WILLEMSTAD — E ekipo di Vesta ta bek siguiente temporada den futbòl promé divishon. Esaki despues di a empatá ku Sithoc den Stadion Ergilio Hato ayera nochi ku skor di 1-1. E promé partido e ekipo di Sithoc a pèrdè ku skor di 2-0 loke a hasi skor global 3-1 na fabor di Vesta. Pa Sithoc esaki ta nifiká ku nan lo tin ku hunga otro temporada den di dos divishon.
WILLEMSTAD — Resientemente, komo parti di e programa edukativo di FFK, a tuma lugá un kurso pa bira entrenadó di Grassroots ouspisiá pa FIFA.?Grassroots ta para pa kategoria u-6 te ku u-13, esta pa hóbennan ku ta praktiká futbòl hubenil, bou di 13 aña di edat. Sr.Leonard Lake, instruktor di FIFA tabata esun enkargá pa duna e kurso aki ku a konta ku un total di 30 partisipante. E kurso a kuminsá djaluna 21 di sèptèmber i a terminá djabièrnè 25 di sèptèmber. Den e promé parti di e kurso e kursistanan a haña e parti teorétiko ku diferente informashon i material di FIFA ku tabata destiná pa e kurso aki. Den e di dos parti, esun práktiko e kursistanan mester a apliká loke nan haña den e parti teorétiko di e kurso aki huntu ku un grupo di hóbennan futbolista ku a bin pa yuda durante e práktikanan di e kurso.
Riba djabièrnè e partisipantenan mester a organisá un Grassroots Festival kaminda a partisipá alrededor di 175 muchanan di skol básiko di Kòrsou.
E hóbennan a partisipá den diferente sirkuito tékniko di weganan redusí di futbòl.
Despues di 5 dia di kurso intensivo tur e kursistanan aki a kaba e kurso ku éksito a risibí nan sertifikado komo entrenadó di Grassroots.
Awó nos por bisa ku e famia di futbòl hubenil ta konta ku 30 entrenadó mas.
FFK ta hasi un apelashon na e kursistanan ku no ta pertenesé na un klup ainda, pa djòin un klup di FFK pa yuda desaroyá i engrandesé e deporte di futbòl hubenil.
WILLEMSTAD — Ayera, 28 di sèptèmber a tuma lugá e elekshon pa un direktiva nobo pa FFK. A postulá un total di 4 kandidato pa e puesto pa presidente i 22 kandidato pa e 8 puestonan di miembro di direktiva.
E 4 kandidato nan ku a postulá pa presidente di FFK ta lo siguiente;
Di e 4 kandidatonan aki, Sr. Millerson a retirá na delaster momentu i no a sigui den e kontienda pa postulá su mes pa presidente di FFK.
E elekshon a wòrdu repartí den dos buelta debí ku den e promé rònt niun di e 3 kandidatonan no a haña 2/3 parti di e votonan di e miembronan ku por a vota. Den e promé beulta di elekshon Sr. Francisca a optené un total di 14 voto, Sr. Griffith a optené 15 voto miéntras Sr. Chance a optené 3 voto. Tabata den e segundo buelta di e votashon ku Sr. Francisca a optené 17 voto ganando pèrtá di Sr. Griffith ku a optené un total di 15 voto. Pues e presidente di FFK ta Sr. Rignaal ‘Jean’ Francisca ku ta sigui na kabes di FFK pa 4 aña mas.
E 22 kandidatonan ku a postulá nan mes pa e 8 puestonan di direktiva ta lo siguiente;
Despues di e elekshon e 8 miembronan ku a wòrdu eligí pa e direktiva di FFK ta lo siguiente;
WILLEMSTAD — Riba djabièrnè tras di lomba tabata tin e promé partido di Promoshon i Degradashon entre e ekiponan di Sithoc i Vesta den Station Ergilio Hato. Akinan tabata Vesta ku a hinka un pia den futbòl promé divishon ora ku nan a derota Sithoc ku skor di 2-0. E golnan di Vesta a keda anotá pa Mauricio Moreno i Darnout Kwasi.
E siguiente partido i ala bes e partido desisivo pa e dos ekiponan aki lo keda hunga djárason awor, 30 di sèptèmber pa 8’or di anochi den Stadion Ergilio Hato.
