Otro Archives | Page 13 of 38

March 23, 2016March 23, 2016

Desaroyo di FDOK 85 aña

WILLEMSTAD — Awe 23 di mart ta kumpli 85 aña, ku fundeshi di aktual Federashon Deporte Olímpiko Korsou (FDOK) i tambe NAOC a keda formalisá. Un pabien i palabranan di apresio na tur dirigente ku a forma parti di e organisashonnan konserní ku awendia ta karga e nòmber FDOK. Un palabra di gratitut pa tur federashon i nan klupnan afiliá, nan deportistanan, ku a forma parti di e famia deportivo durante 85 aña. Un danki na tur dirigente atministrativo ku a duna nan aporte komo miembro di direktiva di federashon i tambe di nan klup di deporte. Un ekspreshon di rekonosementu pa tur entrenadó, coach, masahista, médiko, para médiko, ku a prepará deportistanan pa kompetensianan lokal i internashonal. Un gratitut na tur dirigentenan ku a invertí tempu den guia di kompetensia, komo skorer, rèfri, umpire, ofisial di liña, ofisial di tempu ets. Tur e personanan ariba menshoná ta tin un aporte kolektivo signifikante na e desaroyo di deporte pa nos pais Korsou. E istoria riba tur tereno i den tur sentido ta hopi interesante. Komo teritorio, a inisiá primeramente komo pais “Curacao en de onderhorigen’, despues komo pais Antia Ulandes i awendia ta pais Korsou nos deportistanan ta representá.

Mas interesante ta bira si wak e desaroyo komo organisashon i tambe e nòmber konserní. Primeramente a inisiá komo Curacaose Bond voor de Lichamelijke opvoeding (CBLO) ku a keda fundá 23 di mart 1931. Dia 15 di mei 1950 a risibí rekonosementu di IOC.

Remarkabel ta ku dia 25 di aprel 1950, CBLO a keda kambiá pa NABLO (Nederlands Antilliaanse Bond voor de Lichamelijke Opvoeding). Mas interesante ta e echo ku – diesun aña despues- dia 11 di yüli 1961 a trese un kambio fundamental ku ta tin su konsekuensia pa e forma ku a manehá deporte na nivel gubernamental i nivel partikular. A disolvé NABLO, ku a keda remplasá pa no ménos ku 3 entidat. E promé ta VECUSPO ( Verbond Curacaose Sportorganisaties) ku a bira despues CSF (Curacaose sport Federatie, ku a bira CSOF (Curacaose Sport en Olympische Federatie) i despues te awe ta FDOK (Federashon Deporte i Olímpiko Korsou). E di dos ta SES (Stichting Exploitatie Sporttereinen). E di tres ta Nederlands Antilliaans Olympisch Comite (NAOC) ku despues di 2012 no ta aktivo mas.

Dia 23 di aprel próksimo durante seremonia i inougurashon di miembronan di salon di fama FDOK lo duna atenshon na e selebrashon di 85 aña di deporte organisá na Kòrsou.

Un pabien kaluroso na mundu di deporte di Kòrsou. Alabes un danki super spesial na e siguiente entidatnan ku durante 85 aña ta tin i te awe tin un sosten hopi signifikante i balioso pa nos mundu di deporte: gobièrnu, spònsernan, prensa i tambe pueblo di Korsou ku a sostené kompetensia di deporte ku nan presensia. Masha pabien i danki pa 85 aña di sosten.

March 9, 2016March 9, 2016

Kòrsou ta kla pa saka kara den InselAir Interinsulair 2016

WILLEMSTAD — E ora 0 ta yegando. Ya pa mañan atardi e promé wega pa loke ta InselAir Interinsulair ta tuma lugá!

Kòrsou su representantenan ta kla; e kampeon di Kampeonato ACU Deporte Eskolar di vòlibòl skol avansá damas, a keda International School of Curaçao, kende lo hunga kontra di e kampeon di Bonèiru, Scholen Gemeenschap Bonaire, e kampeon di Aruba Colegio San Nicolaas, i tambe e ekipo di St. Maarten.

Den ACU Deporte Eskolar basketbòl mucha hòmber skol di fundeshi, Sta Rosa de Lima ku ta e kampeonnan di e kampeonato ACU Deporte Eskolar lo midi forsa kontra di Boneiru Kolegio Papa Cornes, di Aruba Skol Basiko Washington, i e ekipo di St. Maarten.

