Beisbòl Archives | Page 89 of 107

March 25, 2013

Xander Bogaerts asigná pa Liga Menor

SARASOTA, Florida – Xander Bogaerts ku hopi ta konsiderá e tòp prospekto di Boston Red Sox a wòrdu asigná pa liga menor despues ku e ekipo di Red Sox a kai kontra Baltimore Orioles. Bogaerts no a hunga masha ku e ekipo di Res Sox den Spring Training dor ku e tabata forma parti di e selekshon di Reino ku a hunga den Klásiko Mundial di Beisbòl. No ta konosí ainda ku kua ekipo di liga menor Bogaerts lo kuminsá e temporada pero tur kos ta mustra ku lo ta e ekipo di Dòbel A Portland.

March 25, 2013March 24, 2013

Andruw Jones su kasa ta pidi kustodia di nan yu

LAWRENCEVILLE, Georgia – Nicole Jones, kasa di pelotero Andruw Jones ta pidiendo pa e keda ku kustodia di nan yu hòmber. Andruw Jones ta bisa ku e ta un mihó mayor pa e yu i pa e motibu ei, e mester haña kustodia di e yu.

Andruw i Nicole Jones ta den proseso di divorsio despues ku Andruw ta wòrdu sospecha di violensia doméstiko na desèmber di 2012. Den e dokumento nan di korte, Nicole ta pidi pa kustodia primario di nan yu hòmber di nuebe aña i tambe anulashon di nan akuerdo nan pre matrimonial.

Den e dokumento nan di korte, Andruw ta bisa, ku no solamente e mester haña kustodia di e yu pero tambe e no ta haña ku e mester paga niun depchi pa Nicole kuida e yu.

E kaso di divisorio di Jones ta siguí djaluna 29 di aprel i lo wòrdu trata pa hues Tom Davis.

March 24, 2013

Jonathan Schoop pa tripel A Norfolk

PORT CHARLOTTE, Florida – E ekipo di Baltimore Orioles a anunsiá ku nan a opta Jonathan Schoop pa nan ekipo di tripel A na Norfolk, Virginia. Schoop a hunga den tres partido di Spring Training ku e ekipo di Orioles. Den e partido nan aki e tabata tin seis turno nan bate for di kua kuater hit, un honron i kuater kareda empuhá.

Miéntras ku Schoop ta bai tripel A, ainda Jair Jurrjens ta den kontienda pa e di sinku lugá den rotashon di Orioles. Den Jurrjens su último partido e la drenta komo relevo i a gana ku skor di 6-3 kontra Tampa Bay Rays. Jurrjens a drenta den relevo di Steve Johnson i a picha sinku ining sin permití kareda. Banda di esaki Jurrjens a permití dos hit, poncha tres i no a bolea ningun batido.

March 22, 2013

Jair Jurrjens i Jonathan Schoop ku bon prestashon

PORT CHARLOTTE, Florida – Jair Jurrjens a drenta komo relevo den e partido ku Baltimore Orioles a gana ku skor di 6-3 kontra Tampa Bay Rays. Jurrjens a drenta den relevo di Steve Johnson i a picha sinku ining sin permití kareda. Banda di esaki Jurrjens a permití dos hit, poncha tres i no a bolea ningun batido.

Mènedjer, Buck Showalter a bisa: “Esaki ta e mihó ku mi a yega di mir’é. No ta importá kua batido e tabata enfrentá, e tabata den kontròl. Esei ta hopi bon. Tur su bala nan tabata keda abou, ku un par di eksepshon. Hopi impreshonante.”

Jonathan Schoop tambe a mira akshon den e partido aki, su promé partido despues di regresá for di e Klásiko Mundial di Beisbòl. Schoop a hunga shortstop i a konektá tres hit den kuater turno, di kua un honron i tres empuhá.

“Esaki ta promé biaha ku mi a mir’é bon. E ta un hòmber grandi,” Showalter a bisa. “E ta eksitá pa hunga. ‘Ma puntr’é ayera kuantu dia mas e mester promé ku e ta kla pa hunga?’ E la bisa, ‘mi ta kla pa hunga awor aki. Mi tin gana di hunga awor aki.’ “

March 20, 2013March 21, 2013

Andrelton Simmons ta sigui kayente despues di Klásiko

LAKE BUENA VISTA, Florida – Andrelton Simmons ku un averahe di .333 for di kua tres doblete i dos honron tabata un di e mihó batido nan di e selekshon di Reino den e Klásiko Mundial di Beisbòl.

Den e partido kontra Pittsburgh Pirates, Simmons a konektá un doblete i dos honron. Simmons a habri e wega ku un doblete den bòm di promé ining. Den di kuater ining Simmons a konektá su promé honron ku niun hende na base. Despues den di sinku Simmons ta konektá su di dos honron di e partido, e biaha aki ta unu di tres kareda.

March 20, 2013March 20, 2013

Roger Bernadina bek ku Washington Nationals

VIERA, Florida – Roger Bernadina a regresá Viera, Florida kaminda e ekipo di Washington Nationals su kampamentu di Spring Training ta. Segun Bernadina, “e Klásiko Mundial di Beisbòl tabata un bon eksperensiá. Úniko kos ta ku e tabata un tiki leu. Nos tabata kontentu di a formá parti di dje. E tabata great.”

E mènedjer di e ekipo, Davey Johnson a bisa ku e la risibí bon komentario di su coach di tersera base, Trent Jewett. Jewett tabata tin kontakto durante e Klásiko Mundial di Beisbòl ku Hensley Meulens pa sa kon ta bayendo ku Bernadina.

