Category: Futbòl

PORTO ALEGRE – Ku un viktoria di 3-2 riba Australia, e selekshon Hulandes ta garantisá nan pase pa oktavo di final. Pa Hulanda e golnan a keda anotá pa Arjen Robben (20′), Robin van Persie (58′) i Memphis Depay (68′).

Ku e derota aki e selekshon di Australia matemátikamente a keda eliminá for di e kompetensia. Meskos ta konta pa e selekshon Spañó, ku a kai vensí kontra Chile ku skor di 2-0.

Awor e úniko interogatorio ku a keda, ta na ki posishon den Grupo B e selekshon Oraño ta klasifiká. E ultimo aki lo keda determiná den e siguiente partido ora ku e Hulandesnan enfrentá Chilenonan. Pa e ekipo Hulandes un empate kontra Chile ta sufisiente pa nan klasifiká na kabes di Grupo B.

Den e siguiente partido e selekshon Hulandes lo no por konta ku Robin van Persie. van Persie a bolbe risibí un karchi hel den e partido kontra Australia i konsekuentemente lo pèrdè e siguiente partido pa Hulanda.

E siguiente partido pa Hulanda lo ta djaluna 23 di yüni próksimo. E úniko biaha ku e selekshon Hulandes a topa ku Chile tabata 86 aña pasa ora ku nan dos a topa den un final amistoso den Olimpiada di 1928 na Hulanda. E partido aki a finalisá den un empate na dos gol pero Hulanda a keda deklará ganadó despues ku a rifa lot pa saka e ganadó

SAO PAULO – No a dura masha den e partido inougural entre Brazil i Kroasia ku tur e alegria, energia i emoshon di Mundial 2014 a bai pèrdí pa e fanatikonan di e selekshon Brazilero. Niun no a imaginá ku na di 11 minüt di e partido Kroasia lo tabata ariba 1-0. Pió ainda ku esaki a bai a kosto di e promé auto gol den historia di Brazil den Kopa Mundial. E Kroatanan a bai ariba riba un kruse abou di Ivica Olic ku Marcelo a hinka den su propio gol.

Na di 29 minüt di e partido Neymar ta tuma kontrol i empatá e partido ku un tiru lastra ku a dal den e poste i drenta gol. E gol aki a reanimá e fanatikada Brazilero.

E selekshon di Brazil tabata dominá e poseshon di e bala i tabata pone preshon konstante riba nan kontrinkante. Den di dos mitar e ekipo di kas a logra bai ariba riba un pinalti ku a keda otorgá. Akinan tabata Neymar ku a kobra e pinalti i manda e Brazileronan ariba 2-1.

Na di 91 minüt Oscar ta sigurá e viktoria di Brazil ku un tiru djis un tiki afó di e area penal.

Brazil ta logra  kue e tres puntonan pero no a konvensé hopi. E Kroatanan tabata kometé hopi eror. Konstantemente nan tabata pèrdè e bala tantu den mediokampo komo den defensa. Ekiponan superior mester probechá di e oportunidatnan aki i kastigá nan oponente. Si esaki no ta posibel kontra ekiponan di ménos superioridat lo bo tin problema pa kontinuá avansando den e torneo.

Nos ta den porta di otro Kampionato Mundial di Futbòl. Pa awor aki bo sa historia di mundial, tur e diferente selekshonnan ku ta partisipá, tambe ba tende diferente análisis di konosedonan di futbòl. Falta un kos mas, e pool ku bo tin ku yena sea na trabou of den bo amistatnan. Den kaso ku bo no sa ki direkshon bo kue den yenamentu di bo pool, nos ta bai yuda bu. Tene na kuenta ku nos no tin un bola di kristal, pues nos no por wak den futuro. Esaki ta simplemente un guia pa yuda den kompletashon di bo pool.

Siguentemente bo ta haña e dos ekiponan ku nos ta kere ta pasa pa oktavo final. Tene na kuenta ku den diferente di e gruponan aki tin diferente selekshon ku nos no a pone den oktavo di final pero ku nos ta kere ku tambe tin chèns di yega oktavo final.

Grupo A
1. Brazil
2. Kroasia

Grupo B
1. Spaña
2. Hulanda

Grupo C
1. Colombia
2. Kosta di Marfil

Grupo D
1. Uruguay
2. Inglatera

Grupo E
1. Fransia
2. Suiza

Grupo F
1. Argentina
2. Bosnia-Herzegovina

Grupo G
1. Alemania
2. Portugal

Grupo H
1. Bèlgika
2. Russia

Na momentu kubo ta partisipá den un pool no ta simplemente ken ta gana kada grupo bo tin ku bisa, pero chèns ta grandi kubo tin ku duna e resultado final di kada partido.

