Futbòl Archives | Page 51 of 62

September 18, 2013September 23, 2013

KNVB ta mustra interes pa Kopa Europeo 2020

ZEIST, Hulanda – E federashon di futbòl Hulandes mihó konosí komo KNVB a aserka UEFA i a mustra nan interes den un oferta pa Kopa Europeo 2020. Den e próksimo luna nan KNVB ta bai sinta huntu ku e siudat di Amsterdam i ku Amsterdam Arena pa wak si definitivamente ta posibel pa ofresé organisashon di algun di e partido nan.

Kopa Europeo 2020 lo tuma lugá den 13 diferente pais. E oferta definitivo di e pais nan ku ta interesá pa organisá e kampionato mester wòrdu entrega na UEFA pa mas tarda 25 di aprel 2014. Na aña 2000 Hulanda tabata sede di Kopa Europeo huntu ku Bèlgika. E tempu ei e partido nan a tuma lugá na Amsterdam, Eindhoven i Rotterdam.

Dor ku te ainda tur e rekisito nan pa partisipashon komo organisadó no ta konosí, KNVB, siudat Amsterdam i Amsterdam Arena a opta pa warda, promé ku entrega un oferta definitivo.

September 12, 2013September 23, 2013

Liga MCB su playoff Kaya 6 ta kontinuá wikènt aki

WILLEMSTAD – E playoff di futbòl promé divishon Liga MCB ta kontinuá e wikènt aki ku tres partido. Kuminsando djabièrnè te ku djadumingu tur dia tin un partido na Stadion Ergilio Hato.

Riba djabièrnè 13 di sèptèmber 8’or di anochi tin Jong Holland kontra Undeba. Djasabra 14 di sèptèmber tambe 8’or di anochi ta siguí ku e partido entre Centro Dominguito i Centro Barber. Por ultimo, djadumingu 15 di sèptèmber 6’or di atardi lo tin e partido entre Jong Colombia i Victory Boys.

August 7, 2013

Selekshon Kurasoleño di futbòl lo partisipá na kampionato inaugural di Concacaf U-15

WILLEMSTAD – Entre 13-25 di ougùstùs lo tuma lugá e kampionato inaugural di Concacaf U-15 na Cayman Islands ku lo konta ku partisipashon di 21 selekshon nashonal inkluyendo e selekshon di Kòrsou. Despues di entrená durante e periodo di vakashon e selekshon Kurasoleño ta sali otro siman pa Cayman Islands. E selekshon ta konta ku 9 hungadó di Curacao Soccer Academy i 9 hungadó di otro ekipo nan lokal. E selekshon di Kòrsou ta bou di guia di direktor tékniko Mau Maria i asistente Johnny Godfried. E promé partido di e selekshon Kurasoleño ta 14 di ougùstùs kontra di e selekshon di Guadeloupe.

July 29, 2013

Jürgen Locadia ta bira tata

EINDHOVEN, Hulanda – E atakante di PSV, Jürgen Locadia a bira tata, asina e la anunsiá riba su kuenta di Twitter. E promé tweet di Locadia tabata bisa: “Raya haar vliezen zijn eindelijk gebroken. We zijn toe aan de laatste stap tot de baby!” Despues di algun Locadia a publiká e siguiente mensahe: “Yaricio Sean Locadia geboren op 18:11.” Locadia a hunga 15 partido temporada pasa pa PSV i a anotá 6 gol.

June 20, 2013

Resultado nan futbòl Liga MCB

WILLEMSTAD – Futbòl promé divishon Liga MCB a kontinuá e siman aki. No tabata manera kustumber ku tur partido ta keda hunga den wikènt. Tabata tin diferente partido ku a wòrdu di skùif i a wòrdu hunga durante di siman. E resultado nan di e partido nan di e siman tras di lomba ta lo siguiente:

Fecha	Ekipo	Skor	Ekipo
15-06-2013	Jong Colombia	1-2	Jong Holland
15-06-2013	Sithoc	1-0	SUBT
17-06-2013	UNDEBA	2-0	Hubentud Fortuna
18-06-2013	Centro Barber	2-1	Centro Dominguito
19-06-2013	VESTA	0-0	Victory Boys

Futbòl ta plania pa siguí wikènt aki, kuminsando djabièrnè ku e partido entre Centro Dominguito i SUBT. Djasabra lo siguí ku dos partido e promé ta Sithoc kontra Centro Barber i despues Jong Colombia kontra Undeba. Riba Djadumingu tambe tin dos partido, e promé ta Jong Holland kontra Victory Boys i despues Hubentud Fortuna kontra Vesta. Tur partido ta tuma lugá na Stadion Ergilio Hato.

