Category: Beisbòl

PEORIA, Arizona – E selekshon di Reino ku lo representá Reino den e semi final di Klásiko Mundial di Beisbòl a terminá nan wega nan di fogeo ku éksito. Despues ku e selekshon a regresá Estádos Unídos for di Taiwan nan tabata tin dos enkuentro di fogeo plania. Den nan di dos partido di fogeo nan enfrentá Seattle Mariners i sali viktorioso for di e enkuentro aki ku skor di 8-1.

E partido kontra Mariners a kuminsá ku un minüt di silensio na memoria di Gregory Halman, ku na novèmber di 2011 a fayesé na un edat di 24 aña. Halman tabata forma parti di e organisashon di Seattle Mariners i tambe e selekshon di Reino.

Wladimir Balentien a rekuperá kompletamente di su leshon i a sirbí den e partido di ayera komo batido designa. Mesora Balentien a tuma a trabou over i a konektá tres hit den sinku turno, di kua un honron di tres kareda i un sinlgle empuhador di dos kareda.

Despues di e partido ayera nochi mesora e selekshon Oraño a subi avion i biaha pa San Francisco. Awe 17.15 ora lokal di Kòrsou e selekshon lo train den stadion AT&T na San Francisco. Mañan 12.45 ora lokal di Kòrsou nan lo tin un último training promé ku e semi final djaluna anochi 21.00 ora lokal di Kòrsou. Ainda no ta konosí kontra ken e selekshon di Reino lo hunga pero lo ta sea Repúblika Dominikana òf Puerto Rico.

PEORIA, Arizona – Meskos ku su kolega di ekipo Curt Smith, Dashenko Ricardo e kuminsá den e Klásiko Mundial di Beisbòl komo agente liber. Ricardo a hunga kuater temporada pa e organisashon di Baltimore Orioles i e último dos temporada nan pa e organisashon di San Francisco Giants. Na final di temporada pasa Ricardo so kontrakt no a wòrdu ekstendé pa San Francsico.

E bon prestashon di Ricardo tras di plato huntu ku e selekshon Oraño a duna fruta. Los Angeles Dodgers a gusta e trabou di Ricardo i a ofresé un kontrakt di un aña ku e organisashon. Ricardo a bai di akuerdo ku e kontrakt i asina buta su mes na servisio di Los Angeles Dodgers.

PEORIA, Arizona – Banda di ku e selekshon di Reino a añadí Jurickson Profar i Kenley Jansen na su roster tambe nan tin algu wega di preparashon promé ku nan hunga den e semifinal di e Klásiko Mundial di Beisbòl. Nan promé partido di preparashon tabata kontra San Deigo Padres kaminda e selekshon Oraño a sali for di e porta grandi ku skor di 9-3.

Tres ora promé ku e partido Jurickson Profar a yega den kamerin di e selekshon di Reino kaminda e la wòrdu saludá pa e ekipo i a bisti su unifòrm ku number 10 ariba. Profar a debutá ku e selekshon hungando segunda base pero no a logra konektá hit den su kuater turno nan na bate. Ku e atkishon di Profar na segunda, Jonathan Schoop mester a move i kubri tersera base.

E otro atkishon nan e roster di e selekshon Oraño kual ta Kenley Jansen no a uni ku e selekshon ainda. Si kos nan bai segun plan Jansen lo keda ku Los Angeles Dogders den wikènt, bula djadumingu pa San Francisco kaminda lo e uni ku e selekshon di Reino.

E selekshon di Reino ta hunga awe nochi nan último partido di preparashon promé ku e semifinal na San Francisco, djaluna 18 di mart 9’or di anochi ora lokal di Kòrsou. E partido di preparashon pa e selekshon di Reino lo ta awe nochi 10’or ora lokal di Kòrsou kontra Seatle Mariners.

PHOENIX, Arizona – Curt Smith a yega Klásiko Mundial di Beisbòl komo agente liber despues di a wòrdu laga den libertat pa e ekipo di liga menor Jacksonville Suns. E bon trabou ku Smith a bin ta hasi den e selekshon di Reino a wòrdu honra ku un kontrakt ku e ekipo di Minnesota Twins. Smith a anunsiá esaki ayera na su kolega nan di e ekipo Oraño.

