Otro Archives | Page 11 of 38

May 26, 2016

Torneo di pinpòn Torneo Compunel & Sons

WILLEMSTAD — Pa medio di e komunikado aki Federashon di Tènis di Mesa Kòrsou kièr invitá tur fanátiko di bon pinpòn pa bin presensia Torneo Compunel & Sons ku lo pone sèn kèsh i trofeo disponibel pe ganadónan. Lo ta presente den e torneo aki hungadónan di Aruba i Bonaire.

Di Aruba bo por bin mira den akshon entre otro Mario Lobo I Andy Gomes ku ta forma e ekipo di Aruba ku ta un di e mihonan den Caribe pa loke ta nan kategoria master.

Bonaire tambe ta manda Almar Nicolaas i J C Clementina , dos di nan mihó hungadónan. Huntu ku nos mihó 8 lo bai tin bataya tantu Djasabra komo Djadumingu na Sala Rekreo Irene Moreno na Muizenberg, banda di Little League Ball Park.

Djasabra ta start 5.00 di atardi ku e partidonan kaminda lo saka di e 4 grupo di 3 i e mihó 2 di kada ku lo pasa pa e finalnan su siguiente dia.

Djadumingu lo start mainta 10.00. Tur wega ta na nos sede na Muizenberg. Ta spera ku e torneo lo yega su final alrededor di 4.00 di atardi.

May 26, 2016

Resultado Full Moon Real Street Legal

WILLEMSTAD — FAC i su Komishon Organisadó ta yama danki na tur esnan ku ainda ta duna nan bon reakshon pa e karedanan di selebrashon 45 aña drag racing organisá riba islanan ABC y 20 aña di Curaçao International Raceway na Ronde Klip.

Despues di un eksitoso Full Moon Real Street Legal djasabra último, ta momentu pa Ronde Klip Shootout pa e point series ku lo tuma luga djasabra awor 28 di mei.

Na fin di aña lo bai skohe e mihó shofùr di aña.

Despues dje promé evento dje aña aki, resultado dje kampionato di kategoria di Street Bracket ku ta kore di 18.00 sekònde pa 14.00:

Lider di RKS pointseries 2016 Street Bracket ku 150 punto ta Julien “Andy” Bonifasio (Toyota Starlet Turbo). 2. Sharnella Martina – 130 punto. 3. Cliffton Nicolina (Toyota Starlet Turbo) – 110 punto. 4. Marlon Rock (Toyota Starlet Turbo), David Tannelek (Toyota Starlet Turbo) y Jonnathan Damiana (Toyota Starlet Turbo) – 90 punto. 5. Timithy Brigita (Honda CRX Turbo) – 70 punto.

E resultado dje kampionato di Street E.T. Bike ku ta kore di 11.50 pa mas rápido ta asina aki:

Lider di RKS pointseries 2016 Street E.T. Bike Christopher “Cleo” Soerka di “JCJ Racing” (Hayabusa) ku 147 punto. 2. Edburth Broos “SBR” (Hayabusa) – 140 punto. Na di 3 Sajid O’Neil “DMR” (Kawazaki ZX-12” y Gerald Allee “Merite Racing” (GSR-1100). 4 tin un empate entre Patrick Isenia “Quart Mile Racing (Hayabusa), Jordianne Freitas Franca “Balachi Racing” (Hayabusa) y Juralden Merite “Merite Racing” (GSR- 1100) – 110 punto. 5. Sigmaro “Maro” Rampenburg “Revolution Racing” (Hayabusa), Signiel “Siggy Maze” Streden “Maze Racing” (Hayabusa), Junny Lourens “JCJ Racing” ( Hayabusa), Jairo Michell “Raising Star” (Hayabusa), Encho Henrique “SBR” ( GSR 1000), Naramly “Remy” Trenidad “SBR” (Hayabusa) i Angel Wilson “DMR” (Hayabusa) – 90 punto.

