Category: Futbòl

Posted on

Kòrsou ta pèrdè promé partido den CFU Women’s U-20 Championships

HAITI — E selekshon di Kòrsou U-20 di dama a kai vensí ayera den nan promé partido di e CFU Women’s U-20 Championships den Stadion Sylvio Cator na Haiti. E selekshon di Kòrsou a sa di bai ariba trempan den e partido kontra Trinidad i Tobago. Ya na di 2 minüt di e partido Ketsiah Nahr a habri e markadó ku un tiru di distansia ku a kue e kiper di Trinidad di sorpresa.

Kòrsou a defendé durante henter e promé mitar, sin embargo na di 37 minüt e gol di empate ta kai. Den e di dos mitar tur kos a kambia ora ku Trinidad a logra anotá na tres okashon, finalisando e partido ku un skor di 4-1.

Golnan di Trinidad a keda anotá pa: Tsainne Leander 37′, 48′, Maya Matouk 52′, Kedie Johnson 53′.

E selekshon di Kòrsou su siguiente partido ta dia 17 di òktober próksimo kontra Jamaica.

Posted on

Joshua Brenet lo ekstendé su kontrakt ku PSV

EINDHOVEN — E ekipo di PSV a konfirmá ku Joshua Brenet por ekstendé su kontrakt ku e ekipo pa un of dos aña. Segun informashonnan, esaki ta loke Joshua lo hasi tambe. E akuerdo aktual ku Brenet tin ta kore te ku zomer di otro aña. For di algun luna pasa e defensor di 21 aña a haña un oferta, pero pa motibu ku e la kambia di agente e desishon a keda postpone. Tur kos ta mustra ku un desishon ta tuma i ku pronto Joshua lo firma su ekstenshon ku PSV.

Posted on

Centro Dominguito den final di Liga MCB kontra Centro Barber

WILLEMSTAD — Despues di un retraso di un siman por fin e ultimo partido di Liga MCB promé divishon su buèlta di kuater a tuma lugá. E partido entre Victory Boys i Centro Dominguito tabata plania pa tuma lugá for di siman pasa na Stadion Antoine Maduro. Pero e ultimo aki no a tuma lugá mas pa motibu ku no tabata tin sufisiente rèfri pa dirigí e partido.

Na e momentu ey, refrinan den un forma di protesta a bisa ku nan no ta dirigí e partido en kuestion miéntras tantu ku e hungadónan di Victory Boys envolví den e insidente di algun tempu atras risibí kastigu di FFK.

Despues di a sinta na mesa ku FFK, ayera si e staf di refrinan tabata kompletu pa dirigí e partido.

E partido ku a tuma lugá na mes un sitio ku e tabata programa e siman anterior, esta Stadion Antoine Maduro a finalisá den kuater gol pa banda. Ku e empate aki Centro Dominguito ta pasa pa final di futbòl promé divishon kaminda lo e topa ku Centro Barber.

Pa Centro Dominguito den e partido di ayera e golnan a keda anotá pa, Norvianel Naar(3x) i Ashar Bernardus. Mientras ku pa Victory Boys tabata un outogol, Raylison Lindo, Randel Winklaar i Jahir Valerius.

Posted on

Selekshon nashonal di futbol dama rumbo pa Haiti

WILLEMSTAD — Na yüni último nos selekshon nashonal di dama kategoria U-20 a biaha pa Puerto Rico pa partisipá na e CFU Woman’s U-20 Cup Tournament i a logra klasifiká pa e segundo buèlta di e torneo aki ku ta bai tuma lugá próksimamente na Haiti.

Despues di dianan di trainingnan intensivo i un temporada di preparashon ekstenso, awe, djaluna 12 di òktober 9:50AM nos selekshon nashonal di dama U-20 a biaha pa Haiti pa asina kumpli ku nan kompromisonan den e segundo buèlta di e CFU Woman’s U-20 Cup Tournament ku ta tuma lugá di 14 pa 23 di òktober próksimo.

Nos pul ta konsistí di e siguiente paisnan; Jamaica, Trinidad & Tobago, St.Vincent & The Grenadines i Kòrsou.

Skema di weganan: 

Fecha Tim A Tim B Ora Lugá
1 15 okt. 15 Jamaica St.Vincent & The Grenadines 4:00 PM Stade Sylvio Cator

(Haiti)
2 Trinidad & Tobago Curacao 6:30 PM
3 17 okt. 15 St.Vincent & The Grenadines Trinidad & Tobago 4:00 PM
4 Jamaica Curacao 6:30 PM
5 19 okt. 15 Curacao St.Vincent & The Grenadines 4:00 PM
6 Trinidad & Tobago Jamaica 6:30 PM

Nos selekshon nashonal di dama U-20 ta konsistí di un grupo di 18 hungadó ku ta wòrdu dirigí pa Sr. Rudsel Monte ku ta e direktor tékniko di e selekshon aki i Sr. Rovian Carolina ku ta e asistente di e direktor tékniko.

