Otro Archives | Page 14 of 38

February 2, 2016

“Blackout” y “Rafik” di Kòrsou ta hasi historia na Gainsville

WILLEMSTAD — Siman pasa e outo Extreme Import di Kòrsou “Blackout” a marka historia na e pista di Orlando Speedworld awèl e fin di siman tras di lomba un historia nobo a keda skirbi na e pista di drag mas importante di Florida ku ta na Gainsville.

Ta momentu ku mester a kore e final di e kareda di dia ku e outo Mazda RX-8 “Blackout” propiedat di Leonard Van Rump, mihó konosí komo “Peter di Master Painting” y manehá pa driver y tuner Abel Burgos di Abel Performance mester bai enfrentá e outo Mazda RX-8 “Rafik” propiedat di Michael Eddine manehá pa Carlos Gonzales di tune pa Wilbert Performance i crew chief y mapping editor pa e yu di Kòrsou Dennis Brouwer aya na Gainsville, Florida.

Den e final aki ku 2 outo di Kòrsou ku nan bandera nan di Kòrsou ta hasi historia aya na Gainsville.

E outo “Blackout” ku Abel Burgos a bai ku e viktoria pa 2 siman konsekutivo i na di 2 lugá a keda e otro outo di Kòrsou “Rafik” ku Carlos Gonzales tras di stür.

Di otro banda tambe a kuminsá e testing di e outo Pro Mod na pista di Bradeton na Florida.

E outo ku bandera di Kòrsou koriendo aya ku ta “King Kong 6” manehá pa e damita Lizzy Musi bou di guia di su tata Pat Musi, tambe a hasi algun pas’é.

Ainda mester hasi algun ahuste pa asina kuminsá e kampaña di PDRL 2016.

FAC y práktikamente Kòrsou kompletu ta kontentu ku e logro aki ku e outo “Blackout” y “Rafik” ku ta kore ku e nòmber y ku e bandera di Curaçao / Kòrsou aya na e pista nan di Merka.

Danki ta bai na Auto City, ARPO Body shop, EMS Dyno, AVF Antiliaanse Verf Fabriek, Star Motors, Curoil, Monster, Napa Auto & Truck Parts, Alcolado Glacial, Kuzeta, IEPA Agencies ku LS2300.

Pa mas informashon y foto di e aktividat di Real Street Legal, Ronde Klip Shootout y kareda nan lokal i internashonal por bishita nos website nan ofisial: www.curacaodrag.com, www.dragactioncuracao.com, www.tcobcur.com, www.adrena-zine.com, www.rpmaruba.com, www.racejunkies.com, www.radicalcompetition.com www.exoticboost.com huntu ku nan página di FaceBook y tambe riba FaceBook like page di BoyzToyz i speedoutlawscuracao speedoutlawscuracao i exoticboostcuracao i exoticboostaruba i Real Street Outlaws.

January 31, 2016

Resumen: Seshon final den korte FDOK kontra IOC

WILLEMSTAD — Dia 20 i 21 di yanüari e último “hearing” tabata riba programa den korte na Lausanne.

Un delegashon di FDOK – sr. R. Bottse (hurista/konsehero), sr. R. Persaud (sekretario FDOK/konsehero) i sr. R. Francisca (presidente) tabata presente na Lausanne Suisa. Esaki tabata programá komo e seshon final, den e kaso kontra Komité Olímpiko Internashonal (KOI) pa rekonosé e organisashon olímpiko di Kòrsou (FDOK).

Den e seshon di 20 di yanüari 2016 den korte, e hues, a tende separadamente testigunan sr. Francisca i sr. Persaud ku a dura kasi 2 ora. Nan a kontesta preguntanan di wes i tambe di ámbos partido. E preguntanan tabata na franses i tradusí pa un traduktor na ingles. A kontestá na ingles i wes por sierto un señora, tabata risibí tradukshon na franses.

Tur dos testigu a keda interogá intensivo i hopi severo. Tin ku bisa ku den e seshon aki por a ripará ku nos delegashon tabata hopi bon prepará mirando e manera kon tabata kontesta pregunta di IOC i wes .