PHOENIX, Arizona – E selekshon di Reino Hulandes a konfirmá ku Kenley Janses lo wòrdu añadí na e roster di e selekshon i lo ta disponibel pa hunga den e buèlta di Kampion nan na parke AT&T na San Francisco. Jansen lo remplasá Jonatan Isenia ku a sufri un leshon na su kokoti drechi. Si kos nan bai segun plan Jansen lo keda ku Los Angeles Dogders den wikènt, bula djadumingu pa San Francisco i regresá bek ku Dodgers djarason.

Don Mattingly, mènedjer di Dodgers a gusta e idea aki: “e no ta pèrdè nada i nos ta pensa ku esaki lo ta bon pe. E ta drenta den kompetensia i lo ta un bon senario pa hink’é den un mentalidat kompetitivo i di preshon haltu i loke nos ta gusta mas ta, ku ta solamente un par di dia.”

PHOENIX, Arizona – Despues di  añadí Jurickson Profar na e roster di e selekshon di Reino probablemente tin un chèns pa añadí un otro hungadó. E regla nan di Klásiko Mundial di Beisbòl ta bisa ku na momentu ku un picher leshoná bo por remplasá esaki ku un otro picher. Segun informashon nan e picher Jonatan Isenia ta leshoná i no por regresá den e kampionato, konsekuentemente esaki ta habri lugá pa un picher.

Den deklarashon nan duna pa picher Kenley Jansen e la bisa ku, ta 95 porshento probabel ku e lo forma parti di e selekshon di Reino pa semifinal djaluna. Si kos nan bai segun plan Jansen lo keda ku Los Angeles Dogders den wikènt, bula djadumingu pa San Francisko i regresá bek ku Dodgers djarason.

Don Mattingly, mènedjer di Dodgers a gusta e idea aki: “e no ta pèrdè nada i nos ta pensa ku esaki lo ta bon pe. E ta drenta den kompetensia i lo ta un bon senario pa hink’é den un mentalidat kompetitivo i di preshon haltu i loke nos ta gusta mas ta, ku ta solamente un par di dia.”

E selekshon di Reino tin te ku djasabra pa trese kambio na e roster. Awe nochi e selekshon Oraño 10’or ora lokal di Kòrsou e ekipo Oraño lo hunga un partido di práktika kontra San Diego Padres.

PHOENIX, Arizona – For di despues di e partido ku e selekshon Oraño a hunga kontra Hapon e mènedjer di e selekshon Hensley Meulens a duna di konosé ku tin posibilidat ku por trese kambio den e roster di e selekshon.

Na e momentu Meulens ei no tabata sigur ainda si e lo trese kambio den selekshon i a menshoná par di faktor ku mester konsiderá promé. E promé faktor tabata, tin ku wak si e hungadó nan ku ta leshoná sigur no por forma parti mas di e torneo. Di dos tabata, tin ku wak si e hungadó nan ku ta bai usa komo remplaso ta haña pèrmití di nan respektivo ekipo nan.

Despues ku e selekshon Oraño a klasifiká pa semifinal Jurickson Profar ta un di e promé hungadó nan ku a hasi su mes dispuesto pa wòrdu añadí na e tim. Profar su disponibilidat a bira un kompromiso ya komo ku ta konfirmá pa Deporte Awe ku Profar lo ta den semifinal ku e ekipo Oraño.

Tur medaya tin dos banda i lástimamente Yurendell de Caster ta wòrdu kita for di e roster pa motibu di e leshon ku e la sufri na pia den partido kontra Hapon.

Awe e selekshon Oraño tabata tin un práktika plania pero esaki a keda kanselá pa Hensley Meulens despues di e biahe di 12 ora for di Hapon pa Arizona. Mañan kos ta siguí normal pa e selekshon di Reino kaminda 7’or di anochi nan lo hunga kontra San Diego Padres i djabièrnè mesun ora kontra Seatle Mariners.

