Futbòl Archives | Page 53 of 62

May 5, 2013May 6, 2013

Jürgen Locadia ku gol pa PSV

EINDHOVEN, Hulanda – Ku un viktoria di 4-2 riba NEC, PSV ta sigurá nan posishon den Liga di Kampion nan. Jürgen Locadia a hinka e di kuater gol pa PSV den di 90 minüt di e partido. Kolega di ekipo di Locadia, Jetro Willems tabata klave den tres di e gol nan di PSV. Den di 9 minüt di partido Willems ta kobra un sake di man largu ku e hungadó Daan Bovenberg di NEC no ta kontrolá i kabese den propio gol. Un par di minüt promé ku tempu di sosiegu Willems ta bolbe kobra un sake di man largu ku Ola Toivonen di PSV ta hinka den net. Na di 78 minüt Willems ta tuma un tiru duru riba gol di NEC ku kiper Gábor Babos no por a wanta i ku Jeremain Lens ta hinka den gol.

May 5, 2013May 6, 2013

Elson Hooi ku gol pa NAC Breda

BREDA, Hulanda – Elson Hooi ta hinka gol i yuda NAC Breda keda den Eredivisie. NAC Breda a hunga kontra Roda JC ku tambe tabata buska pa keda den Eredivisie. NAC a gana ku skor di 5-3 kontra Roda JC. Na di 13 minüt di e partido ya NAC a kuminsá nan goleada ku gol di Frank Demouge. No muchu despues NAC a pèrdè nan bentaha di 1-0 i a kai den desbentaha ku skor di 1-3. E ekipo a bringa bek i empatá e partido na tres. Den e ultimo 15 minüt nan di e partido Elson Hooi a haña e net i a hiba NAC ariba bek ku skor di 4-3. NAC no a konformá nan mes ku e skor aki i añadí nan di sinku gol pa asina garantisá e viktoria di 5-3 kontra Roda JC.

May 2, 2013May 2, 2013

Partido nan di Liga MCB pa e wikènt aki

WILLEMSTAD – Despues ku siman pasa tabata tin un skedjel modifiká pa futbòl Liga MCB, e siman aki tur kos ta kontinuá manera ta kustumber. Un biaha mas tin wega di futbòl riba tur tres dia di wikènt, esta djabièrnè, djasabra i djadumingu. Tur partido ta tuma lugá na Stadion Ergilio Hato.

Djabièrnè anochi mitar di nuebe tin e promé partido, na momentu ku Jong Holland topa ku Centro Dominguito. E partido aki lo ta un lucha pa promé lugá riba tabla di posishon. Jong Holland mester di un viktoria pa asina kue promé lugá for di Centro Dominguito. Centro Dominguito te ku awor tabata un mashin di gol i a hinka 19 gol den seis partido. Niun di dos ekipo no a partido un partido e temporada aki añadí. E partido aki por duna un di e dos ekipo nan aki nan promé derota.

Djasabra tin dos partido, kuminsando 7’or ku Vesta kontra Subt. E ekipo di Vesta ku te ainda e pèrdè tur partido di e temporada i ta bin buska algu ku no ta un derota. Maske ku e viktoria nan no tabata yega fásil pa Subt, nan no a pèrdè ningun partido i no tin intenshon di entrega e promé na Vesta. Ambos ekipo tin kasi mes un kantidat di gol na fabor, pero Vesta tin 14 gol kontra miéntras ku Subt tin solamente tres gol kontra.

Den e di dos partido 9’or di anochi, Centro Barber ta hunga kontra Victory Boys. Ambos ekipo tin solamente un partido gana e temporada aki. Apesar di esaki Barber ta mas mihó para riba tabla di posishon pa motibu ku nan tin kuater empate i un partido pèrdè. Di otro banda Victory Boys tin kuater partido pèrdí i niun empate.

Djadumingu e promé partido ta 5’or di atardi entre Undeba i Sithoc. Undeba ta bin buska su di dos viktoria di temporada. Aktualmente ta e viktoria aki ta separá e dos ekipo nan aki riba e tabla di posishon. Sithoc tin dos viktoria e temporada aki miéntras ku Undeba tin un viktoria.