WILLEMSTAD — Liga MCB Promé Divishon a kontinuá den wikènt tras di lomba ku e partidonan di e buèlta di 4 den Stadion Antoine Maduro (SUBT). Riba djasabra tabata e ekipo di Centro Dominguito ku a enfrentá e ekipo di Victory Boys. E partido aki a keda para na halftime ku skor di 1-1 pa motibu di agreshon kontra di rèfri. Ainda no tin un desishon tuma pa Federashon Futbòl Kòrsou riba kiko ta bai pasa ku e partido aki.
Djadumingu e buèlta di 4 a kontinuá ku e partido entre Centro Barber i Hubentut Fortuna. Akinan ambos ekipo ta kompartí punto despues di a empatá na dos gol. Pa Centro Barber e golnan a keda anotá pa, Kenneth Kunst i Jurensley Martina. Miéntras ku pa Hubentut Fortuna e golnan a keda anotá pa Tyrone Maria i Dario Arieas.
DINAMARKA — E ekipo di Vendsyssel FF a anunsiá ku nan a yega na un akuerdo di mitar aña ku opshon di ekstenshon ku e mediokampista di Kòrsou, Kemy Agustien. Vendsyssel FF ta un ekipo den e di dos divishon di futbòl Danes. Agustien di 29 aña ta un mediokampista ofensivo ku despues di a kuminsá su karera di futbòl na Hulanda a pasa ultimo añanan hungando futbòl na Inglatera. Ultimo aki Kemy a forma parti di Brighton & Hove Albion, pero den pasado e internashonal di Kòrsou a hunga tambe pa Crystal Palace, Swansea City i Birmingham City. Na Hulanda Kemy a hunga pa Willem II, AZ Alkmaar, Roda JC i RKC Waalwijk.
Segun Kemy a deklará, ‘e la tuma e paso aki pa gosa un biaha mas di futbol. No ta kuestion di sen, tampoko e nivel ku e ta hungando riba dje, e ta simplemente agradesido pa e oportunidat ku e la haña serka Vendsyssel FF.’
WILLEMSTAD — Liga MCB Promé Divishon ta kontinuá e wikènt aki ku e di 2 siman di e partidonan di e buèlta di 4 den Stadion Antoine Maduro (SUBT). Den e wikènt tras di lomba a tuma lugá algun partido sumamente interesante kaminda e ekipo kampion Liga MCB 2014 Centro Barber i e ekipo sup-kampion Centro Dominguito a sa di bai ku e promé 3 puntonan ganando di Victory Boys i Hubentut Fortuna ku e skor di 3-1. E wikènt aki atrobe kos lo ta kayente paso e final ta aserkando i tur hende ke gana! Preis pa Liga MCB Promé Divishon buèlta di 4 ta lo siguiente; adulto ta paga fl.10,- miéntras mucha te ku 12 aña i 60+ ta paga fl.2.50,-.
Wega nan pa wikènt binidero, Liga MCB Promé Divishon buèlta di 4:
| Djasabra | 26 sept.15 | 20.00 | C. Dominguito | Victory Boys | SUBT |
| Djadumingu | 27 sept. 15 | 18.00 | Hub. Fortuna | CSD Barber | SUBT |
Liga MCB Segunda Divishon tin su ekipo kampion! Djaluna 21 di sèptèmber último e ekipo di Vesta a titulá nan mes komo e kampionnan di Liga MCB Segunda Divishon despues di a gana Inter Willemstad ku e skor mínimo di 1-0. Awor lo mester tuma lugá e 2 partidonan di Promoshon/Degradashon kaminda Vesta lo enfrentá Sithoc pa sa si Sithoc lo degradá pa Segunda Divishon òf si Vesta lo bai Liga MCB Promé Divishon bèk. E 2 partidonan aki lo tuma lugá dia 25 i 30 di sèptèmber binidero na SDK 8or di anochi i lo kosta fl.6,- pa adulto i fl.2.50 pa mucha te ku 12 aña i 60+.
Partidonan di Promoshon/Degradashon:
| Djabièrnè | 25 sept.15 | 20.00 | Sithoc | Vesta | SDK |
| Djarason | 30 sept.15 | 20.00 | Vesta | Sithoc | SDK |
Djadumingu aki, 27 di sèptèmber Liga Lito ta kontinuá kaminda nos chikitinnan lo mira akshon. E weganan aki ta tuma lugá 10or di mainta na tereno di FFK i tur e weganan aki ta grátis.
HULANDA — E ekipo di futbòl amatùr SteDoCo a anunsiá ku entrante djaweps próksimo e defensa sentral di 32 aña Shelton Martis ta entrená ku e ekipo. Miéntras tantu e ekipo di SteDoCo ta wardando riba desishon di KNVB riba petishon di transferensia.