Atardi e promé testigu di IOC a keda kuestioná. Diskushonnan hopi fuerte a tuma lugá entre partidonan. Despues di atendé e promé testigu di IOC, hues a pidi pa ámbos partido bai sinta na mesa i purba haña otro i yega na un akuerdo dentro di un siman.

Riba konseho di nos abogadonan a bai di akuerdo pa hasi esaki i a posponé e hearing. E siguiente dia 21 di yanüari, delegashon di FDOK huntu ku nos abogadonan, a traha i a formalisá un proposishon ku a manda pa IOC.

E proposishon básikamente ta similar ku e akuerdo anterior di 14 di òktober 2014 ku FDOK a firma ku IOC, pero ku IOC no a logra duna kontenido real na puntonan akordá.

Riba e mesun dia a manda e proposishon pa IOC i nan a primintí un kontesta dentro di 7 dia.

Den kaso ku IOC no kontestá o no firma, lo informá wes pa kontinuá ku e kaso.

Den kaso ku firma i IOC no kumpli ku e kontenido di akuerdo, lo informá wes pa kontinuá ku e kaso.

Entretantu, djárason 27 di yanüari direktiva di FDOK a tene un reunion informativo primeramente pa federashonnan miembro. Djaweps a tene un rueda di prensa pa informá komunidat i awor a saka un komunikado.

FDOK ta yama danki na komunidat en general, mundu di deporte en partikular ku ta bibando ku e kaso. Un danki spesial na Gobièrnu di Korsou ku ta kumpliendo kabalmente ku ehekushon di moshon unánime di parlamento pa sostené FDOK den e lucha hustifiká pa Korsou por partisipá den kompetensia internashonal i tambe Weganan ku su propio bandera i himno, meskos ku Aruba i Ulanda.

January 27, 2016

“Blackout” nr. 4 den Tòp 10 di mundu a pone nos bandera na laira

WILLEMSTAD — Durante e fin di siman tras di lomba a kore e promé evenementu di drag racing di aña na Orlando Speedworld na Orlando, Florida.

Tur preparashon a tuma lugá riba e outo “Blackout” propiedat di Leonard Van Rump, konosí aki komo Peter di Master Painting. Ku su spònser Fuel Tech a sòru pa tur kos ta na lugá. E mekániko i alabes driver Abel Burgos di e shòp Abel Performance a hasi tur e trabou nan, pa asina duna un mihó presentashon e aña aki.

Aña pasa e outo “Blackout” a kore aki na Kòrsou desèmber den e evenementu di Curaçao Extreme Finals 2015 i a gana den e kategoria di Extreme Imports.

Primeramente “Blackout” a kore gana tur su kareda te na momentu di kore e final di e anochi kontra di e Toyota Starlet ku motor 13B rotary “La Lleana” manehá pa un tòp shofùr nan di Puerto Rico Juanchi.

“Blackout” ku Abel Burgos a gana e promé kareda di 2016 komo kampion ku un tempu di 6.96@172 MPH y runner up “La Lleana” ku un tempu di 7.11@189 MPH.

Durante e di 2 buèlta di kualifikashon “Blackout” a marka su rekòrt personal nobo na 6.808@201 MPH.

Den e di 2 buèlta di eliminashon ganando e Mazda RX-7 promé generashon “Chapita” ku a kore un tempu di 7.83@135 MPH y mester a mira e scoreboard di “Blackout” ku Abel Burgos a sende pa un rekòrt personal y na mes momentu pa mehorá su posishon riba e tabla na number 4 den e 10 mihó nan di mundu ku motor rotativo 13B ku un tempu di 6.788@200.62 MPH.

FAC y práktikamente Kòrsou kompletu ta kontentu ku e logro aki ku e outo “Blackout” ku ta kore ku e nòmber y ku e bandera di Curaçao / Kòrsou aya na e pista nan di Merka.