Johnson a kontinuá bisando ku Bernadina lo biaha ku e ekipo pa Lake Buena Vista pero e no sa ainda si e lo hunga. “Bernadina a kustumbrá di hunga sporádikamente i e ta dil kuné hopi bon, mihó ku mayoria hungadó,” Johnson a bisa.

March 20, 2013March 20, 2013

Jonathan Schoop bek na Spring Training

SARASOTA, Florida – Jonathan Schoop a regresá bek ku e ekipo di Baltimore Orioles despues di su partisipashon na e Klásiko Mundial di Beisbòl. Schoop ta kontentu ku e prestashon di e selekshon di Reino den e kampionato. “Mi ta kontentu, nos a hasi un bon trabou i nos a mustra mundu ku nos por kompetí na un nivel haltu,” Schoop a bisa.

Schoop tabata kla pa hunga awe den e partido entre Orioles i Toronto Blue Jays pero e mènedjer di e ekipo a preferá dun’é por lo ménos un dia liber promé ku laga hunga atrobe. Schoop a bisa, “mi ta kla pa hunga, ma drumi den avion i si mi tin ku hunga awe, mi ta kla pa hunga.”

Segun e mènedjer e tin gana di wak Schoop un hunga un par di biaha mas promé ku mand’é pa e ekipo di Tripel A. “Mi tin gana di mir’é un par di biaha mas. Nos a haña masha poko oportunidat pa mir’é,” e mènedjer a bisa.

March 20, 2013

Repúblika Dominikana kampion Klásiko Mundial di Beisbòl

SAN FRANCISCO, California – Despues ku e selekshon Dominikano gana e selekshon di Reino nan a pasa pa hunga e final di e Klásiko Mundial di Beisbòl kontra Puerto Rico. For di tempran den e partido e Dominikano nan a bai ariba i nan picheo a sa di mantené e bentaha. Ku un skor di 3-0 Repúblika Dominikana ta bira kampion invikto di e Klásiko Mundial di Beisbòl.

E viktoria aki no ta hasi Repúblika Dominikana solamente e kampion di e torneo, pero ku esaki nan ta bira tambe Kampion di Mundu rekonosé pa e Federashon Internashonal di Beisbòl (IBAF). Esaki ta e promé biaha despues di 1948 na Nicaragua ku Repúblika Dominikana ta logra e titulo di Kampion di Mundu.

Ku e viktoria di e Dominikano nan e reinado di e selekshon di Reino komo aktual Kampion di Mundu tambe ta kaba. Na 2011 e selekshon di Reino a logra titulá Kampion di Mundu na Panamá ora ku nan a vense Cuba den e partido final.

March 19, 2013

Selekshon di Reino ta kai chikí kontra Repúblika Dominikana

SAN FRANCISCO, California – Selekshon di Reino a yama ayó na e Klásiko Mundial di Beisbòl despues di vensí kontra Repúblika Dominikana. Un biaha mas e selekshon di Reino a habri e markadó pero no por a wanta e bentaha aki.

Den promé entrada e selekshon Oraño ta bai ariba 1-0 sin konektá hit. Andrelton Simmons i Jurickson Profar ta probechá di e deskòntròl di Edinson Volquez i yega base riba base por bola. Un roletaso di Roger Bernadina ta avansá e koredó nan pa segunda i tersera base. Wladimir Balentien ta empuhá Simmons for di tersera ku un roletaso pa shortstop Jose Reyes.

Diegomar Markwell a wanta e bentaha di 1-0 te den bòm di sinku ining. Akinan Markwell ta permití dos doblete i e Dominikano nan ta tabla e wega na unu. Den mesun ining Repúblika Dominikano ta añadí tres kareda mas ku ta sufisiente pa sigurá e viktoria.

Ku e viktoria aki e selekshon di Reino ta tèrminá nan partisipashon na e Klásiko Mundial di Beisbòl, miéntras ku Repúblika Dominikana ta hunga e final kontra Puerto Rico. Un parti di e selekshon Oraño ta yega Hulanda mañan mainta, miéntras ku e hungadó nan profeshonal ku ta hunga na Merka lo reportá na nan respektivo ekipo nan i un parti chikí lo bai Kòrsou.

Hensley Meulens, mènedjer di e selekshon ta sumamente satisfecho ku e aktuashon di e ekipo. “Mi ta orguyoso di loke e selekshon aki a brinda durante di e torneo aki. Nos a hunga bon pero e Dominikano nan tabata un tiki mas mihó,” Meulens a bisa. Segun Meulens tur biaha ku tabata tin e torneo e selekshon di Reino a progresá. Ku un smail Meulens a bisa, “esei ta nifiká ku aki kuater aña nos ta yega final.”

March 17, 2013March 18, 2013

Kenley Jansen ta bira tata

SAN FRANCISCO, California – Aktualmente e selekshon di Reino ku ta partisipando den e Klásiko Mundial di Beisbòl ta na San Francisco wardando pa nan por hunga nan partido di semi final mañan anochi kontra Repúblika Dominikana.

Kenley Jansen a wòrdu añadí na e roster di e selekshon di Reino e wikènt aki despues ku Jonatan Iseniaa sufri un leshon na su kokoti drechi i no ta disponibel pa kontinuashon di e torneo. Banda di wòrdu añadí na e roster di selekshon di Reino e wikènt aki Jansen a risibí e notisia tambe ku e la bira tata di un yu muhé, yama Natalia.