Futbòl Archives | Page 10 of 62

July 26, 2016

Selekshon nashonal U-17 a klasifiká pa e di 2 buèlta di klasifikashon pa Mundial di FIFA U-17.

WILLEMSTAD — Despues ku nos selekshon nashonal Kategoria U-17 a biaha pa Guadeloupe, 18 di yüli último pa asina representá Kòrsou den e promé buèlta di e weganan di Klasifikashon pa Mundial di FIFA U-17, nan a regresá, djaluna 25 di yüli.

Nos selekshon a sa di hasi un tremendo trabou ganando 2 di e 3 partidonan di e buèlta aki i empatá 1 pa asina logra klasifiká komo number 1 den nos pul.

Den nos promé kompromiso kontra Republika Dominikana, nos a sa di gana ku e skor di 4-2, e golnan a keda anotá pa Nathan Bernadina (2x), Luchenthly Vrutaal i Angérick Dorothea.

Den e segundo kompromiso nos selekshon a golia St. Maarten, ganando ku e skor di 10-0.

E goliadónan tabata Nathan Bernadina (4x), Shurendric Fransinet (4x), Luchenthly Vrutaal i Richajier Oleana.

E terser i delaster partido kontra e ekipo amfitrion, Guadeloupe, a kaba ku un empate di 0 gol.

Ku e resultado aki nos selekshon a klasifiká pa e segundo buèlta di e weganan di Klasifikashon pa Mundial di FIFA U-17 ku lo tuma lugá den luna di sèptèmber na Trinidat & Tobago.

Nos selekshon nashonal di U-17 a konsistí di un grupo di 18 hungadó ku a wòrdu dirigí pa Sr. Ludwig Alberto ku ta e direktor tékniko di e selekshon aki i Sr.Reynold Mercera ku ta e asistente di e direktor tékniko.

Tambe a biaha huntu ku e selekshon Sr.Gino Costina ku ta entrenadó di portero di nos selekshon, un masahista kual ta Sr. Malcolm Pieternella i e hefe di delegashon ku ta Sr. Ebell Scharbaai, miembro di direktiva di FFK.

July 22, 2016

Gran apertura di Liga MCB Terser Divishon

WILLEMSTAD — Despues di un tremendo kampionato di Terser Divishon aña pasa, FFK kier a anunsiá ku Liga MCB Terser Divishon 2016 ta ranka sali djadumingu aki den gran forma.

Liga MCB Terser Divishon su gran apertura lo ta djadumingu, 24 di yüli 2016 pa 5’or di atardi na tereno di FFK. E 2 ekiponan ku lo mira akshon durante e apertura di Liga MCB Terser Divishon 2016 lo ta Real Buena Vista i Haitian Union Club Football.

Tur partido di Liga MCB Terser Divishon lo tuma lugá na tereno di FFK durante e djadumingunan binidero.

Un total di 4 klup a inskribí i lo partisipá na e kampionato aki. Esakinan ta lo siguiente: Real Buena Vista, Haitian Union Club Football, Deportivo Santa Rosa i Caribbean International University.

FFK kier a invitá hinter e pueblo di Kòrsou pa bin presensia e weganan aki i sigui disfrutá di bo deporte preferí, e deporte rei, futbòl.

E weganan aki ta kompletamente grátis!

July 18, 2016July 18, 2016

Departamentu di arbitrahe di FFK lo organisá tremendo kurso di arbitrahe

WILLEMSTAD — Departamentu di arbitrahe di FFK ta bai organisá su di tres kurso di arbitrahe pa e aña aki. Despues di e otro dos kursonan básiko ku a resultá di ta un éksito, awor ta bai organisá e di tres kurso básiko pa tur hende di 14 aña òf mas pa dirigí entre otro weganan di sekshon hubenil ku ta e kategoria di U-11 te ku U-20 i tambe 3er divishon.

E kurso lo inisiá djamars, 19 di yüli 2016 i lo finalisá 6 di sèptèmber 2016 ku un èksamen. E kurso aki lo tuma lugá na Edifiso Mordy Maduro (FFK) i e orario lo ta di 18.00 pm pa 20.00 pm riba djamars i djaweps.

Pa inskripshon por tuma kontakto ku departamentu di arbitrahe na referee@ffk.cw òf via di telefòn na 7365057, 5112915, 5128617 i 5202587. Por inskribí te ku dia 18 di yüli 2016. Pa abo ku ta un hóben dinámiko ku outoridat i ku ambishon pa bira rèfri, esaki ta bo oportunidat!

