Category: Futbòl

Posted on

Kemy Agustien: “Mi ta fit i kla pa hunga”

WILLEMSTAD — Kemy Agustien ta otro di e hungadónan ku a partisipá ku e selekshon di Kòrsou den e eliminatorionan pa Mundial Rusia 2018 ku lo ta bek huntu ku e selekshon den e eliminatorionan pa Kopa Karibe.

Kemy di 29 aña a debutá ku e selekshon di Kòrsou na yüni di 2015 den e partido kontra Cuba i te ku awor e tin kuater aparishon pa e bandera blou, hel ku blanku.

Aktualmente e medio-kampista no tin un ekipo fiho pero e ta entrenando ku e ekipo di Swansea City. Akinan Kemy ta entrená ku e di dos selekshon di e ekipo pero regularmente tambe ku hungadónan di e promé selekshon di Swansea City.

“Aktualmente mi ta sinti mi fit i kla pa hunga”, Kemy a deklará. “Tempu nos a hunga kontra El Salvador mi no tabata fit, awor aki m’a entrená pues mi ta sinti mi bon i kla pa hunga.”

Den e promé buèlta di eliminatorio Kòrsou lo ta den Grupo 4 huntu ku Barbados i Repúblika Dominikana. Kòrsou lo enfrentá Barbados dia 22 di mart i Repúblika Dominikana dia 26 di mart. E dos mihonan di kada grupo ta avansá pa e siguiente buèlta.

Banda di Kemy, nos a konfirmá ku Jeremy de Nooijer tambe ta regresá ku e selekshon di Kòrsou. Miéntras ku e karanan nobo ku a risibí invitashon i ku nos por a konfirmá ta; Jarchinio Antonia, Doriano Kortstam, Rangelo Janga i Quentin Jakoba.

Di fuentenan no ofisial nos a komprendé ku Jakoba tabata den e pre-selekshon pero lo no ta forma parti di e selekshon definitivo. Tambe nos a tuma nota di algun otro nomber pero ta wanta na publiká esaki te ora nos risibí konfirmashon i/òf informashon ofisial ku nos por verifiká.

Posted on

Liga MCB Promé i Segundo Divishon a keda posponé te próksimo aviso

WILLEMSTAD — Direktiva di FFK a anunsia ku e 2 weganan pa komienso di nos kampionato di Promé i Segundo Divishon ku tabata programá pa kuminsá den wikent tras di lomba, esta 6 i 7 di mart 2016, a wòrdu posponé te ku un próksimo aviso.

Miembronan den un reunion general di djasabra 5 di mart a pidi pa posponé e kampionato te un próksimo aviso. Esaki te ora ku atendé entre otro algun punto ku nan ke kambia den e reglamentu di e kompetensia. Direktiva a bai di akuerdo pa te djamars 8 di mart 2016, klupnan manda nan proposishonnan pa direktiva pa nan trata esakinan den nan seno, pa despues por sigui ku e reunion general posponé.

Posted on

Kampionato Futbòl Hubenil ta kontinuá na diferente tereno rònt Kòrsou

WILLEMSTAD — Kampionato Hubenil ta kontinuá e wikènt aki riba djabièrnè i djasabra na diferente tereno rònt Kòrsou.

Manera tur siman MCB i FFK ta invitá henter pueblo di Kòrsou pa asistí na e partidó aki i pasa un ratu ameno den kompania di bo famia i ala bes disfrutá di e tremendo partidonan di futbòl aki. Bin sostené i apoyá e futuro nan di mañan.

Tur e weganan aki ta grátis!

Skema kategoria U-9 te ku U-15: 