Danki ta bai na Auto City, ARPO Body shop, EMS Dyno, AVF Antiliaanse Verf Fabriek, Star Motors, Curoil, Monster, Napa Auto & Truck Parts, Alcolado Glacial, Kuzeta, IEPA Agencies ku LS2300.

January 27, 2016

Delegashon di Bich Volibol di korsou ta klasifika pa terser buelta di Continental Cup

WILLEMSTAD — E selekshon di bich volibol konsistiendo di Henrich Daal,Giandro Tokaay, Derwin Colina i Norandy Bonafasia ku a partisipa na e “Continental Cup Beach Volleyball” di Norceca (Confederacion Norte Centro Americano i Caribe) na Castaway Beach, Antigua, a sa di logra klasifika na di 4 luga den e torneo lokual outomatikamente a pone ku nan ta sigui pa e di 3er buelta.

Ademas di nos selekshon a logra klasifika Trinidad and Tobago, Jamaica I US Virgin Islands. E 4 selekshonnan aki proksimamente mester bai kompeti ku e 4 selekshonann di Sentro Amerika pa defini e ekiponan ku lo bai e ultimo buelta di Continental Cup Norceca.

Manera konosi e selekshonnan ta kompeti pa un puesto pa Rio 2016. Aunke ku Korsou no por partisipa na e weganan Olimpiko na Rio e klasifikashon ta sirbi pa e ranking den Norceca.

January 21, 2016

Premio ofisial di Kampeonato WSV Curaçao Windsurfing Series 2015

WILLEMSTAD — Den fin di siman ultimo, dia 17 di januari 2016 a tuma luga e entrega di premio ofisial di kampeonato WSV Curacao Windsurfing Series 2015 na “Surf Village” di St. Jorisbaai. E kampeonato importante aki, oraganisa pa Asosashon di Windsurf Korsou (WSV Curacao), ku koperashon di Windsurfing Curacao i Old School Windsurfers St. Joris, a konsisti di un serie di kompetensha tumando luga 1 of 2 biaha pa luna durante anja 2015 den bahía di St. Joris i riba Spaanse Water den disiplinanan di Slalom i Freestyle.

Durante anja 2015 nos windsurfers profeshonal i amateur a partisipa ku hopi entusiasmo den por lo menos 7 heats durante kada kompetensha di Slalom i a akumula un maksimo di 70 heats total den e anja. Pa lo kual ku ta trata di e disiplina di Freestyle e kompetidornan mester a demostra su miho truko i akrobasia. Kategorianan pa homber i muhe tabata 11-14 anja, 15-24 anja i 25+ anja.

Prome ku entrega di premio, a tene un Slalom clinic na enkargo di e talentoso windsurfernan lokal Jean Patrick van de Wolde (20 anja) i Jean Paul Da Silva De Goes (16 anja), sigi pa 3 “funraces” na unda tur kategoria por a kompeti huntu. E atardi a kulmina ku un bunita seremonia di entrega di premio di e temporada 2015 na e tres miho windsurfers di kada kategoria. Pa mas informashon, por bishita nos web site:?http://wsvcuracao.com/.

OVERALL RESULTS

Slalom Category Boys 11-14 years old:

Stefan De Bell
Boris Van Noort
Luka Stomp

Slalom Category Men 15-24 years old:

Jean Patrick Van Der Wolde
Jean Paul Da Silva De Goes
Delano Moreno

Slalom Category Men 25+ years old:

Derek Sjak-Shie
Eddy De Groot
Marius Van Noort

Slalom Category Girls 11-14 years old:

Anne Coenen

Slalom Category Women 15-24 years old:

Marjenka De Bell

Slalom Category Women 25+ years old:

Carola De Groot

Freestyle Category Boys up to 14 years old:

Stefan De Bell
Faan Coenen
Luka Stomp

Freestyle Category Men 15+ years old:

Kareem Naipal
Ryan Richie
Wave Antonia

Freestyle Category Women (all ages):

Anne Coenen
Hilde Schnitzler
Ingrid Bakker

January 21, 2016

Delegashon di Bich Volibol den Continental Cup Beach Volleyball

WILLEMSTAD — Awe mainta un delegashon di bich volibol a sali ku buelo di Inselair pa via Jamaica sigui pa Antigua & Barbuda kaminda nan lo bai kompeti den e di dos buelta den e “Continental Cup Beach Volleyball” di Norceca (Confederacion Norte CentroAmericano i Caribe).

