Nòmber: William Millerson
Edat: 62 aña
Funshon: Ingeniero den elektrónika i tin su mes kompania.
Su promé pashon ta karate, miéntras su di 2 pashon deportivo ta futbòl. Durante su estudio na Hulanda e a hunga futbòl den OSO na Hilversum. OSO tabata den un di e kategorianan di mas abou di KNVB.
For di 1976 te awe Millerson ta hunga futbòl den e tim di Abrahamsz.
Pa algun aña su persona a fungi komo Presidente di SV Hubentut Buena Vista ku despues a “merge” ku Sentro Buena Vista.
Pa loke ta deporte en general su persona:
– tabata 20 aña Presidente di Panamerican Karate Federation i aktualmente e ta Presidente honorario pa bida di e federashon aki.
– e ta Vise Presidente di World Karate Federation
– e ta Vise Presidente di ACODEPA. ACODEPA ta e organisashon madre pa tur federashon Panamerikano di kada deporte.
– e ta Presidente di Curaçao Karate Bond.
– e tabata Presidente di CSF, Curacaosche Sport Federatie pa 11 aña.
– e tabata Presidente di NAOC, Komité Olímpiko di Antia pa14 aña. Bou di su presidensia a konvertí NAOC den un di e mihó Komité Olímpikonan di region i a hiba un maneho pa krea i yuda desaroyá talentonan manera Churandy Martina i otronan.
Kon e ta mira futbòl
Pa un bon futuro di futbòl, ta importante traha riba lo siguiente;
- Profeshonalisá e operashon general di FFK totalmente, pa di e manera aki hasi FFK un organisashon muchu mas fuerte ku un struktura efisiente i efikas.
- Traha riba un plan di merkadeo bon balansa ku kriterionan bon kla unda nos futbòl mester yega aki 4 aña.
- Mundo korporativo mester ke bira un “partner” di futbol pa su balornan ku e futbol ke transmiti den nos komunidat.
- Yuda drecha/lanta e nivel di dirigentenan atministrativo i dirigentenan tékniko di tur e klupnan ku ta miembro di FFK.
- Bon gobernashon mester inkluí tur miembro(klupnan) den desishonnan stratégiko i mester duna muestra públikamente ku tin unidat di vishon i akshon.Entre otro esaki ke men ku lo inverti sennan di partnerships,sponsorships di FIFA i di fútbol en general di un forma ku miembroan lo mira benefisionan a korto i largo plaso.
- Traha un struktura kaminda ta yuda/fasilitá tur e miembronan di FFK pa upgrade”” i eduká nan mes den nan ròl/tarea pa ku e deporte di futbòl.
- Mustra tur miembro di FFK riba nan responsabilidat di sa kiko ta nan derecho- i debernan Pasobra si kada miembro di e klup ta na altura di e puntonan aki nan lo ta mas atento i komo tal yuda nan klup i komo tal FFK tambe funshoná mihó.
- Traha riba un plan pa traha i/òf drecha mas akomodashon i infrastruktura pa e miembronan di FFK. Yuda kordiná pa tur miembro di FFK por hasi uso di fasilidatnan eksistente pa train i prepará mas optimal posibel.
- Yuda klupnan pa por organisá i desaroya nan mes kontinuamente pa funkshona riba un nivel kada bes mas haltu i yuda klupnan pa tin nan propio akomodashon ,infrastrukura i organisashon di fanátiko bon organisá, espesialmente klupnan di promé divishon.
- Pone atenshon na deskubrimento i desaroyo di talento hoben, ku un bon konekshon ku e proseso di edukashon general i eskolar.
- Sinta ku tur “keyplayers” pa traha un plan di desaroyo pa subi e nivel di wega en general.
- Optimalisá komunikashon ku tur miembro di FFK
- Optimalisá komunikashon ku e Públiko en general.
- Optimalisá e komunikashon ku Prensa en general
- Stimulá pa mas hende interesá den futbol komo fanátiko, sponsor ,boluntario of kolaborador.
- Formulá kriterionan kla pa formashon di preselekshon i selekshonnan.
- Struktura di klupnan mester inkluí kategoria hubenil.
- Regla organisashon di kompetensia hubenil di un forma optimal i struktura
- Mester pone atenshon na desaroyo di talento
- Krea base pa tin un asosashon òf komishon di entrenadó-/coachnan, pa yuda traha riba “upgrading” kontinuo di entrenadornan.
- Duna sosten na kuerpo di rèfri pa tin un kuerpo di árbitro mas fuerte. Sin bon rèfri no por tin bon desaroyo di futbol.
- Atendé ku violensia riba vèlt i den stadion, komportashon di Públiko den stadion, i palabra malu den stadion. futbòl mester bira atraktivo pa tur hende por bai wak. Tambe ta inakseptabel ku un hende ku ta sali su kas pa kontribui ku futbol komo refri wordu agredi.
- Studia manera pa introdusí meskos ku hopi pais grandi durante kampionato regular un kompetensia anual pa Kopa di Korsou.
Hopi ta ku ta para pafó, no ta bai futbòl dor di diferente faktor.
Algun ta:
- Violensia riba vèlt di hungadó kontra hungadó i di hungadó kontra árbitro
- Muchu wega no atraktivo
- Demasiado palabra malu den stadion