Category: Beisbòl

TOKIO, Hapon – Pa promé biaha den e Klásiko Mundial di Beisbòl e selekshon Oraño no ta habri e markadó, tresiendo kuné e di dos derota pa e ekipo. Hapon a sa di nota den tur ining i konsekuentemente finalisando e partido den di shete ining ku un skor di 16-4 pa motibu di lei di miserikòrdia.

Den di seis ining e bate nan Oraño a bin na bida pero esaki no tabata sufisiente. Despues di yena base Wladimir Balentien a konektá un doblete ku a empuhá Kalian Sams, Andrelton Simmons i Randolph Oduber. Balentien no a keda na segunda base largu ya ku e siguiente batido Andruw Jones a konektá un single pa empuhá Balentien i hasi e partido 12-4 pa Hapon.

Ku e derota aki e selekshon di Reino tin ku hunga un partido desisivo kontra Cuba, djaluna 11 di mart 6’or di mainta ora lokal di Kòrsou.

TOKYO,Hapon – Den tur partido ku e selekshon di Reino a hunga den e Klásiko Mundial di beisbòl nan a sabi di habri e merkado promé. Tur biaha ménos den e wega kontra China Taipei nan a sa di sali viktorioso. Nada no a kambia den e partido kontra Cuba, un biaha mas e selekshon Oraño ta habri e markadó i mantene esaki pa sigurá e viktoria.

E selekshon di Reino ta bai ariba den kabes di dos ining despues ku Curt Smith ta konektá un honron di un kareda. Andrelton Simmons ta hasi e partido 2-0 despues di konektá un single ku ta empuhá Kalian Sams ku a enbasá despues di un doblete.

Un defensa sólido a yuda e selekshon Oraño mantene nan bentaha apesar ku Diegomar Markwell no tabata mesun skerpi ku su promé wega kontra Sur Korea. Markwell a picha seis entrada permitiendo nuebe hit, un kareda i bolea unu. E defensa a logra konbertí sinku dòbel play den e promé seis entrada nan i asina yuda konserva e bentaha.

Den kabes di seis ining Reino Hulandes ta drenta ofensivo un biaha mas i ta añadié tres kareda riba un honron di tres kareda di Jonathan Schoop. Schoop ta empuhá un kareda mas den di ocho i asina sigurá e viktoria di 6-2 pa e ekipo Hulandes riba e selekshon di Cuba.

E selekshon di Reino ta hunga nan siguiente partido djadumingu 7’or di mainta ora lokal di Kòrsou kontra Hapon. Ku un viktoria e selekshon di Reino ta pasa pa semifinal na San Francisco, California.

TAICHUNG, Taiwan – Ku un rèkòrt di 1-1 e selekshon Oraño a drenta e partido kontra Oustralia en búskeda di un viktoria pa asina garantisá nan pase pa e siguiente buèlta. E selekshon a bin ku hamber pa gana i un biaha mas ta habri e markadó promé.

Mesora den bòm di promé ining Andrelton Simmons ta habri ku un doblete. Simmons to wòrdu avansá pa tersera riba un toke di Jonathan Schoop i despues ta anotá e promé kareda riba un single empuhador di Roger Bernadina.

E ekipo Hulandes no tabata tin sufisiente na 1-0 i a drenta ofensivo un biaha mas den bòm di dos ining. Despues ku Curt Smith i Dashenko Ricardo ta yega base riba un single kada un, Smith ta anotá riba un roletaso pa segunda base di Simmons i hasi e partido 2-0. Jonathan Schoop su racha sin konektá hit den e kompetensia a kaba awe na momentu ku e la konektá un honron di dos kareda.

E bentaha aki tabata sufisiente pa e staf di picheo Hulandes ku a permití un kareda, bolea unu i poncha sinku. Ku esaki e selekshon Oraño a logra un viktoria di 4-1 riba Oustralia i mesora tambe nan pasa pa e siguiente buèlta na Tokyo, Hapon.

E selekshon di reino lo subi tereno atrobe dia 8 di mart, 6 ‘or di mainta ora lokal di Kòrsou kontra sea Cuba òf Hapon.

TAICHUNG, Taiwan – E selekshon di reino a kai chikí den nan di dos partido di e Klásiko Mundial di Beisbòl kontra China Taipei. Un biaha mas e selekshon Oraño ta subi markadó promé. Ku base yen e picher di China Taipei ta dal Kalian Sams ku bala empuhando Andruw Jones i hasi e skor 1-0. Mesora despues Dashenko Ricardo ta konektá un single, empuhando Xander Bogaerts i Curt Smith.

Kompará ku e partido anterior, e picheo Hulandes no por a wanta e bentaha. Hensley Meulens, mènedjer di e selekshon a komentá e siguiente despues di wega. “Tom Stuifbergen tabata tin un par di ining ku e la picha hopi bon pero den di kuater e la manera kima.”

