Category: Futbòl

MERKA — Den ultimo simannan mi a tuma nota kon ku gran emoshon i orguyo Federashon Futbòl Kòrsou a bin ta propagá e partidonan eliminatorio pa Mundial 2018 komo oportunidatnan pa krea un nashon. Mi no tin niun opheshon pa ku esaki i ta duna FFK rason di usa momentunan asina aki pa purba krea un nashon den union i ala bes alsa nos nivel di patriotismo. Pero ora bo tuma nota di sierto kosnan ku sierto miembronan di e Federashon aki ta hasi, bo ta puntra bo mes ku ta di bèrdat FFK ke purba krea un nashon of esaki ta simplemente un kapa pa haña akohida bou di suidadanonan.

Djabièrnè ultimo promé ku e partido di Kòrsou kontra Montserrat mi a subi internet pa mi por skucha e partido na un di e emisoranan lokal. Grandi tabata mi sorpresa ora ku mi a tende ku e emisora ku mi tabata sintonisando, kual ta Radio Hoyer lo no pasa e partido mas apesar di a propagá esaki durante dianan.

Aun mas asombrá mi a keda ora ku mi a risibí informashon riba e motibu dikon Radio Hoyer lo no transmití mas. Mi a komprendé ku Radio Hoyer no a transmití mas pa motibu ku na momentu ku nan a yega Stadion Ergilio Hato nan a haña un otro emisora den nan hòki di transmishon. Awor bo por bisa dikon Radio Hoyer no a bai den un otro hòki i transmití for di un otro hòki? Esei tabata sugerensia di FFK tambe, pero e problema tabata ku segun ma komprendé e kabel di antena di Radio Hoyer ta pasa solamente den e hòki spesífiko aki i esaki tin años ta pasa ei den i tabata imposibel pa den e ora nan promé ku e partido instalá den un otro hòki transmishon. Kòrda bon ku Radio Hoyer no ta e siman aki ni siman pasa nan a kuminsá transmití futbòl. E emisora aki tin historia amplio den transmishon di futbòl tantu lokal komo internashonal.

Ami personalmente komo miembro di e Asosiashon Internashonal di Prensa Deportivo (AIPS) ta haña e kos aki insolito i un falta di rèspèt pa prensa en general. Ta internashonalmente konosí ku den bòksnan di prensa di ekiponan deportivo tin sierto reglanan ku ta goberná e lugá di trabou. Un di esakinan ta ku tin sierto herarkia den e asignashon di asiento i hòkinan di transmishon pa prensa. Si FFK of su miembronan no konosé esaki mi ta invitanan pa kompañá mi den un evento deportivo internashonal di moda ku nan por mira kon ta trata ku prensa deportivo.

Si FFK lo kier a kambia e emisora di su hòki kustumbrá lo tabata bon i korekto pa notifiká esaki adelantá di moda ku e emisora por hasi e kambionan nesesario adelantá. Deporte Awe ta mustra su solidaridat na e koleganan di prensa deportivo di Radio Hoyer i ta rechasá kategorikamente e manera di opera i trata prensa ku FFK a tuma. Awe ta Radio Hoyer mañan nan ta hasi meskos ku Deporte Awe i/of otro media di komunikashon.

E siguiente partido grandi di e selekshon di Kòrsou lo ta yüni próksimo, pues FFK tin tempu sufisiente pa evaluá nan manera kon ta trata prensa en general. Kòrda ku e kreashon di un nashon ta kuminsá serka kada un di nos promé. Si nos mes sea konsiente of inkonsiente ta trese konflikto i divishon bou di nos mes, hamas i nunka nos lo no por ta un nashon uní.

MONTSERRAT — Korsou ta empata ku Montserrat den ultimo minutnan pa klasifika pa e sigiuente buelta di e eliminatorio pa Mundial 2018. Tabata Charlton Vicento di Willem II ku a drenta e partido na di 82 minut ku a trese e empate pa Korsou na di 87 minut.

