Otro Archives | Page 10 of 38

July 12, 2016

Selekshon nashonal di vòlibòl a regresá for di Haiti ku diferente premio

WILLEMSTAD — E selekshon nashonal di vòlibòl ku wikènt pasa a kompetí den e klasifikashon pa mundial den grupo C di Cazova i ku a terminá na e di dos puesto a regresá kas kansa pero satisfecho.

Fuera di a regresá ku medaya di plata i ala bes klasifiká pa e siguiente buèlta di e klasifikashon Mundial 2018 i tambe e kampeonato di Karibe, nos selekshon a pone man riba 4 premio individual.

E kapitan Anderson Prosper a sali e ‘best oposite hitter’( rematado).

Jurcham Meulens e ‘best outside hitter’.

E libero Ernaldo Mota ku dos premio individual; ‘Best Libero i Best Digger (defensa)

E selekshon awor despues di hasi un evaluashon di nan partisipashon lo kontinuá ku nan preparashon ku mira riba e di dos buèlta i tambe kampeonato di Karibe (Cazova) otro aña yüli na Kingston, Jamaica.

Federashon di vòlibòl ta felisitá e selekshon ku e logro aki.

July 11, 2016

Selekshon nashonal di vòlibòl ku medaya di plata na Haiti

WILLEMSTAD — E selekshon nashonal di vòlibòl ku e weekend aki a kompetí den e di promé ronda pa klasifikashon Mundial den Grupo C na Port-au-Prince, Haiti despues di a gana di tantu US Virgin Islands komo Cayman Islands ku skor konvinsente di 3-0 ayera a kai na man di e selekshon di kas ku skor di 3-0.

Kontra tantu Virgin Islands komo Cayman Islands e ekipo di Kòrsou a hunga un tremendo partido ku e kapitan Anderson Prosper destakando en grande. E ekipo kompleto a funshoná den ámbos partido. Ayera tardi si den e partido final kosnan no kièr a sali i Haiti a probechá di e falta di konsentrashon den nos selekshon i ta derota esaki ku skor di 3-0.

E selekshon di Haiti ta sali gana e promé set ku skor di 25-21, pero den di dos set mester a bini di atras pa doblega nos selekshon nashonal ku skor pèrta di 27-25. Den e di tres set e selekshon di Haiti a bolbe sali desidido i ku bon atake I bou di animashon di nan públiko a krese pa bin derota e seksteto kurasoleño ku skor di 25-19. Apesar di a pèrdè den final e selekshon fuera di e título di sub-kampeon ta bin kas ku 4 premio individual. Anderson Prosper, Jurcham Meulens i Ernaldo Mota ku 2 premio.

E selekshonnan di Haiti komo Kòrsou awor ta pasa pa e siguiente ronda na yüli 2017 na Kingston, Jamaica. E ronda na Jamaica ta sirbi pa e klasifikashon pa Mundial 2018 i tambe pa e kampeonato di Cazova.

E selekshon nashonal ta yega awe nochi 18:40pm for di Port-au-Prince.

June 27, 2016

Oro, Plata i Brons pa Windsurfers di Korsou na Boneiru

WILLEMSTAD — 11 hoben talentoso a representa Korsou den kompetesha internashonal di windsurfing di 16 pa 19 di juni ultimo ku a tuma luga den windsurf paraiso na e popular Lac Bay dilanti di Sorobon Beach na Boneiru.

Nos hobennan a partisipa den Sorobon Masters huntu ku mas ku 50 partisipante di entre otro Martinique, Guadaloupe, Merka, Aruba, Boneiru i Spanja den e disiplinanan Slalom i Freestyle i den e prome edishon di Karibe di e famoso ‘Bjorn Dunkerbeck GPS Speed Challenge’. E kompetensha tabata enormemente intensivo pa esnan ku a kompeti den tur tres disiplina.

Kondishon di bientu tabata hopi faborabel tur tres dia pa Slalom i Speed Challenge pero no sufisiente pa Freestylers kende konsekuentemente por a kompeti solamente den 1 buelta di eliminashon.

Korsou tabata tin un gran presensia riba pódium – nos talentonan a logra konkista varios premio. Den kategoria Sorobon Masters Slalom Jean Patrick van der Wolde (20) a logra terser luga den Men Class despues di bataya intensivo kontra profeshonalnan den top 10 di mundo, Tati Frans i Bjorn Dunkerbeck. Jean Paul Da Silva De Goes (17) a sali na prome luga den kategoria Junior bou di 18 anja i Stefan de Bell (13) a termina na tercer luga den mesun kategoria.