Heavy Bracket No Box ku ta e outo nan ku ta kore 13.99 pa 8.90. E resultado dje kampionato ta:

Lider di RKS pointseries 2016 Heavy Bracket No Box ta Gino Sprockel ku su Chevy Camaro ku 150 punto 2. Timithy Brigitha ku su “Kaylee” Honda CRX Turbo – 137 punto 3. David Tannelek “Baasbol” Toyota Starlet Turbo i Lisandro Pikeur “El Intruso” Honda Civic Turbo ku110 punto. 4 Senthley “Polin” Martina ku “Diablitu” Toyota Starlet Turbo, Marvin Muzo ku Toyota MR2 y Jonnathan Damiana “Game Over 2” Toyota Starlet Turbo ku 90 punto. 5 Marlon Tai “Tyfoon” ku Nissan 250 SX, Julien “Andy” Bonifasio ku “Dynamic 1” Toyota Starlet Turbo, Jules Streden “Hontoya” Toyota Starlet Turbo, Jorge Veira ku Honda CRX Turbo, Vianny Muzo ku “Cosmatic” Toyota Starlet Turbo i Javier “Porky” Augusta “Grigorcito” Toyota Corolla Turbo ku 70 punto.

Heavy Bracket Box ta aki e outonan di mas hot ku ta e outo nan ku ta kore 11.50 pa 9.20:

Lider di RKS pointseries 2016 Heavy Bracket Box ta Virgil Henriquez ku su “Mr. Holley 2” ku 150 punto. 2. R,aeshel Maduro ku su “Zembl’é” ku 130 punto. 3. Johnny De Poula ku “Don Chema Dragster” ku 117 punto. 4. Johannes De Boer ku “Mr. Holley 1”, Ronald Mendez ku “Purple People Eater” ku 130 punto. 5. Andre Raphaela ku “Mr. Punch 1”, Jacob “Akito” Berkemeijer ku “Mr. Dijk Jr”, Sharlon “Pandushi” Look ku su “Pandushi Express”, Yesenia Meulens-Corasol ku su “Joker Dragster” y Jean Carlo Correia ku su “Shaka Zulu Dragster” ku 90 punto.

Djasabra 28 di mei bar y kushina ta bon di stòk i na un bon preis. Entrada ta via di Kaminda George Willems ántes Bonam weg y ta kosta Naf. 10,= pa adulto i mucha bou di 12 aña ta paga Naf. 5,=.

Danki ta bai na Universal Motor ku outo nan Kia, ARPO Body shop, EMS Dyno, Kuzeta ku Shell Helix, AVF Antiliaanse Verf Fabriek, Star Motors, Curoil, Monster, Napa Auto & Truck Parts, Alcolado Glasial, IEPA Agencies ku LS2300.

Pa mas informashon y foto di e aktividat di Real Street Legal, Ronde Klip Shootout, Drag Fest 2016 i kareda nan lokal i internashonal por bishita nos website nan ofisial: www.curacaodrag.com, www.dragactioncuracao.com, www.tcobcur.com, www.adrena-zine.com, www.rpmaruba.com, www.racejunkies.com, www.radicalcompetition.com huntu ku nan página di FaceBook y tambe riba FaceBook like page di BoyzToyz i speedoutlawscuracao.

May 24, 2016May 24, 2016

Inskripshon pa Torneo Komersial Liga 40 2016 a habri

WILLEMSTAD — Inskripshon pa e Torneo Komersial di Liga 40 2016 a habri. Ya tur preparashon ta den full swing pa Torneo Komersial di Liga 40 2016. Esaki ta e di tres torneo Komersial ku liga 40 ta organisá. Intenshon di e torneo ta pa e hungadónan di sòftbòl den e timnan di kompania ta mas tantu huntu durante di aña.

Nos ke urgi tur kompania ku ta deseá na partisipá na e torneo aki pa inskribí mas pronto ku ta posibel.

