EINDHOVEN — Joshua Brenet lo keda ku PSV pa algun aña mas. Tantu PSV komo e agente di e futbolista a mustra nan interes pa e ekstenshon di kontrakt aki. Brenet lo keda ku PSV te mitar di aña 2017.
Sin embargo, e ekipo di PSV ke añadí un opshon na e kontrakt. PSV ke e opshon unilateral pa na final di e kontrakt ekstendé e kontrakt di Brenet pa un aña mas. E kondishonnan bou di kua esaki por sosodé no a keda akordá ainda pa e dos bandanan
WILLEMSTAD — Despues di un trayektoria largu i eksitoso Kampionato Hubenil 2014-2015 a yega na su final djasabra último, 27 di yüni 2015.
Djasabra ei un públiko grandi a disfrutá di e weganan final di Kampionato Hubenil 2014-2015 for di mainta 9or ora ku e promé partido a tuma lugá i sigui bai te den oranan di anochi kaminda e lastu partido di kategoria u-20 a tuma lugá den stadion di SUBT.
E kampionnan di Kampionato Hubenil ya ta konosí i nan ta lo siguiente:
Kampion kategoria U-11: Sithoc-Marchena
Kampion kategoria U-13: Willemstad
Kampion kategoria U-15: Scherpenheuvel
Kampion kategoria U-17: Atletiko Salinja
Kampion kategoria U-20: Victory Boys
Kampion kategoria U-11B: Atletiko Saliña
Kampion kategoria U-13B: Willemstad
Kampion kategoria U-15B: Willemstad
Den e promé partido di u-11B, Atletiko Saliña tabata superior na Excellence School i nan a sa di gana e partido aki ku e skor di 3-0 i a titulá nan mes komo e kampionnan di U-11B, huntu ku Willemstad ku a titulá su mes kampion di tantu U-11B komo U-13B.
Den e segundo partido di kategoria U-11, Sithoc-Marchena a sa di gana e ekipo di Excellence ku e skor di 3-1 i asina titulá e kampionnan di kategoria U-11. Esaki despues ku den e 60 minüt reglamentario i e tempu èkstra e wega a kaba ku empate di 0 gol i durante tirunan penal Sithoc-Marchena a sa anotá 3 di e 5 pinaltinan i a bai ku e viktoria. E skor final tabata 3-1.
Despues ku e wega di U-11 a terminá nos a sigui ku e di 3 partido di kategoria U-13, kaminda ku e ekipo di Willemstad a gana di Atletiko Saliña ku e skor mínimo di 1-0 i titulá kampion di kategoria u-13.
E di 4 partido tabata esun entre Scherpenheuvel i Undeba kaminda Scherpenheuvel a sa di gana Undeba ku e skor di 2 pa 0 i a bira e kampionnan di kategoria u-15.
Den kategoria u-17 e ekipo di Willemstad i Atletiko Saliña a empatá na 1 gol den e 90 minüt reglamentario i den e tempu èkstra e partido a sigui empatá i despues a pasa pa tirunan penal kaminda ku e ekipo di Atletiko Saliña a sali viktorioso ku e skor di 4-2 i asina titulá na mes komo e kampionnan den kategoria u-17.
E último partido entre Vesta i Victory Boys, tabata pèrtá kaminda ku Vesta i Victory Boys a yega na un empate di 1 gol durante e 60 minüt nan reglamentario i den e tempu èkstra Victory Boys a pika dilanti ku e skor di 2 pa 1 i a logra wanta partido ku a finalisá ku un viktoria pa Victory Boys ku a titulá nan mes komo e kampion nan di U-20.
Públiko a disfrutá di algun partido yena ku emoshon kaminda tur e timnan a duna tur ku tin pa bira kampion pero ta un kampion so por tin i esaki nan ya ta konosí.
Tambe ta tin entrega di premio na e kampion nan di U-11 i U-13 B kual ta e ekipo di Willemstad i e ekipo supkampion di U-11 B i U-13 B kual ta ekipo di Atletiko Saliña.
FFK, Komishon Hubenil i MCB e amigu di deporte kier a yama un danki na tur e klupnan, coachnan, mayornan, rèfrinan, medionan di prensa i tur ku a yuda pa e kampionato Hubenil aki tabata unu eksitoso.
Un pabien ta bai na tur e kampionnan i tambe e supkampionnan ku a sa di batayá i a logra yega den e lastu rònt di nos kampionato.