Den Sorobon Masters Freestyle Faan Coenen (12) a konkista prome puesto den Freestyle maskulino bou di 13 anja, Sebastian van Werkhoven (13) a logra un terser puesto bon meresi den mes un kategoria i Ryan Richie (17) a termina tersero den kategoria bou di 18 anja. Mientras nos reina di Freestyle Anne Coenen (14) a termina na tercer luga overall den kategoria femenino. Kareem Naipal (18) a termina na di kuater luga den kategoria di Men.

Freestylers Stefan de Bell, Richard Richie i Christopher Pennock no a logra klasfika pa sigiente buelta for di prome dia di kompetesha door ku nan mester a kompeti fuertemente kontra e miho freestylers for di kuminsamento i lastimamente mal kondishon di bientu a pone ku nan no a hanja un di dos chens pa kuminsa un di dos buelta.

Primisia di Dunkerbeck GPS Speed Challenge den Karibe tabata un reto pa konkista e título ofisial di ‘Pan American Dunkerbeck GPS Speed Challenge Champion 2016’. Kada partisipante a hanja un GPS ku a registra nan posishon i speed durante 45 minut di race. Publiko por a sigi e kompeteshia riba pantaya grandi na e beachbar i apresia e bunita deporte i e velosidatnan di mas ku 50 km pa ora.

Windsurf leyenda Bjorn Dunkerbeck tabata aktivamente presente i tabata motiva tur e partisipantenan pa purba race mas lihe posibel. Kada partisipante tabata purba di kibra nan mes record. Den e disiplina di velosidad aki, e Dunckerbeck Speed Challenge, tambe Korsou a gana 5 di e 9 medayanan. Jean Patrick van der Wolde a termina na di dos luga i Jean Paul Da Silva De Goes djies su tras na terser luga overall den e Kategoria Maskulino (men). Jean Paul tambe tabata prome luga den kategoria bou di 20 anja i Markjenka de Bell i Stefan de Bell tabata e mihonan den kategoria bou di 17 anja.

Un danki speshal na CUR Sailing (zeilbond Curacao), Asosashon di Windsurf Korsou i Windsurfing Curacao pa nan sosten di e deporte aki na Korsou i na Don Andres ku a transporta ekiponan di windsurf na ora pa Boneiru. Danki tambe na e organisadornan di Sorobon Masters i Dunkerbeck Speed Challenge pa organisa e dos importante kompetenshanan internashonal aki. Pa mas detaye di e evento por bishita Sorobon Masters riba Facebook, of nan website: www.sorobonmasters.com

June 25, 2016

Siña landa i haña diploma den 5 siman

WILLEMSTAD — Ta un echo ku e falta di operashon di e pisina na SDK tabatin komo konsekuensha ku hopi mucha no por a sigui ku lèsnan di landamentu. Teniendo esaki na kuenta, FDDK a pone un seshon speshal di lès di landa pa nos muchanan den temporada di fakansi grandi ku nos ta drentando.

Durante di fakansi, FDDK ta brinda nos muchanan entre 5 pa 14 aña e oportunidat pa siña landa i pasa nan èksamen pa diploma A òf B den apénas 5 siman na Pisina Bennie Leito, loke ku normalmente lo dura 3 luna. E lèsnan ta kuminsá djaluna dia 4 di yüli i terminá djabièrnè 5 di ougùstùs próksimo. Dianan di lès ta djaluna, djamars, djaweps i djabièrnè di 8or pa 9or di mainta òf di 9or pa 10or di mainta. Kostonan pa e lès ta solamente fl. 120,- mas fl. 15,- pa èksamen.

Laga nos muchanan siña landa serka profeshonalnan i risibí nan diploma rekonosé. Pa mas informashon i/òf inskripshon, por tene kontakto ku FDDK na 888-1840 òf 512-174. Kòrda ku por sigui FDDK riba su Facebook, www.facebook.com/DeporteKorsou.

June 3, 2016

Olympia Taekwondo Association preparando Sürnam open

WILLEMSTAD — E skol di Taekwondo, Olympia Taekwondo Association ta preparando duru pa e kampionato titulá Sürnam open ku lo bai tuma lugá na Sürnam dia 11 yüni 2016. E kampionato aki lo bai ta unu internashonal kaminda lo bai tin partisipashon di diferente pais.

Den e biahe deportivo aki e skol di Taekwondo Olympia Taekwando Association lo bai ku 3 atleta. E atleta nan ta Jayvan Poulina, Harif Roojer i Shadeon Donker.

Olympia Taekwondo assocation ta trahando duru pa por logra sera fondonan di manera ku por sigui traha riba e desaroyo di tur su atletanan.