E promé partido(basketbòl) lo ta djaweps 17:30 entre Sta. Rosa de Lima(Kòrsou) kontra Kolegio Papa Cornes(Bonèiru) na Sala Niels Liberia na Stadion di Suffisante, miéntras ku e promé partido di vòlibòl lo ta entre International School of Curaçao lo ta 18:30 na sala Niels Liberia mes.

Djabièrnè lo kontinuá ku vários partido di basketbòl i vòlibòl for di 10’or di mainta den Sala Errol Rooi na SDK. E partido ku varios ta pendiente di dje, ta esun di vòlibòl ora ku Kòrsou enfrentá Aruba. E apertura ofisial lo konta ku diferente mandatario tantu lokal komo for di e islanan partisipante i tambe un show di kita sombré!

Djasabra tambe lo tin diferente wega durante di dia, kua lo finalisá pa 6or ku un seremonia di klousura, unda lo tin un ‘surprise act’ spesial pa nos hobennan.

Un invitashon na un i tur pa kue kaminda pa tantu stadion di Suffisant djaweps, komo SDK djabièrnè i djasabra pa abo tambe presensiá e talento deportivo di nos hobennan. Pa esnan ku no por asistí, nos planta nashonal TeleCuraçao lo hasi transmishon bibu di e apertura ofisial i e wega ku ta sigui djis despues entre Kòrsou i Aruba, kuminsando 5or di atardi.

Via di e página di Facebook di FDDK(facebook.com/FundashonDesaroyoDeportivoKorsou) bo lo por sigui tur desaroyo rondó di e evento aki!

March 4, 2016March 4, 2016

Resultado Kampionato nashonal bola 10?

WILLEMSTAD — Federashon Biyar Kòrsou ya a organisá su di dos evento pa lokual ta trata 2016 , na yanüari a tuma lugá kampionato nashonal bola 9 kaminda Jeffrey Nieuwenhuyzen a titulá kampion. Weekend tras di lomba e di dos evento a tuma lugá kual tabata e kampionato nashonal bola 10, e evento aki a konta ku partisipashon di 27 biyardista.

For di djárason a inisiá ku e partidonan p”asina a bin yega na e último fecha kual tabata djadumingu 28 di febrüari .E gran final a tuma lugá entre e aktual no. 2 di ranking kual ta Roukos Tannouri y The Legend Johnny Hellmund, kende algun siman atras a kumpli e bunita edat di 70 aña i still going strong.

Den Johnny su ruta pa final e ta gana Mark Janga 9-8, Julian Rijna 9-6 y e ta pèrdè kontra Roukos 8-9 pa despues e sigi ku viktorianan riba Donald Winklaar 9-5, David Prins 9-7 i Michael Arvelo 10-7. Roukos su viktorianan pa e por a yega final tabata riba Marlon Pietersz 9-2, Robin Aproo 9-3, Johnny Hellmund 9-8 i Michael Arvelo 10-7.

E partido final tabata kompleto dominá pa Roukos ku no a duna The Legend un chèns . E tabata manera ta bisa den terminologia di biyar ” Skerpi”e no tabata faya ningun bola i kasi no a komete ningun eror. Un final “one sided” y e skor final ta demostrá esei , 11-4.

E resultadonan final ta empatá na puesto 5 , Donald Winklaar y Mitch Breedlove , puesto 4 David Prins , puesto 3 Michael Arvelo , subkampion nashonal Johnny Hellmund y Kampion Nashonal Bola 10 2016 Roukos Tannouri.

Nos di Federashon Biyar Kòrsou ta hopi kontentu ku por fin ta duna honor na un gran deportista , un persona ku a akumulá mas di 60 título den su deporte, a dura, pero manera nan ta bisa na spañó ” Ya era hora”. Den luna di aprel , NOS Johnny Hellmund lo drenta salòn di fama, nos di deporte di biar ta kontentu ku por fin e deportista aki ta haña e rekonosementu ku e meresé .

