Category: Futbòl

WILLEMSTAD — FFK ta invitá hinter e pueblo di Kòrsou pa bin disfrutá i apoyá nos muchanan na e kontinuashon di e weganan di Kampionato Hubenil pa e aña aki. E weganan aki ta tuma lugá for di mainta te atardi riba djabièrnè i djasabra na diferente vèlt rònt Kòrsou. Bin ku hinter bo famia pa bin disfrutá di e tremendo partidonan aki i alabes bin apoyá nos futuro nan di mañan, tur wega ta grátis.

Resultadonan i skema di futbol Hubenil i di Dama.

Resultadonan u-11 te ku u-15

Kategoria u-17 & u-20

Kampionato timnan B

Kampionato Dama

Weganan pa wikènt binidero

Kategoria u-11 te ku u-15

Kategoria u-17 & u-20

Kampionato timnan B

WILLEMSTAD — Ku e dianan pa Kòrsou hunga su promé partido den e eliminatorionan pa Kopa Mundial Rusia 2018, Patrick Kluivert i e tim tékniko di Federashon di Futbòl Kòrsou ta konfirmando e hungadónan pa kompletá e selekshon. FFK ta sperando ku e hungadónan di afó ta yega Kòrsou kuminsá entrená 23 di mart próksimo. Esaki ta algu ménos di dos siman for di awe.

Segun un fuente basta yega na FFK tin 10 hungadó di afó ku ta kasi rònt ku Federashon Futbòl Kòrsou pa uni na e selekshon nashonal. E hungadónan ku e keda menshoná ta:

Cuco Martina – FC Twente
Leandro Bacuna – Aston Villa
Roly Bonevacia – Wellington Phoenix FC
Eloy Room – Vitesse Arnhem
Guyon Fernadez – NAC Breda
Liandro Martis – Willem II
Charlton Vicento – Willem II
Charlison Benschop – Fortuna Dusseldorf
Darryl Lachman – FC Twente

Tambe tin Vurnon Anita di Newcastle United FC ku segun e fuente a bisa si pa ku e selekshon di Kòrsou pero no a haña dispensashon di FIFA pa hunga den e partidonan kontra Montserrat. Aparentemente FFK ta den proseso di apelashon di e desishon aki.

Di e 10 hungadónan tin tres ku te ainda ta mas indesiso ku e sobranan. Roly Bonevacia ta unu ku te ku algun dia pasa no a tuma un desishon konkreto ainda. Pero tampoko Leandro Bacuna ni Eloy Room. Segun Bacuna, “for di aña pasa ma wordu aserka i a bisa ku e tin ku pensa riba dje i esaki no a kambia. Probablemente mas despues lo mi tuma un desishon.”

E kiper di Vitesse, Eloy Room tambe ta un tiki indesiso i ta kana ainda ku e speransa di por hunga un dia ku e selekshon di Hulanda.

Ta di nota ku Liandro Martis ku no tabata den 30 hungadónan di e selekshon tentativo su nòmber ta keda menshoná pa e selekshon definitivo. FFK tin te 24 ora promé ku e partido di 27 di mart pa entrega e selekshon definitivo na FIFA. Esaki ta enserá ku FFK por kita i añadí hungadó for di e 30 tentativo manera e haña ta bon.

WILLEMSTAD — Preparashonnan ta den full swing pa e kompromiso di Kòrsou kontra Monserat di djabièrnè 27 di mart próksimo. Miéntras ku Patrick Kluivert i e tim tékniko di Federashon di Futbòl Kòrsou ta konfirmando e hungadónan pa kompletá nos selekshon, karchinan pa e partido ta na benta pa asina pueblo por sostené nos ekipo nashonal di futbòl den nos promé kompromiso rumbo pa mundial na Rusia na 2018. Komo un pueblo, un ekipo nos mester bai pa un meta, esta un viktoria. Naturalmente e 11 hòmbernan riba tereno defendiendo nos kolonan nashonal lo no por hasi e trabou sin e sosten di e di 12 hungadó, kende ta e públiko. P’e motibu aki FFK ta invitá un i tur, fanátiko di futbòl, deportista i pueblo en general pa ban sostené nos selekshon nashonal dor di yena Stadion Ergilio Hato. P’asina huntu, nos vense Monserat.