Inskribí awe mes, departamentu di arbitrahe i FFK ta warda bo!

July 18, 2016

Selekshon nashonal di futbol U-17 ta rumbo pa Guadeloupe

WILLEMSTAD — Despues ku nos selekshon senior ta tin e oportunidat di saka kara di Kòrsou, awor ta toka turno na nos selekshon nashonal U-17 pa represent nos dushi isla durante e promé buèlta di e weganan di kualifikashon pa mundial di FIFA U-17 ku lo tuma lugá aya na Guadeloupe.

Despues di dianan di trainingnan intensivo i un temporada di preparashon ekstenso, mañan, djaluna 18 di yüli nos selekshon nashonal di U-17 lo biaha pa Guadeloupe pa asina kumpli ku nan kompromisonan den e promé buèlta di e weganan di kualifikashon pa mundial di FIFA U-17 ku ta tuma lugá di 18 pa 25 di yüli próksimo.

Nos selekshon a kai den grupo 5 ku ta konsistí di e siguiente paisnan; Republika Dominikana, St. Maarten, Guadeloupe i Kòrsou.

Skema di weganan:

	Fecha	Orario	Tim di kas	Bishitante	Lugá
1	20 yüli 16	4:30 PM	Republika Dominikana	Kòrsou	Stade Fiesque Duchesne Baie-Mahault (Guadeloupe)
2		7:00 PM	Guadeloupe	St. Maarten
3	22 yüli 16	4:30 PM	Kòrsou	St. Maarten
4		7:00 PM	Guadeloupe	Republika Dominikana
5	24 yüli 16	4:30 PM	St. Maarten	Republika Dominikana
6		7:00 PM	Guadelouope	Kòrsou

No selekshon nashonal di U-17 ta konsistí di un grupo di 18 hungadó ku ta wòrdu dirigí pa Sr. Ludwig Alberto ku ta e direktor tékniko di e selekshon aki i Sr.Reynold Mercera ku ta e asistente di e direktor tékniko.

Tambe ta biaha huntu ku e selekshon Sr.Gino Costina ku ta entrenadó di portero di nos selekshon, un masahista kual ta Sr. Malcolm Pieternella i e hefe di delegashon ku ta Sr. Ebell Scharbaai, miembro di direktiva di FFK.

E selekshon ta konsistí di e siguiente hungadónan:

Kevin Juliana
Danèl Rosa
Quinton Burk
Alexander Suart
Ayodele Kwidama
Roderick Bolijn
Sellfrine Pieters
Jared Tyrol
Shurendric Fransinet
Richajier Oleana
Jonathan Libiana
Nathan Bernadina
Luchenthly Vrutaal
Ronathan Willems
Derrick Gijsbertha
Sharrion Pietersz
Rogediën Lacruz
Angérick Dorothea

July 11, 2016July 11, 2016

Entrevista ku Gevaro Nepomuceno di selekshon Nashonal di futbòl i Maritimo

MADEIRA — Direktamente for di Madeira e programa number un di deporte na radio, Deporte Hoyer tabata tin un entrevista ku Gevaro Nepomuceno. Gevaro aktualmente ta na Madeira unda e ta hunga pa e ekipo di Maritimo. Den e entrevista e hungadó di Maritimo i ala bes selekshon di Kòrsou ta konta riba su tempu na Romania i tambe awor na Madeira. Tambe e hungadó ta papia riba e selekshon di Kòrsou i kon e ta mira futuro pa ku e selekshon di Kòrsou.

[soundcloud url=”https://api.soundcloud.com/tracks/273177196″ params=”color=ea1414&auto_play=true&hide_related=true&show_comments=true&show_user=true&show_reposts=false” width=”100%” height=”166″ iframe=”true” /]

Kortesia di Deporte Hoyer, e mihó programa di deporte na radio, skuch’e tur djaluna pa djabièrnè di 8’or pa 9’or di mainta.

July 11, 2016

Kurso básiko pa rèfri di futbòl

WILLEMSTAD — Próksimamente Federashon di Futbòl Kòrsou pa medio di su departamentu di rèfri ta organisá su di tres kurso básiko pa rèfri pa e aña aki. Esaki lo kuminsá riba djamars 19 yüli 2016 i finalisá dia 6 Sèptèmber ku un èksamen.

Esaki lo wòrdu tene na edifisio Mordy Maduro riba tur djamars i djaweps i e orario ta 18.00 – 20.00.

Por inskribí for di awor te ku djaluna 18.07.2016.

Ora kompletá e kurso aki lo risibí un diploma i por dirigí wega hubenil i terser divishon.