Shelton Martis den pasado a forma parti di e akademia di hóben di Feyenoord. Tambe e yu di Kòrsou a hunga na Hulanda pa entre otro SBV Excelsior i FC Eindhoven. Despues e la hunga na Inglatera i Eskosia. Na 2009 Shelton a debutá den Premier League ku e ekipo di West Bromwich Albion. Na 2010 Martis a firma un kontrakt di tres aña i mei ku e ekipo di Doncaster. Ultimo aki Shelton a militá ku e ekipo Thailandes Osotspa Saraburi FC.
Martis for di 2008 tabata forma parti di e selekshon di Antia Hulandes i for di 2014 ta forma parti di e selekshon di Kòrsou. Shelton tabata un di e hungadónan ku a keda konvoká pa Patrick Kluivert pa e partido eliminatorio pa Mundial Rusia 2018 kontra El Salvador.
WILLEMSTAD — Komo un eks futbolista profeshonal i dirigente, Rignald Hato, semper tabata presente i kla pa brinda su sosten i duna un man kaminda e por i ta na su alkanse pa sostené tur bon proyekto deportivo. Komo un hòmber ku pa hopi aña ta brindando su sosten i aporte na nos futbòl lokal i komo eks miembro di diferente selekshon ku a representá Antias i Kòrsou i hungadó profeshonal, e ta pidi e sosten pa dia 28 próksimo e drenta den direktiva di FFK i asina pone kosnan kana di un forma positivo. Aparte di a militá den futbòl lokal i futbòl profeshonal, Rignald a dirigí diferente selekshon di Orfik, selekshon Hubenil i a fungi tambe komo ‘team manager’ di nos selekshon nashonal. Rignald ta un persona ku no sa gaba su mes, pero ta dediká na hasi pa logra éksito. Rignald su konosementu di futbòl ta hopi amplio i tin vasto konosementu di tantu e parti práktiko i alabes atministrativo di futbòl. Prueba di esaki ta ku Rignald den pasado tabata asistente di e konosido Ibi Jansen den e ekipo di Jong Holland i a dirigí e kolegialnan di Sithoc. Rignald tabata tambe den diferente direktiva di ekiponan di Futbòl i sigur lo por ta di gran sosten pa progreso di nos futbòl lokal. Su konosementu i abilidat pa pone kos kana sigur lo ta di gran aporte pa e deporte rei futbòl na Kòrsou. Su intenshon pa drenta direktiva di FFK ta netamente pa yuda den e totalidat ku su konosementu i pa pone kosnan kana di bèrdat den e bon kaminda. Pero pa e por logra esaki, Rignald Hato tin mester di e sosten di esnan ku di bèrdat ta kere den un adelanto di nos futbòl i desaroyo di nos futbolistanan i árbitronan. E sosten aki lo brinda Rignald e oportunidat di pone den práktika su konosementu i eksperensia pa loke ta adelanto di futbòl en general. Tur ekipo i tambe árbitronan, por konta ku nan lo haña un representante ku lo mira e desaroyo di futbòl na promé lugá den persona di Rignald Hato. P’esei nos mester sostené Rignald Hato i brind’é e oportunidat di implementá su plan pa un berdadero desaroyo di nos futbòl, árbitro i su futbolistanan en partikular.
WILLEMSTAD — Liga MCB Promé Divishon a kontinuá den wikènt tras di lomba ku e partidonan di e buèlta di 4 den Stadion Ergilio Hato. Riba djabièrnè tabata e ekipo di Centro Dominguito ku a enfrentá e ekipo di Hubentut Fortuna. Akinan tabata Centro Dominguito ku a e promé dos puntonan di e buèlta di 4 derotando Hubentut Fortuna ku skor di 3-1. Pa Centro Dominguito e golnan a keda anotá pa; Joel Victoria, Ashar Bernardus i Steward Sambo. Mientras ku e úniko di Hubentut Fortuna a keda anotá pa Tyrone Maria
Djasabra e buèlta di 4 a kontinuá ku e partido entre Centro Barber i Victory Boys. Akinan tabata Centro Barber ku a logra e tres puntonan despues di a derota Victory Boys ku skor di 3-1. Pa Barber, dos gol a keda anotá pa Jurensley Martina i unu pa Geryon Alberto. E gol di Victory Boys a keda anotá pa Raylison Lindo.