WILLEMSTAD — FFK i e komishon di dama ta reklutando damitanan entre 13 i 16 aña ku tin talento nan futbolístiko i/òf ku ta interesá den futbòl pa partisipá na un dia di training. E training aki ta tuma lugá awe 30 di yüni, 4or pa mitar di 6 di atardi na tereno di FFK. Intenshon di e training aki ta pa reklutá algun dama ku ta resaltá pa asina forma parti di nos selekshon nashonal di dama U-17. Pa mas informashon tokante e trainingnan aki por tuma kontakto ku Mr. Rudsel Monte na 5106521, entrenadó di e selekshonnan di dama.
Bin mustra bo talento i forma parti di nos selekshon nashonal di dama U-17 ku e chèns di representá bo isla.
WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan den Stadion Ergilio Hato. Riba djabièrnè tabata e ekipo di Scherpenheuvel ku a enfrentá Sithoc. Akinan ambos ekipo a bai kas ku un punto despues di a empatá na un gol.
Riba djasabra e kampionato a kontinuá ku dos partido. Den e promé partido tabata Jong Holland ku a topa ku UNDEBA. Akinan tabata UNDEBA ku a bai ku e tres puntonan despues di a derota Jong Holland ku skor di 3-0.
Den e di dos partido di djasabra tabata Centro Dominguito ku a enfrentá Hubentut Fortuna. Akinan tabata Centro Dominguito ku a logra a viktoria despues di a derota Hubentut Fortuna ku skor di 3-1
Riba djadumingu tambe tabata tin dos partido den Liga MCB. Den e promé partido di djadumingu tabata Victory Boys ku a enfrentá Jong Colombia. Akinan tabata Victory Boys ku a gana Jong Colombia ku skor di 5-2.
Den e di dos partido di djadumingu tabata Centro Barber ku a enfrentá e ekipo di SUBT. Akinan tabata Centro Barber ku a bai ku a bai ku e tres puntonan, derotando SUBT ku skor di 3-2.
Tabla di Posishon:
| Ekipo | H | G | E | P | GF | GK | GD | Pt. | |
| 1 | C. Dominguito | 14 | 13 | 1 | 0 | 45 | 9 | 36 | 40 |
| 2 | CSD Barber | 14 | 10 | 2 | 2 | 45 | 17 | 28 | 32 |
| 3 | Jong Holland | 14 | 9 | 3 | 2 | 23 | 13 | 10 | 30 |
| 4 | Victory Boys | 14 | 9 | 2 | 3 | 27 | 13 | 14 | 29 |
| 5 | Undeba | 14 | 6 | 4 | 4 | 26 | 19 | 7 | 22 |
| 6 | Hub. Fortuna | 14 | 3 | 4 | 7 | 17 | 23 | -6 | 13 |
| 7 | Subt | 14 | 2 | 3 | 9 | 21 | 32 | -11 | 9 |
| 8 | Scherpenheuvel | 14 | 1 | 6 | 7 | 11 | 22 | -11 | 9 |
| 9 | Jong Colombia | 14 | 2 | 1 | 11 | 15 | 54 | -39 | 7 |
| 10 | FC Sithoc | 14 | 1 | 2 | 11 | 10 | 38 | -28 | 5 |
WILLEMSTAD (FFK) — FFK ta invitá hinter e pueblo di Kòrsou pa bin disfrutá i apoyá nos muchanan den e GRAN FINAL di Kampionato Hubenil! Despues ku dezèmber 2014 Kampionato Hubenil a kuminsá ku weganan tur wikènt pa kategoria U-11 te ku U-20, djasabra aki 27 di yüni Kòrsou lo konosé su kampionan hubenil den tur e kategorianan aki. Tambe lo tin entrega di premio na e kampion nan di U-11 i U-13 B kual ta e ekipo di Willemstad i e ekipo supkampion di U-11 B i U-13 B kual ta ekipo di Atletiko Saliña.
For di mainta e weganan final ta kuminsá ku un tremendo ambiente den Stadion di SUBT i kos lo finalisá te den oranan lat di atardi! Bin ku hinter bo famia pa bin disfrutá di e tremendo partidonan di e gran final aki i alabes bin apoyá nos futuro nan di mañan, tur wega ta grátis!
Komishon Liga Lito ta partisipá ku djadumingu awor Liga Lito ta kontinuá! Liga Lito lo ranka sali 10or di mainta i ta terminá te den oranan di mèrdia, na tereno di FFK.
