LONDON – Miéntras ku Leroy Fer ta disfrutando su vakashon na Kòrsou, e ekipo di Queens Park Rangers na Inglatera ta mustrando hopi interes den atkisishon di e futbolista. Temporada pasa Fer a forma parti di Norwich City ku na final di temporada a degradá for di Premier League pa Championship League den di dos divishon.
Ku un pase pa Queens Park Rangers, Leroy lo keda den Premier League. Segun informashonnan e ekipo di Rangers ke paga un montante 6 mion Euro pa e mediokampista Hulandes.
RIO DE JANEIRO – Alemania ku un gol di Mario Gotze den di dos mitar di tempu èkstra ta derota Argentina. 113 minüt ta loke e Aleman nan tabata tin mester pa kue e bentaha den e partido. Un partido kaminda ambos ekipo tabata tin nan oportunidatnan pa hinka gol pero a keda sin hasi esaki. Argentina tabata tin sigur tres okashon den e partido ku nan por a kue e bentaha pero na niun di tres okashon no a logra esaki.
Lionel Messi ku a gana e bala di oro praktikamente no tabata presente den e partido. Di otro banda pa Alemania, Jerome Boateng tabata tin un tremendo partido defensivamente. Ku e derota Alemania ta gana nan di kuater Kampionato Mundial, empatando asina aki ku Italia na di dos lugá komo paisnan ku mas título Mundial di Futbòl.
Banda di Lionel Messi e otro premionan individual a bai pa, James Rodriguez di Colombia ku a gana e bota di oro komo top skorer di e kampionato. Komo e mihó kiper den e kampionato Manuel Neuer di Alemania a haña e wante di oro. E premio pa hungadó hóben a bai pa Paul Pogba di Fransia. Por ultimo, e premio di ‘Fair Play’ a bai pa e selekshon di Colombia.
SAO PAOLO – Durante e tiramentu di pinalti entre e selekshonnan di Hulanda i Argentina kiper Sergio Romero tabata tin loke ta parse un papel ku algu skirbi ariba. Riba grabashon hasi promé ku e tiramentu di pinalti bo por nota kon e kiper di Argentina ta wak algu den su man i despues e ta kue i hinke den su karson. Segun hopi ta trata di algun nota riba unda e hungadónan di Hulanda ta bai lokalisá nan pinalti.
Análisis riba tiramentu di pinalti no ta algu nobo i ta algu ku tei pa añanan kaba. Tantu selekshonnan nashonal komo klupnan profeshonal di futbòl ta tuma konseho di analistanan riba tiramentu di pinalti.
E selekshon di Argentina a eksperensia esaki den e Mundial di aña 2006 na Berlin, Alemania. Den e kuart-final entre Alemania i Argentina ku a terminá den tiramentu di pinalti, kiper Aleman Jens Lehmann tabata tin un papel similar ku esun di Sergio Romero hinka den su mea. Riba e papel aki Lehmann tabata tin skirbi unda shete di e hungadónan Argentino lo tira nan pinalti. Lehmann a tapa dos di e pinalti i Alemania a gana Argentina ku skor di 4-2.
No ta solamente kipernan ta risibí e tipo di notanan aki, e hungadónan tambe. Na 2008 den e final di Champions League entre Manchester United i Chelsea tabata Chelsea ku tabata tin un bon análisis riba kiper di Manchester United, Edwin van der Sar.
E notanan di Chelsea tabata bisa ku Van der Sar tin un tendensia di bula mas tantu na su man drechi ora un hungadó skòp ku su pia drechi i ora ta pia robes Van der Sar ta bula na su man robes.
Mas aleu e nota tabata bisa ku mayoria bala ku Van der Sar ta tapa ta balanan ku ta na altura di su sintura, pues tira pinalti sea altu of abou kontra Van der Sar. Kasi tur hungadó di Chelsea a siguí e konsehonan ku eksepshon di Ashley Cole. Ashley Cole tabata skòp ku su pia robes i e la tira na Van der Sar su man robes en bes di su man drechi. Van der Sar a hera di tapa e bala, Ashley Cole tabata tin suerte ku e la skòp abou manera e notanan tabata bisa.