Kompanianan ku ta interesá na forma parti di e torneo Komersial di Liga 40 2016 por inskribí via di e-mail adrès: liga_soshal_2016@outlook.com

*Menshoná nòmber di kompania, Nòmber di persona di kontakto, Number di telefòn, i e-mail adrès di e persona di kontakto. Tambe por indiká e kategoria ku e kompania ta deseá na inskribí pe.

E Kategorianan ta:

Femenino Sosial
Maskulino Sosial
Maskulino Challenger
Maskulino / Femenino kombiná COED

Suma di partisipashon ta : Nafl 250,00

Último Fecha pa Inskripshon lo ta djaweps 02 di yüni 2016

Djaweps 09 di yüni 2016 lo tin un reunion informativo pa tur tim partisipante

Torneo Komersial Liga 40 lo start djaweps 23 di yüni 2016

(Pa mas informashon por yama Sr. Gurtney Adriana na Cel. 5256638)

May 20, 2016May 20, 2016

Real Street Legal Full Moon 2016 djasabra awor na Pista

WILLEMSTAD — Despues di 1 luna i mei sin a kore awèl djasabra awor 21 di mei tin e Real Street Legal, RSL, y Real Street Outlaw. Ta e edishon di Full Moon. P’esei ta kambia e djadumingu pa djasabra pa asina kuminsá 19.00 (7’or) y ta kore te ku 22.00 (11’or).

Tur hende ku tin un vehíkulo legalmente di kùr y ku seguro mas Ang. 5,= èkstra por hasi e uso di e pista pa asina wak su abilidat y di e vehíkulo den speed.

Kòrda riba e vestuario pa koredor nan di outo ku ta karson largu, shirt ku manga i sapatu ku mea.

Tin e lista di e mihó den Real Street Outlaw Bikes:

Sigmaro “Maro” Rampenburg BMW
Broertje Espasia BMW
Jenny Martis Suzuki Hayabusa 1300
Hubert Constancia Suzuki Hayabusa 1300
Dennis Schoenmaker Suzuki Hayabusa 1300
Javier “Bill” Wooter Kawasaki 1300 ZX
Narely “Remy” Trinidad Suzuki Hayabusa 1300
Roger “Ocean” Felicia Suzuki Hayabusa 1300
Reno Best Ducati
Jorge Veira BMW

Lista di e mihó nan di Real Street Outlaw Heavy Street:

Otmar Balooche Chevrolet Corvette
Brandon Westmaas Mazda RX-7
Marlon TaiNissan 280 SX
Frank Brandao Lexus F1 350IF
Daniel Da Silva Pontiac GTO
Willliam “Kikiet” Mourillion Toyota Starlet
Havic Hinds Pontiac G8
Ruminnige “Niki” Stephens Toyota Corolla
Steven Soeterboek Buick Gran Continantal
Ribeiro De Sargo Toyota Supra

Lista di e mihó nan di Real Street Outlaw Easy Street ku ta kore di 14 sekònde mas slow.

Lorne Zimmerman Honda Civic
Harvy Charles Honda Integra
Edmond “Monty” Henriquez VW Carmaguia
Germain Winklaar Honda Civic
Kevin Calmero Toyota MR 2
Giovanny Boekhoudt Toyota Crown
David Tannelek T-Rex
Ronal Mendez Honda Integra
Andy Juliana Toyota Starlet

Entrada ta via di Kaminda George Willems, esta via Pit. Adulto ta drenta pa Ang. 5,= y mucha bou di 12 aña ta drenta pa Ang. 1,=.

Bar y kushina ta bon surti i ku preis nan pa un y tur.

Ta estriktamente prohibí pa drenta e fasilidat nan di Curaçao International Raceway ku propio konsumo. Lo bai na kontrolá tur vehíkulo na entrada pa ku drentamentu ku konsumo di tantu pa kome komo pa bebe.

