Bernadina a drenta komo pinch runner pa Denard Span den di sinku ining. Den mesun ining Bernadina ta logra nota riba un eror di Miami Marlins. Ku sero out den kabes di shete ining Bernadina a konektá un honron pa right field.

March 26, 2013

Jurickson Profar asigná pa Tripel A

SURPRISE, Arizona – Despues di hopi deliberashon e ekipo di Texas Ranger a disidí di manda Jurickson Profar pa nan ekipo di Tripel A, Round Rock. Profar ta wòrdu konsiderá un di e mihó prospekto nan den beisbòl profeshonal.

Segun e “general manager” di Texas Rangers, Jon Daniels, “e desishon pa manda Profar tripel A no tabata fásil. Profar a impreshoná tur hende pero Rangers a disidí ku e mester haña e oportunidat di hunga tur dia.”

Texas Rangers ta di opinion ku si Profar keda den Liga Grandi lo e tin ku sinta banki miéntras ku Elvis Andrus i Ian Kinsler ta kubri shortstop i segunda base.