Den e partido na Blakes Estate Stadium, Montserrat e selekshon ku ta bou di mando di Partick Kluivert i Etienne Siliee a bai ariba prome meskos ku djabierne ultimo. Tabata Darrel Lachman di FC Twente ku a manda e selekshon nashonal di Korsou ariba na di 41 minut.

Montserrat ta empata e partido na di 65 minut ku gol di Jamal Willer. Na di 81 minut Montserrat ta bai ariba 2-1 ku gol di Bradley Woods-Garness. Ku e resultado aki e partido lo tabata tin ku bai prolongashon. Pero tabata Charlton Vicento ku ta anota e gol di empate na di 87 minut. Apesar di e empate Korsou ta gana ku skor agregá di 4-3 i pasa pa e sigiuente buelta di e eliminatorio.

Partick Kluivert ta kontentu ku e selekshon a pasa pa e sigieunte buelta pero ta rekonose ku tin hopi trabou pa hasi ainda.

“Mi mester ta honesto, den seis dia mi a trese un sistema di wega nobo i e hungado nan e ehekute ta inkreibel. Awor nos tin e tempu pa evalua tur kos i wak kiko nos por hasi miho”, Kluivert a bisa despues di e partido.

Banda di esaki Kluivert a atmiti ku e no ta satisfecho ku e manera ku e selekshon a hunga kontra Montserrat pero ta bisa ku ta resultado ta konta.

Pa Korsou su sigiuente kompromiso ta den luna di yuni proksimo ora nan tin ku enfrenta Kuba den e di dos buelta di e eleminatorio pa Mundial Rusia 2018. E partidonan kontra Kuba lo keda hunga den mesun formato ku Montserrat, pues un wega na kas i otro for di kas. E partidonan aki lo mester tuma luga entre e fechanan di 8 di yuni pa 16 di yuni.

E selekshon di Korsou no tin masha konosomentu di Kuba ainda. Segun Kluivert, awor lo e bai studia e selekshon Kubano. Mientras ku kiper Zeus de la Paz a duna di konose ku e la hunga kontra di e Kubanonan dos aña pasa na Meksiko ku e selekshon U-20 i nan tabata un ekipo hopi fuerte. Pero di e selekshon mayo di Kuba e no tin niun idea.

MONTSERRAT — Despues di un viktoria di dos-pa-un djabièrnè ultimo na Stadion Ergilio Hato, e selekshon di Kòrsou ta hunga awe e partidó di buèlta kontra Montserrat. Djadumingu e selekshon nashonal a biaha pa e isla di Montserrat i ayera a praktika na Blakes Estate Stadium kaminda e partido ta tuma luga awe nochi 7’or.

Pa e selekshon ku ta bou di guiá di Patrick Kluivert i Etienne Siliee e tarea simpel, e ekipo tin 90 minüt pa saka sea un viktoria mas of un empate. Ku kualke un di e dos resultadonan aki e selekshon nashonal di Kòrsou lo enfrentá Kuba den e periodo di 9 pa 16 di yüni próksimo den e eliminatorio pa Mundial Rusia 2018.

E selekshon di Kòrsou por permití su mes un derota i ainda avansá pa e partido kontra Kuba, pero den e kaso aki e diferensia di gol ku e selekshon nashonal pèrdè kuné lo determiná su pase si of no.

WILLEMSTAD — Federashon di Futbòl Kòrsou (FFK) i nos selekshon nashonal di futbòl bou di guia di Patrick Kluivert ta yama danki na pueblo di Kòrsou i prinsipalmente gran kantidat di públiko ku a bai Stadion Ergilio Hato. Danki na e sosten aki i esfuerso di nos estreanan riba tereno, Kòrsou ta sali den un posishon bentahoso kontra di Montserrat den e partido di mañan na Montserrat. Kòrsou djabièrnè último sigur sigur a konosé un momentu di pais den konstrukshon ora ku nos tur tabata biba ku nos selekshon nashonal durante di e enkuentro. Ta apénas e promé enkuentro nos tin tras di lomba i e kaminda pa Rusia 2018 ta largu ainda. Pero ku fe, determinashon, sakrifisio i sosten di e 12 hungadó esta e pueblo, nos tin rason di kere den avanse pa dilanti den e magno esfuerso aki.