May 19, 2016May 19, 2016

Michael Dalnoot kampion di Torneo Harry Walters

WILLEMSTAD — Djamars siman pasá 10 di mei a start e torneo, ku tur aña ta bin bèk Torneo Harry Walters. Sr. Harry Walters q.e.p.d. tabata pa mas ku 10 aña presidente di nos federashon di tènes di mesa den dekada 60 i kuminsamentu di 70. Su famia enkabesá pa su señora sekondá pa su jui muhe i dos jui hombernan pa e amor di e tata ta pone tur aña premio disponibel, ora ku e torneo aki wòrdu organisá pa federashon. Tur aña e famia kompletu ta presente i ta masha agradesí na direktiva pe honor ku nos ta duna sr. Harry Walters.

Ku un partisipashon grandi di 20 hungadó e torneo a ranka sali ku 4 grupo di 5 hungando e weganan eliminatorio pa saka e mihó 8 nan pe weganan final.

Ayera 17 di mei a sigi ku e kwart finalnan, kaminda e mihò 4 nan rankeá a sigi pe semifinalnan. Tabata Devon Meilink ku mester a bai midi forsa ku Dimitri Leon. Devon e biaha aki atrobe a sa di sali di e porta grandi, derotando Dimitri sin mucho doló di kabes 3-1. Na e otro mesa tabata Michael Dalnoot a sa di kita Henny Metri for di kaminda ku e skor pèrta di 3-1. Den final ku a bai pe mihó di 7 Michael Dalnoot a bin ku un formula di wega ku a desifra Devon su wega kompletu i pa gana e Torneo Harry Walters fasil 4-0. Despues entrega di trofeonan a wòrdu hasí pa famia Walters na e ganadornan.

May 18, 2016May 18, 2016

Interes ta grandi pa kongreso FDOK

WILLEMSTAD — Hopi interes pa partisipá i duna un aporte aktivo na futuro desaroyo di deporte na Kòrsou, traves di un kongreso organisá pa Federashon Deporte i Olímpiko Korsou (FDOK).

Djárason 18 di mei ta e último dia ku por inskribí pa partisipá na “Kongreso 3F, den kuadro di 85 aña deporte organisá”. Sinembargo djárason mèrdia a sera e inskripshon debí ku a alkansá e kantidat máksimo di 40 partisipante. Djabièrnè 20 di mei e kongreso ta inisiá den sala di reunion di FFK na Brievengat. Djasabra 21 di mei ta kontinuá den edifisio di FDOK den Roodeweg 92A, ku un seshon mainta i ta finalisá ku e kongreso atardi. E kongreso 3F, lo trata e 3 aspektonan prinsipal di un maneho di deporte ku ta Fasilidat, Finansa i Formashon.

Un danki spesial na tur e oradónan ku a inskribí i prepará pa duna e kongreso un balor adishonal ku nan análisis i rekomendashon riba e tres tópikonan konserní.

May 17, 2016May 17, 2016

Interkambio entre Boneiru i Kòrsou den waterpolo

WILLEMSTAD — Dia 14 i 15 di mei último e ekipo di waterpolo di Boneiru Baracuda tabata na Kòrsou pa un interkambio ku Swim Club Orca Curaçao.

Boneiru a partisipá ku un ekipo di kategoria señor i un ekipo di U16. Meskos ku na Kòrsou, na Boneiru tambe, e deporte di waterpolo ta den desaroyo i tur dos pais ta trata di subi e nivel pa por ta mas kompetitivo den nos region, manera Kòrsou tabata den e añanan 2000 pa 2011.

Tabata un fin di siman hopi fruktífero pa e deporte di waterpolo. E atletanan a siña hopi i a hunga hopi wega. Esaki a yuda hopi na atkerí eksperensia, lokual ámbos pais/ekipo mester pa bira mihó.

Baracuda di Boneiru a sa di gana un (1) wega den e kategoria señor ku skor di 8 – 7 i Orca di Kòrsou a sa di gana dos (2) wega ku skor di 6 – 3 i 8 – 6.

