Category: Futbòl

ZURICH — Apénas kuater dia despues di a keda re-elegí komo presidente di FIFA, Joseph Blatter a anunsiá ku e lo renunsia komo presidente di e Federashon. Blatter a tuma e desishon aki despues di un reflekshon profundo. Segun Blatter, e tin e mandato di e membresia di FIFA pa ta presidente pero e ta sinti ku e no tin e mandato aki di henter e mundu di futbòl.

Pa e motibu aki e aktual presidente di FIFA a disidí di entrega su mandato na un kongreso elektivo èkstra-ordinario. E siguiente kongreso èkstra-ordinario lo tuma lugá den luna di mei 2016, pero Blatter no ta deseá pa warda te otro aña.

E presidente di FIFA for di aña 1998 a urgi e komité ehekutivo di e federashon di futbòl pa organisá un kongreso pa por elegí su susesor mas pronto posibel. Miéntras tantu Blatter di 79 aña lo keda fungi komo presidente di e entidat.

Sepp Blatter lo keda na kabes di FIFA por lo mínimo kuater luna mas. Esaki konsiderando ku segun e statutonan di FIFA mester tin un notifikashon di kuater luna promé ku tene un elekshon presidensial.

Blatter a deklará ku e mes lo no partisipá na e próksimo elekshon. Segun Blatter, komo ku e no ta mara mas na e restrikshonnan ku inevitablemente elekshonan ta trese kune, e lo por pone mas atenshon mas riba reformanan fundamental den e federashon.

MERKA — Un dia despues ku 14 akusado, nuebe ofisial di FIFA i sinku ehekutivo a keda akusá ofisialmente pa Merka di soborno, korupshon i labamentu di plaka, outoridatnan na Merka ta bisa ku ainda nan no ta kla. “Esaki ta solamente e komienso di nos trabou, no e final,” Kelly Currie fiskal pa e distrito ost di New York a bisa. Den e akusashon ofisial di 166 paginá ku a keda presentá ta papia di 25 ko-konspiradó banda di e 14 akusadonan ku ya ta konosí.

Di e shete akusadonan ku a keda detené ayera na Suisa, seis ta oponiendo nan ekstradishon pa Merka. Esaki ta pone ku Merka lo tin ku bai presentá un petishon ofisial di ekstradishon den korte na Suisa den e próksimo 40 dianan.

Segun e Ofisina Federal di Hustisia di Suisa, e úniko akusado ku no a oponé su ekstradishon lo keda entrega na Merka una bes su ekstradishon keda aprobá pa korte Suiso.

Pa FIFA e elekshon presidensial di djabièrnè ta siguí normal. Pero segun UEFA, esaki mester keda postpone. Den un komunikado UEFA a duna di konosé ku loke ta pasando ta un desaster pa FIFA i ta mancha e imágen di futbòl den su totalidat. E Federashon ta di opinion ku mester bin un restrukturashon i un reforma real den FIFA i ku konsekuentemente no por tene un elekshon bou di e kondishonnan aki.

Tantu e konfederashon di CONCACAF komo esun di CONMEBOL a duna di konosé ku nan ta kooperá kompletamente ku e investigashon i ta repudiá e aktonan di korupshon ku a keda trese kontra nan miembronan. Nuebe di e personanan ku ta keda akusá den e kaso di korupshon den FIFA ta sea miembro of èks-miembro di e konfederashonnan aki.

Patrosinadónan pa FIFA su eventonan ya a kuminsá ekspresá nan opinion. Segun Visa, “ta importante pa FIFA trese kambio awor. Den kaso ku esaki no sosodé nos lo re-evalua nos patrosinio.” Mas aleu, otro patrosinadonan manera, Coca Cola, Adidas, McDonalds i Budweiser tambe a drenta den kontakto ku FIFA. Sin embargo, ainda niun no a bisa ku nan lo kita nan patrosinio.

ZURICH — E Ofisina Federal di Hustisia na Suisa a deklará ku seis ofisial di futbòl a keda arestá na Zurich ayera pendiente nan ekstradishon pa Merka. E detenshonnan a tuma lugá den e hotel di sinku strea Baur au Lac na Zurich. Outoridatnan Merikano ta sospecha ku e ofisialnan di korupshon sumando un total di miónes di dòler Merikano.

Segun e Ofisina di Fiskalia Federal na New York, nan ta investigando e individuonan riba sospecho di risibí sèn di forma ilegal kuminsando for di den añanan 1990 te ku presente. Segun Merka mas di 150 mion dòler a keda paga dor di representantenan di media deportivo i kompanianan di promoshon deportivo na funshonarionan di futbòl, entrenan delegadonan di FIFA i otro funshonarionan di sup-organisashonnan di FIFA.

Ta e sospecho ku a kambio, e kompanianan di media i promoshon deportivo a risibí derechinan di media, merkadeo i patrosinio den konekshon ku torneonan di futbòl den Amérika Latino. Segun Merka, e krimennan aki a keda prepará i akordá na Merka i pagonan a keda hasi via di bankonan Merikano.

E departamento di polis di Zurich lo interogá e sospechosonan awe na nòmber di Ofisina Federal di Hustisia Suiso. Segun e Ofisina Federal di Hustisia na Suisa nan lo aprobá i ehekutá e ekstradishon di e sospechosonan ku bai di akuerdo ku esaki mes ora. Sin embargo, si e sospechosonan nengá ekstradishon, Merka lo tin ku someté un solisitut di ekstradishon formal den e próksimo 40 dianan.

Segun e Departamento di Hustisia Merikano nuebe ofisial di FIFA i tambe sinku Ehekutivo ta keda akusá di ekstorshon i tambe korupshon.

E personannan ku ta keda akusá ta:

• Jeffrey Webb: presidente di CONCACAF

• Eduardo Li: miembro di komité ehekutivo di FIFA, miembro di komité ehekutivo di CONCACAF i presidente di Federashon di Futbòl di Costa Rica

• Julio Rocha: Ofisial di desaroyo di FIFA, presidente di Federashon di Futbòl Nikaraguense

• Costas Takkas: man drechi di presidente di CONCACAF

• Jack Warner: èks-presidente di FIFA

• Eugenio Figuerdo: vise-presidente di FIFA

• Rafael Esquivel: miembro di komishon ehekutivo di CONMEBOL i presidente di Federashon di Futbòl Venezolano

• Jose Maria Marin: miembro di komité organisatorio di FIFA

• Nicolas Leoz: èks-presidente di CONMEBOL

• Alejandro Burzaco: prinsipal di kompania di promoshon Torneos y Competencias Argentina

• Aaron Davidson: Presidente di Traffic Sports USA

• Hugo i Mariano Jinkis: prinsipalnan di kompania di promoshon Full Play Group Agrentina

Jeffrey Webb, Eduardo Li, Julio Rocha, Costas Takkas, Eugenio Figueredo, Rafael Esquivel i José Maria a keda detene na Suisa. Tambe e Departamento di Hustisia Merikano a duna di konose ku den oranan di mainta nan a tene un entrada hudisial na e sede di CONCACAF na Miami, Florida.

Den un kaso separa outoridatnan Suiso tambe, a kuminsa un investigashon riba FIFA pa otorgamentu di Mundial Rusia 2018 i Qatar 2022.