June 13, 2013

Leandro Bacuna a firma ku Aston Villa

WEST MIDLANDS, Inglatera – E ekipo di futbòl ingles Aston Villa a anunsiá ku nan a yega na un akuerdo ku FC Groningen pa e traspaso di Leandro Bacuna pa Aston Villa. Bacuna a firma un kontrakt di tres aña ku Aston Villa. E medio kampo tabata tin un kontrakt te ku medio 2015 ku FC Groningen, pero ambos ekipo a haña otro na mesa pa asina hasi e traspaso.

“E ta sinti bon. E ta un komienso nobo pa mi, un paso nobo i mi ta aspirá pa ta parti di e ekipo hóben ku tin na Villa.” Bacuna a bisa. “E ta un soño ku a bira realidat pa mi i mi mayor nan ku ta kontentu pa mi. Ta un tremendo liga pa forma parti di dje, Premier League ta, i nos ke mustra ku Aston Villa por ta den e mihó nan.”

June 11, 2013

Resultado nan Liga MCB

WILLEMSTAD – Despues di algun siman sin futbòl promé divishon Liga MCB, tur kos a kontinuá wikènt tras di lomba. Aki nan tabata tin e komienso di e di dos buèlta di futbòl promé divishon Liga MCB.

E promé wega tabata djabièrnè ocho’r di anochi entre Jong Colombia i Centro Dominguito. Den e partido aki Jong Colombia ta pèrdè nan di sinku lugá riba tabla di posishon despues di kai vensí ku skor di 4-3 na man di Centro Dominguito. Ku e viktoria aki Dominguito ta mantené su mes na kabes di e tabla di posishon.

Djasabra tabata tin dos partido. Kuminsando shet’or di anochi e ekipo di Victory Boys a topa ku Sithoc. Den e partido aki Victory Boys ta sali di e porta grandi ganando di Sithoc ku skor di 2-0. Ku e derota aki Sithoc ta kai nan di nuebe luga riba e tabla di posishon, miéntras ku Victory Boys ta bai na di ocho lugá.

Den e di dos partido di djasabra a hunga SUBT kontra Undeba, e partido aki a tuma lugá nueb’or di anochi. Undeba a kuminsá e di dos buèlta riba bon pia, ganando ku skor di 2-1 di SUBT. Ku esaki Undeba ta subi bai na di sinku lugá riba tabla di posishon.

Djadumingu tabata tin e ultimo partido di wikènt na momentu ku sink’or di atardi e ekipo di Jong Holland a enfrentá Hubentud Fortuna. Ku un viktoria di 2-0 Jong Holland ta logra mantené su posishon na di dos lugá riba e tabla di posishon. Miéntras ku Hubentud Fortuna ta kai na di shete lugá riba e tabla.

Mañan djárason tin un partido, na momentu ku Centro Barber topa ku e ekipo di Vesta. E promé buèlta no a bai muchu bon pa Vesta i nan a keda na ultimo lugá riba e tabla di posishon. Vesta ta bin pa kambia direkshon di kos den e di dos buèlta. Centro Barber di otro banda ta na di kuater lugá riba e tabla. Nan ta bin purba mehorá nan posishon den e di dos buèlta aki.

June 10, 2013

Rigino Cicilia ta firma ku Roda JC Kerkade

KERKADE, Hulanda – E ekipo di futbòl Hulandes Roda JC Kerkade a anunsiá ku nan a firma kontrakt ku ocho hungadó di nan ekipo hubenil. Entre e ocho hungadó nan aki, Rigino Cicilia tambe a firma un kontrakt. Te ku ultimo temporada Cicilia tabata un atakante pa e ekipo di Roda JC A-Junioren. Tambe Cicilia a forma parti algu luna pasa di e selekshon Kurasoleño ku a partisipá na e klasifikatorio pa Mundial U-20 na Puebla, Mexico.