Keda pendiente pa mas informashon di e kampionato organisá pa OTA dia 5 novèmber 2016. E aña aki lo bini diferente pais. E kampionato ta titulá ku e nòmber TK5 Curaçao

Olympia Taekwondo Association kier a partisipá na e pueblo di Curaçao ku a habri oportunidat pa atletanan nobo. Si bo ke traha riba bo mes òf bo yu su konfiansa propio, disiplina, rèspèt i mas punto nan importante pa e deporte i bida, tene kontakto ku nos na 5278018, 5127374 òf WWW.facebook.com/olympia.taekwondo

June 2, 2016June 2, 2016

SOV Brandweer ku boutiso di unifòrm di Sòftbòl & Futbòl

WILLEMSTAD — Ayera den oranan di atardi, Sport en Ontspanningsvereniging di Brandweer Korsou a tene un seremonia chikitu I a hasi boutiso di 2 uniform pa nan timnan. Ta trata di respektivamente e tim di softbol ku a hanja 2 uniform nobo, kual ta konsisti di un pechi kolor kora ku Brandweer skirbi ariba, kamiseta blou skur I pantalon shinishi. E di dos set di uniform tin pantalon blanku, kamiseta blou skur I tambe ta ser kombina ku e kolor kora, kual ta kolornan ku ta tipifika Brandweer.

Pa lokual ta trata e tim di futbol, SOV Brandweer pa basta tempu kaba tabata partisipa na diferente torneo pero sin un uniform. Den kuadro di esaki, SOV Brandweer kier a yama un danki ENORME na ACU ku a kere den e tim di Brandweer I a sa di kontribui ku un uniform super bunita pa e tim di futbol. Ayera den oranan di atardi, representante di ACU, Sra. Arianna Roos huntu ku Sr. Elvin Regina, Komandante di Brandweer a hasi e boutiso di e uniform aki. Porsierto ku e uniform di futbol ya lo bai ser usa durante di enkuentro e fin di siman aki di futbol na velt di KAE. SOV Brandweer Korsou kier a yama danki na tur persona ku di un of otro manera a yuda pa yega na e dos uniformnan aki I sigur lo bai saka kara I gana den e uniformnan nobo aki.

June 1, 2016

Di dos edishon di “THIS IS IT Swimming Marathon”

WILLEMSTAD — Manera a primintí ku lo bini ku un di dos edishon i manera grandinan ta bisa “ primintí ta debe”, nos ta kumpli ku esaki speshalmente pa nos atletanan ku ta práktika e deporte di natashon. Landamentu ta un deporte ku hopi dinamismo i esaki kada bes ta keda proba di nobo.

E tim organisadó di “THIS IS IT Swimming Marathon” konhuntamente ku Sport Club Orca Curaçao i Fundashon Pa Nan, lo tene e di dos edishon riba djasabra, 22 di òktober 2016 na Pisina Bennie Leito na Rif.

Preparashon di parti di e komishon ku lo bai organisá e máratòn ta den gran forma. Nos ta invitá tur klup di natashon meskos ku aña pasa, pa partisipá na e evento aki pa kompetí i pa rekreá. Keda pendiente pa nos boletin nan ku lo bai trese informashon riba konstelashon di kada tim.

May 30, 2016

Mario Lobo di Aruba ta gana e Torneo Compunel & Sons

WILLEMSTAD — Den wikènt tras di lomba tabatin un tremendo torneo di tènis di mesa den Sala Rekreo Irene Moreno.

Compunel & Sons den koperashon ku Federashon Tènis di Mesa Kòrsou a organisá un torneo di kabayero individual ku partisipashon tambe di Aruba i Bonaire.

Di Aruba tabatin e mihó hungadónan ku ta Mario Lobo ku tin 24 título di kampeon di Aruba riba su nòmber i e number 2 ku ta Andy Gomes. Di Bonaire a bini Almar Nicolaas i JC Clementina. Kòrsou tabata representá pa 8 hungadó. Entre otro Devon Meilink kampion di Kòrsou 2015, Dimitri Leon kampion di Kòrsou vários biaha i Henny Metry MVP 2015.

Djasabra tabatin e weganan, hungá den 4 grupo pa saka e mihó 2 pa asina bai ku 8 hungadó Djadumingu pe weganan final. Djasabra mester menshoná e wega entre Mario Lobo i Dimitri Leon den nan grupo, kaminda nan mester a bai tur 5 sèt pa finalmente Mario gana 3-2. Ken por a pensa ku ta e mes un 2 hungadónan aki ta bai resultá e mihonan di e wikènt ey.