Por inskribí na departamentu di rèfri via email:

Refereeing Department Curaçao <referee@ffk.cw> of via telefòn: 7365057, 5112915, 5128617, 5202587, 5235085.

June 25, 2016

Kompetensia eskolar U-14 a yega na su final

WILLEMSTAD — Despues ku 11 di mart último, FFK den koperashon ku Fundashon Desaroyo I Progreso a start ku e kompetensia eskolar pa dama U-14, djarason 22 di yüni último, e kompetensia aki a yega na su gran final. E kompetensia eskolar aki tabata destiná pa damita nan di skol di fundeshi di grupo 3 te ku grupo 6 i a konta ku partisipashon di un total di 12 skol di fundeshi.

E skolnan ku a partisipá na e kompetensia aki ta lo siguiente;

1. Prinses Margriet School

2. CML Maduro School

3. Advent School Bonam

4. Advent School Koraalspecht

5. Kolegio Dodo palm

6. Kolegio Santa Clara

7. Kolegio Mgr. Wim Ellis

8. Pedro Luis Brion School

9. Oranje School

10. Kolegio Santa Rosa de Lima

11. St. Paulus College

12. Kolegio Don Sarto

Meta di e kompetensia aki ta pa stimulá i promové futbòl di dama mas bou di nos damitanan aki na Kòrsou. E partidonan aki a tuma lugá 4 bia pa siman na tereno di Vesta tur atardi 3:15 ku 2 partido simultaniamente.

Djarason último e kompetansia aki a yega su final kaminda Kolegio Mgr. Wim Ellis a titulá nan mes komo e ekipo kampion di e kompetensia aki. E ekipo supkampion a resultá di ta Prinses Margriet School, miéntras CML Maduro School i Kolegio Santa Clara a keda na di 3 ku di 4 luga. E máksimo goliadó di e kompetensia aki ta Riesmarly Tokaay di Kolegio Mgr. Wim Ellis ku a anotá un total di 21 gol durante e kompetensia aki.

Un pabien ta bai na tur e 12 skolnan ku a partisipá na e kompetensia eskolar pa damanan aki. FFK ta spera ku e tipo di kompetensianan aki ta lanta e interes di damitanan pa forma parti di un ekipo di futbòl di dama pa asina yuda engrandesé futbòl pa dama aki na Kòrsou.

June 25, 2016June 25, 2016

Kampionato di Dama ta yega na su gran final

WILLEMSTAD — Despues ku e Kampionato di Dama a ranka sali dia 7 di mei ùltimo, mañan 25 di yüni 206, e torneo aki ta yega na su gran final! E kampionato aki a konta ku partisipashon di un total 7 ekipo ku tur djasabra atardi tabata kompetí kontra otro den un torneo di 7 kontra 7 riba tereno di SUBT.

E ekiponan ku a partisipá na e torneo aki ta lo siguiente;

Hubentut Fortuna 1
Hubentut Fortuna 2
Willemstad 1
Willemstad 2
SUBT 1
SUBT 2
Victory Queens

Mañan pa 4or di atardi lo bai tin e partido ku lo determiná ku SUBT 1 òf Willemstad 2 lo keda na di 3 ku di 4 puesto miéntras 5:15pm lo tin e gran final kaminda Hubentud Fortuna 1 i Willemstad 1 lo bai midi forsa i sa ken lo bai ta e ekipo Kampion i Supkampion di e torneo aki.

Tabla di posishon:

		WH	WG	WE	WP	Pt	GF	GK	Saldo
1	Hub. Fortuna 1	6	4	2	0	14	36	3	33
2	Willemstad 1	5	4	1	0	13	15	1	14
3	Willemstad 2	5	4	1	0	13	12	3	9
4	SUBT 1	6	2	1	3	7	9	12	-3
5	SUBT 2	6	0	2	4	2	6	15	-9
6	Hub. Fortuna 2	5	0	2	3	2	3	25	-22
7	Victory Queens	5	0	1	4	1	6	28	-22

		38	14	10	14	52	87	87	0

Skema di e gran final :

Fecha	Puesto	Orario	Tim di kas		Bishitante	Tereno
25 yüni 16	No.3 i No.4	16.00	Willemstad 2	vs	SUBT 1	SUBT
	FINAL	17.15	Hub. Fortuna 1	vs	Willemstad 1	SUBT

FFK kier a invitá hinter e pueblo di Kòrsou pa bin presensia e gran final di Kampionato di Dama. Sali un ratu ku bo famia i bin disfrutá di e partidonan aki i mira kiko tur nos dama nan tin aden!