Djasabra 5 mart 2016
Kategoria A
Stadion Tim di Kas Bishitante U-9 U-11 U-13 U-15
VESTA Sithoc/Marchena SUBT A 10:00 11:20 12:50 14:30
SAM Jong Holland Inter Willemstad A 10:00 11:20 12:50 14:30
RUST & BURGH Atletiko Saliña A Gemstones United Kura Piedra – 9:30 11:00 14:30
FFK Excellence A Quick ’60 10:00 – – –
FFK Excellence A UNDEBA – – – 14:30
SERU FORTUNA Hubentud Fortuna Victory Boys – 11:20 12:50 –
SERU FORTUNA Hubentud Fortuna Jong Colombia – – – 14:30
SERU FORTUNA Victory Boys F.C. Stallions 10:00 – – –
TERA KÒRÁ U.D. Tera Kòrá Mahuma – – – 11:00
SCHERPENHEUVEL New Song Scherpenheuvel – 10:00 11:30 13:15
Djasabra 5 mart 2016
Kategoria B
Stadion Tim di Kas Bishitante U-11B U-13B U-15B
WILLEMSTAD (2) Excellence B Victory Princess 13:00 – –
WILLEMSTAD (1) Excellence B Inter Willemstad C – 11:30 –
WILLEMSTAD (1) F.C. Stallions Inter Willemstad B – 13:15 –
WILLEMSTAD (1) SUBT B Excellence B – – 15:00
WILLEMSTAD (2) Atletiko Salinja B Inter Willemstad B 10:00 – –
WILLEMSTAD (2) SUBT B Excellence D 11:30 – –
RUST & BURGH Atletiko Salinja B Gemstones United Kura Piedra – 12:45 –
RUST & BURGH Atletiko Salinja B Inter Willemstad B – – 16:15
FFK Excellence C Quick ’60 11:20 – –
FFK UNDEBA Excellence D – 12:50 –


Kategoria U-17 ku U-20: 

Djabierne 4 mart 2016
Stadion/Tereno Tim di Kas Bishitante U-17 U-20
VESTA VESTA v/s Mahuma 18:30 20:30
SAM UNDEBA v/s Jong Holland 18:30 –
SAM Centro Dominguito v/s Jong Holland – 20:30
FFK Victory Boys v/s Excellence A 18:30 20:30
SDK Centro Barber v/s Scherpenheuvel 18:30 20:30
Djasabra 5 mart 2016
Stadion/Tereno Tim di Kas Bishitante U-17 U-20
SAM Hubentud Fortuna v/s SUBT 18:30 20:30
FFK Centro Dominguito v/s Inter Willemstad B 18:30 –
FFK New Song v/s Inter Willemstad A – 20:30

 

Posted on

Jarchinio Antonia konvoka pa selekshon di Korsou

HULANDA — Jarchinio Antonia ta otro di e karanan nobo ku a risibí invitashon di Patrick Kluivert pa forma parti di e selekshon di Kòrsou den e eliminatorionan pa Kopa Karibe 2017. Antonia di 25 aña ta un atakante lateral ku ta hunga pa e ekipo di FC Groningen. Jarchinio e temporada kai ku Groningen a hunga den 16 partido i tabata tin 3 asistensia.

Banda di Antonia e otro karanan nobo ku e keda konvoká pa selekshon di Kòrsou ta: Doriano Kortstam, Rangelo Janga i Quentin Jakoba. Miéntras ku Brandley Kuwas tambe lo tabata un kara nobo, pero e último aki a rechasá e invitashon.

Di e hungadónan ku e forma parti di e selekshon di Kòrsou anteriormente nos tin konfirma ku Jeremy de Nooijer a keda konvoká. Segun informashonnan, e selekshon di Kòrsou pa Kopa Karibe lo tin un base di hungadónan ku a hunga pa Kòrsou anteriormente i algun kara nobo.

Den e promé buèlta di eliminatorio Kòrsou lo ta den Grupo 4 huntu ku Barbados i Repúblika Dominikana. Kòrsou lo enfrentá Barbados dia 22 di mart i Repúblika Dominikana dia 26 di mart. E dos mihonan di kada grupo ta avansá pa e siguiente buèlta.

Posted on

Brandley Kuwas ta rechasá oferta pa hunga pa Kòrsou

HULANDA — Brandley Kuwas ta otro hungadó ku a keda konvoká pa Patrick Kluivert pa partisipá ku e selekshon di Kòrsou den e eliminatorionan pa Kopa Karibe 2017. Sin embargo, Kuwas a gradisí Kluivert pa e invitashon i a nenga e oferta. Segun e atakante di 23 aña di Excelsior Rotterdam ta muchu trempan ainda pa tuma un desishon asina grandi. Brandley te ainda ta karga e speransa di un dia hunga ku e selekshon Hulandes.

Pa Kuwas esaki tabata su promé temporada den Eredivisie. Ku Excelsoir Kuwas a hunga den 25 partido i a anotá 2 gol i tabata tin 2 asistensia.

Den e promé buèlta di eliminatorio Kòrsou lo ta den Grupo 4 huntu ku Barbados i Repúblika Dominikana. Kòrsou lo enfrentá Barbados dia 22 di mart i Repúblika Dominikana dia 26 di mart. E dos mihonan di kada grupo ta avansá pa e siguiente buèlta.