February 29, 2016February 28, 2016

Swim Club Orca Curaçao ku proyekto pa mucha di 3 i 4 aña familiarisá ku awa

WILLEMSTAD — Direktiva di Swim Club Orca Curaçao ta partisipá ku djasabra dia 05 di mart 2016 lo kuminsá ku kurso pa muchanan di 3 i 4 aña familiarisa (kustumá) ku awa. E kurso lo tin un durashon di tres (3) luna i dos (2) biaha pa siman tin treinen. Riba djasabra treinen ta di 16:00 or pa 17:00 or i djadumingu treinen ta di 10:00 or pa 11:00 or na Pisina Bennie Leito.

Meta di e kurso aki ta pa e muchanan di 3 i 4 aña familiarisá/kustumá ku awa, di moda ku nan por manehá fásil den awa. Ora nan tin 5 aña nan por partisipá na e kurso pa diploma “A” sin problema. Na final di e kurso lo tin un tèst i e muchanan ku partisipá na e tèst lo risibí un sertifikado.

Kabando e kurso aki no ta nifiká ku e mucha sa landa, sino ku e por defendé su mes. Semper e mester tin un “gordel” bistí i e mester ta huntu ku su mayor ora e ta na kantu òf den un pisina òf laman. E kurso ta kosta fl. 150,00.

Pa inskripshon i mas informashon tokante e kurso aki por yama sr. Vernon Toré na telefòn 529-6586.

February 25, 2016

RESULTADO TORNEO DONIC

WILLEMSTAD — Djamars último Federashon Tènis di Mesa Kòrsou a konkluí su promé torneo ku tabata esun di kabayero individual patrosiná pa Donic. Tabatin e weganan final despues ku djabièrnè último 8 hungadó a klasifiká for di un partisipashon di 14 hungadó. Djabièrnè por poko tabatin 2 sorpresa grandi ora ku Napi Boekhoudt por poko a saka Nonno Vos for di e torneo I mesun kos Hensley Wentwoord kontra Henny Metry, e hungadó mas balioso di aña pasá. Tur dos di e gran hungadónan aki mester a lucha despues di tabata atras 2-0.

Djamars ey Raymond Begina a sa di derota e number 3 rankeá di aña pasá Jaysron Mathilda ku skore fasil 3-0; Raymond Begina ku ta entrenando mas frekuente últimamente kaminda por nota gran progreso bèk den su wega. Giancarlo da Costa, ku tambe ta trahando fuèrte, ta sa di gana di Nonno ku skore pèrta di 3-2. Devon Meilink ta gana Hensley Wentwoord fasil ku skore di 3-0, miéntras ku e último resultado di e kuart final aki ta ku Henny Metry ta gana Rouchel Hernandez 3-0.

Den e semi final Devon Meilink ta gana Giancarlo 3-0, miéntras Henny Metry ta gana di Raymond Begina tambe 3-0.

E ora ey nos a haña den e final Devon Meilink, ku for di dia den Augustus a drenta komo miembro di nos federashon, no a konosé derota i kontra Henny Metry rankeá aña pasá komo number 1, ta sigi ku su racha triunfal.

Por bisa ku Devon Meilink ta e mihó hungadó di tènis di mesa di aktualidat. He is the man to beat. Ku basta fasilidat e ta gana Henny den final 4-2 i korona su mes komo e promé ganadó di nos torneo di 2016.

Na final sr. Franklin Mathilda a hasi entrega di e trofeonan na e finalistanan den presensia di e kuerpo di árbitro.

February 25, 2016

FDDK kontentu ku patrosinio di InselAir ku deporte eskolar

WILLEMSTAD — Na aña 2007, InselAir a introdusí un fondo destiná pa proyektonan humanitario, kultural i deportivo. E enfoke di nan semper tabata riba proyektonan ku ta involukrá hubentut, kua grupo FDDK i InselAir ta mira komo e futuro ku mester invertí aden pa un kambio positivo, loke ta kontribuí na e enrikesimentu i desaroyo di nos pais.

E aña aki, Inselair a duna FDDK un man pa yuda realisá un di e eventonan deportivo ku ta trese hobennan di varios isla huntu. Ta referí aki na weganan Interinsulair, kua e aña aki ta konta ku partisipashon di Aruba, Bonèiru, Sint Maarten i Kòrsou. E hobennan aki lo kompetí kontra otro den basketbòl i vòlibòl.

Despues di e kompetenshanan aki e fin di siman di 10 di mart próksimo, lo sigui na Aruba i Bonèiru den luna di aprel.

