WILLEMSTAD — E selekshon nashonal di Korsou ya a pisa suelanan di Barbados i ta kla pa enfrentá Barbados den e promé buèlta di e weganan pa eliminatorio pa Caribbean Cup 2016. E promé partido lo tuma lugá na Barbados 8’or pm di awe, 23 di mart den stadion Usain Bolt Sport Complex miéntras e segundo partido lo tuma lugá aki na Kòrsou dia 26 di mart próksimo, 6:30pm den Stadion Ergilio Hato (SDK).
Nos selekshon nashonal ta konta ku 5 hungadó nobo ku a bin pa reforsá nos selekshon. Aki ta sigui un biografia chikí di algun di e hungadónan aki.
Ken ta Rangelo Janga?
Rangelo a nase 16 di aprel 1992 na Hulanda (Rotterdam). E hóben atakante di 23 aña a militá den diferente ekipo hubenil den e region ku ela nase. Den e ekipo di promé divishon, Excelsior Maasluis tambe ela militá. Den e kampionato di aña 2008/2009 ela keda skohé komo e mihó hungadó di e divishon di honor den e kategoria ‘B-Junioren’. El a anotá un total di 14 gol den e temporada ei. For di e temporada 2009/2010 e ta militá den Willem 2. Dia 23 di dezèmber 2011 nan a hür e ku su eks ekipo hubenil, SVB Excelsior i despues di e periodo aki ela pasa definitivamente pa e ekipo ei. Na aña 2014 ela sali for di e ekipo aki i a bai forma parti di e ekipo di Cyprus, Omonia Aradippou.
Na aña 2009 Reangelo a partispá na e ‘Europese Kampioenschap’ na Alemania ku e selekshon di Hulanda kategoria U-17 i alkansá yega e final.
For di ougùstùs 2015 Rangelo ta militá den e ekipo amateur di DC Dordrecht en espera ku e por haña un kontrakt.
Awor Rangelo tambe ta forma parti di nos selekshon i ta kla pa enfrentá Barbados mañan.
Ken ta Everon Pisas?
Everon ta un mediokampista yu di Kòrsou, nasé riba 13 di òktober na aña 1994. Ela kuminsá ku su karera futbolístiko militando den diferente ekipo hubenil manera ZVV Pelikaan i FC Dordrecht kategoria U-19 i U-21. Despues, na aña 2013 ela kontinuá ku e ekipo di FC Dordrecht di kual ela keda 3 aña hungando pa e ekipo aki.
Dia 26 di yanüari di e aña aki ela pasa pa e ekipo ACS Poli Timisoara. Un ekipo di Romania ku ta partisipá den e kampionato di Romania Liga 1. Everon tambe ta kla pa saka kara di Kòrsou durante ambos partido di e promé buèlta di Caribbean Cup.
Ken ta Doriano Kortstam?
Doriano ta un defense di e ekipo Roda JC Kerkrade, nasé dia 7 di yüli 1994 na Hulanda (Rotterdam). Doriano kual ta un defense sentral, a militá den diferente ekipo manera Spartan, SVV Veendam, FC Boshuizen, Nike Academy i Slavoij Trebisov, e ultimo aki di Slovakia.
For fo promé di yüli 2015 e ta militá den e ekipo FC Roda JC Kerkrade.
Doriano tambe ta kla pa enfrentá e reto nobo aki i representá Kòrsou durante e 2 partidonan aki.
Karchinan ya ta na benta i e preisnan pa e diferente sekshonnan ta lo siguiente:
* VIP ta kosta Fl. 250,- (inkluso konsumo);
* Bou di tribuna kubrí ta Fl. 50,-
* Bou di tribuna kubrí parti Festival Center ta Fl. 35,-
* Tribuna no kubrí ta Fl. 25,-
* Den e sekshon di tribuna no kubrí mucha te ku 12 aña i 60+ ta paga Fl. 12.50
E karchinan ta optenibel na FFK bou di ora di ofisina, na Pòmp di gasolin Sta. Maria, Botika Mampuritu, Beep Beep, na 4th of July snèk na Barber i tur filial di C-Post N.V.
Pa abo ku ainda no tin bo flanèl i/òf shal di nos selekshon, pasa buska di bo na FFK bou di ora di ofisina na balor di fl.35,-. Ainda nos tin algun den stòk pa asina tur fanátiko por tin nan flanèl pa bin apoyá nos selekshon komo e number 12!
Nos ta topa 26 di mart, 6:30 PM den Stadion Ergilio Hato i kòrda sintonisá bo medio di komunikashon preferí pa sigui e transmishon di nos promé partido kontra Barbados mañan 8or di anochi!