E plantel nashonal na e momentu aki ta hañando forma i pronto lo por anunsiá e nòmber definitivo di esnan selektá pa hunga pa nos selekshon nashonal. Kòrsou manera tur otro pais lo hasi uso di e espasio den e kalènder di FIFA pa disponé di e hungadónan pa nan ta na Kòrsou pa prepará. Komo ku ta trata di hungadónan ku nivel altu di konosementu di e wega i téknika nan lo akoplá. E hungadónan di afó ta yega Kòrsou pa entrante 23 di mart i uni ku esnan di Kòrsou pa entrená desde 23 di Mart.

Segun presidente di FFK, Jean Francisca:

“Sosten di pueblo i asistensia masal di públiko ta hopi importante pa nos logra gana e partido aki. Kada un partido ta unu i nos mester gana pa sigui den e kontienda. Nos ta konvensí ku nos lo gana di Monserat pero sin e sosten en grande di nos públiko esaki no ta posibel. Laga nos komo un pueblo uní sostené nos ekipo di 11 hungadó riba tereno pa nos por logra viktoria. Un di e promé kos ku kada un di nos mester hasi ta kumpra bo karchi pa bo por tei komo e di 12 hungadó den tribuna pa animá nos muchanan”

Karchi pa tribuna bou di dak ta kosta Nafl. 50,-, karchi pa tribuna ku dak ku ta benta pa Festival Center ta kosta Nafl. 35,- i karchi pa tribuna no kubri ta kosta Nafl. 25,-. Karchinan pa sekshon VIP ta kosta Nafl. 250,-. Karchinan ta na benta na ofisina di FFK djis patras di Sentro Deportivo Kòrsou. Pronto lo anunsiá e otro puntonan di benta. Boso asistensia pa ta e di diesdos hungadó ta hopi esensial.

WILLEMSTAD — E selekshon nashonal di Kòrsou ta bai kuminsá riba 27 di mart próksimo ku nan weganan eliminatorio pa Kopa Mundial Rusia 2018. En konekshon ku esaki, Federashon Futbòl Kòrsou huntu ku Patrick Kluivert a manda yama 30 hungadó pa forma parti di e selekshon tentativo.

E promé wega kontra Montserrat ta tuma lugá djabièrnè 27 di mart den stadion Ergilio Hato pa 8’or di anochi. E di dos partido lo tuma lugá djamars 31 di mart na Montserrat.

E 30 hungadónan ku ta forma parti di e selekshon tentativo ta:

WILLEMSTAD — Awe Federashon Futbòl Kòrsou lo tin un rueda di prensa kaminda lo duna informashon riba e weganan eliminatorio mundial Rusia 2018. Segun FFK, durante e rueda di prensa aki Patrick Kluivert i e ‘branding partners’ di e federashon lo tei pa duna splikashon riba nan kontribushon pa ku weganan eliminatorio Rusia 2018.

Ya pa algun dia tin informashonnan ta sirkulá ku Partick Kluivert lo ta e direktor tékniko di e selekshon di Kòrsou. Sin embargo, FFK ni tampoko e èks-delantero di entre otro Ajax, AC Milan i FC Barcelona no a konfirmá esaki. Tin detayenan nobo ku ta bisa ku Kluivert lo no ta e direktor tékniko pa e selekshon di Kòrsou sino un supervisor pa e federashon di futbòl lokal. Awe tardi durante e rueda di prensa federashon lo tin ku duna mas informashon riba esaki i konfirmá kiko e ròl eksakto di Kluivert lo bai ta.

Adishonal tin informashonnan ta bisa ku Kluivert a tuma un kontrakt di algun luna ku e federashon lokal di futbòl. Den su ròl di supervisor lo keda na Kluivert si e ta sinta riba banki ku e selekshon durante di e partidonan eliminatorio.

E selekshon di Kòrsou lo hunga den promé buèlta kontra Montserrat. E promé wega kontra Montserrat ta tuma lugá djabièrnè 27 di mart den stadion Ergilio Hato pa 8’or di anochi. E di dos partido lo tuma lugá djamars 31 di mart na Montserrat. Ganando di Montserrat, Kòrsou tin di hunga kontra Cuba na luna di yüni próksimo.