Tambe ta biaha huntu ku e selekshon Sra. Nadine Carolina ku ta esun enkargá ku e materialnan di e selekshon, un masahista kual ta Sra. Natalee Felicia, e ‘team manager’ ku ta Sr. Harry Davelaar  i e hefe di delegashon ku ta Sr. Ebell Scharbaai, miembro di direktiva di FFK.

Nos selekshon ta konsistí di e siguiente hungadónan:

  1.  Diante Scheepers (Kòrsou)
  2. Kadisha Martina (Kòrsou)
  3. Kiara Snel (Kòrsou)
  4. Yasmin Levens (Kòrsou)
  5. Samantha Statia (Kòrsou)
  6. Sullyvienne Noten (Kòrsou)
  7. Shade Desir (Kòrsou)
  8. Kiara Angelino (Hulanda)
  9. Sterre Noordhoek (Hulanda)
  10. Stephany Passial (Kòrsou)
  11. Ketsiah Nahr (Merka)
  12. Jurdine Felix (Boneiru)
  13. Juvainy Keller (Hulanda)
  14. Lishanty Guillermo (Merka)
  15. Tihainy Nicolaas (Boneiru)
  16. Tanisha Nicolaas (Boneiru)
  17. Jerona Rifaela (Boneiru)
  18. Danique Trenidad (Boneiru)

FFK i MCB kier a deseá nos selekshon di dama U-20 tur klase di éksito i tin sigur ku nan lo sigui saka kara na Haiti durante e di 2 buèlta di CFU Woman’s U-20 Cup Tournament.

Posted on

Ekipo di futsal ta biaha pa Hulanda awe ku sosten di Global Paint

WILLEMSTAD — E ekipo lokal di futsal, “Curaçao Peace Indoor Soccer Team”, ku lo biaha pa Hulanda awe, pa asina otro siman hunga den un kompetensia mundial di futsal, a risibí sosten di e kompania # 1, pa loke ta fèrf i materialnan di fèrf, na mundu.

Ta trata aki di Global Paint, ku a koperá ku e ekipo i ku deporte di Kòrsou. Esaki unda entre otro tambe nan a sòru pa e ekipo por biaha uniformá awe djabièrnè, pa tera friu.

Nan lo yega Hulanda mañan djasabra, dia 10 òktober 2015, miéntras ku e torneo lo konosé su grandioso apertura djaluna dia 12 benidero. Miembronan di e ekipo aki, riba djamars dia 13 òktober 2015, lo tin un dia liber, unda nan ta probechá pa presensiá e enkuentro di e selekshon nashonal Oraño den Amsterdam Arena, na momentu ku Hulanda, huntu ku nos yu di tera Riechedly Bazoer, topa e selekshon nashonal di Repúblika Cheko. Otro siman djarason dia 14 òktober, e ekipo lokal lo inisiá ku nan partidonan bálido pa e kampionato mundial di futsal, “Peace Indoor Soccer Tournament 2015”, ku ta konta ku partisipashon di 203 ekipo for di 42 diferente pais for di rònt mundu. E ekiponan aki, lo ta repartí den 4 diferente kategoria. E ekipo lokal lo ta kompetiendo den e kategoria maskulino pa hungadónan di 35 aña di edat òf mas, kual ta konta ku partisipashon di 66 ekipo. Den e promé buèlta di e kampionato, Kòrsou su ekipo, lo forma parti di grupo G, ku ta konta ku partisipashon di 8 ekipo. Aki Kòrsou lo kompetí kontra di entre otro ekiponan for di Rumania, Fransia, Polonia, Hulanda, Kroasia i Inglatera.

E delegashon ku lo biaha for di Kòrsou pa Hulanda, lo bai konta tambe ku refuerso di futbolistanan Ellis ‘Pepe’ Orgenia i tambe Joshua ‘Josje’ Bicentini.

Posted on

FFK i FIFA ku tremendo kurso pa rèfrinan aktivo

WILLEMSTAD — Awe 8 di òktober 1or di mèrdia ta inisiá e ‘MA Elite Course 2015’. E kurso aki ta un training ku FIFA ta duna na rèfrinan aktivo di FFK. E kurso lo tuma lugá den sala i riba tereno di FFK for di awe 8 di òktober te ku djaluna 12 di òktober próksimo. E kurso lo konta ku partisipashon di 16 rèfri aktivo di nos futbòl lokal ku lo pasa diferente, tèst tantu teorétiko, práktiko i físiko riba vèlt. Durante e kurso lo pone nan saber den práktika pero tambe nan kondishon físiko. E meta di e kurso aki ta pa mantené nos rèfrinan lokal riba e nivel ku FIFA ta eksihí di nan pa por aktua durante nos partidonan lokal i internashonal.