E di dos buelta aki ta pa e region di Cazova i ECVA,kaminda e selekshonnan nashonal di St.Kitts & Nevis, Dutch St.Maarten, St. Vincent & the Grenadines, Dominica, Trinidad and Tobago,Jamaica, Surnam, Barbados, US Virgin Islands I Korsou lo bai buska un kupo pa sigui pa e di tres buelta kaminda lo ta bai ta presente e ekiponan di Centro America.

E ekipo nashonal maskulino di bich volibol ku ta konsisti di Giandro Tokaay, Henrich Daal, Derwin Colina i Norandy Bonafasia aña pasa den e prome buelta di e Continental Cup ku a tuma luga na Trinidad and Tobago a logra klasifika pa e di dos buelta.

E partidonan lo tuma luga na Castaways beach , Antigua.E ekiponan ku Sali den e prome 3 puestonan ta sigui pa e di tres buelta pa asina saka e ekiponan di bich volibol di Norceca ku lo partisipa na Rio den e olimpiada . Aunke ku korsou no por partisipa na Rio tog nos selekshon lo hunga e partidonan aki di klasifikashon. E ta bai konta pa nan ranking den Norceca.

E partidonan ta programa pa kuminsa djabierne mainta 9’or.

Federashon di volibol korsou ta desea e delegashon di bich tur klase di eksito.

January 16, 2016

Lucha rekonosementu Olímpiko Korsou den rekta final

WILLEMSTAD — Federashon Deporte i Olímpiko Korsou (FDOK) a drenta un periodo sumamente krusial i interesante pa Korsou komo pais i mundu deportivo en partikular.

Dia 16 próksimo un delegashon di FDOK konsistiendo di sr. R. Bottse (konsehero), sr R. Persaud (sekretario FDOK/konsehero) i sr. R. Francisca (Presidente FDOK ántes Curacaose Sport en Olympische Federatie) ta sali pa Lausanne Suisa pa e seshon final den e kaso kontra Komité Olímpiko Internashonal (KOI) pa rekonosimentu di Pais Korsou komo miembro.

E último tratamentu aki lo tuma lugá dia 20 i 21 di yanüari 2016 den korte na Laussane – Suisa.

For di 10-10 -10 dia ku Pais Korsou a bira un pais outónomo e deseo a lanta pa Pais Korsou por kompetí den weganan olímpiko ku su propio representashon deportivo, ku su propio himno i bandera.

Lástimamente esaki no a sosodé i einan un lucha intenso di FDOK den koperashon ku Gobièrnu di Korsou a kuminsá di manera ku Korsou por logra e meta ei.

P’esei dia 20 i 21 di yanüari benidero e representantenan di FDOK huntu ku e abogadonan internashonal lo tin e tarea históriko pa konvensé korte na Lausanne ku Korsou ta un pais di bèrdat, un pais digno ku meresé rekonosementu olímpiko. Ademas , ku nos struktura konstitushonal tin tur aspekto pa konsiderá nos un estado òf pais independiente, ku Korsou ta ser akseptá total den nos region komo pais.

Lo enfatisá i prueba ku Korsou tin un struktura deportivo struktura i serio, ku ta un di e eksigensianan di Charter olímpiko i regular ta produsí deportistanan di nivel regional, kontinental i asta mundial den diferente ramo di deporte.

Ku otro palabra KOI no tin motibu bálido pa tene Pais Korsou afó, pero pa aseptá pais Korsou komo digno parti di mundu ku derechi pa representá su mes na tur plataforma internashonal inkluso ku su nòmber KORSOU i su bandera ta waya durante weganan regional, kontinental i olímpiko. T’esei tabata i ta e meta di e lucha di FDOK.