Den e di dos partido di djadumingu ku ta kuminsá 7’or di anochi Hubentud Fortuna ta hunga kontra Jong Colombia. Jong Colombia ketu bai ta buskando nan promé viktoria di temporada. Jong Colombia i Vesta ta e úniko dos ekipo nan ku no tin un viktoria ainda e temporada aki. Di otro banda Hubentud Fortuna ta bai buska nan di kuater viktoria pa asina garantisá nan posishon den e top dos nan riba tabla di posishon.

April 29, 2013

Resultado nan Liga MCB wikent tras di lomba

WILLEMSTAD – Manera ta kustumber, Liga MCB a kontinuá wikènt aki pero pa e wikènt aki tabata tin un skedjel modifiká. Djabierne tras di lomba no tabata tin partido, e partido entre Centro Dominguito i Vesta ku mester a hunga djabierne a skuif bai djaluna.

Djasabra tur kos ta siguí normal, 7’or di anochi tabata tin e promé partido entre Undeba i Jong Holland. Jong Holland a bin pa e viktoria pa asina garantisá nan posishon den promé dos posishon nan riba e tabla di posishon. Undeba ku tabata na di seis lugá riba e tabla ta bin buska e viktoria pa asina nan por tin chèns di drenta den e top sinku nan riba e tabla. Niun di dos ekipo no ta logra e viktoria despues di empata na un gol.

Despues 9’or di anochi e ekipo di SUBT a enfrentá Centro Barber. Centro Barber a bin pa e viktoria pa asina nan subi riba kabes di SUBT riba e tabla di posishon. SUBT ku no a pèrdè niun wega ainda e temporada aki no a bin pa pèrdè nan promé djasabra. E dos ekipo nan aki a hasi bon i e enkuentro aki a kaba na un empate na un gol.

Djadumingu 5’or di atardi Sithoc a hunga kontra Hubentut Fortuna. Ambos ekipo a bin pa e viktoria pa asina drecha nan posishon riba e tabla di posishon. Sithoc kier a keda den e top sinku nan miéntras ku Hubentut Fortuna a bai buska e viktoria pa asina nan purba drenta den e top sinku nan. Hubentut Fortuna a logra esaki ganando ku skor di 2-1 di Sithoc.

Esaki tabata e úniko partido di djadumingu. E partido ku tabata programa pa djadumingu 7’or di atardi entre Victory Boys i Jong Colombia a keda postpone pa 8 di mei.

April 27, 2013

Federashon Futbòl Kòrsou ku wepsait nobo

WILLEMSTAD – Federashon Futbòl Kòrsou (FFK) tin su propio kas riba e ret sibernetiko. Riba e wepsait e fanátiko nan di futbòl i tambe públiko general por keda na altura di tur loke ta akontesé futbòl di Kòrsou. For di historia te na notisia nan aktual ta disponibel riba www.ffk.cw. Tambe bo ta haña informashon riba tur e diferente ekipo nan na Kòrsou for di promé divishon te na hubenil i futbòl femenino.

April 25, 2013

Futbòl Liga MCB ta siguí wikènt aki ku skedjel modifiká

WILLEMSTAD – Manera ta kustumber, Liga MCB ta kontinuá wikènt aki pero pa wikènt aki tin un skedjel modifiká. Mañan, djabièrnè no tin partido manera ta kustumber. E partido di mañan anochi a skùif bai djaluna e orario no ta konosí.

Djasabra tur kos ta siguí normal, 7’or di anochi tin e promé partido entre Undeba i Jong Holland. Jong Holland ta bin pa e viktoria pa asina garantisá nan posishon den promé dos posishon nan riba e tabla di posishon. Undeba ku aktualmente ta na di seis lugá riba e tabla ta bin buska e viktoria pa asina nan por tin chèns di drenta den e top sinku nan riba e tabla.

Despues 9’or di anochi e ekipo di SUBT ta enfrentá Centro Barber. Centro Barber ta bin pa e viktoria pa asina nan subi riba kabes di SUBT riba e tabla di posishon. SUBT ku no a pèrdè niun wega ainda e temporada aki no ta bin pa pèrdè nan promé djasabra.

Djadumingu 5’or di atardi Sithoc ta hunga kontra Hubentut Fortuna. Ambos ekipo ta bin pa e viktoria pa asina drecha nan posishon riba e tabla di posishon. Sithoc ke keda den e top sinku nan miéntras ku Hubentut Fortuna ta buska e viktoria pa asina nan purba drenta den e top sinku nan. Esaki ta e úniko partido di djadumingu.