FFK a pone promé ku wega tres meta pa logra. E promé meta tabata pa yena stadion pa asina nos selekshon por konta ku un sosten di un bon públiko aki na nos mes kas. Pueblo a respondé engrande komo e number diesdos den Stadion Ergilio Hato. Esaki a kontribuí tambe pa logra e di dos meta, esta yuda pa kubri e gastunan haltu ku tin metí den un tipo di esfuerso grandi asin’aki. Esaki tambe a keda lográ danki na pueblo di Kòrsou su sosten aktivo di ta den stadion pa apoyá nos ekipo. E último meta pero sigur no esun ménos importante tabata pa logra krea un momentu di gloria kaminda un i tur den nos komunidat por a bib’é i sinti nan mes parti di un komunidat. Pueblo a komprondé e mensahe aki i a biba e momentunan eksitante djabièrnè último.

Entretantu nos selekshon nashonal, bou di guia di e tim tékniko enkabesá pa Patrick Kluivert a yega Montserrat pa e enkuentro kontra Montserrat djamars awor pa shet’or di anochi. Laga nos huntu atrobe ban uní i sostené nos selekshon den e importante kompromiso aki. Un biaha mas masha masha danki i nos ta sigui konta ku boso komo e number 12.

WILLEMSTAD — Dilanti di un públiko di mas di 5000 fanátiko e selekshon di Kòrsou a logra su promé viktoria den su kaminda pa Rusia 2018. For di trempan fanatikonan a kuminsá yena Stadion Ergilio Hato pa wak e debut di Patrick Kluivert huntu ku e selekshon di Kòrsou kontra Montserrat.

No a dura masha ku ya na di 8 minüt di e promé tempu, Vidarell ‘Papito’ Merencia ta manda e selekshon di kas ariba. Na di 24 minüt di e partido Montserrat ta logra igualá e partido riba un gol di Lyle Taylor. Den e mesun promé mitar di e partido Kòrsou ta bai bek ariba ku skor di 2-1 ora ku e selekshon di Kòrsou ta risibí un pinalti na su fabor ora ku e bala a mishi ku man di un hungadó di Montserrat den e area penal. E pinalti a keda kobra eksitosamente pa Felitciano Zschusschen.

Ku e skor di 2-1 na fabor di Kòrsou e promé mitar ta terminá. Den di dos mitar no ta bin kambio na e skor apesar di algun oportunidat ku ambos selekshon a risibí pa anotá. Di e manera aki Kòrsou ta kua su promé viktoria rumbo pa Mundial 2018. E siguiente partido pa Kòrsou ta dia di 31 di mart próksimo ora ku e selekshon di Kòrsou enfrentá Montserrat na Montserrat.

Pa pasa pa e siguiente buèlta ku siguransa, e selekshon di Kòrsou mester di mínimo un empate kontra Montserrat. E selekshon di Kòrsou por pèrdè i ainda avansá pa e partido kontra Kuba, pero den e kaso aki e diferensia di gol ku e selekshon nashonal pèrdè kuné lo determiná su pase si of no.

WILLEMSTAD — Awe ta e gran dia kaminda e selekshon nashonal di Kòrsou lo tin su promé kompromiso enfrentando e selekshon di Montserrat den e weganan eliminatorio bálido pa mundial Rusia 2018.

E selekshon di Kòrsou ta konta ku algun di e mihó yunan di tera ku ta hunga afó i na kas. Ekipá ku e mihónan riba tereno e úniko ku falta ta sosten masal di públiko pa apoyá nos selekshon i sigurá un triunfo riba Montserrat. Federashon Futbòl Kòrsou ta invitá henter pueblo pa ban yena Stadion Ergilio Hato i sostené e selekshon nashonal i biba momentunan emoshonante rumbo pa Rusia 2018.

