Category: Futbòl

BAYAMON, PUERTO RICO – E ekipo di Centro Dominguito a empatá na sero gol ku e ekipo di Bayamon FC den e CFU Club Championship Cup. Ku e empate aki e ekipo di Domiguito ta disponé di dos punto den e kompetensia. Tantu Bayamon FC komo Unite Saint Rosienne tin 4 punto, miéntras ku Bodden Town FC no tin punto.

E ekipo di Centro Dominguito ta hunga mañan 25 di mart kontra Bodden Town FC. Den e partido aki e ekipo di Centro Dominguito mester gana ku mas tantu gol ku ta posibel i spera ku e ekiponan di Bayamon FC i  Unite Saint Rosienne ta empatá pa asina forsa un tripel empate.

E ganadó di e grupo lo pasa pa e buèlta final, ku lo tuma lugá entre 16 i 21 di aprel próksimo.

BAYAMON, PUERTO RICO – Awe e ekipo di Centro Domiguito ta hunga nan promé partido den e CFU Club Championship Cup. Den e partido aki ku ta kuminsá 5’or di atardi na Stadion Juan Ramon Loubriel, e ekipo di Centro Dominguito lo enfrentá Unite Saint Rosienne di Guadeloupe.

Den un deklarashon e ekipo a duna di konosé ku e delegashon a yega bon Puerto Rico. Esaki apesar di e kontratempunan ku a presentá na momento ku e ekipo tabata prepará pa bandoná Korsou. Banda di esaki e ekipo ta bisa ku nan ta sumamente positivo i tin ekspektativa grandi pa ku nan partisipashon den e kampionato.

Despues di e partido di awe e siguiente partido pa Centro Dominguito lo ta djadumingu 23 di mart, ora ku Dominguito enfrentá e ekipo di kas ku ta Bayamon FC mitar di shete di anochi. Por ultimo, Centro Dominguito ta hunga dia 25 di mart kontra Bodden Town FC di Cayman Island.

E ganadó nan di e grupo ta pasa pa e buèlta final, ku lo tuma lugá entre 16 i 21 di aprel próksimo.

WILLEMSTAD – Tres hungadó di e ekipo di Centro Dominguito a keda detené na aeropuerto Hato. Esaki na momento ku nan tabata bai aborda avion pa biaha ku e ekipo pa Puerto Rico. Centro Dominguito tin un kompromiso na Puerto Rico kaminda nan lo partisipá den e CFU Club Championship Cup ku ta kuminsá awe 19 di mart te ku 26 di mart próksimo.

Dos di e hungadó nan ku a keda detené ta en konekshon ku un kaso di tiroteo ku morto ku a tuma lugá na Saliña riba djárason 5 di Mart 2014. Kontinuando ku e investigashon den e kaso aki reshèrshi a detené dos hòmber sospechoso na Aeropuerto Hato na momento ku nan tabata prepará pa bai chèk in pa despues abòrda avion. E sospechosonan ta: D.C.N. nasé na Kòrsou, 34 aña di edat i L.H. nasé na Kòrsou, 26 aña di edat

E otro hungadó di e ekipo ku a keda detené ta e sospechoso S.F.B. nasé na Kòrsou, 33 aña di edat. E persona aki a keda detené pa malversashon relashoná ku trabou. E malversashon aki a tuma lugá den 2013 durante un periodo basta largu te ku òktober.

Tur tres e sospechosonan aki a keda presentá dilanti di un Fiskal ousiliar ku a ordená su enkarselamentu pa mas investigashon.

Biniendo bek riba e CFU Club Championship Cup, e ekipo di Centro Dominguito lo ta den Grupo 1 i lo hunga su partido nan na Bayamon, Puerto Rico. Segun informashonnan di Caribbean Football Union (CFU), Centro Dominguito ta hunga nan promé partido dia 21 di mart kontra Unite Saint Rosienne di Guadeloupe, 5’or di atardi. Riba 23 di mart, Dominguito lo enfrentá e ekipo di kas ku ta Bayamon FC, 6:30 di atardi. Por ultimo, Centro Dominguito ta hunga dia 25 di mart kontra Bodden Town FC, 5’or di atardi.

E ganadó nan di kada grupo ta pasa pa e buèlta final, ku lo tuma lugá entre 16 i 21 di april próksimo. E lokalidat pa e buèlta final no a keda anunsiá ainda.