Banda di Kuwas, nos a informabu anteriormente ku Jeremy de Nooijer lo ta bek ku e selekshon di Kòrsou den e eliminatorionan pa Kopa Karibe. Miéntras ku te awor aki e selekshon di Kòrsou lo tin por lo ménos tres kara nobo. Direktor tékniko di selekshon, Patrick Kluivert a hasi un invitashon na entre otro Doriano Kortstam, Rangelo Janga i Quentin Jakoba.

Posted on

Jeremy de Nooijer tambe konvoká pa selekshon di Kòrsou

WILLEMSTAD — Jeremy de Nooijer a bolbe haña invitashon di Patrick Kluivert i Federashon Futbòl Kòrsou pa hunga ku e selekshon nashonal di Kòrsou den e eliminatorionan pa Kopa Karibe. Segun informashonnan, de Nooijer ta sali pa Kòrsou dia 21 di mart próksimo.

Den e promé buèlta di eliminatorio Kòrsou lo ta den Grupo 4 huntu ku Barbados i Repúblika Dominikana. Kòrsou lo enfrentá Barbados dia 22 di mart i Repúblika Dominikana dia 26 di mart. E dos mihonan di kada grupo ta avansá pa e siguiente buèlta.

Manera nos a informá anteriormente tin algun kara nobo ku a risibí invitashon pa e selekshon nashonal. Te ku awor aki e selekshon di Kòrsou lo tin por lo ménos tres kara nobo. Direktor tékniko di selekshon, Patrick Kluivert a hasi un invitashon na entre otro Doriano Kortstam, Rangelo Janga i Quentin Jakoba.

Posted on

Centro Dominguito kontra Jong Colombia ta habri temporada di Liga MCB

WILLEMSTAD — Despues di un tremendo kampionato aña pasa, FFK i MCB ta anunsiá e gran apertura di Liga MCB Promé Divishon ku ta tuma lugá djadumingu, 6 di mart benidero den Stadion Ergilio Hato (SDK) 6or di atardi.

E dos ekiponan ku lo mira akshon den e gran apertura di Liga MCB Promé Divishon lo ta e ekipo kampion di Liga MCB Promé Divishon 2015, Centro Dominguito i e ekipo di Jong Colombia.

E aña aki Liga MCB ta wòrdu dediká na e siguiente baluartenan; Sr. Ruben Brandborg (èks hungadó), Sr. Edgar Meulens (èks hungadó), Wilbert Martijn (èks hungadó), Sr. Keneth Brigitha (rèfri) i Sr. Erwin Rekondi (eks dirigente). E persona nan aki ta tin un kontribushon enorme na e desaroyo di e deporte rei, futbòl. P’esei nan lo wòrdu homenagiá i FFK lo dediká e kampionato di e aña aki na nan.

Porta nan lo ta habri for di 4or di atardi i karchinan lo ta optenibel na lokèt di FFK promé ku wega. E entrada pa e wega di apertura ta kosta 10 florin pa adulto miéntras mucha te ku 12 aña i 60+ ta kosta fl.5,- i animashon musikal lo ta na enkargo di DJ Bradley.

Karchinan adelantá lo ta optenibel for di djaluna 29 di febrüari na ofisina di FFK bou di ora di ofisina òf serka hungadónan di Centro Dominguito i Jong Colombia.

Un yamada ta bai na henter e pueblo di Kòrsou pa asistí na e gran apertura di Liga MCB Promé Divishon ku ta ranka sali 6 di mart próksimo. Bin pasa un ratu ameno den kompania di bo famia i disfrutá di bo deporte preferí e deporte rei, futbòl.

Posted on

Jong Holland su divishon hubenil a estrená unifòrm nobo

WILLEMSTAD — Dia 26 di febrüari tabata un dia memorabel pa e divishon hubenil di Jong Holland.

Riba e dia en kuestion nan a estrená unifòrm di TUR su ekiponan di U-20 te ku U-9.

E sponsornan pa kada divishon ta:

U-20  ezone y Sanicare

U-17 Speedysecurity

U-15 PSB bank

U-13 Savanah

U-11 ASKA seguro

U-9 PSB bank

Manera ta konosí, te ku aña pasa, JH tabata hunga bou di e nòmber di Genesis Boys den e kategoria nan di U-13, U-11 i U-9.

E direktiva nobo ku a sinta 2 aña pasa, tabatin 4 meta pa kumpli kune:

  1. Bini ku un struktura atministrativo y sponsor nobo pa e team
  2. Adkeri e sobra divishon hubenil y yama tur Jong Holland
  3. Pone yerba y lus na nos vèlt na Zaquito y…..
  4. Bira kampion un biaha mas.