InselAir a kontribuí ku e transporte pa e hubentut por biaha di i pa e diferente destinashonnan unda e weganan interinsulair lo tuma lugá.

FDDK ta sumamente gradisí na e kontribushon di InselAir, motibu pa kua e weganan e aña aki ta karga e nòmber ‘Inselair Interinsulair 2016’.

Pa engradisemtu di nos Kòrsou nos tur, inkluyendo empresanan, mester inbolukrá nan mes mas den komunidat i aportá, lokual InselAir ta un bon ehèmpel di dje.

February 24, 2016

Djadumingu awor “Real Street Legal y Real Street Outlaws 2016”

WILLEMSTAD — FAC y su Komishon Organisadó ta yama pueblo, fanátiko i koredornan masha danki pa e respòns duna nos aktividat nan di 2015. Ketu bai ta sigui drenta reakshon nan positivo tantu lokal komo internashonal rondó di nos aktividat nan. Y e aña aki ta selebrashon di 45 aña Drag Racing aki na Kòrsou i 20 aña Curaçao International Raceway na Ronde Klip.

Djadumingu awor 28 di febrüari 2016 lo bai tin e di promé aktividat di 2016, ku ta forma e total di 9 aktividat pa e aña aki di “Real Street Legal”, RSL.

Reglanan

Vehíkulo mester tin “keurings kaart” / karchi di kùr pa por kompetí.

Street tires y SEMI slicks lo wòrdu aseptá. E tire mester tin grove ( liña ) pa por kore den awa! Pues si bo no por kore den áwaseru kuné, e no ta legal!

Motosaikel nan mester tin e vestuario apropiá. (full pak, sapatu, hèlm) y ta riba Street Tires òf riba Semi Slicks.

Scooter nan mester tin hèlm I ta konsehá un jacket.

Lo konsehá tur driver / shofùr ku ta kore bou di 13.99 pa bisti hèlm.

Pa 16.45 / 4.45 di atardi tur koredó ku ta partisipá ku e lista di e mihó 10 nan, mester ta presente i pa pasa nan challenge / reto pa e “Race Master”, pa asina ku ta 17.00 / 5’or kuminsá ku e “Match Race” nan.

Pe eventonan aki LO NO PONE TRACTION COMPOUND! Entrada general ta Ang. 5,= pa Adulto i mucha bou di 12 aña ta kontribuí ku Ang. 1,=.

Pa e promé aktividat aki tur outo lo kore pa registrá nan mihó tempu pa asina nan subi di puesto riba e lista nan di e kategoria basa riba e tempu nan ku nan e registrá. Pues e vehíkulo ku mihó tempu lo subi nan number 1 i basa di e tempu lo sigui riba e lista te ku number 10.

2016: KAMBIONAN PE SEKSHON DI “REAL STREET OUTLAWS”

OUTONAN: lo wòrdu parti den 2 kategoria

HEAVY STREET: outonan ku ta kore bou di 13.99 sekònde: < 13.99
EASY STREET: outonan ku ta kore riba 14.00 sekònde: >14.00
EASY STREET OUTO: e outonan ku ta kore Challenges, lo kore HEADs UP, pero ku e BREAKOUT RULE. Si nan kore mas lihé ku 14.00 nan ta pèrd’é. Outomátikamente nan ta bai over pe kategoria HEAVY STREET

POINT SERIES:

Lo otorgá punto n’e TOP 10 di kada kategoria (inkluyendo bikes)
1e logá lo haña 100 punto, 2 à 9, 3 à 8, 4 à 7, 5 à 6, 6 à 5, 7 à 4, 8 à 3, 9 à 2, 10 à 1
Best Reaction Time / Mihó Reakshon na Lus: den kada kategoria lo otorgá 10 punto p’e vehíkulo ku den e Challenges pone e Best RT.

LANES: e outonan ku lo kore Challenges mester para riba lanes #1 y #2 n’e staging lanes; e Bikes mester ta riba lane #4.
Lanes # 3 ta keda pa e outo nan ku ta keda kore pa nan propio training.