Hinter pueblo di Kòrsou ta keda invitá pa asistí na un wikènt kargá ku partidonan di bo deporte preferí, e deporte rei futbòl!
Kategoria U-11 te ku U-15
| Fecha | Tim di kas | Bishitante | Velt | U-11 | U-13 | U-15 |
| 27-06-2015 | Sithoc – Marchena | Excellence A | SUBT | 10:15 AM | ||
| 27-06-2015 | Willemstad A | Atletiko Salinja A | SUBT | 11:50 PM | ||
| 27-06-2015 | Scherpenheuvel | UNDEBA | SUBT | 1:45 PM |
Kategoria U-17 te ku U-20
| Fecha | Tim di kas | Bishitante | Velt | U-17 | U-20 |
| 27-06-2015 | Willemstad A | Atletiko Salinja A | SUBT | 3:50 PM | – |
| 27-06-2015 | VESTA Plastico Danella N.V. | Victory Boys | SUBT | – | 5:50 PM |
Kategoria timnan ‘B’
| Fecha | Tim di kas | Bishitante | Velt | U-11B | U-13B | U-15B |
| 27-06-2015 | Atletiko Salinja B | Excellence B | SUBT | 9:00 AM | – | – |
WILLEMSTAD — Liga MCB Promé i Segundo Divishon ta kontinuá ku e partidonan di e segundo buèlta den gran forma! Anto e wikènt aki e partidonan di Liga MCB Promé divishon lo mira akshon den SDK ku nan yerba artifisial renobá!
Manera tur siman MCB i FFK ta invitá hinter pueblo di Kòrsou pa asistí na e partidónan aki i pasa un ratu ameno den kompania di bo famia i alabes disfrutá di bo deporte preferí, e deporte rei futbòl. Liga MCB Promé Divishon ta kosta solamente fl.6,- general miéntras ku mucha te 12 aña i 60+ ta kosta fl.2.50 miéntras Liga MCB Segundo Divishon ta kosta fl2 so so pa tur hende
Wega nan pa wikènt, Liga MCB Promé Divishon:
| Djabièrnè | 26 yüni 15 | 20.30 | Scherpenheuvel | vs | FC Sithoc | SDK |
| Djasabra | 27 yüni 15 | 19.00 | Jong Holland | vs | Undeba | SDK |
| 21.00 | C. Dominguito | vs | Hub. Fortuna | |||
| Djadumingu | 28 yüni 15 | 17.00 | Victory Boys | vs | Jong Colombia | SDK |
| 19.00 | CSD Barber | vs | Subt | SDK |
Wega nan pa otro siman, Liga MCB Segundo Divishon:
| Djaluna | 29 yüni 15 | 19.00 | Indekor | vs | U.D. Tera Kora |
| 21.00 | Sta Cruz | vs | Marquita | ||
| Djarason | 1 yüli 15 | 19.00 | C.H. Mahuma | vs | New Song |
| 21.00 | Vesta | vs | Inter Willemstad |
Tur e partidonan aki ta tuma lugá na FFK
WILLEMSTAD (FFK) — E selekshon nashonaldi futbol di dama U-20 a klasifiká pa e di 2 buèlta di e CFU Woman’s U-20 Cup Tournament ku a tuma lugá na Puerto Rico resientemente i a regresá Kòrsou ayera, 25 di yüni.
Despues ku e selekshon a kai vensí di e ekipo anfitrion Puerto Rico, 5-0 den e promé enkuentro, Kòrsou a sa di gana Anguilla ku e skor di 2-0 den e di 2 enkuentro. E dos golnan a keda anotá pa Lindsey Hart ku Dianthe Scheeper. Antayera e selekshon a empatá kontra Antigua i Barbuda ku e skor 1-1 i asina sigurá nan klasifikashon pa siguiente buèlta ku un total di 4 punto. E gol a keda anotá pa Lindsey Hart.
E resultado di e 3 partidonan ei a pone ku e selekshon nashonal di Korsou a klasifiká pa e siguiente buèlta di e CFU Woman’s U-20 Cup Tournament ku lo tuma lugá na Haiti den e luna di òktober.