Pa ambos selekshon esaki ta bira e promé biaha ku nan ta enfrentá otro. E ekipo di Montserrat nunka a gana un partido di eliminatorio pa Mundial i ta bai awe en búskeda di nan promé viktoria den eliminatorionan. Mas leu e ekipo di Montserrat tin solamente dos viktoria den su ultimo 19 partidonan bayendo bek ta na aña 2000. E dos viktorianan aki a bin den e tres ultimo partidonan di e selekshon. Den su ultimo partido Montserrat a empatá ku Boneiru na 0 gol den e Caribbean Cup aña pasa.

Pa loke ta trata Kòrsou, e selekshon ta bai en búskeda di su promé viktoria den su ultimo kuater partidonan. Den e eliminatorionan pa Mundial, Kòrsou a sera su partisipashon na aña 2011 ku dos viktoria konsekutivo despues di no a logra viktoria den e promé kuater partido nan di e eliminatorio pa Mundial 2014 na Brazil.

Pa e partido di awe karchinan lo ta optenibel solamente na SDK i na ofisina di FFK.

Lo kuminsá bende karchi na SDK for di 9or di mainta te ku ora di wega miéntras na FFK lo bende karchi durante ora di ofisina.

Tene na kuenta ku preisnan ta kambia:

* VIP ta kosta Nafl.250,- (konsumo inkluí)

* Bou di tribuna kubri ta Naf.55,-;

* Bou di tribuna kubri parti Festival Center ta Nafl.40,-

* Tribuna no kubri ta Nafl.30,-.

FFK ta hasi un yamada na hinter e pueblo di Kòrsou pa bin apoyá i sostené nos selekshon nashonal. Bin bisti na e kolonan di nos bandera, bin kubo bandera den bo man i animá nos selekshon nashonal komo e number 12.

WILLEMSTAD — Den oranan di ayera e hungadó di Centro Dominguito, Ashar Bernadus a risibí e yamada pa e forma parti di e selekshon di Kòrsou ku lo hunga djabièrnè awor kontra Montserrat den stadion Ergilio Hato. Ku esaki e ekipo di Centro Dominguito tin tres representante den e selekshon Nashonal. Banda di Bernardus tambe Dominguito tin e kiper Jarzinho Pieter i mediokampitsa Luidjino Hoyer.

Ayera ya práktikanan di e selekshon a tuma lugá na Stadion Ergilio Hato i lo kontinuá awe i mañan.

Pa e partido aki por kumpra karchi na FFK di 8’or di mainta pa 12’or di mèrdia i 2’or di atardi pa 5’or di atardi. Karchinan di VIP lo ta optenibel solamente na FFK. Tambe tin karchi disponibel na Beep Beep, Pòmp di gasolin Sta. Maria i Botika Mampuritu (Sta. Rosa).

WILLEMSTAD — Den kuadro di e partidonan eliminatorio pa Mundial Rusia 2018, Federashon Futbòl Kòrsou ta serabu konosí ku e hungadónan di e selekshon nashonal di Kòrsou. Den e promé parti FFK ta introdusí e kipernan i e defensornan di e selekshon di Kòrsou.

KIPERNAN

Nòmber: Zeus de la Paz
Fecha di nasementu: 11 mart 1995
Ekipo: Jong PSV
Posishon: Kiper

Zeus de la Paz ta un hungadó di PSV A1 i Jong PSV. De La Paz a hasi su debut den futbòl paga durante e partido kontra FC Volendam dia 21 mart 2014. E ta biba na Nijmegen i e tabata forma parti di e ekipo hubenil Quick 1888 promé ku ela pasa pa e ekipo di PSV na aña 2007.

Na 2012 i 2013 Zeus a partisipá na 8 partido pa e selekshon nashonal di Kòrsou U-20 i pa e weganan di kualifikashon pa mundial di U-20. I awor e ta bai hasi su debut den e selekshon nashonal senior.

Nòmber: Rowendy Sumter
Fecha di nasementu: 19 mart 1988
Ekipo: Jong Holland
Posishon: Kiper

Un tremendo portero ku ta militá den nos futbòl lokal. Rowendy Sumter ta e aktual portero di Jong Holland i den pasado ela militá den e ekipo di Victory Boys. Tambe ela forma parti di diferente selekshon nashonal, manera e weganan di e di tres buèlta di Caribbean Cup na Jamaica.