E direktor di Roda JC, Marcel van den Bunder a enfatisá ku esaki ta un paso grandi den direkshon di desaroyo di e hóben nan, pero ainda tin hopi trabou pa hasi. “Siguí traha duru i tuma e kontrakt aki komo motivashon. Solamente asina lo bo logra den futbòl paga,” van den Bunder a bisa.

June 6, 2013

Futbòl Liga MCB ta kontinuá wikènt aki

WILLEMSTAD – Despues di algun siman sin futbòl promé divishon Liga MCB, tur kos ta kontinuá wikènt aki. Wikènt aki tin komienso di e di dos buèlta di futbòl promé divishon. Meskos ku den e promé buèlta e partido nan ta wòrdu hunga riba tur tres dia di wikènt na Stadion Ergilio Hato.

E promé wega lo ta djabièrnè ocho’r di anochi entre Jong Colombia i Centro Dominguito. Jong Colombia ta na di sinku lugá riba e tabla di posishon i lo por drecha nan posishon konsiderabel ku un viktoria. Di otro banda Centro Dominguito ta na kabes di e tabla i lo mantené esaki ku un viktoria.

Djasabra tin dos partido manera kustumber. Kuminsando shet’or di anochi ku e partido entre Victory Boys i Sithoc. Ambos ekipo ta den e parti abou di e tabla di posishon i ta bin purba na kuminsá e di dos buèlta riba un bon pia pa asina subi riba e tabla di posishon.

Den e di dos partido djasabra ta hunga SUBT konta Undeba, e partido aki ta programa pa kuminsá nueb’or di anochi. Undeba ta na si shete puesto riba e tabla i ta bai purba na kuminsá nan subida den puesto den e di dos buèlta di kampionato. SUBT ta den e top tres despues di e promé buèlta i ta buska pa mantené esaki.

Djadumingu tin e ultimo dos partido nan di wikènt kuminsando sink’or di atardi ku e partido entre Jong Holland i Hubentud Fortuna. Hubentud Fortuna ku ta na di seis lugá riba e tabla, ta bin buska pa drenta den e promé sinku nan den e di dos buèlta. Jong Holland ke mantené su posishon na di dos lugá i te asta mehorá esaki, tratando na kue e promé puesto ku un viktoria.

E ultimo partido di e wikènt lo ta djadumingu och’or. Aki nan Centro Barber lo topa ku e ekipo di Vesta. E promé buèlta no a bai muchu bon pa Vesta i nan a keda na ultimo lugá riba e tabla di posishon. Vesta ta bin pa kambia direkshon di kos den e di dos buèlta. Centro Barber di otro banda ta na di kuater lugá riba e tabla. Nan ta bin purba mehorá nan posishon den e di dos buèlta aki.

May 28, 2013

Jürgen Locadia lo no partisipá mas na Kopa Europeo U-21

ZEIST, Hulanda – E asosiashon di futbòl Hulandes mihó konosí komo KNVB a anunsiá ku Jürgen Locadia mester a bandoná e selekshon U-21 pa motibu di leshon. E hungadó di PSV a sinti problema nan na su lies den un partido di fogeo kontra Oustralia djabièrnè ultimo. Aki nan Locadia a ripara ku e no por duna 100 porshento riba tereno ku e problema aki. E coach di Jong Oranje, Cor Pot no kier a riska i a saka Locadia for di e selekshon. Komo remplaso a bin e hungadó di Ajax, Danny Hoesen.

E selekshon Jong Oranje a kuminsá preparashon pa e kampionato riba 20 di mei i a hunga un partido di fogeo di 24 di mei kontra Oustralia. Dia 28 di mei e selekshon ta biaha pa Israel kaminda nan lo entrená algu mas promé ku kuminsá e kampionato riba 6 di yüni.