Challenge nan di “Real Street Outlaws” lo bai sigun orario. Lo tin 3 buèlta kuminsando pa 5’or (17:00). Pues pa 5:00PM (17:00) ta start ku e promé buèlta , di dos buèlta ta 6.00PM (18:00), di tres y último buèlta pa 7.00PM (18:00) Den e 3 buèlta nan aki ta kore 5 challenge/reto pa kategoria. Pues pa 5:00PM lo kore 5 kareda (challenges) di motosaikel y 10 kareda (challenges) di outo: 5 HEAVY STREET y 5 EASY STREET. Esaki ta ripití riba tur e otro orarionan ku lo sigui. A hasi esaki pa usa e tiki tempu ku nos tin mas mihó, I no stroba esnan ku no ta partisipá ku RSO.

Lo bai pone un bòrchi disponibel pa e koredó nan den e kategoria di RSO, pa por wak kua ta nan siguiente kareda òf challenge/reto, I ken ta na kua posishon. E lista aki lo wòrdu updated kada bes durante e evento.

Lo bai harma bari mas o ménos for di e bògt di staging lane pa indiká e outo nan motosaikel nan den RSO pa nan ta den e liña korekto pa kore e challenge/reto nan.

Regla pa skùter:
Skuter nan ku ke kore anochi MESTER tin LUS PATRAS!

E evento nan di RSL lo keda organisá mané ta kustumber di 4’or te ku 8’or di anochi. Durante e evento, despues di 5’or lo kuminsá ku e karedanan di e lista di e mihó 10 nan. Koredornan ku no ta partisipá den e lista di e mihó 10 nan, por keda kore te ora solo baha. Meta di e lista di e mihó 10 nan aki ta pa tin e 10 vehíkulonan di mas lihé AKTUALMENTE den kaya! Na final di temporada lo tin un entregá di trofeo na e final evento pa e 1 ku di 2 di kada kategoria. Pues nos ta bai kore e 10 mihó outo nan, e 10 mihó motosaikel nan I e 10 mihó scooter nan.

Prosedura

Na yegada tur koredó ta haña un formulario di inskripshon yena, òf ta wòrdu yena pa nan.

Pa 5’or e “Race Master” lo yama tur esnan ku tin ku kore pa presentá den e staging lane apropiá pa 10 “Match Race” nan.

Drivers / Shofùr nan no por ninga un challenge / reto di un otro driver / shofùr. Si ninga ta pèrdè e puesto outomátikamente

“Race Master” ta prepará e kareda nan di ken kontra ken.

Na momentu ku “Race Master” tin e kareda kla di prepará, tur koredó ta haña 3 yamada separá dor di 2 minüt pa presentá na liña. Esun ku no presentá / “No show up” ta pèrdè e / su puesto di e momentu ei!

“Coin flip” lo dikta ken tin “lane choice”.

Tur match / kareda ta 1 race. Win / loose.

Subi òf Move riba e lista di e mihó 10 nan:

Pa subi e lista di e mihó 10 nan mester challenge / reto e “GATE KEEPER” (#10). Esaki por tin múltiple challenge / reto riba un dia di kareda. Ta kore e karedanan na sekuensia di esun ku registrá promé na e “RACE MASTER”.

Pa move di puesto riba e lista, MESTER challenge / reta e kontrinkante riba bo ( pues #10 ta challenge / reta #9 etc etc) I pone e “RACE MASTER” na altura di esaki. Mester challenge / reta esun riba bo pa por avansá riba e lista. #10 no por challenge / reta #7 b.v. E mester challenge / reta #9 promé. Gana esei I sigui pa #8. I e ora ei pas e por challenge / reta #7 pa su puesto. “RACE MASTER” tin e lista di tur kareda pendiente.

No por ninga challenge / reto bou di niun sirkunstansia. Si bo no por aseptá, bo ta baha di puesto.

SI bo a pèrdè, bo no por challenge / reta e koredó ei mas pa e puesto ei riba e dia ei. Por hasié na e siguiente evento.

Si e puesto (ban bisa #9) wòrdu okupá dor di un otro koredó (esun ku tabata #9, a gana e #8 ) bo por challenge / reta e driver / shofùr ei (èks #8 aworakí #9), pa e puesto ei ( #9 )den e mesun evento.

Bar y kushina ta bon surti i ku preis nan pa un y tur.

Ta estriktamente prohibí pa drenta e fasilidat nan di Curaçao International Raceway ku propio konsumo. Lo bai na kontrolá tur vehíkulo na entrada pa ku drentamentu ku konsumo di tantu pa kome komo pa bebe.