Posted on

Partido entre Centro Dominguito i Victory Boys suspendé

WILLEMSTAD — E partido di Liga MCB promé divishon su buèlta di kuater ku mester a tuma lugá ayera entre e ekipo di Victory Boys i Centro Dominguito no a kontinuá. E partido tabata plania pa tuma lugá ayera 8’or di anochi na Stadion Antoine Maduro, pero no a kontinuá pa di sufisiente ofisial pa dirigí e partido.

Segun informashonnan, e refrinan den un forma di protesta a bisa ku nan no ta dirigí e partido en kuestion miéntras tantu ku e hungadónan di Victory Boys envolvi den e insidente di algun tempu atras risibí kastigu di FFK. Aktualmente e hungadónan ta di skors pendiente un desishon final di FFK.

Pa e respektivo insidente FFK a tuma e siguiente desishon kontra Victory Boys:

  • Victory Boys ta haña un but di fl. 500.-;
  • E kontra partido por deklará su gastunan ku mester wòrdu aprobá pa FFK;
  • Victory Boys ta pèrdè tres punto riba e tabla di posishon di e kampionato;
  • E wega kontra Centro Dominguito ta wòrdu hungá kompletamente di nobo.
Posted on

Departamentu di arbitrahe di FFK lo organisá tremendo kurso di arbitrahe

WILLEMSTAD — Departamentu di arbitrahe di FFK ta bai organisá su di tres kurso di arbitrahe pa e aña aki. Despues di e otro dos kursonan básiko ku a resultá di ta un éksito, awor ta bai organisá e di tres kurso básiko pa tur hende di 14 aña òf mas pa dirigí entre otro weganan di sekshon hubenil ku ta e kategoria di U-11 te ku U-20 i tambe 3er divishon.

E kurso lo inisiá 13 òktober 2015 i lo finalisá 5 Desèmber ku un eksamen.
E kurso aki lo tuma lugá na Edifiso Mordy Maduro (FFK) i e orario lo ta di 18.00pm pa 20.00pm riba djamars i djaweps.

Pa inskripshon por tuma kontakto ku departamentu di arbitrahe na referee@ffk.cw òf via di telefon na 7365057, 5112915, 5128617, 5202587. Por inskribí te ku dia 12 di òktober 2015.

Pa abo ku ta un hóben dinámiko ku outoridat i ku ambishon pa bira rèfri, esaki ta bo oportunidat!

Inskribí awe mes, departamentu di arbitrahe i FFK ta warda bo!

Posted on

Victory Boys ta perde tres punto i tin ku paga multa

WILLEMSTAD — Relashoná ku e insidentenan ku ta tin den e wega di dia 26-09-2015 Victory Boys vs Centro Dominguito, direktiva FFK a investigá un ke otro i a tuma e siguiente desishon:

  • Victory Boys ta haña un but di fl. 500.-;
  • E kontra partido por deklará su gastunan ku mester wòrdu aprobá pa FFK;
  • Victory Boys ta pèrdè tres punto riba e tabla di posishon di e kampionato;
  • E wega ta wòrdu hungá kompletamente di nobo i ta keda reprogramá pa djarason 7 oktober 2015 pa 8’or anochi den S.A.M.
Posted on

Hubentut Fortuna ta gana miéntras e dos Centronan ta empatá

WILLEMSTAD — Liga MCB Promé Divishon a kontinuá den wikènt tras di lomba ku e partidonan di e buèlta di 4 den Stadion Antoine Maduro (SUBT). Riba djabièrnè tabata e ekipo di Victory Boys ku a enfrentá e ekipo di Hubentut Fortuna. Akinan tabata e ekipo di Hubentut Fortuna ku a gana di Victory Boys ku skor di 2-0. E golnan di Hubentut Fortuna a keda anotá pa Davidson Rosa i Ishuar Martha.

Djasabra e buèlta di 4 a kontinuá ku e partido entre Centro Barber i Centro Dominguito. Akinan ambos ekipo ta kompartí punto despues di a empatá na un gol. Pa Centro Barber e gol a keda anotá pa, Jurensley Marina. Miéntras ku pa Centro Dominguito e gol a keda anotá pa Norvianel Naar.

Centro Barber ya ta den final di Liga MCB Prome Divishon.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media