Category: Futbòl

Posted on

Ekipo nan ku lo enfrentá otro den kuart final di Champions League

NYON, Suisa – E ocho ekipo ku lo partisipá den e kuart final di UEFA Champions League tabata konosi kaba. Lo ke tabata deskonosí tabata kontra ken kada ekipo lo hunga den kuart final. Awe mainta e ocho ekipo nan ku a pasa pa kuart final a partisipá den un sorteo pa sa kontra ken nan lo hunga den kuart final. E sorteo a duna e siguiente resultado: Málaga CF (Spaña) lo hunga kontra Borussia Dortmund (Alemania). Real Madrid CF (Spaña) kontra Galatasaray AS (Turkia). Paris Saint-Germain FC (Fransia) lo bai kontra FC Barcelona (Spaña). FC Bayern München (Alemania) ta enfrentá Juventus ( Italia).

E partido nan di ida lo ta riba 2 di aprel i 3 aprel, miéntras ku e partido nan di buèlta lo ta riba 9 di aprel i 10 di aprel. Riba 12 di aprel UEFA lo tene su siguiente sorteo pa determiná kua ekipo ta hunga kontra otro den semi final.

Posted on

Jetro Willems ta uni su mes ku Leroy Fer i Jürgen Locadia den selekshon U-21 Hulandes

ZEIST, Hulanda – Jetro Willems a wòrdu añadí na e selekshon Hulandes U-21 mihó konosí komo “Jong Oranje” ta bai kuminsá nan preparashon nan pa e Kopa Europeo U-21 ku ta tuma lugá den yüni na Israel. Te ku par di siman pasa Willems tabata den e preselekshon Hulandes ku ta bai kuminsá nan partido nan di klasifikashon pa Kopa Mundial.

E direktor tékniko di e selekshon U-21 Cor Pot a manda yama 19 hungadó, di kua Jetro Willems ta e úniko kara nobo. Willems nunka no a hunga pa “Jong Oranje” pero si e tin nuebe partido ku e la hunga ku e selekshon grandi di Hulanda.

Huntu ku Willems, Leroy Fer i Jürgen Locadia tambe ta forma parti di e selekshon U-21. Na promé instante e direktor tékniko a yama Leandro Bacuna tambe den e preselekshon pero esaki no a wòrdu yama pa e selekshon definitivo.

Hulanda lo hunga dos wega di preparashon. E promé partido di e selekshon Hulandes U-21 ta riba 21 di mart na momentu ku nan topa kontra Israel den stadion HaMoshava na Petaj Tikva. Despues riba 25 di mart e selekshon Hulandes ta risibí Noruega komo bishitante den stadion Mandemakers na Waalwijk, Hulanda.

E selekshon U-21 ta konta ku e siguiente hungadó nan:

Patrick van Aanholt (Vitesse)
Marco Bizot (FC Groningen)
Jean-Paul Boëtius (Feyenoord)
Jeffrey Bruma (Hamburger SV)
Lerin Duarte (Heracles Almelo)
Leroy Fer (FC Twente)
Marco van Ginkel (Vitesse)
Jeffrey Gouweleeuw (sc Heerenveen)
Mike van der Hoorn (FC Utrecht)
Luuk de Jong (Borussia Mönchengladbach)
Kelvin Leerdam (Feyenoord)
Jürgen Locadia (PSV)
Adam Maher (AZ)
Bram Nuytinck (Anderlecht)
Rajiv van la Parra (sc Heerenveen)
Georginio Wijnaldum (PSV)
Yanic Wildschut (VVV-Venlo)
Jetro Willems (PSV)
Jeroen Zoet (RKC Waalwijk)

Posted on

Partido nan Promé Divishon di Futbòl

WILLEMSTAD – Futbòl Promé Divishon ta siguí wikènt akí ku kuater partido. Den e partido di apertura wikènt ku a pasa Centro Dominguito a empatá na unu ku Jong Colombia. Djabierne 15 di mart pa 20.30,  Undeba ta hunga kontra SUBT. Djasabra 16 di mart 19.00, Sithoc ta hunga kontra Victory Boys i mas lat pa 21.00, Jong Holland ta hunga kontra Hubentut Fortuna. Djadumingu 17 di mart 17.00, Vesta ta enfrentá Centro Barber .

Posted on

Promé partido di Promé Divishon Futbòl ta kaba den empate

WILLEMSTAD – Kampionato Promé Divishon di futbòl a ranka sali ku e partido entre Centro Dominguito i Jong Colombia. E ekipo di Jong Colombia ta pika dilanti ku skor di 1-0 riba ku un gol di distansha di Kendrith Poulino.

Den di dos mitar Centro Barber ta drenta ofensiva i ta logra haña un pinalti na momentu ku Djumaro Constansia ta kometé un falta den área penal di Jong Colombia. Aki nan Centro Domiguito ta logra empatá e partido na unu ku gol di Ashar Bernardus.