E partido ku tabata programa pa djadumingu 7’or di atardi entre Victory Boys i Jong Colombia a keda postpone pa 8 di mei.

April 24, 2013

Real Madrid e ekipo di futbòl mas balioso na mundu

NEW YORK, New York – E revista Forbes a anunsiá nan lista annual di “E 20 Ekipo nan di Futbòl Mas Balioso na Mundu.” Real Madrid, balorá na $3.3 bion ta na kabes di e lista komo e frankisia di deporte di mas balioso na mundu. E balor di Real Madrid a subi ku 76% den e ultimo aña, kitando di e manera aki Manchester United for di e promé lugá. Manchester United ta na di dos lugá awor, ku un balor di $3.17 bion. Esaki ta promé biaha for di 2004 ku Manchester United no ta na promé lugá riba e lista. Barcelona ta na di tres lugá ku un balor di $2.6 bion.

Pa loke ta trata hungadó nan, David Beckham ta na kabes di hungadó nan mihó paga ganando $50.6 mion den ultimo aña. Na di dos lugá tin e hungadó di Real Madrid, Cristiano Ronaldo ku un ingreso di $43.5 mion. Lionel Messi di Barcelona ta sera na di tres lugá ku un ingreso di $40.3 mion.

Pa e lista kompleto bishitá e siguiente link: www.forbes.com/soccer

April 21, 2013

Resultado di Liga MCB pa wikènt di 19 – 21 di aprel

WILLEMSTAD – Manera ta kustumber di tur wikènt, futbòl promé divishon a kontinuá ku su partido nan. Un biaha mas tabata tin sinku partido plania pa wikènt aki kuminsando riba djabièrnè i terminando ku e ultimo partido djadumingu. Tur partido a wòrdu hunga den Stadion Ergilio Hato.

Djabièrnè mitar di nuebe di anochi tabata tin e promé partido ora ku Sithoc a enfrentá e ekipo di Vesta. Vesta a drenta e ku un partido gana i tres punto despues di gana un protesta ku nan a entrega siman pasa. Di otro banda Sithoc a bin buska su di dos viktoria di temporada. E ekipo di Sithoc a logra esaki saliendo di e porta grandi ku skor di 2-1 riba Vesta. Ku e viktoria aki Sithoc ta keda na di kuater lugá riba tabla ku ocho punto. Vesta ku su tres punto nan ta keda na di nuebe lugá riba tabla di posishon.

Djasabra tabata tin dos partido, kuminsando 7’or di anochi ku e partido entre Centro Dominguito i Hubentut Fortuna. Hubentut Fortuna a bin buska un viktoria pa asina kompensá pa e tres punto nan ku nan a pèrdè den e protesta entrega pa e ekipo di Vesta siman pasa. Centro Dominguito a sali viktorioso, blankeando Hubentut Fortuna ku sinku gol. Ku e viktoria aki Centro Dominguito ta pasa pa dominá e tabla di posishon. Dominguito ta empatá na punto ku Jong Holland pero ta haña e promé lugá pa motibu di diferensia di gol.

E di dos partido di djasabra a kuminsá 9’or di anochi entre Undeba i Victory Boys. Victory Boys a drenta e partido ku tres punto i Undeba ku dos punto. Ambos ekipo a bin buska e viktoria pa mehorá nan posishon riba tabla di posishon. Ku un blankeo di dos gol Undeba a bai ku e tres punto pa asina subi bai na di seis lugá riba e tabla di posishon. Victory Boys a keda den bòm di e tabla ku tres punto.

Djadumingu tabata tin e ultimo dos partido nan di e wikènt. E promé partido di djadumingu tabata entre Jong Holland i SUBT pa 5’or di atardi. SUBT tabata tin ocho punto i por a kita Jong Holland for di kabes di tabla di posishon ku un viktoria. Pero ambos ekipo a disidí di hasi bon i empatá na sero gol. Ku e empate aki Jong Holland ta keda empatá ku Centro Dominguito ku 11 punto riba tabla di posishon, pero nan ta pèrdè e liderazgo di e tabla pa motibu di diferensia di gol.