FDOK ta yama danki na gobièrnu i pueblo di Korsou den su totalidat ku a sostené e lucha aki i ku kada persona na su manera, lo sabi di manda vibrashon positivo riba e asuntu aki ku ta den su rekta final di manera ku por yega na un veredikto na fabor di nos dushi pais Korsou.

January 15, 2016

FDDK ta uni forsa ku FEVOKO I Parokia Don Bosco pa optimalisá sala Don Bosco pa kompetensia internashonal

WILLEMSTAD — E salon deportivo di Don Bosco awor ta orguyoso doño di un flur nobo. E flur ta komparabel ku esun na sala Niels Liberia na Sufisant. E ta mas ideal pa práktika deportenan manera karate, taekwondo, badminton, basketbòl i vòlibòl. E flur su diseño ta apsorbé e shòk nan mas mihó i lo ta mas plasentero pa e rudia nan di e atletanan ku ta kore i bula riba dje.

E trabou nan ta terminando. Pero e flur di e vèlt si ta instalá kaba i ta kla pa uso i pronto FDDK lo anunsiá ki dia por hasi uzo mas optimal di e fasilidat.

E trabounan di instalashon a wòrdu hasi en kooperashon ku De Jong Sporthuis kende tin amplio konosementu den instalashon di e tipo di superfisie nan aki. ?Federashon di vòlibòl Kòrsou (FeVoKo) tambe a hunga un ròl importante ku e flur aki. For di dos aña pasa FeVoKo a risibí e flur for di federashon internashonal pa desaroyo su deporte. E meta ta pa den futuro selekshon di vòlibòl konsentrá nan training i preparashon pa kompetensianan den e sala aki.

Naturalmente e sala aki ta keda habri pa tur klientenan ku tabata hasi uso di dje den pasado.

Un di e otro partnernan importante den e totalidat aki ta parokia di Don Bosco kende a brasa e proyekto aki 100% i tambe a sa di ta para tras di dje.

E sala aki lo benefisiá tantu skolnan di RK & DOS ku durante orario nan di dia ta duna edukashon físiko na e fasilidat aki.

FDDK ta kontentu di por amplia i mehorá fasilidatnan bou di dak “indoor’’ na ku ta kuadra ku e rekerimentu na nivel internashonal ku ta mas ideal i dinámiko pa skolnan i un i tur en general por práktika deporte.

January 12, 2016

Deporte eskolar organisá pa FDDK i partner ACU ku kresementu pa aña eskolar 2015-2016

WILLEMSTAD — E komienso di Deporte Eskolar pa aña eskolar 2015-2016 ta unu espektakular. ACU a bira partner finansiero ku tur siman un premio pa “atleta di siman”, un facebook espesial pa deporte eskolar ku mas ku 500 like den 2 luna i transmishon live di e final di vòlibòl femenino pa stimulá deporte pa mucha muhé. Pa buta e chèri riba e bolo e kampion den tantu vòlibòl komo futsal a risibí NAF 1.000 na material deportivo.

Oumento den vòlibòl i futsal ku 7 tim

Kompará ku aña eskolar 2014-2015 FDDK a logra un oumento di 7 tim kual ta 2 pa futsal i 5 pa vòlibòl kategorisá pa 3 tim di mucha muhé i 4 mucha hòmber pa skol avansá.

Oumento den futbòl i sòftbòl ku 9 tim i kontinuashon di futbòl pa skol avansá ku 23 tim

11 di yanüari e kampionato di futbòl pa skol avansá i básiko ta kuminsá ku un oumento pa skol básiko di 7 tim, 6 di mucha hòmber i 1 di mucha muhé. Futbòl pa skol avansá pa aña 2014-2015 no a kontinuá pero a kontinuá pa aña 2015-2016 ku 18 tim di mucha hòmber i 5 di mucha muhé. Tambe ta kuminsá sòftbòl femenino ku un oumento di 2 tim kompará ku aña eskolar 2013-2014. Aña 2014-2015 vòlibòl femenino no a kontinuá.

