Futbòl Archives | Page 50 of 62

December 20, 2013December 20, 2013

VIDEO: Jetro Willems den kushina huntu ku Georginio Wijnaldum

EINDHOVEN – E defensor di PSV Jetro Willems a partisipá ku su kolega di ekipo Georginio Wijnaldum den kompetensia di kushina “Scoren in de keuken”. Den e promé edishon di e programa Willems a kushina ‘boerenkool stamppot’, miéntras ku Wijnaldum a prepará roti. E plato nan a keda husga pa e kokí di e ekipo ku ala bes a determiná ken su plato tabata mihó. Den e video siguiente bo por wak henter e promé edishon di “Scoren in de keuken” i mesora haña sa ken e ganadó tabata.

December 12, 2013

Jetro Willems bek ku PSV

EINDHOVEN – Jetro Willems ta bek ku e ekipo di PSV despues di tabata ousente pa algun siman pa motibu di leshon. Willems a leshoná su rudia miéntras ku e tabata ku e selekshon Hulandes preparando pa e partido amistoso entre Hulanda i Colombia.

Siman pasa Jetro a kuminsá ku praktiká individual i djaluna ultimo e la keda manda pa hunga ku Jong PSV. Ta mustra ku tur kos ta bayendo bon ku Willems i Philip Cocu a añadí e hóben bek na e roster di e ekipo.

PSV ta hunga awe kontra FK Tsjornomorets Odesa den un partido bálido pa Europa League.

December 9, 2013

Jetro Willems pronto bek ku PSV

EINDHOVEN – Pronto Jetro Willems lo por ta bek ku PSV. Willems algun siman pasa a leshoná su rudia, poniendo ku te awe e no por a hunga. Siman pasa Jetro a kuminsá ku praktiká indivual i awe e lo ta bek ku Jong PSV promé ku e pasa bek pa PSV. Jong PSV ta hunga awe 8’or di anochi ora lokal di Hulanda kontra di Jong Ajax.

December 5, 2013December 6, 2013

“Brazuca” bala pa Kopa Mundial 2014

RIO de JANEIRO – FIFA a desvela na Rio de Janeiro, Brazil e bala ofisial pa e partido nan di Kopa Mundial Brazil 2014. E bala ofisial ku tin e nòmber di “Brazuca” ta keda produsí pa Adidas ku for di aña 1970 a keda enkargá ku e trabou aki.

Banda di wòrdu usa komo a bala ofisial di Kopa Mundial 2014 e bala aki ta bai den historia komo e bala di Adidas ku a pasa dor di mas tantu prueba. Durante un periodo di mas di dos aña i mei e bala aki a keda purba pa mas di 600 hungadó di futbòl profeshonal for di kua 30 ekipo di futbòl.

Dani Alves, defensor di FC Barcelona i tambe e selekshon di futbòl Brazilero ta un di e hungadó nan ku tabata tin e oportunidat pa eksperimentá ku a bala aki. “Importante ta ku e bala ta hunga bon, tantu riba tera komo den laria. Mi tin sigur ku e hungadó nan lo gust’e,” Alves a bisa.

December 4, 2013December 4, 2013

AKTUALISASHON: Leshon di Jetro Willems

EINDHOVEN – Jetro Willems a kuminsá preparashon nan pa bolbe ku su ekipo di PSV. Willems algun siman pasa a wòrdu diagnostiká ku hemoragia na su rudia.

Esaki a pone ku e defensor di PSV no por a forma parti di e wega di fogeo entre Hulanda i Colombia algun siman pasa. Tampoko e no a hunga ku PSV den e partido kontra Feyenoord djadumingu tras di lomba.

Ainda no ta konosí si Willems lo ta disponibel pa e wega di e siman aki kontra Vitesse. Pero miéntras tantu Jetro a kuminsá ku praktiká indivual i pronto lo kontinuá ku praktiká ku e ekipo.

November 22, 2013

AKTUALISASHON: Leshon di Jetro Willems i Jürgen Locadia

EINDHOVEN – E defensor di PSV Jetro Willems a wòrdu diagnostiká ku hemoragia na su rudia. Esaki tabata e konklushon despues di un eksámen di MRI hasi riba su rudia.

Dor di e leshon aki Willems no por a forma parti di e wega di fogeo entre Hulanda i Colombia na kuminsamentu di siman. Ainda no ta konosí si Jetro por hunga djasabra kontra SC Heerenveen. E direktor tékniko di PSV Philip Cocu tin su duda nan i no ta kere ku Willems lo ta kla pa hunga.

Di otro banda Jürgen Locadia ku tambe a leshoná siman pasa den e partido di Jong Oranje kontra Slovakia si ta kla pa mira akshon. Locadia a train e siman aki ku PSV i lo hunga kontra SC Heerenveen.

