Category: Bòkseo

MERKA — E sifranan ofisial di e pelea entre Floyd Mayweather i Manny Pacquiao a keda publiká. Loke a keda konsiderá komo e pelea di siglo a kibra tur rèkert pa loke ta trata benta di pay-per-view, ingreso di pay-per-view i entrada na porta. E ingreso total pa e pelea a surpasá 500 mion dòler. Ku esaki Floyd Mayweather ta risibí mas di 300 mion dòler pa 36 minüt den rin riba djasabra 2 di mei ultimo. Miéntras ku Manny Pacquiao ta risibí mas di 200 mion dòler.

Segun distribuidornan di pay-per-view na Merka, e reportenan inisial ta indiká ku na Merka mas di 4,4 mion hende a paga pa wak e evento riba pay-per-view. Esaki a genera un ingreso di mas di 400 mion dòler. E rèkert anterior di benta di pay-per-view tabata di 2,48 mion den e pelea di Oscar De La Hoya kontra Floyd Mayweather na aña 2007. Miéntras ku e rèkert anterior di ingreso di pay-per-view tabata 150 mion dòler den e pelea di Floyd Mayweather kontra Canelo Alvarez na 2013.

Entrada na porta di MGM Grand Garden Arena a genera mas di 71 mion dòler. Segun informashonnan inisial, ta indiká ku solamente nuebe karchi no a keda bendí pa presensia e pelea den MGM Grand Arena. E rèkert anterior di entrada na porta tabata 20 mion doler den e pelea di Mayweather kontra Canelo.

Tambe e pelea di Mayweather kontra Pacquiao a kibra rèkert di transmishon sirkuito sera tantu na kantidat di atmishon komo ingreso na Las Vegas i na establesimentunan komersial na Merka. E evento a bende kasi 46.000 karchi pa wak e pelea atrabes sirkuito sera na hotelnan di MGM na Las Vegas. Miéntras ku 5000 bar, restaurant i establesimentu komersial a kumpra e pelea.

E pelea a keda distribuí pa 175 pais ront mundu ku ta mas of ménos 75 porshento di e teritorionan mundial. Ku esaki tambe e pelea a kibra un rèkert di ingreso pa distribushon internashonal.

MERKA — Floyd Mayweather i Manny Pacquaio ta ketu bai den notisia, kasi un siman despues di e pelea entre nan dos. Ta parse ku despues di e pelea tin mas notisia riba e bòksdónan ku promé ku e pelea siman pasa.

Despues ku Floyd Mayweather a bisa algun dia pasa ku e ta interesá den un revancha ku Pacqiuao, awor e bòksdó a kambia di idea. Den un entrevista ku kanal di televishon Showtime Mayweather a bisa ku e no ta interesá den un revancha ku Pacquiao.

E entrevista ku Showtime a keda hasi djamars anochi i lo keda transmití djasabra pa e kanal. Mayweather a rekonosé ku anteriormente e la bisa ESPN ku e ta interesá den un revancha.

“Mi a kambia di idea,” Mayweather a bisa. “Na e momentunan aki, mi no ta interesá den un revancha, paso Pacquaio ta un mal pèrdèdó i e ta un kobarde … Si bo a pèrdè, aseptá bo derota i bisa, ‘Mayweather, bo tabata e mihó bringadó.'”

Tambe Mayweather a bisa ku e no ta kere ku e leshon na Pacquiao su skouder tabata e problema den e pelea.

“Èksküs, èksküs, èksküs,” Mayweather a bisa.

Segun Mayweather, Pacquiao tabata lihé. “Su man robes tabata lihé. Su man drechi tabata lihé i e tabata tira ambos lihé i ku forsa. Mi no ta kere e asuntu di leshon ey anto mi no ke pa e públiko tampoko kere e kos ey.”

Mas aleu Mayweather a sugerí pa Pacquaio bringa, no kontra dje, pero si riba su kartelera na sèptèmber próksimo. Segun Mayweather, esei ta un bon manera pa nan tur dos gana sèn

Banda di Mayweather i Pacquiao bòkseo ta kontinua mañan ora den e pelea estelar Canelo Alvarez enfrentá James Kirkland. Tambe den e pelea ko-estelar lo tin Humberto Soto kontra Joseph Diaz. Segun Oscar de la Hoya di Golden Boy Promotions, den peleanan estelar di mañan lo tin mas akshon ku e pelea di siman pasa entre Pacquiao i Mayweather.