Na di seis pinalti Van der Sar a ripara kiko tabata pasando i para den gol, e la mustra ku su dede unda Nicolas Anelka tabata bai skòp su pinalti. Esaki a hinka e hungadó den un dilema i a pone kambia di idea, ku e konsekuensia ku Van der Sar a tapa e pinalti i Manchester United a gana.
E mesun persona ku a traha e notanan pa Chelsea den Champions League di 2008 a hasi esaki pa e selekshon Hulandes den e Mundial anterior na Sur Afrika, promé ku nan a topa ku Spaña den e final. E partido aki a terminá den tempu èkstra i no a bai pinalti pues e selekshon Hulandes no por a hasi uso di su notanan.
E Hulandesnan semper tabata konosí pa nan análisis di tantu e tumadonan di pinalti i kipernan. For di añanan 1970 èks entrenadó Hulandes Jan Reker a kuminsá traha un base di dato riba hungadónan, esaki tabata konosí komo e ‘Boekje van Reker’. Reker tabata tin un bon relashon ku kiper di e selekshon Hulandes Hans van Breukelen. Esaki tabata e motibu dikon PSV a logra superá Benfica den pinalti den e Kopa di Europa di aña 1988. Un luna despues e mesun Van Breukelen aki riba konseho di Reker a logra tapa un pinalti kontra Union Sovietiko den e Kampionato Europeo di Futbòl.
BELO HORIZONTE – E selekshon Aleman a humiya Brazil den nan kas pa pasa pa e final di kopa Mundial 2014. Alemania a habri e markadó na di 11 minüt di e partido ku gol di Thomas Mueller. Despues di e promé gol, den un lapso di 18 minüt Alemania a anotá kuater gol mas. E fanatikada Brasilero tantu den stadion komo pafó no por a kere kiko tabata pasando. Poko poko pero sigur nan kuminsá realisá ku e soño di un di seis kampionato Mundial pa Brazil lo no sosodé mas den e aktual kampionato Mundial.
Den di dos mitar, Alemania a anotá dos gol mas promé ku Oscar di Brazil a hasi e partido 7-1 den di 90 minüt. E derota ku mesora a haña e nòmber di Mineirazo a bira e promé derota kompetitivo ku Brasil ta sufri na kas den 38 aña. E ultimo biaha ku esaki a sosodé tabata Peru ku tambe a derota Brasil den mesun siudat di Belo Horizonte. Pa hasi e kos pió, e ultimo biaha ku Brasil a pèrdè pa shete gol tabata den un partido amistoso kontra Yugoslavia na aña 1934.
Ku e viktoria Alemania ta yega su di ocho final di Mundial poniendo asina un rèkert nobo. E ultimo biaha ku Alemania tabata den final tabata na 2002 i nan lo purba na gana e trofeo ku na 1990 nan a hisa pa ultimo biaha.
SALVADOR – E selekshon Hulandes a logra pone nan mes den semifinal di e kampionato Mundial di futbòl despues di a gana Costa Rica ku skor di 4-3 den pinalti. E Hulandesnan a dominá mayoria di e partido pero simplemente no por a pone e bala den e net di Costa Rica.
Na multiple okashon Hulanda a dal e bala den e poste. Tambe tabata tin okashonnan kaminda simplemente e atakantenan Hulandes a faya e bala kompletamente den porta gol. Komo konsekuensia di esakinan e partido a terminá na sero gol despues di 120 minüt i mester a bai pinalti pa saka un ganadó.
Hulanda a anotá riba tur su pinaltinan, miéntras ku kiper Hulandes Tim Krul a salba dos pinalti pa duna Hulanda e viktoria. Krul e drenta e partido den e ultimo minüt di tempu èkstra. Pa e selekshon Hulandes e pinaltinan a keda anotá pa Robin van Persie, Arjen Robben, Wesley Snijder i Dirk Kuyt.