November 18, 2013

Jetro Willems tambe ta leshoná

EINDHOVEN – Ta manera un epidemia di leshon tin den PSV. Algun dia pasa Jürgen Locadia a leshoná den e partido di Jong Oranje kontra Slovakia. Awor e mala suerte ta toka Jetro Willems.

Segun informashon nan Willems tin problema ku su rudia. Jetro tabata huntu ku e selekshon Hulandes preparando pa e partido di fogeo entre Hulanda i Colombia. Ku e leshon e defensor di PSV a hañ’e ta bandoná kampamentu di entrenamentu na Noordwijk i lo no forma parti di e selekshon Hulandes djamars awor tampoko.

November 15, 2013

Kòrsou i Surnam ta pasa pa final Torneo ABCS

WILLEMSTAD – E promé partido nan di Torneo ABCS a tuma lugá den Stadion Ergilio Hato. Den e promé partido nan e selekshon di Boneiru a enfrentá e selekshon Surnameo. Aki nan Surnam a sa di sali di e porta grandi ganando ku skor di 2-0 di Boneiru.

Den e di dos partido di e anochi e selekshon di Kòrsou a enfrentá e selekshon di Aruba. E selekshon lokal a sa di bai ariba for di den e promé mitar ku dos gol di Stallone Isenia. Kòrsou a sa di mantené e bentaha aki i gana ku skor di 2-0 di Aruba.

Ku e resultado aki e selekshon di Kòrsou lo topa e selekshon di Surnam den e final riba djasabra 16 di novèmber pa 9’or di anochi na Stadion Ergilio Hato. Promé ku e partido aki, 7’or di anochi tin e partido pa determiná e di tres i kuater lugá entre Aruba i Boneiru.

November 15, 2013

Jürgen Locadia leshoná den partido kontra Slovakia

BRATISLAVA, Slovakia – E selekshon Hulandes U-21, mihó konosí komo “Jong Oranje” a subi kancha pa nan di kuater partido den e klasifikatorio pa e kampionato Europeo U-21. E selekshon Hulandes a gana tur tres di su promé partido nan.

Esaki a kambia ayera ora ku Jong Oranje a empatá na 2 gol kontra di Slovakia i mester a konformá nan mes ku un punto. Banda di e dos punto nan ku Jong Oranje a pèrdè nan a pèrdè e delantero Jürgen Locadia tambe.

Locadia a drenta e partido na di 70 minüt na lugá di Luc Castaignos i y na di 79 minüt mester a bandoná e partido. E delantero a keda leshoná riba un avanse den e zona penal di Slovakia. Aki nan Locadia a bai en búskeda di e bala i a bin den kontakto ku e kiper Slovako. Huntu ku e leshon Locadia a haña un karchi kòrá tambe.

No ta parse ku ta algu grave Locadia a bisa despues di e partido. “Ma grita di dolo i ketu bai e ta hincha. E dòkter a bisa ku nada no a kibra, parse ku ta e ligamento nan di mi ènkel a sufri leshon.”

Tantu Locadia komo PSV ta spera ku e pia di Locadia por rekuperá mas lihé ku ta posibel. Esaki debí ku aktualmente Locadia ta e úniko delantero di PSV. Tim Matavz ku at e otro delantero di PSV a opera rudia i lo no ta disponibel pa e próksimo luna nan.

November 14, 2013

Torneo di Futbòl ABCS

Willemstad – Awe 14 di novèmber ta ranka sali e Torneo di Futbòl ABCS 2013. Den e torneo aki ta partisipá e selekshon Nashonal nan di Aruba, Boneiru, Kòrsou i Sürnam. E selekshon ku titulá kampeon di e torneo aki lo risibí un premio di $6000.

Esaki no ta e promé biaha ku e torneo aki ta keda organisá na Kòrsou. Na 2010 tambe e torneo aki a keda organisá na Kòrsou, aki nan e selekshon di Sürnam a sa titulá kampeon. E siguiente aña na 2011 e torneo a tuma lugá na Sürnam i e tim Juventus di Boneiru a titulá kampeon. Na aña 2012, Aruba tabata e anfitrion di e torneo aki i Aruba tabata e pais kampeon.

E promé partido lo tuma lugá awe 14 di novèmber pa 7’or di anochi na Stadion Ergilio Hato i lo ta entre a selekshon nan di Boneiru i Surnam. Mas lat, pa 9’or di anochi lo tin e siguiente partido entre e selekshon di Kòrsou i esun di Aruba.

Djasabra 16 di Novèmber 7’or di anochi lo tin e wega entre e dos selekshon nan pèrdèdó di e promé 2 wega nan i 9’or lo tin e gran final pa disidí e Pais kampion di Torneo di Futbòl ABCS 2013.