Den e kategoria di U16 Boneiru tabata superior riba Kòrsou. Den e kategoria aki kwater (4) wega a wòrdu hunga di kual un seri di mihó di 3 ( skor 11 – 3, 6 – 4 i 16 -1) i un (1) wega di treinen kaminda atletanan di Boneiru i Kòrsou a meks i hunga kontra di otro kaminda e skor a bira 7 – 6. E wega último aki a sirbi pa atkerí mas eksperensia di wega ainda i hunga ku otro atleta ku bo no tin kustumber di hunga kuné.

Den e kategoria U12 (minipolo) Swim Club Orca Curaçao a partisipá ku dos tim. Aki e dos timnan a kompetí kontra di otro. E tim di Orca1 bou di guia di coach Radjinder Angelica a sa di gana e promé wega ku skor 2 -1.Den e di dos wega e tim di Orca 2 bou di guía di Najif Jansen a sa di gana ku skor di 6 – 3.

Minipolo ta pa e muchanan bou di 12 aña (nan por kuminsá for di 5 aña) ku ta práktika e deporte di waterpolo. Na minipolo ta hunga e waterpolo den e baki chikitu, ku golnan mas chikitu i ku bala di waterpolo mas chikitu.

E muchanan tin mag di landa, kore i kana, pero tur sobra regla di waterpolo ta keda apliká.

Aña pasa yüni Swim Club Orca Curaçao tabata di bishita na Boneiru. E fin di siman ku a pasa Boneiru a bishita Kòrsou i dia 23 pa 25 di sèptèmber awor Kòrsou lo ta di bishita na Boneiru atrobe.

Direktiva di Swim Club Orca Curaçao ta yama danki na tur ku a aportá pa e interkambio aki por a tuma lugá.

May 16, 2016May 16, 2016

Kongreso riba fasilidat finansa i formashon

WILLEMSTAD — Djárason 18 di mei ta e último dia ku por inskribí pa partisipá na “Kongreso 3F, den kuadro di 85 aña deporte organisá”di Federashon Deporte i Olímpiko Kòrsou (FDOK). E selebrashon ta entre otro den forma di un kongreso dia 20 i 21 di mei próksimo, kaminda tur persona enbolbí den deporte, por kompartí nan pensamentu riba aspektonan ku por mehorá, a base di nan eksperensia.

E kongreso 3F, ta konsistí di tres seshon durante kua e tres aspektonan prinsipal di deporte Fasilidat, Finansa, Formashon lo ta e tópiko sentral. A skohe e 3F debí ku esei ta e ingredientenan krusial den un maneho pa deporte, tantu pa e sektor gubernamental komo sektor partikular.

E kongreso deportivo lo inisiá djabièrnè 20 di mei pa 7’or anochi den sala di reunion di FFK na Brievengat ku e tópiko fasilidat.

Djasabra mainta 9’or ta kontinuá den edifisio di FDOK den Roodeweg 92A ku e tópiko “finansa”. E di tres i último seshon lo kuminsá 3’or den edifisio di FDOK, kaminda lo elaborá riba e tópiko “formashon”.Tur partisipante lo risibí un sertifikado di e seshon di e seshon ku nan a partisipá.

Partisipashon ta grátis, sinembargo pa motibunan logístiko, tur persona ku ta interesá pa partisipá mester inskribí adelantá, pa medio di un email na info@fdok.cw, ku menshon di nan nòmber i nr. di telefòn. Pa motibu organisatorio i logístiko djárason 18 di mei ta e último dia ku por inskribí.

Un partisipante tambe por ta un oradó riba un o mas tópiko. Un invitashon na persona ku ta deseá di duna nan opinion, análisis, sugerensia, rekomendashon, ets. riba un o mas di e tres tópiko, Fasilidat, Finansa, Formashon, pa inskribí komo oradó. E tin di manda un email na info@fdok.cw, ku menshon di nòmber i nr. di telefòn i e tópiko(nan) i i sekretario Rein Persaud lo tuma kontakto ku nan.