E 2 weganan aki ta grátis.

June 14, 2016

AC Milan Junior Camp Dutch Caribbean tambe ta parti di torneo di CWM / EWP 2016

WILLEMSTAD — Pa Milan Junior Camp Caribbean ta un honor i plaser pa por ta parti di e di dos edishon di e torneo di CWM / EWP 2016. Nos por konsiderá e torneo aki komo nos Champions League di Kòrsou su kategoria U-13, tumando na kuenta ku ta e 8 ekiponan ku a sobresalí durante di kampeonato regular, a ser invitá pa partisipá den e torneo. U-13 ta un di e kategorianan di mas importante mundialmente pa ekiponan internashonal. Ta for di e grupo aki ta saka e futuro streanan di futbòl i esaki ta e motibu prinsipal pa e torneo aki. Milan Junior Camp huntu e grupo di CWM i EWP lo hasi uso di nan konekshonnan den mundu di futbòl internashonal pa showcase e hungadó mas balioso di e torneo. Ademas algun miembro di e ekipo ganadó lo haña beka pa nan por partisipá den edishonnan di Milan Junior Camp na Kòrsou.

E torneo lo ser hungá konforme e reglanan di FIFA, ku algun modifikashon menor den tempu di wega. Rèfrinan ofisial di FFK lo guia e weganan i ta miembronan di ekiponan ku ta registrá na FFK so lo por partisipá na e torneo (pues ku karnèt).

E 8 ekiponan a ser invitá a base di e standing aktual di e kampeonato lokal di U-13. Lo hunga e weganan den 2 pool i despues e 2 ekiponan di kada pool lo hunga semi final i final.

E wega final lo tuma lugá djabièrnè dia 8 di yüli 2016, atardi na vèlt di Rust en Burgh, Asiento.

June 14, 2016

Di dos edishon di Torneo CWM/EWP

WILLEMSTAD — Mirando e éksito di e promé edishon aña pasa mi ta hopi entusiasmá pa ku e di dos edishon e aña aki.

E torneo pa CWM/EWP kùp ta un inisiativa di Curacaose Wegenbouw Mij i EigenWoningplan NV. E dos kompanianan aki a disidí di duna algu bek na komunidat i a skohe pa hasié den forma di un torneo di futbòl. No kualkier torneo pero unu kaminda e hóben (e futuro generashon) por demostrá su talento. Talento no ta nifiká solamente abilidat òf konosementu di futbòl pero tambe e disiplina i rèspèt tantu paden komo pafó di kancha di deporte.

E torneo di aña 2015 a demostrá ku Kòrsou sigur ta disponé di hopi hóben talentoso. Komo esun responsabel tantu pa CWM komo EWP mi ta konvensí ku e aña aki atrobe lo bai hopi hóben kende lo resaltá den e torneo. Nos solamente no por hasi e trabou aki, ta pesey nos a aserka sr. Reginaldo Carolina representante di AC Milan Junior Camp pa yuda nos den esaki.

Nos a skohe e aña aki pa e torneo tuma lugá riba e kancha di futbòl di Asiento. E kancha aki tin un sentimentu speshal pa nos ya ku CWM ta e kompania ku a instalá yerba artifisial aki riba. Un danki na e direktiva ku a pone e kancha aki disponibel pa e torneo.

Los di e parti di embolbimentu di Milan nos a haña un bon koperashon di Café Barista for di aña pasa. Nan ta take care di algu di kome i bebe tantu pa e hóbennan ku ta partisipá komo e rèfrinan i nan asistentenan. Un danki na sr. Sprock pa e koperashon aki.

Aña pasa e hungadó mas valioso Kurt de Palm kende ta sinta huntu ku nos aki a haña e oportunidat di partisipá na training na e kampamentu di Milan na Italia. E mes lo por konta aki ratu su eksperensha.

E aña aki atrobe nos lo saka un hungadó mas valioso di e torneo. E premio lo keda un sorpresa.

Mi kier deseá Brigitte (nos koordinadora di e torneo) i Reginaldo hopi forsa ku e preparashon di e torneo i ku despues di e torneo nos lo mira atras riba unu eksitoso.

Na aña 2017 nos los konkluí e 3 añanan di torneo den un forma grandioso.

For di awor na nòmber di Curacao Wegenbouw Mij i EigenWoningplan NV mi kier deseá e 8 tim nan partisipante hopi éksito i kòrda semper disiplina, rèspèt i talento ta forma e hóben pa esaki tin éksito den futuro i laga nos dushi Kòrsou sigui krese.