Boost pa Basketbol ku 28 tim

Despues di un ousensia di por lo ménos 3 aña basketbòl ta e deporte ku ta haña un BOOST den deporte eskolar. Basketbòl tambe ta kuminsá 11 di yanüari próksimo ku por lo ménos 336 partisipante di tantu skol avansá komo skol básiko dividí den 23 tim di mucha hòmber i 5 tim di mucha muhé.

St. Maarten tambe den kompetensia Interinsular entre Aruba, Kòrsou i Boneiru

Aprel 2015 FDDK a logra partisipashon di St. Maarten durante e interinsular na Kòrsou próksimo despues di a invitá St. Maarten pa un impreshon di e interinsular na Kòrsou. St. Maarten lo kuminsá partisipá na Kòrsou ku aspirashon pa partisipashon na e otro isla nan i tambe pa e tres isla nan kompetí nan St. Maarten tambe. Esaki ta nifiká “mas tipo di deporte” den e kampionato interinsular.

Keda pendiente pa e planifikashon di e otro deporte nan pendiente (pingpong, dam, ahedres, natashon, atletismo, rugby i e interinsular.

January 11, 2016

Swim Club Orca Curaçao a kumpli un (1) aña

WILLEMSTAD — Swim Club Orca Curaçao su promé treinen tabata un aña pasa dia 10 di yanüari. E dia ei 9 mucha i 5 entrenadó a presentá pa trein. Djadumingu dia 10 di yanüari 2016 miembronan, entrenadónan i direktiva a selebrá i kanta bolo pa e hecho ku Orca a kumpli un (1) aña. Durante di e aña Orca a desaroyá i a krese den miembresia i entrenadó, tambe Orca a desplegá diferente aktividat:

Tabatin “team building” na Caracasbaai
A duna demostrashon na mayornan di e muchanan
A organisá un “Car Wash” pa rekoudá fondo
Tabatin un klínika pa e grupo di waterpolo,
A bai Boneiru pa kompetensia di waterpolo,
A partisipá na e kompetensia di Curacaquatholon edishon # 3 di TEC na Lions Dive
Huntu ku Fundashon Pa Nan a organisá “This Is It Swimming Marathon”
Tabatin treinen speshal/”Boot camp Workout”?(Militaire?training)?

Direktiva di Swim Club Orca Curaçao por wak bèk riba un aña hopi fruktífero pa e klup di landamentu i su miembronan. Esaki ta bira e reto pa mantené tur lokual a i ta bayendo bon den e klup pa e por sigui bai bon den aña 2016 tambe. Direktiva, entrenadónan i miembronan di Swim Club Orca Curaçao ta deseá e pueblo di Kòrsou un felis aña i tur kos bon den e aña nobo.

Pa loke ta trata aña 2016, Orca ta preparando pa por bai partisipá na e aktividatnan di Federashon Akuátiko Kòrsou.

Swim Club Orca Curaçao ta un klup di landamentu ku ta brinda e siguiente disiplinanan:

Landamentu kompetitivo; (“Speed zwemmen”)
Landamentu rekreativo;(trein pa tene kurpa den kondishon i distraishon)
Waterpolo; (“polo aquatico”)
Landamentu sinkronisá;(“waterballet”)
“Open waters”; (kompetí riba distansia largu den laman)
“Diving”; (kompetí den bula kabes i bula nèchi for di sprenplank
“Master”;(treinen pa kondishon pa adulto)

Pa tur hóben ku ta interesá, Swim Club Orca Curaçao ta trein:
djasabra di 15.30 or pa 17.00 or i djadumingu di 10.00 or pa 11.30 or na Pisina Bennie Leito.
Kontribushon ta Naf. 35,00 pa luna pa trein dos (2) biaha pa siman.

Tin treinen pa adulto tambe riba djasabra di 17.00 or pa 18.00 or i djamars di 19.00 or pa 20.00 or. Kontribushon ta Naf. 50,00 pa luna pa trein dos (2) biaha pa siman.