Un danki spesial na entre otro e siguiente personanan ku a inskribí pa duna nan aporte komo oradó na e kongreso i elaborá riba un o mas tópiko: Errol Hernandez, Nazeen Approo, Nidia Daal, Glyselle Hanst, Albert Martis, Josue Suart, Janike Maria, Leidy ?Girigorie, Ries van Lomwel; Nathaniel Veeris, Renny Oehlers, Napoleon Boekhoudt, Edwin Baas.

May 14, 2016May 14, 2016

Èmpayer Ulrich “Pel” Hernandez ku gran prestashon den eksterior

WILLEMSTAD — Durante e periodo di 3-9 di Mei nos arbitro lokal, sr. Ulrich “Pel” Hernandez a asisti komo èmpayer na e di 39 Kampionato Habri pa Hubenil di Spaña. E kampionato a tuma lugá den Palacio de Deporte y Congresos na Girona.

Tabatin na e kampionato aki 46 èmpayer, di kua 15 invitá i sobra tabata di Spaña. Tabatin na e kampeonato aki partisipashon di 221 deportista hóben di 28 pais, mayoria di Oropa, pero ku hopi di Asia tambe.

Tabata den un lapso di ménos ku 3 aña ku Pel ta partisipá na 3 torneo grandi internashonal. Promé tabata na 2014 na Barbados, luego aña pasá na Puerto Rico i awó na Spaña.

Un pabien na Pel pa su tremendo desempeño i su determinashon pa bira un gran èmpayer internashonal, representando Kòrsou dignamente.

Na final Federashon Tènis di Mesa Kòrsou kièr informá tur bon fanátiko di tènis di mesa pa e final di kabayero Djamars awó den e torneo Harry Walters. Bin mira nos hungadónan ku a pasa pa e weganan final ku ta bai bira hopi interesante. E weganan ta kuminsá 8.00 na Sala Rekreo Irene Moreno na Muizenberg, banda di e parke di Little League.

May 9, 2016

GRANDIOSO KONGRESO RIBA DEPORTE

WILLEMSTAD — Aña 2016 ta nifiká ku deporte organisá na Kòrsou tin 85 aña di eksperensia.

Un époka ku ta enserá 17 lustro o mas di 8 dékada. Un periodo asina largu ta kontené eksperensia amplio riba tur ingrediente prinsipal ku deporte ta kontené.

Esei ta motibu pa Federashon Deporte i Olímpiko Kòrsou (FDOK) organisá un kongreso 3F, Fasilidat, Finansa, Formashon ku ta ingredientenan prinsipal den un maneho pa deporte, tantu pa sektor gubernamental komo inisiativa partikular.

E kongreso deportivo lo tuma lugá djabièrnè 20 i djasabra 21 di mei próksimo den edifisio di FDOK na Roodeweg 92A.

Partisipashon ta grátis, sinembargo pa motibunan logístiko, tur persona ku ta interesá pa partisipá mester inskribí adelantá, pa medio di un e-mail na info@fdok.cw ku menshon di nan nòmber i number di telefòn. Nan lo risibí e programa.

Tin dos (2) manera pa duna un aporte i kontenido na e kongreso 3F.

Komo partisipante komun i komo partisipante oradó.

Un invitashon na tur persona ku ta deseá pa duna nan opinion, análisis, sugerensia, rekomendashon, ets. riba un o mas di e tres tópiko, Fasilidat, Finansa, Formashon, pa inskribí komo oradó. Un oradó ta haña 10 minüt pa trese su punto di bista dilanti riba e tópiko konserní.

Djabièrnè 20 di mei e tópiko sentral ta “fasilidat”, djasabra 21 di mei mainta lo elaborá riba “finansa” i djasabra atardi lo klousura ku tópiko “formashon”.

Un invitashon na tur persona ku ta interesá pa duna un aporte komo oradó, pa e-mail nan nòmber i number di telefòn na info@fdok.cw i sekretario Rein Persaud lo tuma kontakto ku nan.