TOKIO, Hapon – E selekshon di  Reino Hulandes ku ta partisipando den e Klasiko Mundial di Beisbol a hunga nan último partido di e di dos buèlta promé nan biaha pa San Fransisco pa hunga semifinal. Un biaha mas e selekshon Oraño mester a enfrentá Hapon pero e biaha aki pa determiná kontra ken kada ekipo ta bai hunga den semifinal ya komo ku tur dos a pasa pa siguiente buèlta.

Andrelton Simmons ta kuminsá kaminda e la keda den e partido kontra Cuba i hiba e selekshon di Reino ariba 1-0 ku un honron den kabes di promé ining. E selekshon Oraño no por a wanta e bentaha aki i a pèrmití ocho kareda den bòm di dos ining.

Den kabes di shete Hulanda ta hasi e partido 8-3. E promé kareda den e ining a drenta riba un single empuhador di Xander Bogaerts i despues e di dos ta drenta riba un flai di sakrifisio di Randolph Oduber. E selekshon di Reino ta siguí pone preshon riba Hapon i ta anotá tres kareda mas den kabes di ocho ining pero esaki no tabata sufisiente i ta pèrdè ku skor di 10-6 di Hapon.

Mesora despues di e partido e selekshon di Reino a subi avion i kuminsá nan biahe di 12 ora pa Phoenix, Arizona. Aki nan e selekshon lo hunga dos wega di training promé ku e partido di semifinal. Nan promé partido ta djaweps 14 di mart, 7’or di anochi kontra San Diego Padres. E di dos partido ta un dia despues esta djabièrnè mesun ora kontra Seattle Mariners.

Segun Hensley Meulens tin posibilidat pa trese algu kambio den e selekshon pero esaki no ta definitivo ainda, e selekshon tin te djasabra pa disidí. Meulens a bisa promé tin ku wak si e hungadó nan ku ta leshoná sigur no por forma parti mas di e torneo. Banda di esaki tin ku wak tambe ku e hungadó nan ku ta bai usa komo remplaso ta haña pèrmití di nan respektivo ekipo nan. E hungadó nan prinsipal den mente di Meulens ta Jurickson Profar, Mariekson Gregorius, Kenley Jansen i Jair Jurrjens.

TOKYO, Hapon – Despues di a gana di Cuba algu dia pasa, selekshon di Reino tabata tin ku saka un viktoria for di e ekipo Kubano pa pasa pa semifinal. Un biaha mas e selekshon di Reino a bin ta kumpli ku nan denominadó komun di e torneo, esta habri e markadó.

E selekshon Oraño a bai ariba den bòm di tres ining ku un flai di sakrifisio konektá pa Andruw Jones despues ku e selekshon a yena base. Riba e sakrifisio aki Randolph Oduber a nota e promé kareda. Mesora su tras Curt Smith a konektá un single empuhador di un kareda i asina hiba e selekshon Oraño 2-0 ariba.

Despues ku Cuba a tabla e partido den kabes di kuater ining, e selekshon di Reino a drenta ofensivo bek. Aki nan Andrelton Simmons ta konektá un flai di sakrifisio i asina empuhá Kalian Sams pa hiba Ulanda ariba 3-2. Ku Jonathan Schoop na bate, Oduber ta roba tersera i ta siguí pa krusa plato riba un tiru malu di e kècher.

Den kabes di sinku Cuba ta empatá e partido na kuater i nan ta bai ariba den di ocho ku un bentaha di dos kareda. E selekshon di Reino mesora ta bora e bentaha aki riba un honron di dos kareda konektá pa Andrelton Simmons.

E selekshon Oraño ta laga Cuba den tereno den bòm di nuebe ining despues ku nan ta yena base i Kalian Sams ta konektá un flai di sakrifisio, empuhando Andruw Jones for di tersera. Ku esaki selekshon di Reino a logra e pase pa semifinal ku skor di 7-6.

E selekshon di Reino lo hunga na próksimo partido djamars 12 di mart, 6’or di mainta kontra Hapon. E partido aki ta solamente pa determiná posishon kua ekipo ta topa ken den semifinal ku ta kuminsá djadumingu 17 di mart.