E ekipo a logra un ophetivo mas, esta punto nr. 2

Punto nr. 3, ya tin aprobashon i pronto e trabounan ta bai kuminsá.

Direktiva di Jong Holland ta sumamente orguyoso di e mucha nan di divishon U-20 te ku U-9.

Nan ta di e skol of Farm, y ta nan ta esnan ku mañan ta subi i bin den nos ekipo di promé divishon.

Posted on

Jakoba, Janga i Kortstam a haña invitashon pa selekshon di futbòl Kòrsou

HULANDA — Moveshonnan ta tumando luga pa ku e selekshon nashonal di futbòl di Kòrsou ku lo bai partisipá den e eliminatorionan di Kopa Karibe 2017 den luna di mart próksimo. Manera kos ta mustra te ku awor aki e selekshon di Kòrsou lo tin por lo ménos tres kara nobo. Direktor tékniko di selekshon, Patrick Kluivert a hasi un invitashon na entre otro Doriano Kortstam, Rangelo Janga i Quentin Jakoba.

Den e promé buèlta di eliminatorio Kòrsou lo ta den Grupo 4 huntu ku Barbados i Repúblika Dominikana. Kòrsou lo enfrentá Barbados dia 22 di mart i Republika Dominikana dia 26 di mart. E dos mihonan di kada grupo ta avansá pa e siguiente buèlta.

Doriano Kortstam

Doriano Kortstam ta un defensa sentral ku ta hungando den e Beloften Eredivisie pa Roda JC U21. Na 2014, Kortstam a gana e Nike Academy Challenge kaminda e hungadó a haña e oportunidat pa skohe un ekipo profeshonal di futbòl pa hunga kune i tambe e ta keda di sponsor pa Nike.

Rangelo Janga

Rangelo Janaka aktualmente ta atakante pa e ekipo di FC Dordrecht den prome divishon na Hulanda. E atakante di 23 aña e temporada aki a hunga den 25 partido i anotá na 15 okashon pa e ekipo di Dordrecht. Janga tin eksperensia den pasado hungando den Eredivisie ku Willem II i SBV Excelsior.

Quentin Jakoba

Quentin Jakoba ta defensa pa e ekipo di Kozakken Boys ku ta den e nivel mas altu di futbol amatùr na Hulanda. Jakoba na diferente okashon a sali hungadó di aña.

Artíkulo skirbi ku kontribushon di  Rienngelo Albertus.

Posted on

Departamentu di arbitrahe di FFK lo organisá tremendo kursonan di arbitrahe

WILLEMSTAD — Departamento di arbitrahe di FFK ta bai organisá su promé kurso di arbitrahe pa e aña aki di nivel 2. Despues di vários kursonan básiko ku a resultá di ta un éksito, awor ta bai organisá e promé kurso básiko nivel 2 pa tur hende di 14 aña òf mas pa dirigí entre otro weganan di sekshon hubenil ku ta e kategoria di U-11 te ku U-20 i tambe 3er divishon.

E kurso lo inisiá promé di mart i lo finalisá 23 di aprel ku un èksamen.
E kurso aki lo tuma lugá na Edifiso Mordy Maduro (FFK) i e orario lo ta di 18.00pm pa 20.00pm riba djamars i djaweps.

Kontribushon pa e kurso aki lo ta fl.10  i ora kompletá e kurso ku éksito lo risibí un diploma.

Por inskribí te ku dia 29 febrüari 2016. 

Tambe e departamento di rèfri lo kuminsá ku un kurso pa hóben netamente pa logra haña rèfrinan hóben (12 aña bai ariba) pa dirigí weganan hubenil, manera e weganan di Liga Lito kual ta e kampionato pa muchanan di 4 pa 8 aña. E kurso aki tambe lo tuma lugá na edifisio Mordy Maduro (FFK) i lo ta riba kuater djasabra mainta den luna di mart. E fecha nan ta lo siguiente: 5,12,19 i 26 di mart 2016 i e orario lo ta di 10or di mainta pa 12or mèrdia.

E kurso aki ta kompletamente grátis i ora kompletá e kurso lo risibí un sertifikado di partisipashon.

Pa inskripshon por tuma kontakto ku departamento di arbitrahe na referee@ffk.cw òf via di telefòn na 7365057, 5112915, 5128617, 5202587.

Pa abo ku ta un hóben dinámiko ku outoridat i ku ambishon pa bira rèfri, esaki ta bo oportunidat!

Inskribí awe mes, departamento di arbitrahe i FFK ta warda bo!

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media