A tuma mas òf ménos 10 minüt promé ku Centro Dominguito por a kobra e pinalti. E motibu di esaki tabata paso Constansia a haña karchi kòrá riba e falta ku e la kometé i mesora esaki a trese kuné ku e kiper di Jong Colombia, Daniel Lopez a ataka e rèfri di e partido. Konsekuentemente e tambe a haña karchi kòrá i a dura un ratu pa por a haña e hungadó nan pa bandoná tereno di wega.

Posted on

Leandro Bacuna, Leroy Fer i Jürgen Locadia den selekshon tentativo U-21 Hulandes

ZEIST, Hulanda – E selekshon Hulandes U-21 mihó konosí komo “Jong Oranje” ta bai kuminsá nan preparashon nan pa e Kopa Europeo U-21 ku ta tuma lugá den yüni na Israel. Hulanda lo hunga dos wega di preparashon i den konekshon ku esaki direktor tékniko, Cor Pot a manda yama 25 hungadó.

E promé partido di e selekshon Hulandes U-21 ta riba 21 di mart na momentu ku nan topa kontra Israel den stadion HaMoshava na Petaj Tikva. Despues riba 25 di mart e selekshon Hulandes ta risibí Noruega komo bishitante den stadion Mandemakers na Waalwijk, Hulanda.

Riba djabièrnè 15 di mart direktor tékniko Pot ta hasi e selekshon definitivo konosí.

E 25 hungadó nan tentativo ta:

Patrick van Aanholt (Vitesse)
Leandro Bacuna (FC Groningen)
Marco Bizot (FC Groningen)
Jeffrey Bruma (Hamburger SV)
Thomas Bruns (Heracles Almelo)
Virgil van Dijk (FC Groningen)
Mitchell Dijks (Ajax)
Lerin Duarte (Heracles Almelo)
Leroy Fer (FC Twente)
Marco van Ginkel (Vitesse)
Jeffrey Gouweleeuw (sc Heerenveen)
Ricky van Haaren (VVV-Venlo)
Danny Hoesen (Ajax)
Luuk de Jong (Borussia Mönchengladbach)
Florian Jozefzoon (RKC Waalwijk)
Kelvin Leerdam (Feyenoord)
Jürgen Locadia (PSV)
Nick Marsman (Go Ahead Eagles)
Miquel Nelom (Feyenoord)
Bram Nuytinck (Anderlecht)
Rajiv van la Parra (sc Heerenveen)
Georginio Wijnaldum (PSV)
Yanic Wildschut (VVV-Venlo)
Género Zeefuik (FC Groningen)
Jeroen Zoet (RKC Waalwijk).

Posted on

Jetro Willems den 26 hungadó nan yama pa selekshon Hulandes

ZEIST, Hulanda – Direktor tékniko di e selekshon Hulandes di futbòl, Louis van Gaal a yama un total di 26 hungadó pa partisipá na partido nan di klasifikashon pa Kopa Mundial. E promé partido di e selekshon Hulandes ta djabièrnè 22 di mart kontra Estonia. Kuater dia despues, djamars 26 di mart e selekshon Oraño ta topa Rumania. Tur dos partido ta wòrdu hunga den Amsterdam Arena i ta kuminsá 20.30 ora lokal di Hulanda.

E 26 hungadó nan ku a wòrdu yama ta:

Daley Blind (Ajax)
Jean-Paul Boëtius (Feyenoord)
Jordy Clasie (Feyenoord)
Bas Dost (VfL Wolfsburg)
Jonathan de Guzman (Swansea City)
Mike van der Hoorn (FC Utrecht)
Klaas Jan Huntelaar (Schalke 04)
Daryl Janmaat (Feyenoord)
Ola John (Benfica)
Siem de Jong (Ajax)
Dirk Kuyt (Fenerbah?e)
Adam Maher (AZ)
Joris Mathijsen (Feyenoord)
Robin van Persie (Manchester United)
Ricardo van Rhijn (Ajax)
Arjen Robben (Bayern München)
Ruben Schaken (Feyenoord)
Wesley Sneijder (Galatasaray)
Maarten Stekelenburg (AS Roma)
Kevin Strootman (PSV)
Rafael van der Vaart (HSV)
Kenneth Vermeer (Ajax)
Tonny Trindade de Vilhena (Feyenoord)
Michel Vorm (Swansea City)
Stefan de Vrij (Feyenoord)
Jetro Willems (PSV)

Posted on

Kampionato Federashon Futbòl Kòrsou ta bai kuminsá

WILLEMSTAD – Djadumingu promé divishon ta start ku e partido entre di Centro Dominguito i Jong Colombia pa 18.00. Promé ku e partido lo bai tin un programa ku ta kuminsá for di 15.00 ku weganan infantil (Orfik), desfile di nos ekiponan i homenahe na nos baluartenan na kende nos kampionatonan ta wòrdu dediká.