Danki ta bai na Auto City, ARPO Body shop, EMS Dyno, AVF Antiliaanse Verf Fabriek, Star Motors, Curoil, Monster, Napa Auto & Truck Parts, Alcolado Glasial, Kuzeta, IEPA Agencies ku LS2300.

Pa mas informashon y foto di e aktividat di Real Street Legal, Ronde Klip Shootout, Drag Fest 2016 i kareda nan lokal i internashonal por bishita nos website nan ofisial: www.curacaodrag.com, www.dragactioncuracao.com, www.tcobcur.com, www.adrena-zine.com, www.rpmaruba.com, www.racejunkies.com, www.radicalcompetition.com huntu ku nan página di FaceBook y tambe riba FaceBook like page di BoyzToyz i speedoutlawscuracao.

February 24, 2016

Inselair Interinsulair 2016 aki na Kòrsou dianan 11 i 12 di mart

WILLEMSTAD — Kòrsou lo ta anfitrion di un selebrashon deportivo e fin di siman di 11 i 12 di mart próksimo. Ya pa algun aña kaba, Aruba, Bonèiru i Kòrsou ta kompetiendo. Aña pasá, FDDK a logra partisipashon di St. Maarten proksimamente despues di a invitá St. Maarten pa un impreshon di e interinsular na Kòrsou. St. Maarten lo kuminsá partisipá na Kòrsou ku aspirashon pa partisipashon na e otro islanan i mas ku klaro, pa e tres islanan kompetí nan St. Maarten tambe.

Deportenan ku lo forma parti di e kompetensia proksimamente ta:

Basketbòl, skol di fundeshi
Vòlibòl, skol di fundeshi i skol avansá mucha muhé i mucha hòmber

Despues di Kòrsou, lo sigui ku e kompetenshanan interinsular na Aruba i tambe Bonèiru na aprel próksimo.

Pues ya bo sa, dianan 11 i 12 di mart Sala Errol Rooi aya na Stadion Ergilio Hato SDK lo ta yená ku hóbennan di e diferente islanan kompetiendo. Entrada ta kompletamente grátis, asina dunando pueblo hinter, speshalmente nos hóbennan e oportunidat pa bai apoyá i atmirá nos hóbennan.

Danki speshal na Inselair, ku ta kere den deporte i ta mira su importansia pa nos hubentut.

Pa keda na altura di tur loke ta pasando i lo pasa durante di Inselair Interinsulair 2016, chèk e página di Facebook di FDDK.

February 17, 2016

Kòrsou tin su promé 2 Doping Control Officer

WILLEMSTAD — Dia 9 pa 12 di febrüari 2 dirigente deportivo den forma di Ruthsel Martina visepresidente di Federashon Deporte i Olímpiko Korsou (FDOK) huntu ku sr. Edsel Cominencia sekretario di federashon di Vòlibòl di Kòrsou (Fevoko) a sigui un kurso pa bira Doping Control Officer (DCO) na Aruba. Tin ku bisa ku nan a konkluí esaki ku éksito. Un DCO ta un persona ku tin ku realisá e proseso di tumamentu di oriná di un atleta pa despues pòst esaki pa un di e laboratorio nan rekonosé pa e World Anti-Doping Agency (WADA).

E DCO nan den nos aria di Caribe ta kai bou di e ofisina di anti-doping di Caribe RADO ku ta establesé na Barbados.

Mirando e diferente skandalnan ku tin den mundu di deporte pa loke ta trata mal uso di supstansianan i/o métodonan prohibí pa haña mas bentaha riba un otro deportista, ta sumamente importante pa kada pais hasi tèst regular di su deportistanan di haltu rendimentu i tambe esnan den un selekshon ku ta representá su pais den eksterior. Pa kumpli ku reglanan internashonal FDOK a lanta un komishon di anti-doping ku tin komo tarea e formamentu di e komishon ofishal di anti-doping di Korsou. Den e kuadro aki a presentá un oportunidat pa sigui un kurso pa bira DCO na Aruba i nos a probechá i a manda 2 persona pa sigui e kurso aki.