Meulens a siguí bisa ku, “Shairon Martis a picha e bala bon i a saka tres out, pero nan tabata fly-out ku tambe a pèrmití algun kareda.”

Segun Meulens, “e echo ku nan e hunga e dia promé anochi lat i yega hotèl basta lat pa despues lanta mainta i hunga e wega aki tabata poko duru pero no tin èksküs, nan a hunga mihó ku nos.”

Hulanda ta bolbe hunga djamars sinku di mart 12:30am ora lokal di Kòrsou kontra Oustralia. E partido aki Hulanda mester gana si nan ke siguí ku bida den e torneo.

TAICHUNG, Taiwan – E selekshon di Reino Hulandes a habri su promé wega di e Klásiko Mundial di Beisbòl. Hulanda a enfrentá e selekshon di Sur Korea, ku ta e aktual sub-kampion di e Klásiko Mundial di Beisbòl.

Hulanda ta habri e markadó den di dos ining, na momentu ku Andruw Jones ta konektá un doblete. Xander Bogaerts ta toka i avansá Jones pa tersera, kual seguidamente ta anotá riba un flai di sakrifisio konektá pa Curt Smith.

Diegomar Markwell a sòru pa Hulanda mantené e bentaha aki hasiendo un tremendo trabou riba montikulo. E habridó pa e ekipo Oraño a picha kuater ining kompletu, permitiendo dos hit, un base por bola i dos ponche.

Den di sinku entrada Hulanda ta añadí na e skor ora ku Roger Bernadina ku base yen ta konektá un roletaso kaminda Korea ta saka e force out na segunda i Dashenko Ricardo ta nota for di tersera pa hasi e skor 2-0. Mesora su tras Wladimir Balentien ta konektá un single i empuhá Andrelton Simmons ku a avansá pa tersera riba e hungadó anterior.

Hulanda no a konfia e márgen di tres kareda riba Korea i a siguí añadí mas kareda. Un biaha mas Bernadina te empuhá un kareda na momentu ku e la konektá un doblete den di shete ining, empuhando Andrelton Simmons ku tabata na segunda despues di tambe konektá un doblete.

Ainda den di shete entrada, Jones ta konektá un roletaso pa e picher ku ta bini plato pa e force out. Mesora e kècher Koreano ta purba saka dòbel play na primera pero ta tira e bala den right field i duna Bernadina chèns di anotá i hasi e partidó 5-0.

E partido ta terminá ku e skor aki tambe, despues di un tremendo trabou di e bulpen Hulandes. Despues di Markwell ku a picha kuater ining a siguí Orlando Yntema, Leon Boyd i Mark Pawelek. Na tur e relevista nan Hulandes a permití dos hit, tres base por bola i 2 ponche den sinku ining di relevo.

Hulanda su siguiente partido ta djadumingu tres di mart pa 2:30am ora lokal di Kòrsou. Tur dos ekipo ta drenta e wega di mana ku un wega gana i un viktoria mañan ta garantisá e pase pa e siguiente buèlta.

TAICHUNG, Taiwan –E selekshon Hulandes ku ta preparando pa e Klásiko Mundial di Beisbòl ta blankeá Industrial All Star i asina gana ku skor di 6-0. Esaki ta e di dos blankeo ku e selekshon Oraño ta logra den último dia nan. Djadumingu último den otro wega di preparashon e selekshon Hulandes a blankeá Cuba 5-0.

Esaki ta promé wega di preparashon ku e ekipo Hulandes a hasi den kua tur su hungadó nan tabata presente. Awe mainta Jonathan Schoop i Shairon Martis tabata e último dos hungadó nan ku a añadí nan mes na e selekshon. Schoop a mira akshon awe mes ora ku e la hunga segunda base, miéntras ku Martis si no a mira akshon ainda.

Den  di dos ining Curt Smith a manda Hulanda ariba 2-0 ku un doblete ku a empuhá Wladimir Balentien i Xander Bogaerts. Hulanda ta oumentá e bentaha den di kuater ining ku un single empuhador di un kareda un biaha mas di Curt Smith. Andruw Jones a hasi e partido 6-0 ku un honron di un kareda.

E aliniashon di Hulanda tabata: Andrelton Simmons, shortstop; Jonathan Schoop, segunda base; Roger Bernadina, center field; Wladimir Balentien, right field; Andruw Jones, batido designa; Xander Bogaerts, tersera base; Curt Smith, primera base; Kalian Sams, left field; Dashenko Ricardo, kècher; Rob Cordemans, picher.

Hulanda ta hunga nan último wega di preparashon djaweps. Djasabra 7:30 AM (ora lokal di Kòrsou) Hulanda ta hunga nan promé partido kontra Sur Korea.