Category: Futbòl

WILLEMSTAD – E promé buèlta di futbòl promé divishon Liga MCB a finalisá ayera ku un partido. Den e partido aki e ekipo di Hubentud Fortuna a enfrentá e ekipo di Victory Boys na Stadion Ergilio Hato. Hubentud Fortuna a logra sali for di e porta grandi ganando ku un skor di 2-1 for di Victory Boys. Pa Hubentud Fortuna e gol nan a keda anotá pa Lisandro Trenidad i Moreno Juan Diego. E úniko gol di Victory Boys a keda anotá pa Vilyson Lake na di 66 minüt.

Tabla di posishon despues di promé buèlta.

 

Ekipo	WH	G	E	P	GF	GK	GD	Pnt
Centro Dominguito	9	6	3	0	24	5	19	21
Jong Holland	9	5	4	0	13	3	10	19
SUBT	9	3	5	1	9	5	4	14
Centro Barber	9	3	4	2	13	12	1	13
Hubentud Fortuna	9	3	3	3	8	14	-6	12
Jong Colombia	9	1	7	1	9	11	-2	10
UNDEBA	9	2	3	4	12	14	-2	9
Sithoc	9	2	2	5	6	11	-5	8
Victory Boys	9	2	1	6	5	16	-11	7
VESTA	9	2	0	7	11	19	-8	6

 

WILLEMSTAD – Futbòl Liga MCB a sigui e wikènt aki, ku su sinku partido nan kustumbrá. E promé partido tabata djabièrnè anochi ora ku UNDEBA a enfrentá e ekipo di Centro Dominguito. Den e partido aki Dominguito ta logra blankeá UNDEBA i sali viktorioso ku un skor di 2-0. Pa Dominguito tur dos gol a keda anotá pa Mirco Colina Jr.

Djasabra tabata tin dos partido, kuminsando ku Hubentud Fortuna kontra Centro Barber. Centro Barber ta logra sali di e porta grandi ku un skor di 2-1. Pa Barber e gol nan a keda anotá pa Ruensley Leuteria i Randall Labordus. Oscar Palomina ta anotá e úniko gol di Hubentud Fortuna riba un pinalti na di 67 minüt.

E di dos partido di djasabra a bai entre Jong Colombia i Vesta. Esaki tabata un partido ku hopi ofensiva i e dos ekipo nan a kombiná pa hinka no ménos ku 5 gol. Jong Colombia ta e ekipo ku ta sali di e porta grandi derotando Vesta ku skor di 3-2. E gol nan di Jong Colombia a wòrdu anotá pa Norvianel Naar, Frenly Servania i Kendrith Poulino. Pa Vesta, Kenley Winterdal i Ruchendro Kierindongo a haña e net.

Djadumingu tambe tabata tin dos partido, e promé partido tabata entre Sithoc i Jong Holland. Den e partido aki Jerome Jemeison i Shuremy Felomina ta anota pa Jong Holland bai ku e viktoria di 2-0 riba Sithoc.

E ultimo partido di wikènt tabata entre SUBT i Victory Boys. Aki nan Victory Boys a logra sali viktorioso ku un skor di 2-1. Pa Victory Boys tabata Orville Barnette i Raylison Lindo ku a anotá. Miéntras ku pa SUBT, Stallone Isenia tabata e hungadó ku a haña e net.

WILLEMSTAD – E siman aki futbòl promé divishon Liga MCB a siguí pero e skedjel no tabata manera kustumber. Fuera di kustumber tabata tin partido riba djárason, den e partido aki Centro Barber a hunga kontra di Jong Holland. Jong Holland ta logra keda invikto ku un viktoria di 2-0 riba Centro Barber. E promé gol di Jong Holland a bin na final di e promé mitar, miéntras ku e di dos a bin mesora na inisio di e di dos mitar.

Wikènt aki futbòl ta siguí ku un skedjel normal. Kuminsando djabièrnè ku un partido manera kustumber. Mitar di nuebe di anochi UNDEBA ta enfrentá Centro Dominguito. Djasabra tin dos partido. E promé lo ta shet’or di anochi entre Sithoc i Hubentud Fortuna. Despues nueb’or di anochi tin Vesta kontra Jong Colombia. Djadumingu tin e ultimo dos partido nan di e wikènt, na momnetu ku Sithoc hunga kontra Jong Holland. Despues shet’or lo tin Centro Barber kontra Victory Boys.

WILLEMSTAD – Manera ta konosí e wikènt tras di lomba futbòl promé divishon a siguí pero tabata tin un skedjel modifiká. Esaki a pone ku otro for di kustumber tabata tin wega futbòl riba djaluna. Akí nan tabata tin e enkuentro entre Jong Colombia i SUBT. E partido aki a bai 90 minüt sin produsí gol i a kaba na un empatá na sero gol.

Djamars futbòl mester a siguí ku e partido entre Hubentud Fortuna i Victory Boys pero esaki a keda posponé. Esaki en konekshon ku di seremonia di despedida di Sr. Helmin Wiels. Direktiva di Sentro Deportivo Kòrsou a kanselá tur aktividat riba djamars.

