Category: Futbòl

WILLEMSTAD – Kampionato di futbòl Liga MCB ta sigui e wikènt aki un biaha mas ku sinku partido. Manera ta kustumber tur e partido nan ta hunga den Stadion Ergilio Hato i bo por kumpra bo karchi di entrada na porta pa FL. 6,-. Mucha bou di 12 i 60+ ta paga FL. 2,50.

Djabièrnè mitar di nuebe di anochi tin e promé partido na momento ku Centro Dominguito topa ku Victory Boys. Centro Dominguito no a pèrdè ningun partido ainda e temporada aki i ta bai en búskeda di nan di dos viktoria. Di otro banda Victory Boys ku tin tres punto aktualmente ta bai buska e viktoria pa asina surpasá Centro Dominguito den puntuashon.

Undeba ta hunga kontra Centro Barber den e promé partido riba djasabra. E partido ta kuminsá 7’or di anochi na momento ku Undeba ta bai buska nan promé viktoria di temporada 2013. Centro Barber ta bin pa evitá esaki i duna Undeba nan di tres derota di temporada.

Den e di dos partido 9’or di anochi Jong Colombia ta topa ku Sithoc. Jong Colombia meskos ku Undeba tambe ta bai buska su promé viktoria di temporada. Di otro banda Sithoc ta bin pa sende nan motor ofensivo i hinka gol kontra Jong Colombia pa asina bai ku e viktoria. Te ainda den tres partido Sithoc tin solamente un gol na fabor.

Djadumingu e partido nan di futbòl ta kuminsá mas tempran. SUBT ta bai midi forsa ku Hubentut Fortuna den e promé partido 5’or di atardi. Ambos ekipo ta disponé di shete punto riba tabla di posishon i ta bin pa e tres punto nan.

E ultimo partido pa e wikènt aki lo ta djadumingu 7’or entre Jong Holland i Vesta. Vesta ku aktualmente ta den bòm di e tabla di posishon ku tres wega pèrdí ta bai buska nan promé viktoria kontra Jong Holland. E ekipo di Jong Holland ta komandá e table di posishon aktualmente i no a pèrdè niun partido ainda.

WILLEMSTAD – Manera ya a keda publiká, Federashon Futbòl Kòrsou a anunsiá ku Maduro & Curiel’s Bank (MCB) ta bira patrosinador ofisial di futbòl lokal na Kòrsou. Ku esaki e kampionato di promé divishon pa 3 aña largu lo wòrdu yamá “Kampionato di MCB promé divishon”.

Den wikènt tras di lomba, despues ku wikènt anterior no tabata tin futbòl pa motibu di dia nan di fiesta i di reflekshon, futbòl a sigui. Wikènt aki un biaha mas tin sinku partido riba programa i tur wega ta wòrdu hunga na Stadion Ergilio Hato.

E promé partido tabata djabièrnè na momentu ku Sithoc a topa ku e ekipo di Centro Barber. E partido aki a kaba na un empate di 0 gol. Ku esaki ámbos ekipo ta haña un punto i awor tur dos ekipo ta disponé di kuater punto riba tabla di posishon.

Djasabra tabata tin dos partido, ku e promé partido entre Vesta i Hubentut Fortuna. Den e partido aki Vesta a bai buska su promé punto nan riba tabla di posishon, pero no a logra esaki despues di kai vensí ku skor di 3-1. Ku esaki Hubentut Fortuna ta avansá bai shete punto riba tabla di posishon, miéntras ku Vesta ta keda ku sero punto.

Den e di dos partido tabata tin e enkuentro entre SUBT i Centro Dominguito. Ámbos ekipo a logra bai kas ku solamente un punto despues di a empate na un gol. SUBT awor tin shete punto riba tabla di posishon. Centro Dominguito ta avansá bai sinku punto riba tabla di posishon.

Djadumingu tambe tabata tin dos partido. Den e promé partido Jong Holland a enfrentá Victory Boys, kaminda Jong Holland ku kuater punto a logra e viktoria ku skor mínimo. Ku e resultado aki Jong Holland tambe tin shete punto awor riba tabla di posishon, miéntras ku Victory Boys ta keda ku nan tres punto

E último enkuentro pa wikènt tras di lomba tabata entre Undeba i Jong Colombia. E partido aki a bira e di tres empate di wikènt, na momentu ku e partido entre Undeba i Jong Colombia ta kaba na un gol pa banda. Ku e empate Undeba ta logra nan promé punto di temporada, miéntras ku Jong Colombia ta avansá bai dos punto riba tabla di posishon.

WILLEMSTAD – Federashon Futbòl Kòrsou a anunsiá ku Maduro & Curiel’s Bank (MCB) ta bira patrosinador ofisial di futbòl lokal na Kòrsou. Ku esaki e kampionato di promé divishon pa 3 aña largu lo wòrdu yamá “Kampionato di MCB promé divishon ” i e kampionato infantil lo wòrdu yamá “Kampionato di Lito”.

WILLEMSTAD – Despues ku wikènt pasa no tabata tin futbòl pa motibu di dia nan di fiesta i di reflekshon, futbòl ta siguí e wikènt aki. Wikènt aki un biaha mas tin sinku partido riba programa i tur wega ta wòrdu hunga na Stadion Ergilio Hato.

Mañan djabièrnè 5 di aprel, 8:30 di anochi tin e promé partido ora ku Sithoc topa ku e ekipo di Centro Barber. Ámbos ekipo tin tres punto riba tabla di posishon ku ámbos un partido gana i otro pèrdí.

Djasabra 6 di aprel tin dos partido kuminsando 7’or di anochi ku Vesta kontra Hubentut Fortuna. Vesta ta bai buska su promé punto nan riba tabla di posishon. Di otro banda Hubentut Fortuna tin kuater punto riba tabla i ta bai buska pa mehorá nan posishon riba esaki.

Mas lat, 9’or di anochi tin e enkuentro entre e lider nan riba tabla di posishon. SUBT ku ta kabesa e tabla aktualmente ta topa ku Centro Dominguitu ku ta na di dos posishon riba tabla. Centro Dominguito ku un viktoria ta baha SUBT for di liderazgo riba e tabla di posishon. Miéntras ku SUBT ku un viktoria ta garantisá nan mes na kabes di e tabla pa un siman mas.

Djadumingu 7 di aprel tambe tin 2 partido e promé ta 5’or di atardi entre Jong Holland i Victory Boys. Jong Holland ku kuater punto ta bai en búskeda di un viktoria pa asina purba keda den e tòp tres nan riba tabla di posishon. Victory Boys tin tres punto i ta bai purba drecha nan posishon riba tabla ku un viktoria.

Undeba kontra Jong Colombia ta sera e wikènt di futbòl ku nan partido 7’or di anochi. Undeba ta bai buska nan promé punto nan riba tabla di posishon, miéntras ku Jong Colombia ku ya tin un punto ta bin buska nan promé viktoria.