Pronto FDOK lo kuminsá informá tur su miembronan riba e importansia di anti-doping den deporte i lo kuminsá informá nos deportistanan riba diferente detayenan ku nan mester sa, ora nan yega na nivel di un deportista internashonal. E parti di informá i eduká nos deportistanan i tambe nos skolnan ta hopi importante pa un bon desaroyo di nos hubentut. Tin vários produkto i remedi ku ta kontené supstansianan prohibí. Ta bon pa kada deportista tene su mes bon informá i pa semper konsulta serka su coach, federashon òf dòkter promé ku e tuma kualke supstansia. Un di e reglanan ta ku e deportista ta esun responsabel pa loke e tuma promé, durante o despues di un entrenamentu òf kompetensia.

FDOK ta felisitá e dos dirigentenan aki ku e logro i ta yama un danki spesial na komité olímpiko di Aruba ku a permití nos partisipá na e kurso aki. FDOK ta pidi pa keda pendiente pasombra pronto lo bini mas informashon pa nos federashonnan i deportistanan lokal.

February 11, 2016

Nominadonan di FDOK pa Elekshon Deportista i Dirigente di Aña 2015

WILLEMSTAD — Federashon Deporte i Olímpiko Kòrsou ta tene e premiashon anual di su Atletanan, Dirigentenan, Wes, Ekipo i Nobato di aña ku a destaká durante aña 2015 djasabra 27 di febrüari 2016.

Aparte di esaki e atletanan (Maskulino i/o femenino-adulto i/o hubenil) ku a destaká den nan respektivo ramo di deporte lo risibí un medaya di rekonosementu di Federashon Deporte i Olímpiko Kòrsou.

E seremonia di premiashon Io tuma lugá den Ballroom di Hotel Hilton Curaçao situá na John F. Kennedy Boulevard Piscaderbay, kuminsando pa 20:00’or.

NOMINADONAN PA ELEKSHON DI DEPORTISTA/DIRIGENTENAN AÑA 2015 FDOK:

KATEGORIA-/NOMBERNAN:	FEDERASHON:
01. Dep. Hubenil FEMENINO:.
Esmay York	FED. AQUATIKO KORSOU
MENA, Ailén	FED.AGEDRES KORSOU
Joanna Benita	CUR. ATLETIEK BOND
Sarinah Maduro	TENNIS FEDERATION CUR.

02. Dep. Hubenil MASKULINO:
Gianluca Beaujon	TENNIS FEDERATION CUR.
Mekhayl Malik Jules Engel	FED. AQUATIKO KORSOU
Yohance Valks	CUR .ATLETIEK BOND
Jean Paul da Silva de Goes	CUR. SAILING

03. Dep. Senior FEMENINO:
Shurdelys Annette Andrea Meulens	FED. VOLIBOL KORSOU
Samantha Statie	FED. FUTBOL KORSOU
Nargelis Statia	CUR. ATLETIEK BOND

04. Dep. Senior MASKULINO:
Derwin Emanuel Colina	FED. VOLIBOL KORSOU
Ashar Bernardus	FED. FUTBOL K0RSOU
Regis Loo	CUR. BODYBUILDING & FITNESS FED.
Dimitri Juliet	CUR. ATLETIEK BOND

05. Dirigente Atministrativo:
Glenda Bridgewater-Cannegieter	FED. VOLIBOL KORSOU
Eric Fraay	FED. FUTBOL KORSOU
Willem Cordilia	CUR. ATLETIEK BOND

06. Dirigente Tekniko:
Nazario Martijn	FED. AQUATIKO KORSOU
Raymond van Gurp	FED. BEISBOL KORSOU
Ingemar Pieternella	FED. FUTBOL KORSOU

07. Nobato di Aña:
Anais Gabriela Leonarda Conradus	FED. VOLIBOL KORSOU
D’Jeandro Philip Peny	FED. TAEKWONDO KORSOU
David de Wolf	FED. YUDO KORSOU

08. Wes:
Ingrid van der Hilst	FED. TENIS DI MESA KORSOU
Cheryll Petrus Rojer	FED. VOLIBOL KORSOU
Rudy Antonie Josepha	CUR. .ATLETIEK BOND

09. Ekipo di Aña:
Typhoon Swimmers	FED. AQUATIKO KORSOU
Stakamahakchi Guardian Group	FED. VOLIBOL KORSOU
Centro Dominguito	FED. FUTBOL KORSOU