Nòmber: Jarzinho Pieter
Fecha di nasementu: 11 novèmber 1987
Ekipo: Centro Dominguito
Posishon: Kiper

Un di e mihó porteronan di aktualidat aki na Kòrsou ta Jarzinho Pieter kual tambe a kai diferente biaha den e selekshon nashonal di Korsou i a fungi komo kiper prinsipal den e weganan di Caribbean Cup resientemente. Hungadó di e ekipo di Centro Dominguito.

DEFENSORNAN

Nòmber: Rhu-endly ‘Cuco’ Martina
Fecha di nasementu: 25 sèptèmber 1989
Ekipo: FC Twente
Posishon: Defenes ala drechi

Ken no konosé e kapitan di e selekshon di Kòrsou den e Caribbean Cup 2014? Rhu-endly Martina mihó konosí komo Cuco a kuminsá ku su karera na 2008 den RBC Roosendaal den e liga Jupiler i despues ela debutá den e ekipo di promé divishon, RKC Waalwijk. Na 2013 ela kambia di ekipo bai FC Twente kaminda e ta un di e hungadónan estelar di e ekipo.

Na 2011 Cuco a wòrdu selekshoná pa e weganan di eliminatorio di mundial i na 2014 ela wòrdu selekshoná pa forma parti di e selekshon di Korsou den e weganan di Caribbean Cup ku a logra yega te den e di tres buèlta.

Nòmber: Jason Wall
Fecha di nasementu: 10 dezèmber 1991
Ekipo: RKTVV Tilburg
Posishon: Defensa ala robes

E defensa relativamente hóben Jason Wall a kuminsá su trayektoria futbolístiko den RKTVV Tilburg. Ela hunga un temporada pa Jong Willem II i despues ela regresá RKTVV. Ela debutá den e selekshon nashonal di Kòrsou durante e weganan di Caribbean Cup na 2014 den kual e tabata forma parti di e tim básiko ku a hunga e partidonan ei.

Nòmber: Shelton Martis
Fecha di nasementu: 29 novèmber 1982
Ekipo: Osotspa Sariburi FC
Posishon: Defensa

Shelton Martis a kuminsá su trayektoria futbolístiko na Hulanda den SBV Excelsior i FC Eindhoven. Despues ela hunga na Inglatera i Schotland. Na mart 2009 ela hasi su debut den promé divishon ku West Bromwich Albion. Kuminsamentu di 2010 ela firma kontrakt pa 3 aña i mei ku su èks klup Doncaster. Den febrüari 2013 a kibra e kontrakt i un aña despues ela firma na Thailand ku e ekipo Osotspa Saraburi FC pa e temporada di 2014.

Na aña 2008 Martis a partisipá den 3 wega internashonal pa e selekshon di Antia Hulandes. Entretantu Shelton ta un di nos hungadónan mas eksperensia.

Nòmber: Gillian Justiana
Fecha di nasementu: 5 mart 1991
Ekipo: Helmond Sport
Posishon: Defensa ala robes

Di 2009 pa 2011 Gillian Juliana a hunga pa PEC Zwolle komo defensa riba ala robes. Na 2011 ela pasa pa Helmond Sport den kual e ta militá ainda. Di 110 partido ela skor 5 gol pa Helmond Sport.

Na 2011 Gillian a wòrdu skohe pa partisipá den e selekshon di Kòrsou i na 2014 esei tambe tabata e kaso durante e Caribbean Cup.

Nòmber: Darryl Lachman
Fecha di nasementu: 11 novèmber 1989
Ekipo: FC Twente
Posishon: Defensa sentral

Lachman a hunga den e ekipo hubenil Hellas Sport i AFC Ajax i na aña 2008 ela bai FC Groningen. Na òktober 2009 ela wòrdu promové pa e selekshon di promé divishon i dia 13 di dezèmber ela hasi su debut den e partido kontra Sparta Rotterdam. Riba 21 di aprel 2011 ela firma kontrakt pa 2 temporada serka FC Zwolle. Riba 9 di dezèmber di e mesun aña su kontrakt a keda alargá ku 1 aña te ku ‘zomer’ 2014. Durante ‘winter’ di 2014 a bira konosí ku e ta tin un akuerdo ku FC Twente.