Djadumingu weganan a wòrdu hungá, kaminda a bin resultá e weganan di semi final entre Dimitri Leon i Andy Gomes pa despues Mario Lobo kontra Michael Dalnoot. Dimitri i Andy Gomes a faha ku otro, kaminda tremendo partido di pinpòn a keda demonstra.

Dimitri a mustra kon bon prepará mentalmente e la bini i ta gana e number 2 di Aruba ku skor di 3-1. Di otro banda Mario a mustra su nivel i eksperensia i ta gana Michael Dalnoot, ku últimamente ta den bon forma, ku skor di 3-1.

E tremendo final ku tur hende kièr a mira: Mario Lobo di Aruba kontra Dimitri Leon di Kòrsou. Tabatin un bon públiko i nan a haña kos pa mira. Rèlinan fabuloso, largu i rápido. tabata karakterisá e wega.

E partido final aki, ku tabata mihó di 7, a bai kompletu. Na dado momentu den e di 5 wega, empatá 2-2 na sèt, Dimitri ta sufri un leshon na su rudia ku kasi a pone un final na e partido. Ku ayudo e la sigui pero por a mira ku e la pèrdè su konsentrashon un ratu i ta kai atras 3-2. Den e di 6 sèt e la rekuperá i den un tremendo sèt ta bin empatá e wega dor di gana e di 6 sèt 14-12.

Ku e wega empatá na sèt 3-3 Mario Lobo ta bin gana e torneo dor di gana di Dimitri finalmente 4-3. Un tremendo demostrashon di e islanan pa loke ta tènis di mesa. vale la pena pa sigui ku e tipo di torneonan aki ku ayudo di mas sponsor. Un danki inmenso na Compunel & Sons.

May 30, 2016May 30, 2016

Kenley Jansen ta hasi donashon na proyekto AJB

WILLEMSTAD — ‘Alleen Jij Bepaalt(AJB)’ ta un proyekto inisiá aña pasá dor di Fundashon Desaroyo Deportivo Kòrsou (FDDK) huntu ku su partnernan Ministerio di Hustisia di Kòrsou, Ministerio di Hustisia di Hulanda i Fundashon Bon Intenshon ku ta duna 20 hóben e oportunidat pa praktiká e deporte di basketbòl tra’i mèrdia na skol mes, unabes nan terminá nan debernan eskolar bou di guia di Montaña Spartans/FDDK pa e temporada eskolar 2015-2016.

‘Ami, mi mes i mi logronan’ a inisiá na St. Jozef VSBO. Ku e proyekto aki, por a nota kambionan positivo den komportashon di e hóbennan i tambe a mira e estímulo pa hasi deporte tantu dor di nan mes komo esnan rondó di nan. Miéntras tantu e desishon a keda tumá pa alargá e proyekto na VSBO St. Jozef bou di guia di Montaña Spartans/FDDK pa aña eskolar 2016-2017.

Djaweps último, e pelotero yu di Kòrsou Kenley Jansen, representá pa su ruman Verney Jansen, a hasi donashon di bala na AJB, gesto pa kua FDDK ta sumamente gradisí p’e. E akto aki ta un muestra ku nos tur huntu lo logra muchu mas pa nos deporte aki na Kòrsou i mas ku klaro nos hóbennan en partikular.

May 27, 2016

Torneo hubenil di vóliból ‘Keep Calm and Spike On’

WILLEMSTAD — Dia 21 di Mei tabatin inisio di e torneo HUBENIL, “Keep Calm and Spike On” organisá pa e Komishon di vóliból hubenil, KOVONIL, ku animashon di un publiko grandi i ku a gosa di e partidonan ku tabatin den Sala Errol Rooi.

Aki ta sigui e resultadonan di e fecha 21 di mei.:

MINI FEM:

Stakamahakchi vs Shuatanari 2-0

MINI MASK:

Stakamahakchi vs Watakeli 2 2-0

Shuatanari vs Watakeli 1 0-2

Hub B FEM:

Hurricane vs Watakeli 1-2

Stakamahakchi vs Shuatanari 2-1

Hub A FEM:

Stakamahakchi1 vs Shuatanari 2-1

Stakamahakchi2 vs Hurricane 0-2

Djasabra awor 28 di mei e weganan ta kontinuá for di 12 or di merdia te ku 6 or di atardi na Sala Niels Liberia na Suffisant.

Lo bai tin kos di tene barika kontentu i kos di kita set.

KOVONIL kier a invitá tur amante di deporte i di vóliból en partikular pa bin presensia e weganan di e chikitin nan. Korda bin ku animo i un mente positivo.