WILLEMSTAD – E wikènt aki futbòl promé divishon Liga MCB a kontinuá pero ku un skedjel un tiki diferente di e otro wikènt nan. Djasabra tabata tin e promé partido nan riba programa i manera ta kustumber  tabata tin dos partido. E promé partido ta 19:00’or di anochi ora ku Centro Dominguito topa ku Sithoc. Despues 21:00’or di anochi Undeba ta hunga kontra Vesta. Den e promé partido Centro Dominguito a gana di Sithoc ku skor di 2-0. Despues den e di dos partido Vesta a logra nan promé viktoria di temporada ganando ku skor di 3-2 di Undeba. Djadumingu no tabata tin wega manera sa ta kustumber.

Djaluna 20:00’or tin e siguiente partido, aki nan Jong Colombia ta hunga kontra SUBT. Miéntras ku e partido di djamars 20:00’or entre Hubentud Fortuna i Victory Boys a keda kanselá. Esaki en konekshon ku di seremonia di despedida di Sr. Helmin Wiels. Direktiva di Sentro Deportivo Kòrsou a kanselá tur aktividat riba djamars.

WILLEMSTAD – Federashon Futbòl Kòrsou a anunsiá ku temporalmente nan ta suspendé un kantidat di hungadó di Jong Holland i Centro Dominguito. Esaki en konekshon ku un pelea kampal ku a kuminsá den e partido di 3 mei entre e dos ekipo nan aki. E partido a keda suspendé na di 60 minüt ku e skor empatá na un gol.

Despues di un investigashon FFK a suspendé e siguiente hungadó nan. Di Jong Holland tres hungadó a keda suspendé: Jeremiah Wansing, Ruthviensley Windster i Charles Martina. Di Centro Dominguito 12 hungado a risibi suspenshon. E hungadó nan ta: Ivanny Calvenhoven, Jean Pauletta, Dhenico Pauletta, Ashar Bernardus, Shaquelle Clements, Shayron Bernardus, Dennis Niles, Kenneth Kunst, Sairon Martina, Rolando Martina, Joshua Lourens i Rudy Isidora.

WILLEMSTAD – E wikènt aki futbòl promé divishon Liga MCB ta kontinuá pero ku un skedjel un tiki diferente di e otro wikènt nan. Djabièrnè anochi tur kos ta siguí normal ku e partido di Centro Barber kontra Jong Holland, 20:30’or na Stadion Ergilio Hato.

Djasabra tambe no tin kambio den e skedjel i manera ta kustumber tin dos partido. E promé partido ta 19:00’or di anochi ora ku Centro Dominguito topa ku Sithoc. Despues 21:00’or di anochi Undeba ta hunga kontra Vesta.

Djadumingu no tin wega manera ta kustumber. Djaluna 20:00’or tin e siguiente partido, aki nan Jong Colombia ta hunga kontra SUBT. Esaki lo ta e úniko partido pa djaluna i djamars tin e siguiente partido. E partido aki ta kuminsá meskos ku djaluna 20:00’or i lo ta entre Hubentud Fortuna i Victory Boys.

WILLEMSTAD – Despues ku siman pasa tabata tin un skedjel modifiká den futbòl Liga MCB, e wikènt aki tur kos ta kontinuá manera ta kustumber. Un biaha mas tabata tin wega di futbòl riba tur tres dia di wikènt, esta djabièrnè, djasabra i djadumingu. Tur partido a tuma lugá na Stadion Ergilio Hato.

Djabièrnè anochi mitar di nuebe tabata tin e promé partido, na momentu ku Jong Holland a topa ku Centro Dominguito. E partido aki a kaba na un empate na un gol, despues ku un pelea kampal a kuminsá den e partido aki. Despues di un reunion Federashon Futbòl Kòrsou a disidí ku e skor 1-1 lo keda e resultado final. Tambe tur esun nan ku a partisipá den e akto nan bonchornoso aki ta ser di skors temporalmente, pendiente di investigashon nan mas profundo riba e suseso.

Djasabra tabata tin e di dos partido entre Vesta i Subt. E ekipo di Vesta a bin buska nan promé viktoria di temporada. E ultimo aki no a logra ya komo ku e ekipo di Vesta a kai derota ku skor di 3-0. Ku e viktoria aki SUBT ta subi i yega na di tres lugá riba e tabla di posishon

Den e di dos partido 9’or di anochi, Centro Barber a hunga kontra Victory Boys. Ambos ekipo a drenta e enkuentro ku solamente un partido gana e temporada aki. E ekipo di Barber a logra surpasá nan úniko viktoria ganando ku skor di 3-0 di Victory Boys. Ku e viktoria aki Centro Barber ta bai na di sinku posishon riba e tabla di posishon.

Djadumingu e promé partido tabata 5’or di atardi entre Undeba i Sithoc. Undeba a bin buska su di dos viktoria di temporada i a logra esaki despues di sali di e porta grandi ku skor di 2-1. E viktoria aki ta laga Undeba subi riba Sithoc riba e tabla di posishon.

Den e di dos partido di djadumingu ku a kuminsá 7’or di anochi, Hubentud Fortuna a hunga kontra Jong Colombia. Jong Colombia a bai en búskeda di nan promé viktoria di temporada. E ekipo di Jong Colombia no a logra esaki despues ku nan a hasi bon ku Hubetud Fortuna i empatá na 0 gol. Jong Colombia i Vesta ta e úniko dos ekipo nan ku no tin un viktoria ainda e temporada aki.