Resultadonan di e partidonan na Puerto Rico:
Curacao 0 – Puerto Rico 5
Curacao 2 – Anguila 0
Curacao 1 – Antigua & Barbuda 1
E mundial di U-20 mes lo tuma lugá na Papua New Guinea otro aña, esta 2016 i e kampionato di dama U-20 lo tuma lugá e aña aki na Honduras. Pa awor aki e selekshon lo sigui entrená pa asina e por ta kla prepará pa e kompromisonan di e siguiente buelta.
Miéntras e selekshon a empatá ku e ekipo di Antigua & Barbuda i a klasifiká komo number 2 den nos pul, e ekipo anfitrion, Puerto Rico a sa di gana tur su weganan i a klasifiká komo number 1 den den e pul.
Tabla di posishon:
| WH | WG | WE | WP | GF | GK | Saldo | Punto | ||
| 1 | Puerto Rico | 3 | 3 | 0 | 0 | 16 | 1 | 15 | 9 |
| 2 | Curacao | 3 | 1 | 1 | 1 | 3 | 6 | -3 | 4 |
| 3 | Anguilla | 3 | 0 | 2 | 1 | 1 | 9 | -8 | 2 |
| 4 | Antigua & Barbuda | 3 | 0 | 1 | 2 | 1 | 5 | -4 | 1 |
E selekshon nashonal di dama U-20 ta konsistí di un grupo di 19 hungadó ku ta wòrdu dirigí pa Sr. Rudsel Monte ku ta e direktor tékniko di e selekshon aki i Sr. Rovian Carolina ku ta e asistente di e direktor tékniko.
Tambe ta biaha huntu ku e selekshon Sra. Nadine Carolina ku ta esun enkargá ku e materialnan di e selekshon, un masahista kual ta Sra. Rose-Marie Curial i e hefe di delegashon ku ta Sr. Harry Davelaar, miembro di direktiva di FFK.
WILLEMSTAD — Kampionato di futbòl Liga MCB a kontinuá ayera ku e partido entre Jong Holland i Sithoc den Stadion Antoine Maduro (SUBT). Den e partido aki tabata Jong Holland ku a bin djatras i bai ku e viktoria di 2-1 riba Sithoc. E ekipo di Sithoc a bai ariba 1-0 den promé mitar ku gol di Jason Inecia. Den e di dos mitar tabata Riddick Koeiman ku a anotá ambos gol pa Jong Holland bin bek i derota Sithoc.
WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan den Stadion Antoine Maduro (SUBT). Riba djabièrnè tabata e ekipo di Victory Boys ku a topa ku e ekipo di UNDEBA. Akinan tabata e ekipo di Victory Boys ku a sali di e porta grandi derotando UNDEBA ku skor di 2-0. E golnan di Victory Boys a keda anotá pa Raylison Lindo i Randal Winklaar.
Riba djasabra e kampionato a kontinuá ku dos partido. Den e promé partido tabata Centro Dominguito ku a enfrentá SUBT. Den e partido aki ambos ekipo a bai kas ku un punto despues di a empata na dos gol. Pa SUBT e golnan a keda anota pa, Jervine Mook i Christopher Martha. Miéntras ku ambos gol di Centro Dominguito a keda anotá pa Luidjino Hoyer.
Den e di dos partido di djasabra tabata Centro Barber ku a topa ku Scherpenheuvel. Akinan tabata Centro Barber ku a logra e tres puntonan despues di derota Scherpenheuvel ku skor di 2-0. Pa Centro Barber e golnan a keda anotá pa Kenneth Kunst i Christopher Isenia.
Ayera djadumingu no tabata tin partido. E kampionato di futbòl Liga MCB ta kontinuá awe nochi mitar di nuebe na Stadion Antoine Maduro (SUBT) ku e partido entre Jong Holland i Sithoc.
WILLEMSTAD — Kampionato di futbòl Liga MCB a kontinuá ayera ku e partido entre Hubentut Fortuna i Jong Colombia den Stadion Antoine Maduro (SUBT). Den e partido aki tabata Hubentut Fortuna ku a bai ku e viktoria ora ku nan a derota Jong Colombia ku skor di 3-1. Pa Hubentut Fortuna e golnan a keda anotá pa, Tyrone Maria, Gilbert Emperador i Pito Roosje. E úniko gol di Jong Colombia a keda anotá pa Frenly Servania.
E kampionato ta kontinuá awe nochi pa mitar di nuebe di anochi ku e partido entre Victory Boys i UNDEBA na Stadion Antoine Maduro (SUBT).