Ora bo ta duna un ekipo un wega gana tin básikamente kuater resultado kubo tin ku tene kuenta kuné. Nos a analisá tur resultado di tur partido di mundial te ku awe i mas of ménos 58% di bo partidonan ta bai finalisá den e sinku skornan aki: 1-0 (18,78%), 2-0(11,01%), 2-1(14,51%), 3-1(7,64%) i 3-0(5.70%).

1-0 ta e skor mas komun den promé buèlta di Mundial ku 18,21%, sigui pa 2-1(12,93%). Na di tres lugá bo tin 2-0(12,02%) i por ultimo 3-1(7,65%). 3-0 no ta keda muchu atras ku 6,19% di bo resultadonan den promé buèlta.

Den kaso di empate bo tin ku tene kuenta ku solamente tres resultado. 1-1 ta e empate mas komun den e promé buèlta ku 11,48% di biaha ku e resultado aki a parese den Mundial. 0-0 ta sigui’e ku 8,93% i por ultimo 2-2 ku 4,19%.

Ku e skornan ariba menshoná bo tin mas di 80% di bo resultadonan den e promé buèlta di Mundial. Pues den e promé buèlta di Mundial bo ta bai tin 48 partido. Mas of ménos nuebe partido den e promé buèlta ta bai finalisá na 1-0. Un otro 12 partido ta bai finalisá 2-1 i 2-0. Kuater partido ta finalisá 3-1 i tres partido 3-0. Seis partido ta finalisá empatá na un gol. Miéntras ku kuater partido di e promé buèlta ta kaba na 0-0 i solamente dos partido ta kaba na 2-2.

Den oktavo di final e kuater resultadonan mas komun ta; 1-0(25%), 2-1(21,43%), 2-0(12,50%) i 3-0(8,93%).

Den kuart final, 1-0(22,41%) ta keda e resultado mas komun, sigui pa 2-1(18,97%), 1-1(10,43%) i 3-2(8.62%).

Tin sinku resultado ku ta resaltá den semifinal i esakinan ta; 1-0(18,75%), 2-1(15,63%), 2-0 i 3-1 ambos 12,50%. Pa loke ta trata empate den semifinal ta 1-1(9,38%)

Den final e dos resultadonan mas komun ta 3-1 i 4-2 ambos ku 16,67%. Esaki ta keda sigui pa 1-0, 2-1 i 3-2 ku 11,11%. Empate den final ta sea 0-0 of 1-1 ku ambos 5,56%.

Kon ta yega na e kuater selekshonnan ku lo yega semifinal?

Den pasado tabata tin kuater mundial na un pais di Sur Amérika. Na tur kuater okashon un pais di Sur Amérika a gana. Na tres di e kuater okashonnan aki un pais Europeo a bira sub-kampion. E úniko biaha ku un pais Europeo no a bira sub-kampion tabata na 1950 ora ku Brazil a bira sub-kampion. Sin embargo na 1950 no tabata tin un partido final manera nos konosé awor aki. E ganadó i sub-kampion di e mundial ey a keda determiná a base di puntuashon.

Tene kuenta ku paisnan Europeo semper tin por lo mínimo dos selekshon den semifinal sin importá na unda e Kampionato Mundial keda tene. Paisnan Sur Amerikano semper tin por lo mínimo un selekshon den e top kuaternan, ku eksepshon di kuater okashon. Sin embargo na tur e kuater okashonnan aki e Mundial tabata na Europa. Na Sur Amérika semper tin dos selekshon Sur Amerikano den top 4, ku eksepshon di aña 1930 na Uruguay ku tabata solamente un pais Sur Amerikano den top 4. Selekshonan ku no ta di Europa of di Sur Amérika a yega den top 4 solamente na un okashon, esaki tabata na 1930 ora ku Estados Unidos tabata den top 4.

E kuater ekiponan ku nos ta kere ta yega semifinal ta:

• Brazil
• Alemania
• Spaña
• Argentina

Nos ta laga e ekiponan ku ta bai final i e ganadó di Mundial habri pa bo mes analisá I hasi bo eskoho. Na e etapa aki di e kompetensia no tin bon of mal eskoho. Gosa di Mundial i nos ta spera ku e análisis aki por tabata di yudansa.