E ultimo partido tabata 7’or di anochi entre Centro Barber i Jong Colombia. Jong Colombia a bin buska nan promé viktoria di temporada. Jong Colombia no ta logra esaki i ambos ekipo ta bai kas ku un punto despues di empatá na dos gol.

April 18, 2013April 18, 2013

Partido nan di Liga MCB wikènt siguiente

WILLEMSTAD – Manera ta kustumber di tur wikènt, futbòl promé divishon ta kontinuá ku su partido nan. Un biaha mas tin sinku partido plania pa wikènt aki kuminsando riba djabièrnè i terminando ku e ultimo partido djadumingu. Tur partido ta wòrdu hunga den Stadion Ergilio Hato.

Djabièrnè mitar di nuebe di anochi tin e promé partido ora ku Sithoc enfrentá e ekipo di Vesta. Vesta a haña un partido gana i tres punto despues di gana un protesta ku nan a entrega siman pasa. Ku esaki Vesta a haña su promé viktoria di temporada. Sithoc ta bin buska su di dos viktoria di temporada. Ambos ekipo no a hinka masha gol den e temporada. Den kuater wega hunga Sithoc tin dos gol na fabor i Vesta tin kuater gol na fabor, pero tres di e kuater gol nan di Vesta a bin via di e protesta ku nan a gana.

Djasabra tin dos partido, kuminsando 7’or di anochi ku e partido entre Centro Dominguito i Hubentut Fortuna. Hubentut Fortuna ta bin buska un viktoria pa asina kompensá pa e tres punto nan ku nan a pèrdè den e protesta entrega pa e ekipo di Vesta. Ku un viktoria Centro Dominguito tin chèns di subi na kabes di e tabla dependiendo di kiko pasa den e partido di Jong Holland. Centro Dominguito ta un fabriká di gol ku 11 gol na fabor i permitiendo solamente dos gol kontra.

E di dos partido di djasabra ta kuminsá 9’or di anochi entre Undeba i Victory Boys. Victory Boys tin tres punto aktualmente i Undeba tin dos punto. Ambos ekipo ta bin buska e viktoria pa mehorá nan posishon riba tabla di posishon. Pa logra esaki Victory Boys mester sende nan mekanismo ofensivo, den kuater partido nan tin solamente un gol na fabor. Undeba no tin problema ku esaki, ku un total di sinku gol na fabor aktualmente.

Djadumingu tin e ultimo dos partido nan di e wikènt. E promé partido di djadumingu ta entre Jong Holland i SUBT pa 5’or di atardi. SUBT ku tin ocho punto aktualmente por kita Jong Holland for di kabes di tabla di posishon ku un viktoria. Jong Holland ku shete gol na fabor ta bin pa keda na promé lugá di e tabla di posishon.

E ultimo partido ta 7’or di anochi entre Centro Barber i Jong Colombia. Jong Colombia ta bin buska nan promé viktoria di temporada. Ku un viktoria Jong Colombia ta surpasá Centro Barber den puntuashon. Centro Barber di otro banda tin un bon chèns di drecha su posishon riba e tabla ku un viktoria.

April 18, 2013April 17, 2013

Elson Hooi ta ekstendé kontrato ku NAC

BREDA, Hulanda – Elson Hooi a debutá e aña aki ku e ekipo prinsipal di NAC i ya e la bira parti integral di e ekipo. Hooi su bon trabou ku e ekipo a pone ku NAC a ekstendé su kontrakt pa tres aña mas. Elson Hooi di 21 anan di edat a hunga 22 partido i anotá un gol e aña aki ku NAC.

“E la traha duru pa un posishon den e ekipo”, direktor tékniko Jeffrey van As a bisa. “Bo no por imaginá ne mas for di e ekipo básiko.”

Elson Hooi a bisa ku for di prinsipio ma traha duru i asina hasi un impakto. “Ma haña un chèns di hunga e promé partido di temporada kontra Willem II i mesora ma demostrá ku mi por ku e nivel. Despues ma hunga kasi tur wega. Ta impreshonante pa por a eksperensia esaki.”

Segun Hooi no tabata fásil pa bandoná Kòrsou i ta gradesido na su famia. “Den e tempu ku mi a yega Hulanda ma wòrdu risibí hopi bon pa mi tio i tanta. Ainda mi ta sinti falta di mi famia na Kòrsou, pero mi sa ku nan ta orguyoso di mi. Esei ta importante pa mi.”