MERKA — Despues di a bringa leshoná djasabra ultimo kontra Floyd Mayweather, Manny Pacquiao a opera su skouder drechi ayera. Apesar di a leshoná e skouder den entrenamentu pa e pelea di djasabra, Pacquiao a kere ku su skouder tabata sufisiente bon pa bringa. Sin embargo, esaki no tabata e kaso ora ku e leshon a re-aparese den e di tres asalto di e pelea.

Segun konosido siruhano, Dr. Neal ElAttrache tur kos a bai bon ku e operashon i ta spera un rekuperashon total di e skouder di Manny. E tempu di rekuperashon despues di e operashon lo tuma entre 9 pa 12 luna.

Miéntras ku niun hende no tabata na altura di e leshon di Pacquiao aparentemente Mayweather si tabata sa tur loke tabata pasa den e kampamentu di Pacquiao. Den un entrevista ku FightHype.com, ku ta keda konsiderá komo e boka di Floyd Mayweather e bòksdó a bisa: “mi tabata sa tur dia tur kos ku Manny Pacquiao tabata hasi den su kampamentu. Mi tabata sa ki ora e tabata bòks, ki ora e no a bòks. Mi tabata sa kuantu asalto e la bòks. Mi tabata sa kon prepará e tabata. Mi tabata sa kuantu asalto e la praktiká kontra saku pisa. Mi tabata sa ora su pia kue kram.”

Segun Mayweather, ora e ta bringa kontra di un hende e mester sa tur kos di dje.

Miéntras tantu e promotor di Manny Pacquiao, Bob Arum a sugerí pa Mayweather keda sin bringa na sèptèmber próksimo. Arum ke pa Mayweather drenta rin bek na aprel di 2016 kontra Pacquiao.

Entrevista di FightHype.com ku Floyd Mayweather:

MERKA — Floyd Mayweather a kambia di idea, ta parse ku Mayweather ke traha un tiki sèn mas promé ku e retirá. Despues ku bòksdó a duna di konosé despues di e pelea di djasabra ku na sèptèmber lo e bringa su ultimo pelea, ayera e la manda un mensahe pa ESPN bisando ku e ta habri pa un revancha kontra Manny Pacquiao. Esaki klaro ku lo ta otro aña despues ku Manny rekuperá di e operashon ku lo e tin ku hasi na su skouder.

“Lo mi bringa ku ne aki un aña, despues di su operashon,” Mayweather a skirbi.

Ambos bòksdó ta enfrentando demandanan despues di e pelea di djasabra. Pa Manny, banda di e echo ku e lo por risibí sanshon di e Komishon di Atlétiko di Neveda, awor ta fanátikonan ta demandando e bòksdó. E fanátikonan ta buskando un rekompensa di 5 mion dòler pa motibu ku Pacquiao no a divulgá e leshon na su skouder promé ku e pelea.

Di otro banda Mayweather ta keda demanda dor di su èks-partner i mama di su tres yunan, Josie Harris pa 20 mion dòler. Esaki pa motibu ku segun Harris, Mayweather a gaña i difamá Harris den un entrevista promé ku e pelea.

Ainda no ta konosí kontra ken Mayweather lo bringa na sèptèmber próksimo. Segun Amir Khan, e la papia ku e ekipo di Mayweather despues di e pelea di djasabra i e ta bisa ku nan ta interesá den un pelea ku ne. Sin embargo, Khan a duna di konosé ku e no por bringa na sèptèmber próksimo ya komo ku e ta den ayuno pa motibu di Ramadan.

MEKRA — Despues di e pelea kontra Floyd ‘Money’ Mayweather, Manny Pacquiao e rekonosé ku e la bringa ku un leshon na su skouder. Segun e ekipo di Pacquiao e bòksdó a sufri e leshon aki den entrenamentu pa e pelea di djasabra ultimo. Mas aleu, nan a duna di konosé ku e leshon a mehorá satisfaktoriamente durante di entrenamentu ku no tabata tin motibu pa postpone e pelea. Sin embargo, e leshon a re aparesé durante di e pelea poniendo ku Manny tabata usa su brasa drechi limitá.