Despues di diskursonan pa 18.00 en punto e partido entre Centro Dominguito i  Jong Colombia ta kuminsá. Federashon Futbòl Kòrsou  (FFK) ta invitá tur fanátiko nan di deporte rei futbòl pa bini stadion trempan.

Porta di stadion lo ta habri for di 14.30 pa presensiá i apoyá nan ekiponan faborito. Kampionato 2012/2013 ta wòrdu dediká na tres persona  kual ta: Sr. Humphrey Leue (eks rèfri), Sr. Evaristo ”Lito” Rozal (eks hungadó di Jong Holland) i Sr. John Isidora (eks dirigente Victory Boys i FFK).

E kampionato 2012/2013 ta wòrdu hunga den e siguiente manera: dos buèlta regular, play off kaya 6, play off kaya 4 i un wega final. E ekipo ku finalisá na puesto number 10  riba e tabla di posishon ta hunga dos wega di promoshon/degradashon kontra e ekipo Kampion di Amatur.

Tur wega ta wòrdu hunga na Stadion Ergilio Hato i a konsentrá e weganan pa wòrdu hunga den wikènt so, esta djabièrnè, djasabra i djadumingu ku eksepshon di dianan di fiesta den wikènt e weganan ta skùif pa den siman.

Posted on

Representashon di CONCACAF pa Mundial U-20 ta konosí

PUEBLA, Mexico – E kuater selekshon nan nashonal ku lo representá CONCACAF den e final di Mundial FIFA U-20 ta konosí. E selekshon di Kòrsou tambe tabata den kontienda pa klasifiká pa Mundial U-20 pero a kai afó despues di sufri dos derota, un kontra Mexico i e otro kontra El Salvador.

Kòrsou por bisa ku e la pèrdè kontra e mihó nan. Tantu Mexico komo El Salvador ku tabata den e grupo di Kòrsou a logra pasa pa Mundial U-20. El Salvador ta logra nan promé Mundial U-20 despues di gana ku skor di 3-1 kontra Panama. El Salvador no ta e úniko debutante den e Mundial U-20, ya komo ku Cuba tambe ta logra nan promé despues di gana di Costa Rica ku skor di 2-1.

E dos grandi nan di CONCACAF kual ta Estádos Unídos i Mexico tambe a logra pasa pa Mundial U-20. Estádos Unídos a logra esaki ganadó di Canada ku skor di 4-2 miéntras ku Mexico a gana di Jamaica ku skor di 4-0.

E Mundial di FIFA U-20 lo keda organisá entre 21 di yüni i 13 di yüli na Turkia.

Posted on

Jürgen Locadia ta hiba PSV final di Kopa KNVB

ZWOLLE, Hulanda – E ekipo di Eindoven a logra posishoná nan mes den e final di e Kopa KNVB despues di gana ku un skor di 3-0 riba e ekipo di PEC Zwolle. PSV por a konta ku Jürgen Locadia ku a karga e ekipo i hink’é den final.

PSV a bai ariba for di den e promé mitar ku dos gol. Na di 16 minüt Locadia a habri e markadó pa PSV ku asistensia di Georginio Wijnaldum. Locadia ta bolbe anotá un biaha mas kua asistensia di Wijnaldum na di 34 minüt. Den di dos mitar, Oscar Hiljemark ta pasa e bala den buraku kual ta laga Locadia liber dilanti di gol i esaki na su turno ta logra haña gol pa di tres biaha i asina kompletá e ‘hat-trick’.

PSV lo topa ku AZ Alkmaar den e final di Kopa KNVB riba 9 di Mei den stadion De Kuip na Rotterdam.

Posted on

Josep Guardiola ta spioná hungadó

BARCELONA – Segun e wepsait “El Confidencial” di Spaña, Josep Guardiola den su tempu komo direktor tékniko di Barcelona  tabata spioná Gerard Piqué, Samuel Eto’o, Ronaldihno i Deco pa asina konosé nan bida priva

El Confidencial ta bisa ku Guradiola a kontratá e agensia di investigadó “Metodo 3”. Parse ku Guardiola tabata yama na kas di su hungadó nan pa asina sa ku di bèrdat nan tabata na kas òf si nan ta riba kaya ta kore paranda.

“E tabata opseshoná pa su hungadó nan mantené un bida priva ordená i pa nan no sali for di òrdu paso di otro forma nan no ta presta bon riba kancha di wega”,  El Confidencial ta duna di konosé.

E investigashon nan hasi riba bida priva di e hungadó nan ta un di e motibu nan dikon Deco, Eto’o i Ronaldihno a keda for di e plan di trabou Josep Guardiola. Segun fuente nan Guardiola a asta pidi pa Barcelona bende Piqué despues ku su relashon ku Shakira a sali den publisidat.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media