Tambe Lachman a wòrdu yamá pa partisipá na e pre-selekshon di Jong Oranje. Lachman a hunga na 2009 i 2010 den 2 wega ofisial di ‘Nederlands Beloftenvoetbalelftal’ kontra un kombinashon di e timnan Bayern München ku N.E.C. Tambe ela hunga 2 wega den e selekshon hulandes U-20.

Awor ta toka turno pa e hasi su debut den e selekshon nashonal di Kòrsou.

Nòmber: Dustley Mulder
Fecha di nasementu: 27 yanüari 1985
Ekipo: Apollon Limasso
Posishon: Defensa ala drechi

Mulder a wòrdu krea futbolistikamente na e akademia di futbòl; Feyenoord Jeugd Academy. Na 2004 ela hasi su debut den e tim di Feyenoord, SBV Excelsior. Durante 2 temporada ela hunga 46 partido i a anotá 4 gol. Na 2006 Mulder a kambia di ekipo bai RKC Waalwijk, kaminda e ta tin un lugá fiho durante 5 temporada. Na yüni 2010 ela bai Bulgaria den e ekipo Levski Sofia. Ela mira akshon 95 bia durante 4 temporada i ela anotá 2 gol. Na yüli 2014 Mulder a firma un kontrakt di 1+1 aña ku e ekipo Cypriotische Apollon Limassol. Ela hasi su debut dia 21 di ougùstùs 2014 komo suplente kontra Lokomotiv Moscow den un wega di UEFA Europa League.

E ta bai hasi su debut den e selekshon di Kòrsou.

Nòmber: Derwin Martina
Fecha di nasementu: 19 yüli 1994
Ekipo: RKC Waalwijk
Posishon: Defensa ala drechi

E defensa hóben Derwin Martina a kuminsá su trayektoria hubenil den AFC Ajax. E la kuminsá komo delantero pero pa fin di e kampionato 2011/2012 su entrenadó, Said Ouaali a dun’é e posishon di defensa riba e ala drechi i a kompar’é ku Michael Reiziger. Durante e kampionato 2011/2012 Martina tabata pertenesé den e selekshon di Jong Ajax ku tabata kai bou di e liga Jupiler. Riba 25 di yüni 2014 RKC Waalwijk a duna di konosé ku Martina a wòrdu atkerí sin transferensia for di Ajax. Martina a firma primeramente pa 2 aña pero ku opshon di por a keda un temporada mas. 8 ougùstùs 2014 Martina a debutá ofisialmente den RKC, kual tabata un partido di promé divishon kontra Roda JC ku a pèrdè 3-2.

Derwin Martina a hunga algun partido pa e selekshon hulandes U-16. Riba 20 di febrüari 2013 Martina a hasi su debut den selekshon nashonal di Kòrsou durante e partido di Kòrsou kontra Mexico U-20 kaminda nos a pèrdè ku e skor di 3-0. Tambe ela hunga den e partido kontra El Salvador riba 22 di febrüari 2013. Na òktober 2014 durante un buelo pa Kòrsou pa reforsá nos selekshon nashonal, Martina a sufri 1 leshon na su brasa. Danki Dios tur kos a kana bon kuné i djabièrnè aki e tambe lo hasi su debut den nos selekshon nashonal.

Nòmber: Soranley Tomsjansen
Fecha di nasementu: 21 mei 1984
Ekipo: Centro Barber
Posishon: Defensa ala robes

Tomsjansen ta otro di Kòrsou su tremendo defensanan ku ta militá den e ekipo di Centro Barber despues di a forma parti pa largu tempu di Hubentut Fortuna. E meskos ku mayoria di e hungadónan tambe a partisipá den diferente selekshon entre nan e selekshon ku a partisipá na Caribbean Cup aña pasa.