Segun un siruhano di e famoso klínika Kerlan-Jobe, Manny no solamente tin un leshon na su skouder pero ta un leshon ku lo rekerí operashon di e bòksdó. Ku esaki Manny lo tin ku pasa un periodo di entre 9 pa 12 luna sin mira akshon.

Ku esaki te na e momentu nan aki ta kita tur posibilidat di un posibel revancha entre Floyd Mayweather i Manny Pacquiao. Si un revancha tabata pa tuma lugá mes, esaki lo mester a sosodé den luna di sèptèmber próksimo ora Mayweather bringa su ultimo pelea.

E Komishon Atlétiko di Nevada ku a sanshoná e pelea no ta masha kontentu ku e ekipo di Manny Pacquiao. Pa motibu ku nan no a revelá e leshon riba un formulario ofisial promé ku e pelea. Segun e komishon, Pacquiao of un hende di su ekipo a skirbi “No” banda di e pregunta, “Bo tabata tin un leshon na bo skouder, kokoti of man ku tabata rekerí evaluashon of eksaminashon?”

Di ser haña kulpabel pa e komishon, Pacquiao por keda suspendé i te asta por enfrentá kargonan kriminal pa motibu di perhurio. Segun e promotor di Manny, Top Rank, e komishon Anti-Doping di Merka (USADA) tabata na altura di e leshon. Pero USADA na nan turno ta laba nan man bisando ku nan ta supervisa e uso di dopahe i nan no a risibí niun informashon médiko riba Manny Pacquiao. Segun USADA, e pregunta kardinal ku mester keda hasi ta: dikon un hende a bisa ku Manny no tabata leshoná riba e formulario promé ku e pelea?

LAS VEGAS — Floyd ‘Money’ Mayweather a derota Manny ‘PacMan’ Pacquiao djasabra ultimo den MGM Grand Arena den loke a keda kategorisá komo e pelea di siglo. E pelea a bai tur 12 asalto i tabata un desishon unánime di e huesnan ku a deklará Floyd viktorioso. E tres huesnan a skor e pelea 118-110, 116-112 i 116-112. Ku e viktoria Mayweather ta keda invikto ku un rèkert di 48-0 i tambe eksitosamente a defendé su títulonan di peso Welter WBA i WBC.

For di tempran den e pelea Mayweather a dikta e paso di e pelea i tambe mustrando dikon e ta un di e mihó bòksdó nan defensivo. Mayweather tabata move kontinuamente den ring lagando Pacquiao tirando moketa na numeroso okashon den bashí. E ultimo aki a pone ku hopi fanátiko a haña e pelea un poko laf. Pero pa e fanatikada di Floyd Mayweather esaki no tabata algu nobo i esaki ta e motibu prinsipal dikon Mayweather ta invikto te dia di awe.

“Mi tabata un bòksdó inteligente, mi no tabata haña masha sla, sino tabata pa momentunan ku mi tabata para lag’e dal mi” Mayweather a bisa despues di e pelea.

Pa e renombre ku Manny Pacquiao tin tog a hasi falta un tiki kreatividat i adaptashon den e manera di bringa di e bòksdó. Pacquiao no nada diferente den e pelea aki i a opta pa hasi loke otro bòksdónan a purba den pasado kaba kontra Mayweather. Manny na lugá di tabata e agresor durante henter e pelea mester a bòltu e ròl i obligá Mayweather sali for di su komodidat defensivo i bira mas ofensivo.

Despues di e pelea a resultá ku Manny a bringa ku un leshon na skouder. Esaki sin embargo no ta kita ku e bòksdó por a hasi algu diferente den e pelea.

Pa Floyd Mayweather a keda un ultimo pelea na sèptèmber próksimo promé ku e retirá. Mas aleu, Floyd a ekspresá ku e lo bai renunsia tur su títulonan den e próksimo dia/simannan. E bòksdó ta di opinion ku e mester duna oportunidat na bòksdónan nobo pa gana e títulonan. Ainda no ta konosí kiko lo ta e futuro di Manny Pacquiao.