Ku e viktoria aki Hulanda lo bai buska su pase pa final djárason awor kontra e Argentinonan. Esaki lo bira e di nuebe okashon ku e dos ekiponan aki ta topa otro. Hulanda tin un rèkert di kuater viktoria, tres empate i un derota. Nada no ta pisa mas ku e un derota ku Hulanda a risibi kontra Argentina. E derota aki a bin den e final di e Kampionato Mundial di aña 1978 ora ku Hulanda ta pèrdè ku skor di 3-1 di e Argentinonan.
WILLEMSTAD – Futbòl Liga MCB a kontinuá ayera ku e partido entre UNDEBA i Sithoc na Stadion Ergilio Hato. Na di 37 minüt di e partido e kolegialnan di Sithoc a habri e markadó ku gol di Jonathan Getruida. Den e di dos mitar Norvianel Naar ta empatá e partido na un gol. Edgard Gassiani ta duna Undeba e bentaha na di 18 minüt den e di dos mitar. No a dura masha ku Oswin Luciano ta igualá e partido na dos gol. Faltando ocho minüt den e partido Norvianel Naar pa medio di un tremendo disparo ta manda Undeba un biaha mas ariba ku e skor di 3-2. Ku e resultado aki e ekipo di Undeba ta kue tres punto mas i ta move pa di dos lugá riba e tabla di posishon ku 29 punto.
FORTALEZA, BRAZIL – Ku dos gol den e ultimo minütnan di e partido, e selekshon Hulandes ta logra gana di Mehiko ku skor di 2-1 i pasa pa kuart final. E Mehikano a bai ariba for di den 48 minüt di e partido ku un gol di Giovani Dos Santos. Na diferente okashon por poko Hulanda ta empatá e partido pero un bon trabou di e kiper Mehikano Guillermo Ochoa ta prevení esaki.
Na di 88 minüt, Ochoa no por a hasi nada ku no ta para wak un misil di Wesley Sneijder drenta gol. E selekshon Hulandes a sigui pone preshon riba Mehiko i na di 94 minüt ta logra haña un pinalti ora ku Rafael Marquez a kometé un infrakshon den e area penal kontra di Arjen Robben. E pinalti a keda kobra ku éksito pa Klaas-Jan Huntelaar ku a hasi e skor 2-1.
Ku e resultado aki e selekshon Hulandes ta den kuart final i lo hunga kontra Costa Rica djasabra 5 di yüli próksimo. E dos ekiponan aki nunka no a topa ku otro den nan historia ainda. Pa Costa Rica ta promé biaha ku nan ta yega kuart final di Mundial, miéntras ku pa Hulanda esaki ta na di sinku okashon ku nan ta den kuart final. Ku eksepshon di Mundial 1994 semper e selekshon Hulandes a sali viktorioso den kuart final. Na 1974, 1978 i 2010 nan a sigui bai i logra bira sup-kampion, miéntras ku na 1998 e selekshon Hulandes a keda na di kuater lugá.
WILLEMSTAD – Futbòl Liga MCB a kontinuá den wikènt tras di lomba ku tres partido na Stadion Ergilio Hato. E promé partido tabata djasabra anochi ora ku e ekipo di Centro Dominguito a enfrentá e ekipo di Victory Boys. Ku golnan di Ashar Bernardus i Micro Colina JR. e ekipo di Dominguito a logra un viktoria di 2-0. Ku e resultado aki e ekipo di Centro Dominguito ta keda na kabes di e tabla di posishon ku 36 punto den 14 partido, miéntras ku Victory Boys ta na di seis lugá ku 15 punto.
Mas lat a sigui e partido di Jong Holland i Centro Barber. Akinan tabata e ekipo di Centro Barber ku a logra bai ku e viktoria, derotando Jong Holland ku skor di 1-0. E úniko gol pa Barber a keda anotá pa medio di un pinalti kobra pa Jurensley Martina. Ku e viktoria aki Centro Barber ta pasa pa di dos lugá riba e tabla di posishon ku 27 den 14 partido i mesora Barber ta manda Jong Holland na di kuater lugá ku 25 punto.
Djadumingu tabata tin un partidó so, ora ku Jong Colombia a enfrentá Hubentut Fortuna. Den e partido aki tabata Jong Colombia ku a logra bai ku e tres puntonan, ganando ku skor di 4-1. Ku e tres puntonan aki Jong Colombia ta subi bai na di shete lugá riba e tabla ku 12 punto den 14 partido, miéntras ku Hubentud Fortuna ta baha bai di ocho lugá riba e tabla ku 11 punto den 14 partido.
Futbòl Liga MCB ta kontinuá djamars promé di yüli ora ku pa 8:30 PM a ekipo di Sithoc enfrentá e ekipo di UNDEBA.
SAO PAOLO – Ku e viktoria di 2-0 kontra Chile, e selekshon Hulandes ta klasifiká na kabes di Grupo B pa oktavo di final. E selekshon Oraño no tabata tin mester di un viktoria kontra Chile, ya komo ku un empate tambe tabata sufisiente pa e selekshon klasifiká na kabes. Pero Leroy Fer i Memphis Depay tabata tin otro intenshon. Leroy a drenta e partido na di 75 minüt i apénas dos minüt despues a habri e markadó pa Hulanda. Una bes ku Fer a tuma e inisiativa, Memphis Depay no a keda atras i ta hasi e skor 2-0 den di 92 minüt di e partido.
Ku e liderato den Grupo B sigurá, e selekshon Hulandes mester a warda riba e resultadonan di Grupo A pa sa kontra ken nan lo hunga djadumingu 29 di yüni próksimo. Den Grupo A Brazil a derota Kamerun ku skor di 4-1 i Mexico a derota Kroasia ku skor di 3-1. Ku e resultado aki Brazil a klasifiká komo lider den Grupo A i lo hunga kontra Chile, i Mexico lo enfrentá Hulanda.
E selekshon Hulandes a topa ku Mexico na seis okashon den su historia. Na aña 1961 tabata e ultimo biaha ku Hulanda a pèrdè kontra Mexico. Despues di aña 1961 e Hulandesnan a gana na tres okashon i empatá na un okashon.
E partido di djadumingu ta bai bira un partido hopi interesante ora ku e selekshon ku mas gol na fabor te ainda den Mundial topa ku e selekshon ku ménos gol kontra despues di tres partido den Mundial. E mashin Oraño a produsí 10 gol den e mundial aki, miéntras ku e Mehikanonan ta den oktavo di final ku solamente un gol kontra.
WILLEMSTAD – Futbòl Liga MCB a kontinuá den wikènt tras di lomba ku kuater partido na Stadion Ergilio Hato. Riba djasabra, 7’or di anochi e ekipo di Hubentud Fortuna a enfrentá e ekipo di UNDEBA. Den e partido aki tabata UNDEBA ku a sali di e porta grandi, derotando Hubentud Fortuna ku skor di 3-1. Pa Undeba e golnan a keda anotá pa Edgard Gassiani, Notvianel Naar i Jimbertson Vapor. Miéntras ku Hubentud Fortuna a anotá nan úniko gol riba un pinalti kobra pa Mauricio Moreno.
Den e di dos partido di djasabra e ekipo di Victory Boys a enfrentá Vesta. Akinan tabata Victory Boys ku a duna kontenido na nan nòmber i bai ku e viktoria di 2-1 riba Vesta. Pa Victory Boys e golnan a keda anotá pa Vilyson Lake i e otro tabata un outo gol. E úniko gol di Vesta a keda anotá pa Ruchendro Kierindongo.
Meskos ku djasabra, djadumingu tambe tabata tin dos partido. Den e promé partido di djadumingu e ekipo di Jong Colombia a gana ku skor mínimo di Jong Holland. E úniko gol di Jong Colombia a keda anotá pa Everon Espacia.
Seguidamente e kampionato a sigui ku e partido di Centro Dominguito kontra Sithoc. Akinan tabata Centro Dominguito ku a derota Sithoc ku skor di 4-2. E golnan di Centro Dominguito a keda anotá na tres okashon pa Micro Colina JR i na un okashon pa Ashar Bernardus. E dosnan di Sithoc a keda anotá pa Jonathan Gertuide i Jursley Kroonstadt.